9. உப்³பா³ஹிகவக்³கோ³

455. ‘‘கதிஹி நு கோ², ப⁴ந்தே, அங்கே³ஹி ஸமன்னாக³தோ பி⁴க்கு² உப்³பா³ஹிகாய ந ஸம்மன்னிதப்³போ³’’தி? ‘‘பஞ்சஹுபாலி, அங்கே³ஹி ஸமன்னாக³தோ பி⁴க்கு² உப்³பா³ஹிகாய ந ஸம்மன்னிதப்³போ³. கதமேஹி பஞ்சஹி? ந அத்த²குஸலோ ஹோதி, ந த⁴ம்மகுஸலோ ஹோதி, ந நிருத்திகுஸலோ ஹோதி, ந ப்³யஞ்ஜனகுஸலோ ஹோதி, ந புப்³பா³பரகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ந ஸம்மன்னிதப்³போ³. பஞ்சஹுபாலி, அங்கே³ஹி ஸமன்னாக³தோ பி⁴க்கு² உப்³பா³ஹிகாய ஸம்மன்னிதப்³போ³. கதமேஹி பஞ்சஹி? அத்த²குஸலோ ஹோதி, த⁴ம்மகுஸலோ ஹோதி, நிருத்திகுஸலோ ஹோதி, ப்³யஞ்ஜனகுஸலோ ஹோதி, புப்³பா³பரகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ஸம்மன்னிதப்³போ³.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ந ஸம்மன்னிதப்³போ³. கதமேஹி பஞ்சஹி? கோத⁴னோ ஹோதி கோதா⁴பி⁴பூ⁴தோ, மக்கீ² ஹோதி மக்கா²பி⁴பூ⁴தோ, பளாஸீ ஹோதி பளாஸாபி⁴பூ⁴தோ, இஸ்ஸுகீ ஹோதி இஸ்ஸாபி⁴பூ⁴தோ, ஸந்தி³ட்டி²பராமாஸீ ஹோதி ஆதா⁴னக்³கா³ஹீ து³ப்படினிஸ்ஸக்³கீ³ – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ந ஸம்மன்னிதப்³போ³. பஞ்சஹுபாலி, அங்கே³ஹி ஸமன்னாக³தோ பி⁴க்கு² உப்³பா³ஹிகாய ஸம்மன்னிதப்³போ³. கதமேஹி பஞ்சஹி? ந கோத⁴னோ ஹோதி ந கோதா⁴பி⁴பூ⁴தோ, ந மக்கீ² ஹோதி ந மக்கா²பி⁴பூ⁴தோ, ந பளாஸீ ஹோதி ந பளாஸாபி⁴பூ⁴தோ, ந இஸ்ஸுகீ ஹோதி ந இஸ்ஸாபி⁴பூ⁴தோ, அஸந்தி³ட்டி²பராமாஸீ ஹோதி அனாதா⁴னக்³கா³ஹீ ஸுப்படினிஸ்ஸக்³கீ³ – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ஸம்மன்னிதப்³போ³.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ந ஸம்மன்னிதப்³போ³. கதமேஹி பஞ்சஹி? குப்பதி, ப்³யாபஜ்ஜதி, பதிட்டி²யதி, கோபம் ஜனேதி, அக²மோ ஹோதி அபத³க்கி²ணக்³கா³ஹீ அனுஸாஸனிம் – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ந ஸம்மன்னிதப்³போ³. பஞ்சஹுபாலி, அங்கே³ஹி ஸமன்னாக³தோ பி⁴க்கு² உப்³பா³ஹிகாய ஸம்மன்னிதப்³போ³. கதமேஹி பஞ்சஹி? ந குப்பதி, ந ப்³யாபஜ்ஜதி, ந பதிட்டி²யதி, ந கோபம் ஜனேதி, க²மோ ஹோதி பத³க்கி²ணக்³கா³ஹீ அனுஸாஸனிம் – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ஸம்மன்னிதப்³போ³.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ந ஸம்மன்னிதப்³போ³. கதமேஹி பஞ்சஹி? பஸாரேதா ஹோதி நோ ஸாரேதா, அனோகாஸகம்மம் காரேத்வா பவத்தா ஹோதி, ந யதா²த⁴ம்மே யதா²வினயே யதா²பத்தியா சோதே³தா ஹோதி, ந யதா²த⁴ம்மே யதா²வினயே யதா²பத்தியா காரேதா ஹோதி, ந யதா²தி³ட்டி²யா ப்³யாகதா ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ந ஸம்மன்னிதப்³போ³. பஞ்சஹுபாலி, அங்கே³ஹி ஸமன்னாக³தோ பி⁴க்கு² உப்³பா³ஹிகாய ஸம்மன்னிதப்³போ³. கதமேஹி பஞ்சஹி? ஸாரேதா ஹோதி நோ பஸாரேதா, ஓகாஸகம்மம் காரேத்வா பவத்தா ஹோதி, யதா²த⁴ம்மம் யதா²வினயே யதா²பத்தியா சோதே³தா ஹோதி, யதா²த⁴ம்மே யதா²வினயே யதா²பத்தியா காரேதா ஹோதி, யதா²தி³ட்டி²யா ப்³யாகதா ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ஸம்மன்னிதப்³போ³.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ந ஸம்மன்னிதப்³போ³. கதமேஹி பஞ்சஹி? ச²ந்தா³க³திம் க³ச்ச²தி, தோ³ஸாக³திம் க³ச்ச²தி, மோஹாக³திம் க³ச்ச²தி, ப⁴யாக³திம் க³ச்ச²தி, அலஜ்ஜீ ச ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ந ஸம்மன்னிதப்³போ³. பஞ்சஹுபாலி, அங்கே³ஹி ஸமன்னாக³தோ பி⁴க்கு² உப்³பா³ஹிகாய ஸம்மன்னிதப்³போ³. கதமேஹி பஞ்சஹி? ந ச²ந்தா³க³திம் க³ச்ச²தி, ந தோ³ஸாக³திம் க³ச்ச²தி, ந மோஹாக³திம் க³ச்ச²தி, ந ப⁴யாக³திம் க³ச்ச²தி, லஜ்ஜீ ச ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ஸம்மன்னிதப்³போ³.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ந ஸம்மன்னிதப்³போ³. கதமேஹி பஞ்சஹி? ச²ந்தா³க³திம் க³ச்ச²தி, தோ³ஸாக³திம் க³ச்ச²தி, மோஹாக³திம் க³ச்ச²தி, ப⁴யாக³திம் க³ச்ச²தி, அகுஸலோ ச ஹோதி வினயே – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ந ஸம்மன்னிதப்³போ³. பஞ்சஹுபாலி, அங்கே³ஹி ஸமன்னாக³தோ பி⁴க்கு² உப்³பா³ஹிகாய ஸம்மன்னிதப்³போ³. கதமேஹி பஞ்சஹி? ந ச²ந்தா³க³திம் க³ச்ச²தி, ந தோ³ஸாக³திம் க³ச்ச²தி, ந மோஹாக³திம் க³ச்ச²தி, ந ப⁴யாக³திம் க³ச்ச²தி, குஸலோ ச ஹோதி வினயே – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² உப்³பா³ஹிகாய ஸம்மன்னிதப்³போ³’’தி.

456. ‘‘கதிஹி நு கோ², ப⁴ந்தே, அங்கே³ஹி ஸமன்னாக³தோ பி⁴க்கு² பா³லோத்வேவ ஸங்க²ம் க³ச்ச²தீ’’தி? ‘‘பஞ்சஹுபாலி, அங்கே³ஹி ஸமன்னாக³தோ பி⁴க்கு² பா³லோத்வேவ ஸங்க²ம் க³ச்ச²தி. கதமேஹி பஞ்சஹி? ஸுத்தம் ந ஜானாதி, ஸுத்தானுலோமம் ந ஜானாதி, வினயம் ந ஜானாதி, வினயானுலோமம் ந ஜானாதி, ந ச டா²னடா²னகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² பா³லோத்வேவ ஸங்க²ம் க³ச்ச²தி. பஞ்சஹுபாலி, அங்கே³ஹி ஸமன்னாக³தோ பி⁴க்கு² பண்டி³தோத்வேவ ஸங்க²ம் க³ச்ச²தி. கதமேஹி பஞ்சஹி? ஸுத்தம் ஜானாதி, ஸுத்தானுலோமம் ஜானாதி, வினயம் ஜானாதி, வினயானுலோமம் ஜானாதி, டா²னாடா²னகுஸலோ ச ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² பண்டி³தோத்வேவ ஸங்க²ம் க³ச்ச²தி.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தோ பி⁴க்கு² பா³லோத்வேவ ஸங்க²ம் க³ச்ச²தி. கதமேஹி பஞ்சஹி? த⁴ம்மம் ந ஜானாதி, த⁴ம்மானுலோமம் ஜானாதி, வினயம் ந ஜானாதி, வினயானுலோமம் ந ஜானாதி, ந ச புப்³பா³பரகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² பா³லோத்வேவ ஸங்க²ம் க³ச்ச²தி. பஞ்சஹுபாலி, அங்கே³ஹி ஸமன்னாக³தோ பி⁴க்கு² பண்டி³தோத்வேவ ஸங்க²ம் க³ச்ச²தி. கதமேஹி பஞ்சஹி? த⁴ம்மம் ஜானாதி, த⁴ம்மானுலோமம் ஜானாதி, வினயம் ஜானாதி, வினயானுலோமம் ஜானாதி, புப்³பா³பரகுஸலோ ச ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² பண்டி³தோத்வேவ ஸங்க²ம் க³ச்ச²தி.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தோ பி⁴க்கு² பா³லோத்வேவ ஸங்க²ம் க³ச்ச²தி. கதமேஹி பஞ்சஹி? வத்து²ம் ந ஜானாதி, நிதா³னம் ந ஜானாதி, பஞ்ஞத்திம் ந ஜானாதி, பத³பச்சாப⁴ட்ட²ம் ந ஜானாதி, அனுஸந்தி⁴வசனபத²ம் ந ஜானாதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² பா³லோத்வேவ ஸங்க²ம் க³ச்ச²தி. பஞ்சஹுபாலி, அங்கே³ஹி ஸமன்னாக³தோ பி⁴க்கு² பண்டி³தோத்வேவ ஸங்க²ம் க³ச்ச²தி. கதமேஹி பஞ்சஹி? வத்து²ம் ஜானாதி, நிதா³னம் ஜானாதி, பஞ்ஞத்திம் ஜானாதி, பத³பச்சாப⁴ட்ட²ம் ஜானாதி, அனுஸந்தி⁴வசனபத²ம் ஜானாதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² பண்டி³தோத்வேவ ஸங்க²ம் க³ச்ச²தி.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தோ பி⁴க்கு² பா³லோத்வேவ ஸங்க²ம் க³ச்ச²தி. கதமேஹி பஞ்சஹி? ஆபத்திம் ந ஜானாதி, ஆபத்திஸமுட்டா²னம் ந ஜானாதி, ஆபத்தியா பயோக³ம் ந ஜானாதி, ஆபத்தியா வூபஸமம் ந ஜானாதி, ஆபத்தியா ந வினிச்ச²யகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² பா³லோத்வேவ ஸங்க²ம் க³ச்ச²தி. பஞ்சஹுபாலி, அங்கே³ஹி ஸமன்னாக³தோ பி⁴க்கு² பண்டி³தோத்வேவ ஸங்க²ம் க³ச்ச²தி. கதமேஹி பஞ்சஹி? ஆபத்திம் ஜானாதி, ஆபத்திஸமுட்டா²னம் ஜானாதி, ஆபத்தியா பயோக³ம் ஜானாதி, ஆபத்தியா வூபஸமம் ஜானாதி, ஆபத்தியா வினிச்ச²யகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² பண்டி³தோத்வேவ ஸங்க²ம் க³ச்ச²தி.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தோ பி⁴க்கு² பா³லோத்வேவ ஸங்க²ம் க³ச்ச²தி. கதமேஹி பஞ்சஹி? அதி⁴கரணம் ந ஜானாதி, அதி⁴கரணஸமுட்டா²னம் ந ஜானாதி, அதி⁴கரணஸ்ஸ பயோக³ம் ந ஜானாதி, அதி⁴கரணஸ்ஸ வூபஸமம் ந ஜானாதி, அதி⁴கரணஸ்ஸ ந வினிச்ச²யகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² பா³லோத்வேவ ஸங்க²ம் க³ச்ச²தி. பஞ்சஹுபாலி, அங்கே³ஹி ஸமன்னாக³தோ பி⁴க்கு² பண்டி³தோத்வேவ ஸங்க²ம் க³ச்ச²தி. கதமேஹி பஞ்சஹி? அதி⁴கரணம் ஜானாதி, அதி⁴கரணஸமுட்டா²னம் ஜானாதி, அதி⁴கரணஸ்ஸ பயோக³ம் ஜானாதி, அதி⁴கரணஸ்ஸ வூபஸமம் ஜானாதி, அதி⁴கரணஸ்ஸ வினிச்ச²யகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² பண்டி³தோத்வேவ ஸங்க²ம் க³ச்ச²தீ’’தி.

உப்³பா³ஹிகவக்³கோ³ நிட்டி²தோ நவமோ.

தஸ்ஸுத்³தா³னம் –

ந அத்த²குஸலோ சேவ, கோத⁴னோ குப்பதீ ச யோ;

பஸாரேதா ச²ந்தா³க³திம், அகுஸலோ ததே²வ ச.

ஸுத்தம் த⁴ம்மஞ்ச வத்து²ஞ்ச, ஆபத்தி அதி⁴கரணம்;

த்³வே த்³வே பகாஸிதா ஸப்³பே³, கண்ஹஸுக்கம் விஜானதா²தி.