10. அதி⁴கரணவூபஸமவக்³கோ³

457. ‘‘கதிஹி நு கோ², ப⁴ந்தே, அங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேது’’ந்தி? ‘‘பஞ்சஹுபாலி, அங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேதும். கதமேஹி பஞ்சஹி? ஆபத்திம் ந ஜானாதி, ஆபத்திஸமுட்டா²னம் ந ஜானாதி, ஆபத்தியா பயோக³ம் ந ஜானாதி, ஆபத்தியா வூபஸமம் ந ஜானாதி, ஆபத்தியா ந வினிச்ச²யகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேதும். பஞ்சஹுபாலி, அங்கே³ஹி ஸமன்னாக³தோ பி⁴க்கு² அலம் அதி⁴கரணம் வூபஸமேதும். கதமேஹி பஞ்சஹி? ஆபத்திம் ஜானாதி, ஆபத்திஸமுட்டா²னம் ஜானாதி, ஆபத்தியா பயோக³ம் ஜானாதி, ஆபத்தியா வூபஸமம் ஜானாதி, ஆபத்தியா வினிச்ச²யகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² அலம் அதி⁴கரணம் வூபஸமேதும்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேதும். கதமேஹி பஞ்சஹி? அதி⁴கரணம் ந ஜானாதி, அதி⁴கரணஸமுட்டா²னம் ந ஜானாதி, அதி⁴கரணஸ்ஸ பயோக³ம் ந ஜானாதி, அதி⁴கரணஸ்ஸ வூபஸமம் ந ஜானாதி, அதி⁴கரணஸ்ஸ ந வினிச்ச²யகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேதும்.

‘‘பஞ்சஹுபாலி, அங்கே³ஹி ஸமன்னாக³தோ பி⁴க்கு² அலம் அதி⁴கரணம் வூபஸமேதும். கதமேஹி பஞ்சஹி? அதி⁴கரணம் ஜானாதி, அதி⁴கரணஸமுட்டா²னம் ஜானாதி, அதி⁴கரணஸ்ஸ பயோக³ம் ஜானாதி, அதி⁴கரணஸ்ஸ வூபஸமம் ஜானாதி, அதி⁴கரணஸ்ஸ வினிச்ச²யகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² அலம் அதி⁴கரணம் வூபஸமேதும்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேதும். கதமேஹி பஞ்சஹி? ச²ந்தா³க³திம் க³ச்ச²தி, தோ³ஸாக³திம் க³ச்ச²தி, மோஹாக³திம் க³ச்ச²தி, ப⁴யாக³திம் க³ச்ச²தி, அலஜ்ஜீ ச ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேதும். பஞ்சஹுபாலி, அங்கே³ஹி ஸமன்னாக³தோ பி⁴க்கு² அலம் அதி⁴கரணம் வூபஸமேதும். கதமேஹி பஞ்சஹி? ந ச²ந்தா³க³திம் க³ச்ச²தி, ந தோ³ஸாக³திம் க³ச்ச²தி, ந மோஹாக³திம் க³ச்ச²தி, ந ப⁴யாக³திம் க³ச்ச²தி, லஜ்ஜீ ச ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² அலம் அதி⁴கரணம் வூபஸமேதும்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேதும். கதமேஹி பஞ்சஹி? ச²ந்தா³க³திம் க³ச்ச²தி, தோ³ஸாக³திம் க³ச்ச²தி, மோஹாக³திம் க³ச்ச²தி, ப⁴யாக³திம் க³ச்ச²தி, அப்பஸ்ஸுதோ ச ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேதும். பஞ்சஹுபாலி, அங்கே³ஹி ஸமன்னாக³தோ பி⁴க்கு² அலம் அதி⁴கரணம் வூபஸமேதும். கதமேஹி பஞ்சஹி? ந ச²ந்தா³க³திம் க³ச்ச²தி, ந தோ³ஸாக³திம் க³ச்ச²தி, ந மோஹாக³திம் க³ச்ச²தி, ந ப⁴யாக³திம் க³ச்ச²தி, ப³ஹுஸ்ஸுதோ ச ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² அலம் அதி⁴கரணம் வூபஸமேதும்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேதும். கதமேஹி பஞ்சஹி? வத்து²ம் ந ஜானாதி, நிதா³னம் ந ஜானாதி, பஞ்ஞத்திம் ந ஜானாதி, பத³பச்சாப⁴ட்ட²ம் ந ஜானாதி, அனுஸந்தி⁴வசனபத²ம் ந ஜானாதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேதும். பஞ்சஹுபாலி, அங்கே³ஹி ஸமன்னாக³தோ பி⁴க்கு² அலம் அதி⁴கரணம் வூபஸமேதும். கதமேஹி பஞ்சஹி? வத்து²ம் ஜானாதி, நிதா³னம் ஜானாதி, பஞ்ஞத்திம் ஜானாதி, பத³பச்சாப⁴ட்ட²ம் ஜானாதி, அனுஸந்தி⁴வசனபத²ம் ஜானாதி – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² அலம் அதி⁴கரணம் வூபஸமேதும்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேதும். கதமேஹி பஞ்சஹி? ச²ந்தா³க³திம் க³ச்ச²தி, தோ³ஸாக³திம் க³ச்ச²தி, மோஹாக³திம் க³ச்ச²தி, ப⁴யாக³திம் க³ச்ச²தி, அகுஸலோ ச ஹோதி வினயே – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேதும். பஞ்சஹுபாலி, அங்கே³ஹி ஸமன்னாக³தோ பி⁴க்கு² அலம் அதி⁴கரணம் வூபஸமேதும். கதமேஹி பஞ்சஹி? ந ச²ந்தா³க³திம் க³ச்ச²தி, ந தோ³ஸாக³திம் க³ச்ச²தி, ந மோஹாக³திம் க³ச்ச²தி, ந ப⁴யாக³திம் க³ச்ச²தி, குஸலோ ச ஹோதி வினயே – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² அலம் அதி⁴கரணம் வூபஸமேதும்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேதும். கதமேஹி பஞ்சஹி? ச²ந்தா³க³திம் க³ச்ச²தி, தோ³ஸாக³திம் க³ச்ச²தி, மோஹாக³திம் க³ச்ச²தி, ப⁴யாக³திம் க³ச்ச²தி, புக்³க³லக³ரு ஹோதி நோ ஸங்க⁴க³ரு – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேதும். பஞ்சஹுபாலி, அங்கே³ஹி ஸமன்னாக³தோ பி⁴க்கு² அலம் அதி⁴கரணம் வூபஸமேதும். கதமேஹி பஞ்சஹி? ந ச²ந்தா³க³திம் க³ச்ச²தி, ந தோ³ஸாக³திம் க³ச்ச²தி, ந மோஹாக³திம் க³ச்ச²தி, ந ப⁴யாக³திம் க³ச்ச²தி, ஸங்க⁴க³ரு ஹோதி நோ புக்³க³லக³ரு – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² அலம் அதி⁴கரணம் வூபஸமேதும்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேதும். கதமேஹி பஞ்சஹி? ச²ந்தா³க³திம் க³ச்ச²தி, தோ³ஸாக³திம் க³ச்ச²தி, மோஹாக³திம் க³ச்ச²தி, ப⁴யாக³திம் க³ச்ச²தி, ஆமிஸக³ரு ஹோதி நோ ஸத்³த⁴ம்மக³ரு – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² நாலம் அதி⁴கரணம் வூபஸமேதும். பஞ்சஹுபாலி, அங்கே³ஹி ஸமன்னாக³தோ பி⁴க்கு² அலம் அதி⁴கரணம் வூபஸமேதும். கதமேஹி பஞ்சஹி? ந ச²ந்தா³க³திம் க³ச்ச²தி, ந தோ³ஸாக³திம் க³ச்ச²தி, ந மோஹாக³திம் க³ச்ச²தி, ந ப⁴யாக³திம் க³ச்ச²தி, ஸத்³த⁴ம்மக³ரு ஹோதி நோ ஆமிஸக³ரு – இமேஹி கோ², உபாலி, பஞ்சஹங்கே³ஹி ஸமன்னாக³தோ பி⁴க்கு² அலம் அதி⁴கரணம் வூபஸமேது’’ந்தி.

458. ‘‘கதிஹி நு கோ², ப⁴ந்தே, ஆகாரேஹி ஸங்கோ⁴ பி⁴ஜ்ஜதீ’’தி? ‘‘பஞ்சஹுபாலி, ஆகாரேஹி ஸங்கோ⁴ பி⁴ஜ்ஜதி. கதமேஹி பஞ்சஹி? கம்மேன, உத்³தே³ஸேன, வோஹரந்தோ, அனுஸ்ஸாவனேன, ஸலாகக்³கா³ஹேன – இமேஹி கோ², உபாலி, பஞ்சஹாகாரேஹி ஸங்கோ⁴ பி⁴ஜ்ஜதீ’’தி.

‘‘ஸங்க⁴ராஜி ஸங்க⁴ராஜீதி, ப⁴ந்தே, வுச்சதி. கித்தாவதா நு கோ², ப⁴ந்தே, ஸங்க⁴ராஜி ஹோதி நோ ச ஸங்க⁴பே⁴தோ³? கித்தாவதா ச பன ஸங்க⁴ராஜி சேவ ஹோதி ஸங்க⁴பே⁴தோ³ சா’’தி? ‘‘பஞ்ஞத்தேதம், உபாலி, மயா ஆக³ந்துகானம் பி⁴க்கூ²னம் ஆக³ந்துகவத்தம். ஏவம் ஸுபஞ்ஞத்தே கோ², உபாலி, மயா ஸிக்கா²பதே³ ஆக³ந்துகா பி⁴க்கூ² ஆக³ந்துகவத்தே ந வத்தந்தி. ஏவம்பி கோ², உபாலி, ஸங்க⁴ராஜி ஹோதி நோ ச ஸங்க⁴பே⁴தோ³. பஞ்ஞத்தேதம், உபாலி, மயா ஆவாஸிகானம் பி⁴க்கூ²னம் ஆவாஸிகவத்தம். ஏவம் ஸுபஞ்ஞத்தே கோ², உபாலி, மயா ஸிக்கா²பதே³ ஆவாஸிகா பி⁴க்கூ² ஆவாஸிகவத்தே ந வத்தந்தி. ஏவம்பி கோ², உபாலி, ஸங்க⁴ராஜி ஹோதி நோ ச ஸங்க⁴பே⁴தோ³. பஞ்ஞத்தேதம் உபாலி மயா பி⁴க்கூ²னம் ப⁴த்தக்³கே³ ப⁴த்தக்³க³வத்தம் – யதா²வுட்³ட⁴ம் யதா²ரத்தம் யதா²பதிரூபம் அக்³கா³ஸனம் அக்³கோ³த³கம் அக்³க³பிண்ட³ம். ஏவம் ஸுபஞ்ஞத்தே கோ², உபாலி, மயா ஸிக்கா²பதே³ நவா பி⁴க்கூ² ப⁴த்தக்³கே³ தே²ரானம் பி⁴க்கூ²னம் ஆஸனம் படிபா³ஹந்தி. ஏவம்பி கோ², உபாலி, ஸங்க⁴ராஜி ஹோதி நோ ச ஸங்க⁴பே⁴தோ³. பஞ்ஞத்தேதம், உபாலி, மயா பி⁴க்கூ²னம் ஸேனாஸனே ஸேனாஸனவத்தம் – யதா²வுட்³ட⁴ம் யதா²ரத்தம் யதா²பதிரூபம். ஏவம் ஸுபஞ்ஞத்தே கோ², உபாலி, மயா ஸிக்கா²பதே³ நவா பி⁴க்கூ² தே²ரானம் பி⁴க்கூ²னம் ஸேனாஸனம் படிபா³ஹந்தி. ஏவம்பி கோ², உபாலி, ஸங்க⁴ராஜி ஹோதி நோ ச ஸங்க⁴பே⁴தோ³. பஞ்ஞத்தேதம், உபாலி, மயா பி⁴க்கூ²னம் அந்தோஸீமாய ஏகம் உபோஸத²ம் ஏகம் பவாரணம் ஏகம் ஸங்க⁴கம்மம் ஏகம் கம்மாகம்மம். ஏவம் ஸுபஞ்ஞத்தே கோ², உபாலி, மயா ஸிக்கா²பதே³ தத்தே²வ அந்தோஸீமாய ஆவேனிபா⁴வம் [ஆவேணிபா⁴வம் (ஸீ. ஸ்யா.)] கரித்வா க³ணம் ப³ந்தி⁴த்வா ஆவேனிம் [ஆவேணி (ஸீ. ஸ்யா.)] உபோஸத²ம் கரோந்தி ஆவேனிம் பவாரணம் கரோந்தி ஆவேனிம் ஸங்க⁴கம்மம் கரோந்தி ஆவேனிம் கம்மாகம்மானி கரோந்தி. ஏவம் கோ², உபாலி, ஸங்க⁴ராஜி சேவ ஹோதி ஸங்க⁴பே⁴தோ³ சா’’தி.

அதி⁴கரணவூபஸமவக்³கோ³ நிட்டி²தோ த³ஸமோ.

தஸ்ஸுத்³தா³னம் –

ஆபத்திம் அதி⁴கரணம், ச²ந்தா³ அப்பஸ்ஸுதேன ச;

வத்து²ஞ்ச அகுஸலோ ச, புக்³க³லோ ஆமிஸேன ச;

பி⁴ஜ்ஜதி ஸங்க⁴ராஜி ச, ஸங்க⁴பே⁴தோ³ ததே²வ சாதி.