8. பி⁴க்கு²னோவாத³வக்³கோ³

450. ‘‘கதிஹி நு கோ², ப⁴ந்தே, அங்கே³ஹி ஸமன்னாக³தஸ்ஸ பி⁴க்கு²னோ பி⁴க்கு²னிஸங்கே⁴னேவ கம்மம் காதப்³ப³’’ந்தி? ‘‘பஞ்சஹுபாலி, அங்கே³ஹி ஸமன்னாக³தஸ்ஸ பி⁴க்கு²னோ பி⁴க்கு²னிஸங்கே⁴னேவ கம்மம் காதப்³ப³ம், அவந்தி³யோ ஸோ பி⁴க்கு² பி⁴க்கு²னிஸங்கே⁴ன. கதமேஹி பஞ்சஹி? விவரித்வா காயம் பி⁴க்கு²னீனம் த³ஸ்ஸேதி, ஊரும் த³ஸ்ஸேதி, அங்க³ஜாதம் த³ஸ்ஸேதி, உபோ⁴ அம்ஸகூடே த³ஸ்ஸேதி, ஓபா⁴ஸதி, கி³ஹீ ஸம்பயோஜேதி – இமேஹி கோ², உபாலி, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ பி⁴க்கு²னிஸங்கே⁴னேவ கம்மம் காதப்³ப³ம். அவந்தி³யோ ஸோ பி⁴க்கு² பி⁴க்கு²னிஸங்கே⁴ன.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ பி⁴க்கு²னிஸங்கே⁴னேவ கம்மம் காதப்³ப³ம், அவந்தி³யோ ஸோ பி⁴க்கு² பி⁴க்கு²னிஸங்கே⁴ன. கதமேஹி பஞ்சஹி? பி⁴க்கு²னீனம் அலாபா⁴ய பரிஸக்கதி, பி⁴க்கு²னீனம் அனத்தா²ய பரிஸக்கதி, பி⁴க்கு²னீனம் அவாஸாய பரிஸக்கதி, பி⁴க்கு²னியோ அக்கோஸதி பரிபா⁴ஸதி, பி⁴க்கூ² பி⁴க்கு²னீஹி பே⁴தே³தி – இமேஹி கோ², உபாலி, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ பி⁴க்கு²னிஸங்கே⁴னேவ கம்மம் காதப்³ப³ம், அவந்தி³யோ ஸோ பி⁴க்கு² பி⁴க்கு²னிஸங்கே⁴ன.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ பி⁴க்கு²னிஸங்கே⁴னேவ கம்மம் காதப்³ப³ம், அவந்தி³யோ ஸோ பி⁴க்கு² பி⁴க்கு²னிஸங்கே⁴ன. கதமேஹி பஞ்சஹி? பி⁴க்கு²னீனம் அலாபா⁴ய பரிஸக்கதி, பி⁴க்கு²னீனம் அனத்தா²ய பரிஸக்கதி, பி⁴க்கு²னீனம் அவாஸாய பரிஸக்கதி, பி⁴க்கு²னியோ அக்கோஸதி பரிபா⁴ஸதி, பி⁴க்கூ² பி⁴க்கு²னீஹி ஸம்பயோஜேதி – இமேஹி கோ², உபாலி, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ பி⁴க்கு²னிஸங்கே⁴னேவ கம்மம் காதப்³ப³ம், அவந்தி³யோ ஸோ பி⁴க்கு² பி⁴க்கு²னிஸங்கே⁴னா’’தி.

451. ‘‘கதிஹி நு கோ², ப⁴ந்தே, அங்கே³ஹி ஸமன்னாக³தாய பி⁴க்கு²னியா கம்மம் காதப்³ப³’’ந்தி? பஞ்சஹுபாலி, அங்கே³ஹி ஸமன்னாக³தாய பி⁴க்கு²னியா கம்மம் காதப்³ப³ம். கதமேஹி பஞ்சஹி? விவரித்வா காயம் பி⁴க்கூ²னம் த³ஸ்ஸேதி, ஊரும் த³ஸ்ஸேதி, அங்க³ஜாதம் த³ஸ்ஸேதி, உபோ⁴ அம்ஸகூடே த³ஸ்ஸேதி, ஓபா⁴ஸதி, கி³ஹீ ஸம்பயோஜேதி – இமேஹி கோ², உபாலி, பஞ்சஹங்கே³ஹி ஸமன்னாக³தாய பி⁴க்கு²னியா கம்மம் காதப்³ப³ம்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தாய பி⁴க்கு²னியா கம்மம் காதப்³ப³ம். கதமேஹி பஞ்சஹி? பி⁴க்கூ²னம் அலாபா⁴ய பரிஸக்கதி, பி⁴க்கூ²னம் அனத்தா²ய பரிஸக்கதி, பி⁴க்கூ²னம் அவாஸாய பரிஸக்கதி, பி⁴க்கூ² அக்கோஸதி பரிபா⁴ஸதி, பி⁴க்கு²னியோ பி⁴க்கூ²ஹி பே⁴தே³தி – இமேஹி கோ², உபாலி, பஞ்சஹங்கே³ஹி ஸமன்னாக³தாய பி⁴க்கு²னியா கம்மம் காதப்³ப³ம்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தாய பி⁴க்கு²னியா கம்மம் காதப்³ப³ம். கதமேஹி பஞ்சஹி? பி⁴க்கூ²னம் அலாபா⁴ய பரிஸக்கதி, பி⁴க்கூ²னம் அனத்தா²ய பரிஸக்கதி, பி⁴க்கூ²னம் அவாஸாய பரிஸக்கதி, பி⁴க்கூ² அக்கோஸதி பரிபா⁴ஸதி, பி⁴க்கு²னியோ பி⁴க்கூ²ஹி ஸம்பயோஜேதி – இமேஹி கோ², உபாலி, பஞ்சஹங்கே³ஹி ஸமன்னாக³தாய பி⁴க்கு²னியா கம்மம் காதப்³ப³’’ந்தி.

452. ‘‘கதிஹி நு கோ², ப⁴ந்தே, அங்கே³ஹி ஸமன்னாக³தேன பி⁴க்கு²னா பி⁴க்கு²னீனம் ஓவாதோ³ ந ட²பேதப்³போ³’’தி? ‘‘பஞ்சஹுபாலி, அங்கே³ஹி ஸமன்னாக³தேன பி⁴க்கு²னா பி⁴க்கு²னீனம் ஓவாதோ³ ந ட²பேதப்³போ³. கதமேஹி பஞ்சஹி? அலஜ்ஜீ ச ஹோதி, பா³லோ ச, அபகதத்தோ ச, சாவனாதி⁴ப்பாயோ வத்தா ஹோதி, நோ வுட்டா²னாதி⁴ப்பாயோ – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா பி⁴க்கு²னீனம் ஓவாதோ³ ந ட²பேதப்³போ³.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தேன பி⁴க்கு²னா பி⁴க்கு²னீனம் ஓவாதோ³ ந ட²பேதப்³போ³. கதமேஹி பஞ்சஹி? அபரிஸுத்³த⁴காயஸமாசாரோ ஹோதி, அபரிஸுத்³த⁴வசீஸமாசாரோ ஹோதி, அபரிஸுத்³தா⁴ஜீவோ ஹோதி, பா³லோ ஹோதி, அப்³யத்தோ, ந படிப³லோ அனுயுஞ்ஜியமானோ அனுயோக³ம் தா³தும் – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா பி⁴க்கு²னீனம் ஓவாதோ³ ந ட²பேதப்³போ³.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தேன பி⁴க்கு²னா பி⁴க்கு²னீனம் ஓவாதோ³ ந ட²பேதப்³போ³. கதமேஹி பஞ்சஹி? காயிகேன அனாசாரேன ஸமன்னாக³தோ ஹோதி, வாசஸிகேன அனாசாரேன ஸமன்னாக³தோ ஹோதி, காயிகவாசஸிகேன அனாசாரேன ஸமன்னாக³தோ ஹோதி, பி⁴க்கு²னீனம் அக்கோஸகபரிபா⁴ஸகோ ஹோதி, பி⁴க்கு²னீஹி ஸத்³தி⁴ம் ஸம்ஸட்டோ² விஹரதி அனனுலோமிகேன ஸம்ஸக்³கே³ன – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா பி⁴க்கு²னீனம் ஓவாதோ³ ந ட²பேதப்³போ³.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தேன பி⁴க்கு²னா பி⁴க்கு²னீனம் ஓவாதோ³ ந ட²பேதப்³போ³. கதமேஹி பஞ்சஹி? அலஜ்ஜீ ச ஹோதி, பா³லோ ச, அபகதத்தோ ச, ப⁴ண்ட³னகாரகோ ச ஹோதி கலஹகாரகோ, ஸிக்கா²ய ச ந பரிபூரிகாரீ – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா பி⁴க்கு²னீனம் ஓவாதோ³ ந ட²பேதப்³போ³’’தி.

453. ‘‘கதிஹி நு கோ², ப⁴ந்தே, அங்கே³ஹி ஸமன்னாக³தேன பி⁴க்கு²னா பி⁴க்கு²னீனம் ஓவாதோ³ ந க³ஹேதப்³போ³’’தி? ‘‘பஞ்சஹுபாலி, அங்கே³ஹி ஸமன்னாக³தேன பி⁴க்கு²னா பி⁴க்கு²னீனம் ஓவாதோ³ ந க³ஹேதப்³போ³. கதமேஹி பஞ்சஹி? காயிகேன அனாசாரேன ஸமன்னாக³தோ ஹோதி, வாசஸிகேன அனாசாரேன ஸமன்னாக³தோ ஹோதி, காயிகவாசஸிகேன அனாசாரேன ஸமன்னாக³தோ ஹோதி, பி⁴க்கு²னீனம் அக்கோஸகபரிபா⁴ஸகோ ஹோதி, பி⁴க்கு²னீஹி ஸத்³தி⁴ம் ஸம்ஸட்டோ² விஹரதி அனனுலோமிகேன ஸம்ஸக்³கே³ன – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா பி⁴க்கு²னீனம் ஓவாதோ³ ந க³ஹேதப்³போ³.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தேன பி⁴க்கு²னா பி⁴க்கு²னீனம் ஓவாதோ³ ந க³ஹேதப்³போ³. கதமேஹி பஞ்சஹி? அலஜ்ஜீ ச ஹோதி, பா³லோ ச, அபகதத்தோ ச, க³மிகோ வா ஹோதி, கி³லானோ வா – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா பி⁴க்கு²னீனம் ஓவாதோ³ ந க³ஹேதப்³போ³’’தி.

454. ‘‘கதிஹி நு கோ², ப⁴ந்தே, அங்கே³ஹி ஸமன்னாக³தேன பி⁴க்கு²னா ஸத்³தி⁴ம் ந ஸாகச்சி²தப்³போ³’’தி? ‘‘பஞ்சஹுபாலி, அங்கே³ஹி ஸமன்னாக³தேன பி⁴க்கு²னா ஸத்³தி⁴ம் ந ஸாகச்சி²தப்³போ³. கதமேஹி பஞ்சஹி? ந அஸேக்கே²ன ஸீலக்க²ந்தே⁴ன ஸமன்னாக³தோ ஹோதி, ந அஸேக்கே²ன ஸமாதி⁴க்க²ந்தே⁴ன ஸமன்னாக³தோ ஹோதி, ந அஸேக்கே²ன பஞ்ஞாக்க²ந்தே⁴ன ஸமன்னாக³தோ ஹோதி, ந அஸேக்கே²ன விமுத்திக்க²ந்தே⁴ன ஸமன்னாக³தோ ஹோதி, ந அஸேக்கே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸத்³தி⁴ம் ந ஸாகச்சி²தப்³போ³. பஞ்சஹுபாலி, அங்கே³ஹி ஸமன்னாக³தேன பி⁴க்கு²னா ஸத்³தி⁴ம் ஸாகச்சி²தப்³போ³. கதமேஹி பஞ்சஹி? அஸேக்கே²ன ஸீலக்க²ந்தே⁴ன ஸமன்னாக³தோ ஹோதி, அஸேக்கே²ன ஸமாதி⁴க்க²ந்தே⁴ன ஸமன்னாக³தோ ஹோதி, அஸேக்கே²ன பஞ்ஞாக்க²ந்தே⁴ன ஸமன்னாக³தோ ஹோதி, அஸேக்கே²ன விமுத்திக்க²ந்தே⁴ன ஸமன்னாக³தோ ஹோதி, அஸேக்கே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸத்³தி⁴ம் ஸாகச்சி²தப்³போ³.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸத்³தி⁴ம் ந ஸாகச்சி²தப்³போ³. கதமேஹி பஞ்சஹி? ந அத்த²படிஸம்பி⁴தா³பத்தோ ஹோதி, ந த⁴ம்மபடிஸம்பி⁴தா³பத்தோ ஹோதி, ந நிருத்திபடிஸம்பி⁴தா³பத்தோ ஹோதி, ந படிபா⁴னபடிஸம்பி⁴தா³பத்தோ ஹோதி, யதா²விமுத்தம் சித்தம் ந பச்சவேக்கி²தா – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸத்³தி⁴ம் ந ஸாகச்சி²தப்³போ³. பஞ்சஹுபாலி, அங்கே³ஹி ஸமன்னாக³தேன பி⁴க்கு²னா ஸத்³தி⁴ம் ஸாகச்சி²தப்³போ³. கதமேஹி பஞ்சஹி? அத்த²படிஸம்பி⁴தா³பத்தோ ஹோதி, த⁴ம்மபடிஸம்பி⁴தா³பத்தோ ஹோதி, நிருத்திபடிஸம்பி⁴தா³பத்தோ ஹோதி, படிபா⁴னபடிஸம்பி⁴தா³பத்தோ ஹோதி, யதா²விமுத்தம் சித்தம் பச்சவேக்கி²தா – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸத்³தி⁴ம் ஸாகச்சி²தப்³போ³’’தி.

பி⁴க்கு²னோவாத³வக்³கோ³ நிட்டி²தோ அட்ட²மோ.

தஸ்ஸுத்³தா³னம் –

பி⁴க்கு²னீஹேவ காதப்³ப³ம், அபரேஹி ததா² து³வே;

பி⁴க்கு²னீனம் தயோ கம்மா, ந ட²பேதப்³பா³ த்³வே து³கா;

ந க³ஹேதப்³பா³ த்³வே வுத்தா, ஸாகச்சா²ஸு ச த்³வே து³காதி.