3. வோஹாரவக்³கோ³

424. ‘‘கதிஹி நு கோ², ப⁴ந்தே, அங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³’’ந்தி?

‘‘பஞ்சஹுபாலி, அங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். கதமேஹி பஞ்சஹி? ஆபத்திம் ந ஜானாதி, ஆபத்திஸமுட்டா²னம் ந ஜானாதி, ஆபத்தியா பயோக³ம் ந ஜானாதி, ஆபத்தியா வூபஸமம் ந ஜானாதி, ஆபத்தியா ந வினிச்ச²யகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். பஞ்சஹுபாலி, அங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம். கதமேஹி பஞ்சஹி? ஆபத்திம் ஜானாதி, ஆபத்திஸமுட்டா²னம் ஜானாதி, ஆபத்தியா பயோக³ம் ஜானாதி, ஆபத்தியா வூபஸமம் ஜானாதி, ஆபத்தியா வினிச்ச²யகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். கதமேஹி பஞ்சஹி? அதி⁴கரணம் ந ஜானாதி, அதி⁴கரணஸமுட்டா²னம் ந ஜானாதி, அதி⁴கரணஸ்ஸ பயோக³ம் ந ஜானாதி, அதி⁴கரணஸ்ஸ வூபஸமம் ந ஜானாதி, அதி⁴கரணஸ்ஸ ந வினிச்ச²யகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். பஞ்சஹுபாலி, அங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம். கதமேஹி பஞ்சஹி? அதி⁴கரணம் ஜானாதி, அதி⁴கரணஸமுட்டா²னம் ஜானாதி, அதி⁴கரணஸ்ஸ பயோக³ம் ஜானாதி, அதி⁴கரணஸ்ஸ வூபஸமம் ஜானாதி, அதி⁴கரணஸ்ஸ வினிச்ச²யகுஸலோ ஹோதி – இமேஹி கோ², உபாலி பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். கதமேஹி பஞ்சஹி? பஸய்ஹபவத்தா ஹோதி, அனோகாஸகம்மம் காரேத்வா பவத்தா ஹோதி, ந யதா²த⁴ம்மே யதா²வினயே யதா²பத்தியா சோதே³தா ஹோதி, ந யதா²த⁴ம்மே யதா²வினயே யதா²பத்தியா காரேதா ஹோதி, ந யதா²தி³ட்டி²யா ப்³யாகதா ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். பஞ்சஹுபாலி, அங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம். கதமேஹி பஞ்சஹி? ந பஸய்ஹபவத்தா ஹோதி, ஓகாஸகம்மம் காரேத்வா பவத்தா ஹோதி, யதா²த⁴ம்மே யதா²வினயே யதா²பத்தியா சோதே³தா ஹோதி, யதா²த⁴ம்மே யதா²வினயே யதா²பத்தியா காரேதா ஹோதி, யதா²தி³ட்டி²யா ப்³யாகதா ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். கதமேஹி பஞ்சஹி? ஆபத்தானாபத்திம் ந ஜானாதி, லஹுகக³ருகம் ஆபத்திம் ந ஜானாதி, ஸாவஸேஸானவஸேஸம் ஆபத்திம் ந ஜானாதி, து³ட்டு²ல்லாது³ட்டு²ல்லம் ஆபத்திம் ந ஜானாதி, ஸப்படிகம்மம் அப்படிகம்மம் ஆபத்திம் ந ஜானாதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். பஞ்சஹுபாலி, அங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம். கதமேஹி பஞ்சஹி? ஆபத்தானாபத்திம் ஜானாதி, லஹுகக³ருகம் ஆபத்திம் ஜானாதி, ஸாவஸேஸானவஸேஸம் ஆபத்திம் ஜானாதி, து³ட்டு²ல்லாது³ட்டு²ல்லம் ஆபத்திம் ஜானாதி, ஸப்படிகம்மம் அப்படிகம்மம் ஆபத்திம் ஜானாதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். கதமேஹி பஞ்சஹி? கம்மம் ந ஜானாதி, கம்மஸ்ஸ கரணம் ந ஜானாதி, கம்மஸ்ஸ வத்து²ம் ந ஜானாதி, கம்மஸ்ஸ வத்தம் ந ஜானாதி, கம்மஸ்ஸ வூபஸமம் ந ஜானாதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். பஞ்சஹுபாலி, அங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம். கதமேஹி பஞ்சஹி? கம்மம் ஜானாதி, கம்மஸ்ஸ கரணம் ஜானாதி, கம்மஸ்ஸ வத்து²ம் ஜானாதி, கம்மஸ்ஸ வத்தம் ஜானாதி, கம்மஸ்ஸ வூபஸமம் ஜானாதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். கதமேஹி பஞ்சஹி? வத்து²ம் ந ஜானாதி, நிதா³னம் ந ஜானாதி, பஞ்ஞத்திம் ந ஜானாதி, பத³பச்சாப⁴ட்ட²ம் ந ஜானாதி, அனுஸந்தி⁴வசனபத²ம் ந ஜானாதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். பஞ்சஹுபாலி, அங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம். கதமேஹி பஞ்சஹி? வத்து²ம் ஜானாதி, நிதா³னம் ஜானாதி, பஞ்ஞத்திம் ஜானாதி, பத³பச்சாப⁴ட்ட²ம் ஜானாதி, அனுஸந்தி⁴வசனபத²ம் ஜானாதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். கதமேஹி பஞ்சஹி? ச²ந்தா³க³திம் க³ச்ச²தி, தோ³ஸாக³திம் க³ச்ச²தி, மோஹாக³திம் க³ச்ச²தி, ப⁴யாக³திம் க³ச்ச²தி, அலஜ்ஜீ ச ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். பஞ்சஹுபாலி, அங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம். கதமேஹி பஞ்சஹி? ந ச²ந்தா³க³திம் க³ச்ச²தி, ந தோ³ஸாக³திம் க³ச்ச²தி, ந மோஹாக³திம் க³ச்ச²தி, ந ப⁴யாக³திம் க³ச்ச²தி, லஜ்ஜீ ச ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். கதமேஹி பஞ்சஹி? ச²ந்தா³க³திம் க³ச்ச²தி, தோ³ஸாக³திம் க³ச்ச²தி, மோஹாக³திம் க³ச்ச²தி, ப⁴யாக³திம் க³ச்ச²தி, அகுஸலோ ச ஹோதி வினயே – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். பஞ்சஹுபாலி, அங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம். கதமேஹி பஞ்சஹி? ந ச²ந்தா³க³திம் க³ச்ச²தி, ந தோ³ஸாக³திம் க³ச்ச²தி, ந மோஹாக³திம் க³ச்ச²தி, ந ப⁴யாக³திம் க³ச்ச²தி, குஸலோ ச ஹோதி வினயே – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். கதமேஹி பஞ்சஹி? ஞத்திம் ந ஜானாதி, ஞத்தியா கரணம் ந ஜானாதி, ஞத்தியா அனுஸ்ஸாவனம் ந ஜானாதி, ஞத்தியா ஸமத²ம் ந ஜானாதி, ஞத்தியா வூபஸமம் ந ஜானாதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். பஞ்சஹுபாலி, அங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம். கதமேஹி பஞ்சஹி? ஞத்திம் ஜானாதி, ஞத்தியா கரணம் ஜானாதி, ஞத்தியா அனுஸ்ஸாவனம் ஜானாதி, ஞத்தியா ஸமத²ம் ஜானாதி, ஞத்தியா வூபஸமம் ஜானாதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். கதமேஹி பஞ்சஹி? ஸுத்தம் ந ஜானாதி, ஸுத்தானுலோமம் ந ஜானாதி, வினயம் ந ஜானாதி, வினயானுலோமம் ந ஜானாதி, ந ச டா²னாடா²னகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். பஞ்சஹுபாலி, அங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம். கதமேஹி பஞ்சஹி? ஸுத்தம் ஜானாதி, ஸுத்தானுலோமம் ஜானாதி, வினயம் ஜானாதி, வினயானுலோமம் ஜானாதி, டா²னாடா²னகுஸலோ ச ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம்.

‘‘அபரேஹிபி, உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். கதமேஹி பஞ்சஹி? த⁴ம்மம் ந ஜானாதி, த⁴ம்மானுலோமம் ந ஜானாதி, வினயம் ந ஜானாதி, வினயானுலோமம் ந ஜானாதி, ந ச புப்³பா³பரகுஸலோ ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம். பஞ்சஹுபாலி, அங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³ம். கதமேஹி பஞ்சஹி? த⁴ம்மம் ஜானாதி, த⁴ம்மானுலோமம் ஜானாதி, வினயம் ஜானாதி, வினயானுலோமம் ஜானாதி, புப்³பா³பரகுஸலோ ச ஹோதி – இமேஹி கோ², உபாலி, பஞ்சஹங்கே³ஹி ஸமன்னாக³தேன பி⁴க்கு²னா ஸங்கே⁴ வோஹரிதப்³ப³’’ந்தி.

வோஹாரவக்³கோ³ நிட்டி²தோ ததியோ.

தஸ்ஸுத்³தா³னம் –

ஆபத்தி அதி⁴கரணம், பஸய்ஹாபத்தி ஜானனா;

கம்மம் வத்து²ம் அலஜ்ஜீ ச, அகுஸலோ ச ஞத்தியா;

ஸுத்தம் ந ஜானாதி த⁴ம்மம், ததியோ வக்³க³ஸங்க³ஹோதி.