1. லஸுணவக்³கோ³

231. லஸுணம் கா²த³ந்தீ த்³வே ஆபத்தியோ ஆபஜ்ஜதி. கா²தி³ஸ்ஸாமீதி படிக்³க³ண்ஹாதி, ஆபத்தி து³க்கடஸ்ஸ; அஜ்ஜோ²ஹாரே அஜ்ஜோ²ஹாரே ஆபத்தி பாசித்தியஸ்ஸ.

ஸம்பா³தே⁴ லோமம் ஸம்ஹராபேந்தீ த்³வே ஆபத்தியோ ஆபஜ்ஜதி. ஸம்ஹராபேதி, பயோகே³ து³க்கடம்; ஸம்ஹராபிதே ஆபத்தி பாசித்தியஸ்ஸ.

தலகா⁴தகம் கரோந்தீ த்³வே ஆபத்தியோ ஆபஜ்ஜதி. கரோதி, பயோகே³ து³க்கடம்; கதே ஆபத்தி பாசித்தியஸ்ஸ.

ஜதுமட்ட²கம் ஆதி³யந்தீ த்³வே ஆபத்தியோ ஆபஜ்ஜதி. ஆதி³யதி, பயோகே³ து³க்கடம், ஆதி³ன்னே ஆபத்தி பாசித்தியஸ்ஸ.

அதிரேகத்³வங்கு³லபப்³ப³பரமம் உத³கஸுத்³தி⁴கம் ஆதி³யந்தீ த்³வே ஆபத்தியோ ஆபஜ்ஜதி. ஆதி³யதி, பயோகே³ து³க்கடம்; ஆதி³ன்னே ஆபத்தி பாசித்தியஸ்ஸ.

பி⁴க்கு²ஸ்ஸ பு⁴ஞ்ஜந்தஸ்ஸ பானீயேன வா விதூ⁴பனேன வா உபதிட்ட²ந்தீ த்³வே ஆபத்தியோ ஆபஜ்ஜதி. ஹத்த²பாஸே திட்ட²தி, ஆபத்தி பாசித்தியஸ்ஸ; ஹத்த²பாஸம் விஜஹித்வா திட்ட²தி, ஆபத்தி து³க்கடஸ்ஸ.

ஆமகத⁴ஞ்ஞம் விஞ்ஞாபேத்வா பு⁴ஞ்ஜந்தீ த்³வே ஆபத்தியோ ஆபஜ்ஜதி. பு⁴ஞ்ஜிஸ்ஸாமீதி படிக்³க³ண்ஹாதி, ஆபத்தி து³க்கடஸ்ஸ; அஜ்ஜோ²ஹாரே அஜ்ஜோ²ஹாரே ஆபத்தி பாசித்தியஸ்ஸ.

உச்சாரம் வா பஸ்ஸாவம் வா ஸங்காரம் வா விகா⁴ஸம் வா திரோகுட்டே வா திரோபாகாரே வா ச²ட்³டே³ந்தீ த்³வே ஆபத்தியோ ஆபஜ்ஜதி. ச²ட்³டே³தி, பயோகே³ து³க்கடம்; ச²ட்³டி³தே ஆபத்தி பாசித்தியஸ்ஸ.

உச்சாரம் வா பஸ்ஸாவம் வா ஸங்காரம் வா விகா⁴ஸம் வா ஹரிதே ச²ட்³டே³ந்தீ த்³வே ஆபத்தியோ ஆபஜ்ஜதி. ச²ட்³டே³தி, பயோகே³ து³க்கடம்; ச²ட்³டி³தே ஆபத்தி பாசித்தியஸ்ஸ.

நச்சம் வா கீ³தம் வா வாதி³தம் வா த³ஸ்ஸனாய க³ச்ச²ந்தீ த்³வே ஆபத்தியோ ஆபஜ்ஜதி. க³ச்ச²தி, ஆபத்தி து³க்கடஸ்ஸ; யத்த² டி²தா பஸ்ஸதி வா ஸுணாதி வா, ஆபத்தி பாசித்தியஸ்ஸ.

லஸுணவக்³கோ³ பட²மோ.