2. ரத்தந்த⁴காரவக்³கோ³

232. ரத்தந்த⁴காரே அப்பதீ³பே புரிஸேன ஸத்³தி⁴ம் ஏகேனேகா ஸந்திட்ட²ந்தீ த்³வே ஆபத்தியோ ஆபஜ்ஜதி. ஹத்த²பாஸே திட்ட²தி, ஆபத்தி பாசித்தியஸ்ஸ; ஹத்த²பாஸம் விஜஹித்வா திட்ட²தி, ஆபத்தி து³க்கடஸ்ஸ.

படிச்ச²ன்னே ஓகாஸே புரிஸேன ஸத்³தி⁴ம் ஏகேனேகா ஸந்திட்ட²ந்தீ த்³வே ஆபத்தியோ ஆபஜ்ஜதி. ஹத்த²பாஸே திட்ட²தி, ஆபத்தி பாசித்தியஸ்ஸ; ஹத்த²பாஸம் விஜஹித்வா திட்ட²தி, ஆபத்தி து³க்கடஸ்ஸ.

அஜ்ஜோ²காஸே புரிஸேன ஸத்³தி⁴ம் ஏகேனேகா ஸந்திட்ட²ந்தீ த்³வே ஆபத்தியோ ஆபஜ்ஜதி. ஹத்த²பாஸே திட்ட²தி, ஆபத்தி பாசித்தியஸ்ஸ; ஹத்த²பாஸம் விஜஹித்வா திட்ட²தி, ஆபத்தி து³க்கடஸ்ஸ.

ரதி²காய வா ப்³யூஹே வா ஸிங்கா⁴டகே வா புரிஸேன ஸத்³தி⁴ம் ஏகேனேகா ஸந்திட்ட²ந்தீ த்³வே ஆபத்தியோ ஆபஜ்ஜதி. ஹத்த²பாஸே திட்ட²தி, ஆபத்தி பாசித்தியஸ்ஸ; ஹத்த²பாஸம் விஜஹித்வா திட்ட²தி, ஆபத்தி து³க்கடஸ்ஸ.

புரேப⁴த்தம் குலானி உபஸங்கமித்வா ஆஸனே நிஸீதி³த்வா ஸாமிகே அனாபுச்சா² பக்கமந்தீ த்³வே ஆபத்தியோ ஆபஜ்ஜதி. பட²மம் பாத³ம் அனோவஸ்ஸகம் அதிக்காமேதி, ஆபத்தி து³க்கடஸ்ஸ; து³தியம் பாத³ம் அதிக்காமேதி, ஆபத்தி பாசித்தியஸ்ஸ.

பச்சா²ப⁴த்தம் குலானி உபஸங்கமித்வா ஸாமிகே அனாபுச்சா² ஆஸனே நிஸீத³ந்தீ த்³வே ஆபத்தியோ ஆபஜ்ஜதி. நிஸீத³தி, பயோகே³ து³க்கடம்; நிஸின்னே ஆபத்தி பாசித்தியஸ்ஸ.

விகாலே குலானி உபஸங்கமித்வா ஸாமிகே அனாபுச்சா² ஸேய்யம் ஸந்த²ரித்வா வா ஸந்த²ராபேத்வா வா அபி⁴னிஸீத³ந்தீ த்³வே ஆபத்தியோ ஆபஜ்ஜதி. அபி⁴னிஸீத³தி, பயோகே³ து³க்கடம்; அபி⁴னிஸின்னே ஆபத்தி பாசித்தியஸ்ஸ.

து³க்³க³ஹிதேன தூ³பதா⁴ரிதேன பரம் உஜ்ஜா²பேந்தீ த்³வே ஆபத்தியோ ஆபஜ்ஜதி. உஜ்ஜா²பேதி, பயோகே³ து³க்கடம்; உஜ்ஜா²பிதே ஆபத்தி பாசித்தியஸ்ஸ.

அத்தானம் வா பரம் வா நிரயேன வா ப்³ரஹ்மசரியேன வா அபி⁴ஸபந்தீ த்³வே ஆபத்தியோ ஆபஜ்ஜதி. அபி⁴ஸபதி, பயோகே³ து³க்கடம்; அபி⁴ஸபிதே ஆபத்தி பாசித்தியஸ்ஸ.

அத்தானம் வதி⁴த்வா வதி⁴த்வா ரோத³ந்தீ த்³வே ஆபத்தியோ ஆபஜ்ஜதி. வத⁴தி ரோத³தி, ஆபத்தி பாசித்தியஸ்ஸ; வத⁴தி ந ரோத³தி, ஆபத்தி து³க்கடஸ்ஸ.

ரத்தந்த⁴காரவக்³கோ³ து³தியோ.