1. பாராஜிககண்ட³ம்

228. அவஸ்ஸுதா பி⁴க்கு²னீ அவஸ்ஸுதஸ்ஸ புரிஸபுக்³க³லஸ்ஸ காயஸம்ஸக்³க³ம் ஸாதி³யந்தீ கதி ஆபத்தியோ ஆபஜ்ஜதி? அவஸ்ஸுதா பி⁴க்கு²னீ அவஸ்ஸுதஸ்ஸ புரிஸபுக்³க³லஸ்ஸ காயஸம்ஸக்³க³ம் ஸாதி³யந்தீ திஸ்ஸோ ஆபத்தியோ ஆபஜ்ஜதி. அத⁴க்க²கம் உப்³ப⁴ஜாணுமண்ட³லம் க³ஹணம் ஸாதி³யதி, ஆபத்தி பாராஜிகஸ்ஸ; உப்³ப⁴க்க²கம் அதோ⁴ஜாணுமண்ட³லம் க³ஹணம் ஸாதி³யதி, ஆபத்தி து²ல்லச்சயஸ்ஸ; காயபடிப³த்³த⁴ம் க³ஹணம் ஸாதி³யதி, ஆபத்தி து³க்கடஸ்ஸ – அவஸ்ஸுதா பி⁴க்கு²னீ அவஸ்ஸுதஸ்ஸ புரிஸபுக்³க³லஸ்ஸ காயஸம்ஸக்³க³ம் ஸாதி³யந்தீ இமா திஸ்ஸோ ஆபத்தியோ ஆபஜ்ஜதி.

வஜ்ஜப்படிச்சா²தி³கா பி⁴க்கு²னீ வஜ்ஜம் படிச்சா²தே³ந்தீ கதி ஆபத்தியோ ஆபஜ்ஜதி? வஜ்ஜப்படிச்சா²தி³கா பி⁴க்கு²னீ வஜ்ஜம் படிச்சா²தே³ந்தீ திஸ்ஸோ ஆபத்தியோ ஆபஜ்ஜதி. ஜானம் பாராஜிகம் த⁴ம்மம் படிச்சா²தே³தி, ஆபத்தி பாராஜிகஸ்ஸ; வேமதிகா படிச்சா²தே³தி, ஆபத்தி து²ல்லச்சயஸ்ஸ; ஆசாரவிபத்திம் படிச்சா²தே³தி, ஆபத்தி து³க்கடஸ்ஸ – வஜ்ஜப்படிச்சா²தி³கா பி⁴க்கு²னீ வஜ்ஜம் படிச்சா²தே³ந்தீ இமா திஸ்ஸோ ஆபத்தியோ ஆபஜ்ஜதி.

உக்கி²த்தானுவத்திகா பி⁴க்கு²னீ யாவததியம் ஸமனுபா⁴ஸனாய ந படினிஸ்ஸஜ்ஜந்தீ கதி ஆபத்தியோ ஆபஜ்ஜதி? உக்கி²த்தானுவத்திகா பி⁴க்கு²னீ யாவததியம் ஸமனுபா⁴ஸனாய ந படினிஸ்ஸஜ்ஜந்தீ திஸ்ஸோ ஆபத்தியோ ஆபஜ்ஜதி. ஞத்தியா து³க்கடம்; த்³வீஹி கம்மவாசாஹி து²ல்லச்சயா; கம்மவாசாபரியோஸானே ஆபத்தி பாராஜிகஸ்ஸ – உக்கி²த்தானுவத்திகா பி⁴க்கு²னீ யாவததியம் ஸமனுபா⁴ஸனாய ந படினிஸ்ஸஜ்ஜந்தீ இமா திஸ்ஸோ ஆபத்தியோ ஆபஜ்ஜதி.

அட்ட²மம் வத்து²ம் பரிபூரேந்தீ கதி ஆபத்தியோ ஆபஜ்ஜதி? அட்ட²மம் வத்து²ம் பரிபூரேந்தீ திஸ்ஸோ ஆபத்தியோ ஆபஜ்ஜதி. புரிஸேன – ‘‘இத்த²ன்னாமம் ஓகாஸம் [இத்த²ன்னாமம் க³ஹனம் (ஸீ.), இத்த²ன்னாமம் க³ப்³ப⁴ம் (ஸ்யா.)] ஆக³ச்சா²’’தி வுத்தா க³ச்ச²தி, ஆபத்தி து³க்கடஸ்ஸ; புரிஸஸ்ஸ ஹத்த²பாஸம் ஓக்கந்தமத்தே ஆபத்தி து²ல்லச்சயஸ்ஸ; அட்ட²மம் வத்து²ம் பரிபூரேதி, ஆபத்தி பாராஜிகஸ்ஸ – அட்ட²மம் வத்து²ம் பரிபூரேந்தீ இமா திஸ்ஸோ ஆபத்தியோ ஆபஜ்ஜதி.

பாராஜிகா நிட்டி²தா.