2. ஸங்கா⁴தி³ஸேஸகண்ட³ம்

229. உஸ்ஸயவாதி³கா பி⁴க்கு²னீ அட்³ட³ம் கரோந்தீ திஸ்ஸோ ஆபத்தியோ ஆபஜ்ஜதி. ஏகஸ்ஸ ஆரோசேதி, ஆபத்தி து³க்கடஸ்ஸ; து³தியஸ்ஸ ஆரோசேதி, ஆபத்தி து²ல்லச்சயஸ்ஸ; அட்³ட³பரியோஸானே ஆபத்தி ஸங்கா⁴தி³ஸேஸஸ்ஸ.

சோரிம் வுட்டா²பேந்தீ திஸ்ஸோ ஆபத்தியோ ஆபஜ்ஜதி. ஞத்தியா து³க்கடம்; த்³வீஹி கம்மவாசாஹி து²ல்லச்சயா; கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ.

ஏகா கா³மந்தரம் க³ச்ச²ந்தீ திஸ்ஸோ ஆபத்தியோ ஆபஜ்ஜதி. க³ச்ச²தி, ஆபத்தி து³க்கடஸ்ஸ; பட²மம் பாத³ம் பரிக்கே²பம் அதிக்காமேதி, ஆபத்தி து²ல்லச்சயஸ்ஸ; து³தியம் பாத³ம் அதிக்காமேதி, ஆபத்தி ஸங்கா⁴தி³ஸேஸஸ்ஸ.

ஸமக்³கே³ன ஸங்கே⁴ன உக்கி²த்தம் பி⁴க்கு²னிம் த⁴ம்மேன வினயேன ஸத்து²ஸாஸனேன அனபலோகேத்வா காரகஸங்க⁴ம் அனஞ்ஞாய க³ணஸ்ஸ ச²ந்த³ம் ஓஸாரேந்தீ திஸ்ஸோ ஆபத்தியோ ஆபஜ்ஜதி. ஞத்தியா து³க்கடம்; த்³வீஹி கம்மவாசாஹி து²ல்லச்சயா; கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ.

அவஸ்ஸுதா பி⁴க்கு²னீ அவஸ்ஸுதஸ்ஸ புரிஸபுக்³க³லஸ்ஸ ஹத்த²தோ கா²த³னீயம் வா போ⁴ஜனீயம் வா ஸஹத்தா² படிக்³க³ஹேத்வா பு⁴ஞ்ஜந்தீ திஸ்ஸோ ஆபத்தியோ ஆபஜ்ஜதி. ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து²ல்லச்சயஸ்ஸ; அஜ்ஜோ²ஹாரே அஜ்ஜோ²ஹாரே ஆபத்தி ஸங்கா⁴தி³ஸேஸஸ்ஸ; உத³கத³ந்தபோனம் படிக்³க³ண்ஹாதி, ஆபத்தி து³க்கடஸ்ஸ.

‘‘கிம் தே, அய்யே, ஏஸோ புரிஸபுக்³க³லோ கரிஸ்ஸதி அவஸ்ஸுதோ வா அனவஸ்ஸுதோ வா, யதோ த்வம் அனவஸ்ஸுதா! இங்க⁴, அய்யே, யம் தே ஏஸோ புரிஸபுக்³க³லோ தே³தி கா²த³னீயம் வா போ⁴ஜனீயம் வா, தம் த்வம் ஸஹத்தா² படிக்³க³ஹேத்வா கா²த³ வா பு⁴ஞ்ஜ வா’’தி உய்யோஜேந்தீ திஸ்ஸோ ஆபத்தியோ ஆபஜ்ஜதி. தஸ்ஸா வசனேன கா²தி³ஸ்ஸாமி பு⁴ஞ்ஜிஸ்ஸாமீதி படிக்³க³ண்ஹாதி, ஆபத்தி து³க்கடஸ்ஸ; அஜ்ஜோ²ஹாரே அஜ்ஜோ²ஹாரே ஆபத்தி து²ல்லச்சயஸ்ஸ; போ⁴ஜனபரியோஸானே ஆபத்தி ஸங்கா⁴தி³ஸேஸஸ்ஸ.

குபிதா பி⁴க்கு²னீ யாவததியம் ஸமனுபா⁴ஸனாய ந படினிஸ்ஸஜ்ஜந்தீ திஸ்ஸோ ஆபத்தியோ ஆபஜ்ஜதி. ஞத்தியா து³க்கடம்; த்³வீஹி கம்மவாசாஹி து²ல்லச்சயா; கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ.

கிஸ்மிஞ்சிதே³வ அதி⁴கரணே பச்சாகதா பி⁴க்கு²னீ யாவததியம் ஸமனுபா⁴ஸனாய ந படினிஸ்ஸஜ்ஜந்தீ திஸ்ஸோ ஆபத்தியோ ஆபஜ்ஜதி. ஞத்தியா து³க்கடம்; த்³வீஹி கம்மவாசாஹி து²ல்லச்சயா; கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ.

ஸம்ஸட்டா² பி⁴க்கு²னியோ யாவததியம் ஸமனுபா⁴ஸனாய ந படினிஸ்ஸஜ்ஜந்தியோ திஸ்ஸோ ஆபத்தியோ ஆபஜ்ஜந்தி. ஞத்தியா து³க்கடம்; த்³வீஹி கம்மவாசாஹி து²ல்லச்சயா; கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ.

‘‘ஸம்ஸட்டா²வ, அய்யே, தும்ஹே விஹரத². மா தும்ஹே நானா விஹரித்தா²’’தி உய்யோஜேந்தீ யாவததியம் ஸமனுபா⁴ஸனாய ந படினிஸ்ஸஜ்ஜந்தீ திஸ்ஸோ ஆபத்தியோ ஆபஜ்ஜதி. ஞத்தியா து³க்கடம்; த்³வீஹி கம்மவாசாஹி து²ல்லச்சயா; கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ.

ஸங்கா⁴தி³ஸேஸா நிட்டி²தா.