9. து³தியது³ட்ட²தோ³ஸஸிக்கா²பத³ம்

391. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன மேத்தியபூ⁴மஜகா பி⁴க்கூ² கி³ஜ்ஜ²கூடா பப்³ப³தா ஓரோஹந்தா அத்³த³ஸம்ஸு ச²க³லகம் [ச²கலகம் (ஸ்யா.)] அஜிகாய விப்படிபஜ்ஜந்தம். தி³ஸ்வான ஏவமாஹம்ஸு – ‘‘ஹந்த³ மயம், ஆவுஸோ, இமம் ச²க³லகம் த³ப்³ப³ம் மல்லபுத்தம் நாம கரோம. இமம் அஜிகம் மேத்தியம் நாம பி⁴க்கு²னிம் கரோம. ஏவம் மயம் வோஹரிஸ்ஸாம. புப்³பே³ மயம், ஆவுஸோ, த³ப்³ப³ம் மல்லபுத்தம் ஸுதேன அவோசும்ஹா. இதா³னி பன அம்ஹேஹி ஸாமம் தி³ட்டோ² மேத்தியாய பி⁴க்கு²னியா விப்படிபஜ்ஜந்தோ’’தி. தே தம் ச²க³லகம் த³ப்³ப³ம் மல்லபுத்தம் நாம அகம்ஸு. தம் அஜிகம் மேத்தியம் நாம பி⁴க்கு²னிம் அகம்ஸு. தே பி⁴க்கூ²னம் ஆரோசேஸும் – ‘‘புப்³பே³ மயம், ஆவுஸோ, த³ப்³ப³ம் மல்லபுத்தம் ஸுதேன அவோசும்ஹா. இதா³னி பன அம்ஹேஹி ஸாமம் தி³ட்டோ² மேத்தியாய பி⁴க்கு²னியா விப்படிபஜ்ஜந்தோ’’தி. பி⁴க்கூ² ஏவமாஹம்ஸு – ‘‘மாவுஸோ, ஏவம் அவசுத்த². நாயஸ்மா த³ப்³போ³ மல்லபுத்தோ ஏவம் கரிஸ்ஸதீ’’தி.

அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா ஆயஸ்மந்தம் த³ப்³ப³ம் மல்லபுத்தம் படிபுச்சி² – ‘‘ஸரஸி த்வம், த³ப்³ப³, ஏவரூபம் கத்தா யத²யிமே பி⁴க்கூ² ஆஹம்ஸூ’’தி? ‘‘யதா² மம், ப⁴ந்தே, ப⁴க³வா ஜானாதீ’’தி. து³தியம்பி கோ² ப⁴க³வா…பே… ததியம்பி கோ² ப⁴க³வா ஆயஸ்மந்தம் த³ப்³ப³ம் மல்லபுத்தம் ஏதத³வோச – ‘‘ஸரஸி த்வம், த³ப்³ப³, ஏவரூபம் கத்தா யத²யிமே பி⁴க்கூ² ஆஹம்ஸூ’’தி? ‘‘யதா² மம், ப⁴ந்தே, ப⁴க³வா ஜானாதீ’’தி. ‘‘ந கோ², த³ப்³ப³, த³ப்³பா³ ஏவம் நிப்³பே³டே²ந்தி. ஸசே தயா கதம் கதந்தி வதே³ஹி, ஸசே தயா அகதம் அகதந்தி வதே³ஹீ’’தி. ‘‘யதோ அஹம், ப⁴ந்தே, ஜாதோ நாபி⁴ஜானாமி ஸுபினந்தேனபி மேது²னத⁴ம்மம் படிஸேவிதா, பகே³வ ஜாக³ரோ’’தி! அத² கோ² ப⁴க³வா பி⁴க்கூ² ஆமந்தேஸி – ‘‘தேன ஹி, பி⁴க்கு²வே, இமே பி⁴க்கூ² அனுயுஞ்ஜதா²’’தி. இத³ம் வத்வா ப⁴க³வா உட்டா²யாஸனா விஹாரம் பாவிஸி.

அத² கோ² தே பி⁴க்கூ² மேத்தியபூ⁴மஜகே பி⁴க்கூ² அனுயுஞ்ஜிம்ஸு. தே பி⁴க்கூ²ஹி அனுயுஞ்ஜீயமானா பி⁴க்கூ²னம் ஏதமத்த²ம் ஆரோசேஸும் – ‘‘கிம் பன தும்ஹே, ஆவுஸோ, ஆயஸ்மந்தம் த³ப்³ப³ம் மல்லபுத்தம் அஞ்ஞபா⁴கி³யஸ்ஸ அதி⁴கரணஸ்ஸ கிஞ்சிதே³ஸம் லேஸமத்தம் உபாதா³ய பாராஜிகேன த⁴ம்மேன அனுத்³த⁴ம்ஸேதா²’’தி? ‘‘ஏவமாவுஸோ’’தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம மேத்தியபூ⁴மஜகா பி⁴க்கூ² ஆயஸ்மந்தம் த³ப்³ப³ம் மல்லபுத்தம் அஞ்ஞபா⁴கி³யஸ்ஸ அதி⁴கரணஸ்ஸ கிஞ்சி தே³ஸம் லேஸமத்தம் உபாதா³ய பாராஜிகேன த⁴ம்மேன அனுத்³த⁴ம்ஸேஸ்ஸந்தீ’’தி! அத² கோ² தே பி⁴க்கூ² மேத்தியபூ⁴மஜகே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர தும்ஹே, பி⁴க்க²வே, த³ப்³ப³ம் மல்லபுத்தம் அஞ்ஞபா⁴கி³யஸ்ஸ அதி⁴கரணஸ்ஸ கிஞ்சி தே³ஸம் லேஸமத்தம் உபாதா³ய பாராஜிகேன த⁴ம்மேன அனுத்³த⁴ம்ஸேதா²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… ‘‘கத²ஞ்ஹி நாம தும்ஹே, மோக⁴புரிஸா, த³ப்³ப³ம் மல்லபுத்தம் அஞ்ஞபா⁴கி³யஸ்ஸ அதி⁴கரணஸ்ஸ கிஞ்சி தே³ஸம் லேஸமத்தம் உபாதா³ய பாராஜிகேன த⁴ம்மேன அனுத்³த⁴ம்ஸேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

392. ‘‘யோ பன பி⁴க்கு² பி⁴க்கு²ம் து³ட்டோ² தோ³ஸோ அப்பதீதோ அஞ்ஞபா⁴கி³யஸ்ஸ அதி⁴கரணஸ்ஸ கிஞ்சிதே³ஸம் லேஸமத்தம் உபாதா³ய பாராஜிகேன த⁴ம்மேன அனுத்³த⁴ம்ஸேய்ய – ‘அப்பேவ நாம நம் இமம்ஹா ப்³ரஹ்மசரியா சாவேய்ய’ந்தி. ததோ அபரேன ஸமயேன ஸமனுக்³கா³ஹீயமானோ வா அஸமனுக்³கா³ஹீயமானோ வா அஞ்ஞபா⁴கி³யஞ்சேவ தம் அதி⁴கரணம் ஹோதி கோசிதே³ஸோ லேஸமத்தோ உபாதி³ன்னோ, பி⁴க்கு² ச தோ³ஸம் பதிட்டா²தி, ஸங்கா⁴தி³ஸேஸோ’’தி.

393. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

பி⁴க்கு²ந்தி அஞ்ஞம் பி⁴க்கு²ம்.

து³ட்டோ² தோ³ஸோதி குபிதோ அனத்தமனோ அனபி⁴ரத்³தோ⁴ ஆஹதசித்தோ கி²லஜாதோ.

அப்பதீதோதி தேன ச கோபேன, தேன ச தோ³ஸேன, தாய ச அனத்தமனதாய, தாய ச அனபி⁴ரத்³தி⁴யா அப்பதீதோ ஹோதி.

அஞ்ஞபா⁴கி³யஸ்ஸ அதி⁴கரணஸ்ஸாதி ஆபத்தஞ்ஞபா⁴கி³யம் வா ஹோதி அதி⁴கரணஞ்ஞபா⁴கி³யம் வா. கத²ம் அதி⁴கரணம் அதி⁴கரணஸ்ஸ அஞ்ஞபா⁴கி³யம்? விவாதா³தி⁴கரணம் அனுவாதா³தி⁴கரணஸ்ஸ ஆபத்தாதி⁴கரணஸ்ஸ கிச்சாதி⁴கரணஸ்ஸ அஞ்ஞபா⁴கி³யம். அனுவாதா³தி⁴கரணம் ஆபத்தாதி⁴கரணஸ்ஸ கிச்சாதி⁴கரணஸ்ஸ விவாதா³தி⁴கரணஸ்ஸ அஞ்ஞபா⁴கி³யம். ஆபத்தாதி⁴கரணம் கிச்சாதி⁴கரணஸ்ஸ விவாதா³தி⁴கரணஸ்ஸ அனுவாதா³தி⁴கரணஸ்ஸ அஞ்ஞபா⁴கி³யம். கிச்சாதி⁴கரணம் விவாதா³தி⁴கரணஸ்ஸ அனுவாதா³தி⁴கரணஸ்ஸ ஆபத்தாதி⁴கரணஸ்ஸ அஞ்ஞபா⁴கி³யம். ஏவம் அதி⁴கரணம் அதி⁴கரணஸ்ஸ அஞ்ஞபா⁴கி³யம்.

கத²ம் அதி⁴கரணம் அதி⁴கரணஸ்ஸ தப்³பா⁴கி³யம்? விவாதா³தி⁴கரணம் விவாதா³தி⁴கரணஸ்ஸ தப்³பா⁴கி³யம். அனுவாதா³தி⁴கரணம் அனுவாதா³தி⁴கரணஸ்ஸ தப்³பா⁴கி³யம். ஆபத்தாதி⁴கரணம் ஆபத்தாதி⁴கரணஸ்ஸ ஸியா தப்³பா⁴கி³யம் ஸியா அஞ்ஞபா⁴கி³யம்.

கத²ம் ஆபத்தாதி⁴கரணம் ஆபத்தாதி⁴கரணஸ்ஸ அஞ்ஞபா⁴கி³யம்? மேது²னத⁴ம்மபாராஜிகாபத்தி அதி³ன்னாதா³னபாராஜிகாபத்தியா மனுஸ்ஸவிக்³க³ஹபாராஜிகாபத்தியா உத்தரிமனுஸ்ஸத⁴ம்மபாராஜிகாபத்தியா அஞ்ஞபா⁴கி³யா. அதி³ன்னாதா³னபாராஜிகாபத்தி மனுஸ்ஸவிக்³க³ஹபாராஜிகாபத்தியா உத்தரிமனுஸ்ஸத⁴ம்மபாராஜிகாபத்தியா மேது²னத⁴ம்மபாராஜிகாபத்தியா அஞ்ஞபா⁴கி³யா. மனுஸ்ஸவிக்³க³ஹபாராஜிகாபத்தி உத்தரிமனுஸ்ஸத⁴ம்மபாராஜிகாபத்தியா மேது²னத⁴ம்மபாராஜிகாபத்தியா அதி³ன்னாதா³னபாராஜிகாபத்தியா அஞ்ஞபா⁴கி³யா. உத்தரிமனுஸ்ஸத⁴ம்மபாராஜிகாபத்தி மேது²னத⁴ம்மபாராஜிகாபத்தியா அதி³ன்னாதா³னபாராஜிகாபத்தியா மனுஸ்ஸவிக்³க³ஹபாராஜிகாபத்தியா அஞ்ஞபா⁴கி³யா. ஏவம் ஆபத்தாதி⁴கரணம் ஆபத்தாதி⁴கரணஸ்ஸ அஞ்ஞபா⁴கி³யம்.

கத²ம் ஆபத்தாதி⁴கரணம் ஆபத்தாதி⁴கரணஸ்ஸ தப்³பா⁴கி³யம்? மேது²னத⁴ம்மபாராஜிகாபத்தி மேது²னத⁴ம்மபாராஜிகாபத்தியா தப்³பா⁴கி³யா. அதி³ன்னாதா³னபாராஜிகாபத்தி அதி³ன்னாதா³னபாராஜிகாபத்தியா தப்³பா⁴கி³யா. மனுஸ்ஸவிக்³க³ஹபாராஜிகாபத்தி மனுஸ்ஸவிக்³க³ஹபாராஜிகாபத்தியா தப்³பா⁴கி³யா. உத்தரிமனுஸ்ஸத⁴ம்மபாராஜிகாபத்தி உத்தரிமனுஸ்ஸத⁴ம்மபாராஜிகாபத்தியா தப்³பா⁴கி³யா. ஏவம் ஆபத்தாதி⁴கரணம் ஆபத்தாதி⁴கரணஸ்ஸ தப்³பா⁴கி³யம்.

கிச்சாதி⁴கரணம் கிச்சாதி⁴கரணஸ்ஸ தப்³பா⁴கி³யம். ஏவம் அதி⁴கரணம் அதி⁴கரணஸ்ஸ தப்³பா⁴கி³யம்.

394. கிஞ்சி தே³ஸம் லேஸமத்தம் உபாதா³யாதி லேஸோ நாம த³ஸ லேஸா – ஜாதிலேஸோ, நாமலேஸோ, கோ³த்தலேஸோ, லிங்க³லேஸோ, ஆபத்திலேஸோ, பத்தலேஸோ, சீவரலேஸோ, உபஜ்ஜா²யலேஸோ, ஆசரியலேஸோ, ஸேனாஸனலேஸோ.

395. ஜாதிலேஸோ நாம க²த்தியோ தி³ட்டோ² ஹோதி பாராஜிகம் த⁴ம்மம் அஜ்ஜா²பஜ்ஜந்தோ. அஞ்ஞம் க²த்தியம் பஸ்ஸித்வா சோதே³தி – ‘‘க²த்தியோ மயா தி³ட்டோ² [ஏத்த² ‘‘பாராஜிகம் த⁴ம்மம் அஜ்ஜா²பஜ்ஜந்தோ’’தி பாடோ² ஊனோ மஞ்ஞே, அட்ட²கதா²யம் ஹி ‘‘க²த்தியோ மயா தி³ட்டோ² பாராஜிகம் த⁴ம்மம் அஜ்ஜா²பஜ்ஜந்தோ’’தி தி³ஸ்ஸதி]. பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ம் உபோஸதோ² வா பவாரணா வா ஸங்க⁴கம்மம் வா’’தி, ஆபத்தி வாசாய, வாசாய ஸங்கா⁴தி³ஸேஸஸ்ஸ.

ப்³ராஹ்மணோ தி³ட்டோ² ஹோதி…பே… வேஸ்ஸோ தி³ட்டோ² ஹோதி…பே… ஸுத்³தோ³ தி³ட்டோ² ஹோதி பாராஜிகம் த⁴ம்மம் அஜ்ஜா²பஜ்ஜந்தோ. அஞ்ஞம் ஸுத்³த³ம் பஸ்ஸித்வா சோதே³தி – ‘‘ஸுத்³தோ³ மயா தி³ட்டோ². பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

396. நாமலேஸோ நாம பு³த்³த⁴ரக்கி²தோ தி³ட்டோ² ஹோதி…பே… த⁴ம்மரக்கி²தோ தி³ட்டோ² ஹோதி…பே… ஸங்க⁴ரக்கி²தோ தி³ட்டோ² ஹோதி பாராஜிகம் த⁴ம்மம் அஜ்ஜா²பஜ்ஜந்தோ. அஞ்ஞம் ஸங்க⁴ரக்கி²தம் பஸ்ஸித்வா சோதே³தி – ‘‘ஸங்க⁴ரக்கி²தோ மயா தி³ட்டோ². பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

397. கோ³த்தலேஸோ நாம கோ³தமோ தி³ட்டோ² ஹோதி…பே… மோக்³க³ல்லானோ தி³ட்டோ² ஹோதி…பே… கச்சாயனோ தி³ட்டோ² ஹோதி…பே… வாஸிட்டோ² தி³ட்டோ² ஹோதி பாராஜிகம் த⁴ம்மம் அஜ்ஜா²பஜ்ஜந்தோ. அஞ்ஞம் வாஸிட்ட²ம் பஸ்ஸித்வா சோதே³தி – ‘‘வாஸிட்டோ² மயா தி³ட்டோ². பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

398. லிங்க³லேஸோ நாம தீ³கோ⁴ தி³ட்டோ² ஹோதி…பே… ரஸ்ஸோ தி³ட்டோ² ஹோதி…பே… கண்ஹோ தி³ட்டோ² ஹோதி…பே… ஓதா³தோ தி³ட்டோ² ஹோதி பாராஜிகம் த⁴ம்மம் அஜ்ஜா²பஜ்ஜந்தோ. அஞ்ஞம் ஓதா³தம் பஸ்ஸித்வா சோதே³தி – ‘‘ஓதா³தோ மயா தி³ட்டோ². பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

399. ஆபத்திலேஸோ நாம லஹுகம் ஆபத்திம் ஆபஜ்ஜந்தோ தி³ட்டோ² ஹோதி. தஞ்சே பாராஜிகேன சோதே³தி – ‘‘அஸ்ஸமணோஸி, அஸக்யபுத்தியோஸி…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

400. பத்தலேஸோ நாம லோஹபத்தத⁴ரோ தி³ட்டோ² ஹோதி…பே… ஸாடகபத்தத⁴ரோ தி³ட்டோ² ஹோதி…பே… ஸும்ப⁴கபத்தத⁴ரோ தி³ட்டோ² ஹோதி பாராஜிகம் த⁴ம்மம் அஜ்ஜா²பஜ்ஜந்தோ. அஞ்ஞம் ஸும்ப⁴கபத்தத⁴ரம் பஸ்ஸித்வா சோதே³தி – ‘‘ஸும்ப⁴கபத்தத⁴ரோ மயா தி³ட்டோ². பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

401. சீவரலேஸோ நாம பம்ஸுகூலிகோ தி³ட்டோ² ஹோதி…பே… க³ஹபதிசீவரத⁴ரோ தி³ட்டோ² ஹோதி பாராஜிகம் த⁴ம்மம் அஜ்ஜா²பஜ்ஜந்தோ. அஞ்ஞம் க³ஹபதிசீவரத⁴ரம் பஸ்ஸித்வா சோதே³தி – ‘‘க³ஹபதிசீவரத⁴ரோ மயா தி³ட்டோ². பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

402. உபஜ்ஜா²யலேஸோ நாம இத்த²ன்னாமஸ்ஸ ஸத்³தி⁴விஹாரிகோ தி³ட்டோ² ஹோதி பாராஜிகம் த⁴ம்மம் அஜ்ஜா²பஜ்ஜந்தோ. அஞ்ஞம் இத்த²ன்னாமஸ்ஸ ஸத்³தி⁴விஹாரிகம் பஸ்ஸித்வா சோதே³தி – ‘‘இத்த²ன்னாமஸ்ஸ ஸத்³தி⁴விஹாரிகோ மயா தி³ட்டோ². பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

403. ஆசரியலேஸோ நாம இத்த²ன்னாமஸ்ஸ அந்தேவாஸிகோ தி³ட்டோ² ஹோதி பாராஜிகம் த⁴ம்மம் அஜ்ஜா²பஜ்ஜந்தோ. அஞ்ஞம் இத்த²ன்னாமஸ்ஸ அந்தேவாஸிகம் பஸ்ஸித்வா சோதே³தி – ‘‘இத்த²ன்னாமஸ்ஸ அந்தேவாஸிகோ மயா தி³ட்டோ². பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

404. ஸேனாஸனலேஸோ நாம இத்த²ன்னாமஸேனாஸனவாஸிகோ தி³ட்டோ² ஹோதி பாராஜிகம் த⁴ம்மம் அஜ்ஜா²பஜ்ஜந்தோ. அஞ்ஞம் இத்த²ன்னாமஸேனாஸனவாஸிகம் பஸ்ஸித்வா சோதே³தி – ‘‘இத்த²ன்னாமஸேனாஸனவாஸிகோ மயா தி³ட்டோ². பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ம் உபோஸதோ² வா பவாரணா வா ஸங்க⁴கம்மம் வா’’தி, ஆபத்தி வாசாய, வாசாய ஸங்கா⁴தி³ஸேஸஸ்ஸ.

405. பாராஜிகேன த⁴ம்மேனாதி சதுன்னம் அஞ்ஞதரேன.

அனுத்³த⁴ம்ஸேய்யாதி சோதே³தி வா சோதா³பேதி வா.

அப்பேவ நாம நம் இமம்ஹா ப்³ரஹ்மசரியாசாவேய்யந்தி பி⁴க்கு²பா⁴வா சாவேய்யம், ஸமணத⁴ம்மா சாவேய்யம், ஸீலக்க²ந்தா⁴ சாவேய்யம், தபோகு³ணா சாவேய்யம்.

ததோ அபரேன ஸமயேனாதி யஸ்மிம் க²ணே அனுத்³த⁴ம்ஸிதோ ஹோதி, தம் க²ணம் தம் லயம் தம் முஹுத்தம் வீதிவத்தே.

ஸமனுக்³கா³ஹீயமானோதி யேன வத்து²னா அனுத்³த⁴ம்ஸிதோ ஹோதி தஸ்மிம் வத்து²ஸ்மிம் ஸமனுக்³கா³ஹீயமானோ.

அஸமனுக்³கா³ஹீயமானோதி ந கேனசி வுச்சமானோ.

அதி⁴கரணம் நாம சத்தாரி அதி⁴கரணானி – விவாதா³தி⁴கரணம், அனுவாதா³தி⁴கரணம், ஆபத்தாதி⁴கரணம், கிச்சாதி⁴கரணம்.

கோசி தே³ஸோ லேஸமத்தோ உபாதி³ன்னோதி தேஸம் த³ஸன்னம் லேஸானம் அஞ்ஞதரோ லேஸோ உபாதி³ன்னோ ஹோதி.

பி⁴க்கு² ச தோ³ஸம் பதிட்டா²தீதி துச்ச²கம் மயா ப⁴ணிதம், முஸா மயா ப⁴ணிதம், அபூ⁴தம் மயா ப⁴ணிதம், அஜானந்தேன மயா ப⁴ணிதம்.

ஸங்கா⁴தி³ஸேஸோதி …பே… தேனபி வுச்சதி ஸங்கா⁴தி³ஸேஸோதி.

406. பி⁴க்கு² ஸங்கா⁴தி³ஸேஸம் அஜ்ஜா²பஜ்ஜந்தோ தி³ட்டோ² ஹோதி, ஸங்கா⁴தி³ஸேஸே ஸங்கா⁴தி³ஸேஸதி³ட்டி² ஹோதி. தஞ்சே பாராஜிகேன சோதே³தி – ‘‘அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ம் உபோஸதோ² வா பவாரணா வா ஸங்க⁴கம்மம் வா’’தி, ஏவம்பி ஆபத்தஞ்ஞபா⁴கி³யம் ஹோதி லேஸோ ச உபாதி³ன்னோ, ஆபத்தி வாசாய, வாசாய ஸங்கா⁴தி³ஸேஸஸ்ஸ.

பி⁴க்கு² ஸங்கா⁴தி³ஸேஸம் அஜ்ஜா²பஜ்ஜந்தோ தி³ட்டோ² ஹோதி, ஸங்கா⁴தி³ஸேஸே து²ல்லச்சயதி³ட்டி² ஹோதி…பே… பாசித்தியதி³ட்டி² ஹோதி… பாடிதே³ஸனீயதி³ட்டி² ஹோதி… து³க்கடதி³ட்டி² ஹோதி… து³ப்³பா⁴ஸிததி³ட்டி² ஹோதி. தஞ்சே பாராஜிகேன சோதே³தி – ‘‘அஸ்ஸமணோஸி’’…பே… ஏவம்பி ஆபத்தஞ்ஞபா⁴கி³யம் ஹோதி லேஸோ ச உபாதி³ன்னோ, ஆபத்தி வாசாய, வாசாய ஸங்கா⁴தி³ஸேஸஸ்ஸ.

பி⁴க்கு² து²ல்லச்சயம் அஜ்ஜா²பஜ்ஜந்தோ தி³ட்டோ² ஹோதி து²ல்லச்சயே து²ல்லச்சயதி³ட்டி² ஹோதி…பே… து²ல்லச்சயே பாசித்தியதி³ட்டி² ஹோதி… பாடிதே³ஸனீயதி³ட்டி² ஹோதி… து³க்கடதி³ட்டி² ஹோதி… து³ப்³பா⁴ஸிததி³ட்டி² ஹோதி… ஸங்கா⁴தி³ஸேஸதி³ட்டி² ஹோதி. தஞ்சே பாராஜிகேன சோதே³தி – ‘‘அஸ்ஸமணோஸி’’ …பே… ஏவம்பி ஆபத்தஞ்ஞபா⁴கி³யம் ஹோதி லேஸோ ச உபாதி³ன்னோ, ஆபத்தி வாசாய, வாசாய ஸங்கா⁴தி³ஸேஸஸ்ஸ.

பி⁴க்கு² பாசித்தியம்…பே… பாடிதே³ஸனீயம்… து³க்கடம்… து³ப்³பா⁴ஸிதம் அஜ்ஜா²பஜ்ஜந்தோ தி³ட்டோ² ஹோதி, து³ப்³பா⁴ஸிதே து³ப்³பா⁴ஸிததி³ட்டி² ஹோதி…பே… து³ப்³பா⁴ஸிதே ஸங்கா⁴தி³ஸேஸதி³ட்டி² ஹோதி… து²ல்லச்சயதி³ட்டி² ஹோதி… பாசித்தியதி³ட்டி² ஹோதி… பாடிதே³ஸனீயதி³ட்டி² ஹோதி… து³க்கடதி³ட்டி² ஹோதி. தஞ்சே பாராஜிகேன சோதே³தி – ‘‘அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ம் உபோஸதோ² வா பவாரணா வா ஸங்க⁴கம்மம் வா’’தி, ஏவம்பி ஆபத்தஞ்ஞபா⁴கி³யம் ஹோதி லேஸோ ச உபாதி³ன்னோ, ஆபத்தி வாசாய, வாசாய ஸங்கா⁴தி³ஸேஸஸ்ஸ.

ஏகேகம் மூலம் காதுன சக்கம் ப³ந்தி⁴தப்³ப³ம்.

407. பி⁴க்கு² ஸங்கா⁴தி³ஸேஸம் அஜ்ஜா²பஜ்ஜந்தோ தி³ட்டோ² ஹோதி ஸங்கா⁴தி³ஸேஸே ஸங்கா⁴தி³ஸேஸதி³ட்டி² ஹோதி. தஞ்சே பாராஜிகேன சோதா³பேதி – ‘‘அஸ்ஸமணோஸி’’…பே… ஏவம்பி ஆபத்தஞ்ஞபா⁴கி³யம் ஹோதி லேஸோ ச உபாதி³ன்னோ, ஆபத்தி வாசாய, வாசாய ஸங்கா⁴தி³ஸேஸஸ்ஸ.

பி⁴க்கு² ஸங்கா⁴தி³ஸேஸம் அஜ்ஜா²பஜ்ஜந்தோ தி³ட்டோ² ஹோதி, ஸங்கா⁴தி³ஸேஸே து²ல்லச்சயதி³ட்டி² ஹோதி…பே… பாசித்தியதி³ட்டி² ஹோதி… பாடிதே³ஸனீயதி³ட்டி² ஹோதி… து³க்கடதி³ட்டி² ஹோதி… து³ப்³பா⁴ஸிததி³ட்டி² ஹோதி. தஞ்சே பாராஜிகேன சோதா³பேதி – ‘‘அஸ்ஸமணோஸி’’…பே… ஏவம்பி ஆபத்தஞ்ஞபா⁴கி³யம் ஹோதி லேஸோ ச உபாதி³ன்னோ, ஆபத்தி வாசாய, வாசாய ஸங்கா⁴தி³ஸேஸஸ்ஸ.

பி⁴க்கு² து²ல்லச்சயம் அஜ்ஜா²பஜ்ஜந்தோ தி³ட்டோ² ஹோதி து²ல்லச்சயே து²ல்லச்சயதி³ட்டி² ஹோதி…பே… து²ல்லச்சயே பாசித்தியதி³ட்டி² ஹோதி… பாடிதே³ஸனீயதி³ட்டி² ஹோதி… து³க்கடதி³ட்டி² ஹோதி… து³ப்³பா⁴ஸிததி³ட்டி² ஹோதி… ஸங்கா⁴தி³ஸேஸதி³ட்டி² ஹோதி. தஞ்சே பாராஜிகேன சோதா³பேதி – ‘‘அஸ்ஸமணோஸி’’…பே… ஏவம்பி ஆபத்தஞ்ஞபா⁴கி³யம் ஹோதி லேஸோ ச உபாதி³ன்னோ, ஆபத்தி வாசாய, வாசாய ஸங்கா⁴தி³ஸேஸஸ்ஸ.

பி⁴க்கு² பாசித்தியம்…பே… பாடிதே³ஸனீயம்… து³க்கடம்… து³ப்³பா⁴ஸிதம் அஜ்ஜா²பஜ்ஜந்தோ தி³ட்டோ² ஹோதி து³ப்³பா⁴ஸிதே து³ப்³பா⁴ஸிததி³ட்டி² ஹோதி…பே… து³ப்³பா⁴ஸிதே ஸங்கா⁴தி³ஸேஸதி³ட்டி² ஹோதி… து²ல்லச்சயதி³ட்டி² ஹோதி… பாசித்தியதி³ட்டி² ஹோதி… பாடிதே³ஸனீயதி³ட்டி² ஹோதி… து³க்கடதி³ட்டி² ஹோதி. தஞ்சே பாராஜிகேன சோதா³பேதி – ‘‘அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ம் உபோஸதோ² வா பவாரணா வா ஸங்க⁴கம்மம் வா’’தி, ஏவம்பி ஆபத்தஞ்ஞபா⁴கி³யம் ஹோதி லேஸோ ச உபாதி³ன்னோ, ஆபத்தி வாசாய, வாசாய ஸங்கா⁴தி³ஸேஸஸ்ஸ.

408. அனாபத்தி ததா²ஸஞ்ஞீ சோதே³தி வா சோதா³பேதி வா, உம்மத்தகஸ்ஸ, ஆதி³கம்மிகஸ்ஸாதி.

து³தியது³ட்ட²தோ³ஸஸிக்கா²பத³ம் நிட்டி²தம் நவமம்.