10. ஸங்க⁴பே⁴த³ஸிக்கா²பத³ம்

409. [இத³ம் வத்து² சூளவ. 343] தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. அத² கோ² தே³வத³த்தோ யேன கோகாலிகோ கடமோத³கதிஸ்ஸகோ [கடமோரகதிஸ்ஸகோ (ஸீ. ஸ்யா.)] க²ண்ட³தே³வியா புத்தோ ஸமுத்³த³த³த்தோ தேனுபஸங்கமி; உபஸங்கமித்வா கோகாலிகம் கடமோத³கதிஸ்ஸகம் க²ண்ட³தே³வியா புத்தம் ஸமுத்³த³த³த்தம் ஏதத³வோச – ‘‘ஏத² மயம், ஆவுஸோ, ஸமணஸ்ஸ கோ³தமஸ்ஸ ஸங்க⁴பே⁴த³ம் கரிஸ்ஸாம சக்கபே⁴த³’’ந்தி. ஏவம் வுத்தே கோகாலிகோ தே³வத³த்தம் ஏதத³வோச – ‘‘ஸமணோ கோ², ஆவுஸோ, கோ³தமோ மஹித்³தி⁴கோ மஹானுபா⁴வோ. கத²ம் மயம் ஸமணஸ்ஸ கோ³தமஸ்ஸ ஸங்க⁴பே⁴த³ம் கரிஸ்ஸாம சக்கபே⁴த³’’ந்தி? ‘‘ஏத² மயம், ஆவுஸோ, ஸமணம் கோ³தமம் உபஸங்கமித்வா பஞ்ச வத்தூ²னி யாசிஸ்ஸாம – ‘ப⁴க³வா, ப⁴ந்தே, அனேகபரியாயேன அப்பிச்ச²ஸ்ஸ ஸந்துட்ட²ஸ்ஸ ஸல்லேக²ஸ்ஸ து⁴தஸ்ஸ பாஸாதி³கஸ்ஸ அபசயஸ்ஸ வீரியாரம்ப⁴ஸ்ஸ [வீரியாரப்³ப⁴ஸ்ஸ (க.)] வண்ணவாதீ³. இமானி, ப⁴ந்தே, பஞ்ச வத்தூ²னி அனேகபரியாயேன அப்பிச்ச²தாய ஸந்துட்டி²யா ஸல்லேகா²ய து⁴ததாய பாஸாதி³கதாய அபசயாய வீரியாரம்பா⁴ய ஸம்வத்தந்தி. ஸாது⁴, ப⁴ந்தே, பி⁴க்கூ² யாவஜீவம் ஆரஞ்ஞிகா அஸ்ஸு; யோ கா³மந்தம் ஓஸரேய்ய, வஜ்ஜம் நம் பு²ஸேய்ய. யாவஜீவம் பிண்ட³பாதிகா அஸ்ஸு; யோ நிமந்தனம் ஸாதி³யேய்ய, வஜ்ஜம் நம் பு²ஸேய்ய. யாவஜீவம் பம்ஸுகூலிகா அஸ்ஸு; யோ க³ஹபதிசீவரம் ஸாதி³யேய்ய, வஜ்ஜம் நம் பு²ஸேய்ய. யாவஜீவம் ருக்க²மூலிகா அஸ்ஸு; யோ ச²ன்னம் உபக³ச்சே²ய்ய, வஜ்ஜம் நம் பு²ஸேய்ய. யாவஜீவம் மச்ச²மம்ஸம் ந கா²தே³ய்யும்; யோ மச்ச²மம்ஸம் கா²தே³ய்ய, வஜ்ஜம் நம் பு²ஸேய்யா’தி. இமானி ஸமணோ கோ³தமோ நானுஜானிஸ்ஸதி. தே மயம் இமேஹி பஞ்சஹி வத்தூ²ஹி ஜனம் ஸஞ்ஞாபேஸ்ஸாமாதி. ஸக்கா கோ², ஆவுஸோ, இமேஹி பஞ்சஹி வத்தூ²ஹி ஸமணஸ்ஸ கோ³தமஸ்ஸ ஸங்க⁴பே⁴தோ³ காதும் சக்கபே⁴தோ³. லூக²பஸன்னா ஹி, ஆவுஸோ, மனுஸ்ஸா’’தி.

அத² கோ² தே³வத³த்தோ ஸபரிஸோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² தே³வத³த்தோ ப⁴க³வந்தம் ஏதத³வோச – ‘‘ப⁴க³வா, ப⁴ந்தே, அனேகபரியாயேன அப்பிச்ச²ஸ்ஸ…பே… வீரியாரம்ப⁴ஸ்ஸ வண்ணவாதீ³. இமானி, ப⁴ந்தே, பஞ்ச வத்தூ²னி அனேகபரியாயேன அப்பிச்ச²தாய…பே… வீரியாரம்பா⁴ய ஸம்வத்தந்தி. ஸாது⁴, ப⁴ந்தே, பி⁴க்கூ² யாவஜீவம் ஆரஞ்ஞிகா அஸ்ஸு; யோ கா³மந்தம் ஓஸரேய்ய வஜ்ஜம் நம் பு²ஸேய்ய…பே… யாவஜீவம் மச்ச²மம்ஸம் ந கா²தே³ய்யும், யோ மச்ச²மம்ஸம் கா²தே³ய்ய வஜ்ஜம் நம் பு²ஸேய்யா’’தி. ‘‘அலம், தே³வத³த்த, யோ இச்ச²தி ஆரஞ்ஞிகோ ஹோது, யோ இச்ச²தி கா³மந்தே விஹரது; யோ இச்ச²தி பிண்ட³பாதிகோ ஹோது, யோ இச்ச²தி நிமந்தனம் ஸாதி³யது; யோ இச்ச²தி பம்ஸுகூலிகோ ஹோது, யோ இச்ச²தி க³ஹபதிசீவரம் ஸாதி³யது. அட்ட²மாஸே கோ² மயா, தே³வத³த்த, ருக்க²மூலஸேனாஸனம் அனுஞ்ஞாதம், திகோடிபரிஸுத்³த⁴ம் மச்ச²மம்ஸம் – அதி³ட்ட²ம் அஸுதம் அபரிஸங்கித’’ந்தி. அத² கோ² தே³வத³த்தோ – ‘‘ந ப⁴க³வா இமானி பஞ்ச வத்தூ²னி அனுஜானாதீ’’தி ஹட்டோ² உத³க்³கோ³ ஸபரிஸோ உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி.

410. அத² கோ² தே³வத³த்தோ ஸபரிஸோ ராஜக³ஹம் பவிஸித்வா பஞ்சஹி வத்தூ²ஹி ஜனம் ஸஞ்ஞாபேஸி – ‘‘மயம், ஆவுஸோ, ஸமணம் கோ³தமம் உபஸங்கமித்வா பஞ்ச வத்தூ²னி யாசிம்ஹா – ‘ப⁴க³வா, ப⁴ந்தே, அனேகபரியாயேன அப்பிச்ச²ஸ்ஸ ஸந்துட்ட²ஸ்ஸ ஸல்லேக²ஸ்ஸ து⁴தஸ்ஸ பாஸாதி³கஸ்ஸ அபசயஸ்ஸ வீரியாரம்ப⁴ஸ்ஸ வண்ணவாதீ³. இமானி, ப⁴ந்தே, பஞ்ச வத்தூ²னி அனேகபரியாயேன அப்பிச்ச²தாய ஸந்துட்டி²யா ஸல்லேகா²ய து⁴ததாய பாஸாதி³கதாய அபசயாய வீரியாரம்பா⁴ய ஸம்வத்தந்தி. ஸாது⁴, ப⁴ந்தே, பி⁴க்கூ² யாவஜீவம் ஆரஞ்ஞிகா அஸ்ஸு; யோ கா³மந்தம் ஓஸரேய்ய, வஜ்ஜம் நம் பு²ஸேய்ய. யாவஜீவம் பிண்ட³பாதிகா அஸ்ஸு; யோ நிமந்தனம் ஸாதி³யேய்ய, வஜ்ஜம் நம் பு²ஸேய்ய. யாவஜீவம் பம்ஸுகூலிகா அஸ்ஸு; யோ க³ஹபதிசீவரம் ஸாதி³யேய்ய, வஜ்ஜம் நம் பு²ஸேய்ய. யாவஜீவம் ருக்க²மூலிகா அஸ்ஸு; யோ ச²ன்னம் உபக³ச்சே²ய்ய, வஜ்ஜம் நம் பு²ஸேய்ய. யாவஜீவம் மச்ச²மம்ஸம் ந கா²தே³ய்யும்; யோ மச்ச²மம்ஸம் கா²தே³ய்ய, வஜ்ஜம் நம் பு²ஸேய்யா’தி. இமானி ஸமணோ கோ³தமோ நானுஜானாதி. தே மயம் இமேஹி பஞ்சஹி வத்தூ²ஹி ஸமாதா³ய வத்தாமா’’தி. தத்த² யே தே மனுஸ்ஸா அஸ்ஸத்³தா⁴ அப்பஸன்னா து³ப்³பு³த்³தி⁴னோ தே ஏவமாஹம்ஸு – ‘‘இமே கோ² ஸமணா ஸக்யபுத்தியா து⁴தா ஸல்லேக²வுத்தினோ, ஸமணோ பன கோ³தமோ பா³ஹுல்லிகோ பா³ஹுல்லாய சேதேதீ’’தி. யே பன தே மனுஸ்ஸா ஸத்³தா⁴ பஸன்னா பண்டி³தா ப்³யத்தா பு³த்³தி⁴மந்தோ தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம தே³வத³த்தோ ப⁴க³வதோ ஸங்க⁴பே⁴தா³ய பரக்கமிஸ்ஸதி சக்கபே⁴தா³யா’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம தே³வத³த்தோ ஸங்க⁴பே⁴தா³ய பரக்கமிஸ்ஸதி சக்கபே⁴தா³யா’’தி! அத² கோ² தே பி⁴க்கூ² தே³வத³த்தம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர த்வம், தே³வத³த்த, ஸங்க⁴பே⁴தா³ய பரக்கமஸி சக்கபே⁴தா³யா’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… ‘‘கத²ஞ்ஹி நாம த்வம், மோக⁴புரிஸ, ஸங்க⁴பே⁴தா³ய பரக்கமிஸ்ஸஸி சக்கபே⁴தா³ய! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

411. ‘‘யோ பன பி⁴க்கு² ஸமக்³க³ஸ்ஸ ஸங்க⁴ஸ்ஸ பே⁴தா³ய பரக்கமேய்ய, பே⁴த³னஸம்வத்தனிகம் வா அதி⁴கரணம் ஸமாதா³ய பக்³க³ய்ஹ திட்டே²ய்ய, ஸோ பி⁴க்கு² பி⁴க்கூ²ஹி ஏவமஸ்ஸ வசனீயோ – ‘மாயஸ்மா ஸமக்³க³ஸ்ஸ ஸங்க⁴ஸ்ஸ பே⁴தா³ய பரக்கமி, பே⁴த³னஸம்வத்தனிகம் வா அதி⁴கரணம் ஸமாதா³ய பக்³க³ய்ஹ அட்டா²ஸி. ஸமேதாயஸ்மா ஸங்கே⁴ன. ஸமக்³கோ³ ஹி ஸங்கோ⁴ ஸம்மோத³மானோ அவிவத³மானோ ஏகுத்³தே³ஸோ பா²ஸு விஹரதீ’தி. ஏவஞ்ச ஸோ பி⁴க்கு² பி⁴க்கூ²ஹி வுச்சமானோ ததே²வ பக்³க³ண்ஹேய்ய , ஸோ பி⁴க்கு² பி⁴க்கூ²ஹி யாவததியம் ஸமனுபா⁴ஸிதப்³போ³ தஸ்ஸ படினிஸ்ஸக்³கா³ய. யாவததியஞ்சே ஸமனுபா⁴ஸியமானோ தம் படினிஸ்ஸஜ்ஜேய்ய, இச்சேதம் குஸலம்; நோ சே படினிஸ்ஸஜ்ஜேய்ய, ஸங்கா⁴தி³ஸேஸோ’’தி.

412. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ஸமக்³கோ³ நாம ஸங்கோ⁴ ஸமானஸம்வாஸகோ ஸமானஸீமாயம் டி²தோ.

பே⁴தா³ய பரக்கமேய்யாதி – ‘‘கத²ம் இமே நானா அஸ்ஸு, வினா அஸ்ஸு, வக்³கா³ அஸ்ஸூ’’தி பக்க²ம் பரியேஸதி, க³ணம் ப³ந்த⁴தி.

பே⁴த³னஸம்வத்தனிகம் வா அதி⁴கரணந்தி அட்டா²ரஸபே⁴த³கரவத்தூ²னி.

ஸமாதா³யாதி ஆதா³ய.

பக்³க³ய்ஹாதி தீ³பேய்ய.

திட்டே²ய்யாதி ந படினிஸ்ஸஜ்ஜேய்ய.

ஸோ பி⁴க்கூ²தி யோ ஸோ ஸங்க⁴பே⁴த³கோ பி⁴க்கு².

பி⁴க்கூ²ஹீதி அஞ்ஞேஹி பி⁴க்கூ²ஹி.

யே பஸ்ஸந்தி, யே ஸுணந்தி, தேஹி வத்தப்³போ³ – ‘‘மாயஸ்மா ஸமக்³க³ஸ்ஸ ஸங்க⁴ஸ்ஸ பே⁴தா³ய பரக்கமி, பே⁴த³னஸம்வத்தனிகம் வா அதி⁴கரணம் ஸமாதா³ய பக்³க³ய்ஹ அட்டா²ஸி. ஸமேதாயஸ்மா ஸங்கே⁴ன. ஸமக்³கோ³ ஹி ஸங்கோ⁴ ஸம்மோத³மானோ அவிவத³மானோ ஏகுத்³தே³ஸோ பா²ஸு விஹரதீ’’தி. து³தியம்பி வத்தப்³போ³. ததியம்பி வத்தப்³போ³. ஸசே படினிஸ்ஸஜ்ஜதி, இச்சேதம் குஸலம்; நோ சே படினிஸ்ஸஜ்ஜதி, ஆபத்தி து³க்கடஸ்ஸ. ஸுத்வா ந வத³ந்தி, ஆபத்தி து³க்கடஸ்ஸ. ஸோ பி⁴க்கு² ஸங்க⁴மஜ்ஜ²ம்பி ஆகட்³டி⁴த்வா வத்தப்³போ³ – ‘‘மாயஸ்மா ஸமக்³க³ஸ்ஸ ஸங்க⁴ஸ்ஸ பே⁴தா³ய பரக்கமி, பே⁴த³னஸம்வத்தனிகம் வா அதி⁴கரணம் ஸமாதா³ய பக்³க³ய்ஹ அட்டா²ஸி. ஸமேதாயஸ்மா ஸங்கே⁴ன. ஸமக்³கோ³ ஹி ஸங்கோ⁴ ஸம்மோத³மானோ அவிவத³மானோ ஏகுத்³தே³ஸோ பா²ஸு விஹரதீ’’தி. து³தியம்பி வத்தப்³போ³. ததியம்பி வத்தப்³போ³. ஸசே படினிஸ்ஸஜ்ஜதி, இச்சேதம் குஸலம்; நோ சே படினிஸ்ஸஜ்ஜதி, ஆபத்தி து³க்கடஸ்ஸ. ஸோ பி⁴க்கு² ஸமனுபா⁴ஸிதப்³போ³ – ‘‘ஏவஞ்ச பன, பி⁴க்க²வே, ஸமனுபா⁴ஸிதப்³போ³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

413. ‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² ஸமக்³க³ஸ்ஸ ஸங்க⁴ஸ்ஸ பே⁴தா³ய பரக்கமதி. ஸோ தம் வத்து²ம் ந படினிஸ்ஸஜ்ஜதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²ம் ஸமனுபா⁴ஸேய்ய தஸ்ஸ வத்து²ஸ்ஸ படினிஸ்ஸக்³கா³ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² ஸமக்³க³ஸ்ஸ ஸங்க⁴ஸ்ஸ பே⁴தா³ய பரக்கமதி. ஸோ தம் வத்து²ம் ந படினிஸ்ஸஜ்ஜதி. ஸங்கோ⁴ இத்த²ன்னாமம் பி⁴க்கு²ம் ஸமனுபா⁴ஸதி தஸ்ஸ வத்து²ஸ்ஸ படினிஸ்ஸக்³கா³ய. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ ஸமனுபா⁴ஸனா தஸ்ஸ வத்து²ஸ்ஸ படினிஸ்ஸக்³கா³ய, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி – ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² ஸமக்³க³ஸ்ஸ ஸங்க⁴ஸ்ஸ பே⁴தா³ய பரக்கமதி. ஸோ தம் வத்து²ம் ந படினிஸ்ஸஜ்ஜதி. ஸங்கோ⁴ இத்த²ன்னாமம் பி⁴க்கு²ம் ஸமனுபா⁴ஸதி தஸ்ஸ வத்து²ஸ்ஸ படினிஸ்ஸக்³கா³ய. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ ஸமனுபா⁴ஸனா தஸ்ஸ வத்து²ஸ்ஸ படினிஸ்ஸக்³கா³ய, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘ஸமனுப⁴ட்டோ² ஸங்கே⁴ன இத்த²ன்னாமோ பி⁴க்கு² தஸ்ஸ வத்து²ஸ்ஸ படினிஸ்ஸக்³கா³ய. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

414. ஞத்தியா து³க்கடம், த்³வீஹி கம்மவாசாஹி து²ல்லச்சயா, கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ. ஸங்கா⁴தி³ஸேஸம் அஜ்ஜா²பஜ்ஜந்தஸ்ஸ ஞத்தியா து³க்கடம், த்³வீஹி கம்மவாசாஹி து²ல்லச்சயா படிப்பஸ்ஸம்ப⁴ந்தி.

ஸங்கா⁴தி³ஸேஸோதி…பே… தேனபி வுச்சதி ஸங்கா⁴தி³ஸேஸோதி.

415. த⁴ம்மகம்மே த⁴ம்மகம்மஸஞ்ஞீ ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ.

த⁴ம்மகம்மே வேமதிகோ ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ.

த⁴ம்மகம்மே அத⁴ம்மகம்மஸஞ்ஞீ ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ.

அத⁴ம்மகம்மே த⁴ம்மகம்மஸஞ்ஞீ, ஆபத்தி து³க்கடஸ்ஸ.

அத⁴ம்மகம்மே வேமதிகோ, ஆபத்தி து³க்கடஸ்ஸ.

அத⁴ம்மகம்மே அத⁴ம்மகம்மஸஞ்ஞீ, ஆபத்தி து³க்கடஸ்ஸ.

416. அனாபத்தி அஸமனுபா⁴ஸந்தஸ்ஸ, படினிஸ்ஸஜ்ஜந்தஸ்ஸ, உம்மத்தகஸ்ஸ, கி²த்தசித்தஸ்ஸ, வேத³னாட்டஸ்ஸ, ஆதி³கம்மிகஸ்ஸாதி.

ஸங்க⁴பே⁴த³ஸிக்கா²பத³ம் நிட்டி²தம் த³ஸமம்.