8. து³ட்ட²தோ³ஸஸிக்கா²பத³ம்

380. [இத³ம் வத்து² சூளவ. 189] தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ஆயஸ்மதா த³ப்³பே³ன மல்லபுத்தேன ஜாதியா ஸத்தவஸ்ஸேன அரஹத்தம் ஸச்சி²கதம் ஹோதி. யம் கிஞ்சி [யஞ்ச கிஞ்சி (ஸீ. க.)] ஸாவகேன பத்தப்³ப³ம் ஸப்³ப³ம் தேன அனுப்பத்தம் ஹோதி. நத்தி² சஸ்ஸ கிஞ்சி உத்தரி கரணீயம், கதஸ்ஸ வா பதிசயோ. அத² கோ² ஆயஸ்மதோ த³ப்³ப³ஸ்ஸ மல்லபுத்தஸ்ஸ ரஹோக³தஸ்ஸ படிஸல்லீனஸ்ஸ ஏவம் சேதஸோ பரிவிதக்கோ உத³பாதி³ – ‘‘மயா கோ² ஜாதியா ஸத்தவஸ்ஸேன அரஹத்தம் ஸச்சி²கதம். யம் கிஞ்சி ஸாவகேன பத்தப்³ப³ம் ஸப்³ப³ம் மயா அனுப்பத்தம். நத்தி² ச மே கிஞ்சி உத்தரி கரணீயம், கதஸ்ஸ வா பதிசயோ. கின்னு கோ² அஹம் ஸங்க⁴ஸ்ஸ வேய்யாவச்சம் கரேய்ய’’ந்தி?

அத² கோ² ஆயஸ்மதோ த³ப்³ப³ஸ்ஸ மல்லபுத்தஸ்ஸ ஏதத³ஹோஸி – ‘‘யம்னூனாஹம் ஸங்க⁴ஸ்ஸ ஸேனாஸனஞ்ச பஞ்ஞபேய்யம் ப⁴த்தானி ச உத்³தி³ஸேய்ய’’ந்தி. அத² கோ² ஆயஸ்மா த³ப்³போ³ மல்லபுத்தோ ஸாயன்ஹஸமயம் படிஸல்லானா வுட்டி²தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா த³ப்³போ³ மல்லபுத்தோ ப⁴க³வந்தம் ஏதத³வோச – ‘‘இத⁴ மய்ஹம், ப⁴ந்தே, ரஹோக³தஸ்ஸ படிஸல்லீனஸ்ஸ ஏவம் சேதஸோ பரிவிதக்கோ உத³பாதி³ மயா கோ² ஜாதியா ஸத்தவஸ்ஸேன அரஹத்தம் ஸச்சி²கதம், யம் கிஞ்சி ஸாவகேன பத்தப்³ப³ம், ஸப்³ப³ம் மயா அனுபத்தம், நத்தி² ச மே கிஞ்சி உத்தரி கரணீயம், கதஸ்ஸ வா பதிசயோ, கிம் நு கோ² அஹம் ஸங்க⁴ஸ்ஸ வேய்யாவச்சம் கரேய்ய’’ந்தி. தஸ்ஸ மய்ஹம் ப⁴ந்தே, ஏதத³ஹோஸி யம்னூனாஹம் ‘‘ஸங்க⁴ஸ்ஸ ஸேனாஸனஞ்ச பஞ்ஞபேய்யம் ப⁴த்தானி ச உத்³தி³ஸேய்யந்தி. இச்சா²மஹம், ப⁴ந்தே, ஸங்க⁴ஸ்ஸ ஸேனாஸனஞ்ச பஞ்ஞபேதும் ப⁴த்தானி ச உத்³தி³ஸிது’’ந்தி. ‘‘ஸாது⁴ ஸாது⁴, த³ப்³ப³. தேன ஹி த்வம், த³ப்³ப³, ஸங்க⁴ஸ்ஸ ஸேனாஸனஞ்ச பஞ்ஞபேஹி ப⁴த்தானி ச உத்³தி³ஸா’’தி. ‘‘ஏவம், ப⁴ந்தே’’தி கோ² ஆயஸ்மா த³ப்³போ³ மல்லபுத்தோ ப⁴க³வதோ பச்சஸ்ஸோஸி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, ஸங்கோ⁴ த³ப்³ப³ம் மல்லபுத்தம் ஸேனாஸனபஞ்ஞாபகஞ்ச ப⁴த்துத்³தே³ஸகஞ்ச ஸம்மன்னது. ஏவஞ்ச பன, பி⁴க்க²வே, ஸம்மன்னிதப்³போ³. பட²மம் த³ப்³போ³ மல்லபுத்தோ யாசிதப்³போ³. யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

381. ‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லம் ஸங்கோ⁴ ஆயஸ்மந்தம் த³ப்³ப³ம் மல்லபுத்தம் ஸேனாஸனபஞ்ஞாபகஞ்ச ப⁴த்துத்³தே³ஸகஞ்ச ஸம்மன்னேய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. ஸங்கோ⁴ ஆயஸ்மந்தம் த³ப்³ப³ம் மல்லபுத்தம் ஸேனாஸனபஞ்ஞாபகஞ்ச ப⁴த்துத்³தே³ஸகஞ்ச ஸம்மன்னதி. யஸ்ஸாயஸ்மதோ க²மதி ஆயஸ்மதோ த³ப்³ப³ஸ்ஸ மல்லபுத்தஸ்ஸ ஸேனாஸனபஞ்ஞாபகஸ்ஸ ச ப⁴த்துத்³தே³ஸகஸ்ஸ ச ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘ஸம்மதோ ஸங்கே⁴ன ஆயஸ்மா த³ப்³போ³ மல்லபுத்தோ ஸேனாஸனபஞ்ஞாபகோ ச ப⁴த்துத்³தே³ஸகோ ச. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

382. ஸம்மதோ ச பனாயஸ்மா த³ப்³போ³ மல்லபுத்தோ ஸபா⁴கா³னம் பி⁴க்கூ²னம் ஏகஜ்ஜ²ம் ஸேனாஸனம் பஞ்ஞபேதி. யே தே பி⁴க்கூ² ஸுத்தந்திகா தேஸம் ஏகஜ்ஜ²ம் ஸேனாஸனம் பஞ்ஞபேதி – ‘‘தே அஞ்ஞமஞ்ஞம் ஸுத்தந்தம் ஸங்கா³யிஸ்ஸந்தீ’’தி. யே தே பி⁴க்கூ² வினயத⁴ரா தேஸம் ஏகஜ்ஜ²ம் ஸேனாஸனம் பஞ்ஞபேதி – ‘‘தே அஞ்ஞமஞ்ஞம் வினயம் வினிச்சி²னிஸ்ஸந்தீ’’தி [வினிச்சி²ஸ்ஸந்தீதி (க.)]. யே தே பி⁴க்கூ² த⁴ம்மகதி²கா தேஸம் ஏகஜ்ஜ²ம் ஸேனாஸனம் பஞ்ஞபேதி – ‘‘தே அஞ்ஞமஞ்ஞம் த⁴ம்மம் ஸாகச்சி²ஸ்ஸந்தீ’’தி. யே தே பி⁴க்கூ² ஜா²யினோ தேஸம் ஏகஜ்ஜ²ம் ஸேனாஸனம் பஞ்ஞபேதி – ‘‘தே அஞ்ஞமஞ்ஞம் ந ப்³யாபா³தி⁴ஸ்ஸந்தீ’’தி [ந ப்³யாபா³ஹிஸ்ஸந்தீதி (க.)]. யே தே பி⁴க்கூ² திரச்சா²னகதி²கா காயத³ள்ஹிப³ஹுலா [காயத³ட்³டி⁴ப³ஹுலா (ஸீ.)] விஹரந்தி தேஸம்பி ஏகஜ்ஜ²ம் ஸேனாஸனம் பஞ்ஞபேதி – ‘‘இமாயபிமே ஆயஸ்மந்தோ ரதியா அச்சி²ஸ்ஸந்தீ’’தி. யேபி தே பி⁴க்கூ² விகாலே ஆக³ச்ச²ந்தி தேஸம்பி தேஜோதா⁴தும் ஸமாபஜ்ஜித்வா தேனேவ ஆலோகேன ஸேனாஸனம் பஞ்ஞபேதி. அபிஸு பி⁴க்கூ² ஸஞ்சிச்ச விகாலே ஆக³ச்ச²ந்தி – ‘‘மயம் ஆயஸ்மதோ த³ப்³ப³ஸ்ஸ மல்லபுத்தஸ்ஸ இத்³தி⁴பாடிஹாரியம் பஸ்ஸிஸ்ஸாமா’’தி.

தே ஆயஸ்மந்தம் த³ப்³ப³ம் மல்லபுத்தம் உபஸங்கமித்வா ஏவம் வத³ந்தி – ‘‘அம்ஹாகம், ஆவுஸோ த³ப்³ப³, ஸேனாஸனம் பஞ்ஞபேஹீ’’தி. தே ஆயஸ்மா த³ப்³போ³ மல்லபுத்தோ ஏவம் வதே³தி – ‘‘கத்தா²யஸ்மந்தா இச்ச²ந்தி, கத்த² பஞ்ஞபேமீ’’தி? தே ஸஞ்சிச்ச தூ³ரே அபதி³ஸந்தி – ‘‘அம்ஹாகம், ஆவுஸோ த³ப்³ப³, கி³ஜ்ஜ²கூடே பப்³ப³தே ஸேனாஸனம் பஞ்ஞபேஹி. அம்ஹாகம், ஆவுஸோ, சோரபபாதே ஸேனாஸனம் பஞ்ஞபேஹி. அம்ஹாகம், ஆவுஸோ, இஸிகி³லிபஸ்ஸே காளஸிலாயம் ஸேனாஸனம் பஞ்ஞபேஹி. அம்ஹாகம், ஆவுஸோ, வேபா⁴ரபஸ்ஸே ஸத்தபண்ணிகு³ஹாயம் ஸேனாஸனம் பஞ்ஞபேஹி. அம்ஹாகம், ஆவுஸோ, ஸீதவனே ஸப்பஸோண்டி³கபப்³பா⁴ரே ஸேனாஸனம் பஞ்ஞபேஹி. அம்ஹாகம், ஆவுஸோ, கோ³தமககந்த³ராயம் ஸேனாஸனம் பஞ்ஞபேஹி. அம்ஹாகம், ஆவுஸோ, திந்து³ககந்த³ராயம் ஸேனாஸனம் பஞ்ஞபேஹி. அம்ஹாகம், ஆவுஸோ, தபோத³கந்த³ராயம் ஸேனாஸனம் பஞ்ஞபேஹி. அம்ஹாகம், ஆவுஸோ, தபோதா³ராமே ஸேனாஸனம் பஞ்ஞபேஹி. அம்ஹாகம், ஆவுஸோ, ஜீவகம்ப³வனே ஸேனாஸனம் பஞ்ஞபேஹி. அம்ஹாகம், ஆவுஸோ, மத்³த³குச்சி²ஸ்மிம் மிக³தா³யே ஸேனாஸனம் பஞ்ஞபேஹீ’’தி.

தேஸம் ஆயஸ்மா த³ப்³போ³ மல்லபுத்தோ தேஜோதா⁴தும் ஸமாபஜ்ஜித்வா அங்கு³லியா ஜலமானாய புரதோ புரதோ க³ச்ச²தி. தேபி தேனேவ ஆலோகேன ஆயஸ்மதோ த³ப்³ப³ஸ்ஸ மல்லபுத்தஸ்ஸ பிட்டி²தோ பிட்டி²தோ க³ச்ச²ந்தி. தேஸம் ஆயஸ்மா த³ப்³போ³ மல்லபுத்தோ ஏவம் ஸேனாஸனம் பஞ்ஞபேதி – ‘‘அயம் மஞ்சோ, இத³ம் பீட²ம், அயம் பி⁴ஸி, இத³ம் பி³ம்போ³ஹனம், இத³ம் வச்சட்டா²னம், இத³ம் பஸ்ஸாவட்டா²னம், இத³ம் பானீயம், இத³ம் பரிபோ⁴ஜனீயம், அயம் கத்தரத³ண்டோ³, இத³ம் ஸங்க⁴ஸ்ஸ கதிகஸண்டா²னம், இமம் காலம் பவிஸிதப்³ப³ம், இமம் காலம் நிக்க²மிதப்³ப³’’ந்தி. தேஸம் ஆயஸ்மா த³ப்³போ³ மல்லபுத்தோ ஏவம் ஸேனாஸனம் பஞ்ஞபேத்வா புனதே³வ வேளுவனம் பச்சாக³ச்ச²தி.

383. தேன கோ² பன ஸமயேன மேத்தியபூ⁴மஜகா [பு⁴ம்மஜகா (ஸீ. ஸ்யா.)] பி⁴க்கூ² நவகா சேவ ஹோந்தி அப்பபுஞ்ஞா ச. யானி ஸங்க⁴ஸ்ஸ லாமகானி ஸேனாஸனானி தானி தேஸம் பாபுணந்தி லாமகானி ச ப⁴த்தானி. தேன கோ² பன ஸமயேன ராஜக³ஹே மனுஸ்ஸா இச்ச²ந்தி தே²ரானம் பி⁴க்கூ²னம் அபி⁴ஸங்கா²ரிகம் பிண்ட³பாதம் தா³தும் ஸப்பிம்பி தேலம்பி உத்தரிப⁴ங்க³ம்பி. மேத்தியபூ⁴மஜகானம் பன பி⁴க்கூ²னம் பாகதிகம் தே³ந்தி யதா²ரந்த⁴ம் கணாஜகம் பி³லங்க³து³தியம். தே பச்சா²ப⁴த்தம் பிண்ட³பாதப்படிக்கந்தா தே²ரே பி⁴க்கூ² புச்ச²ந்தி – ‘‘தும்ஹாகம், ஆவுஸோ, ப⁴த்தக்³கே³ கிம் அஹோஸி? தும்ஹாகம், ஆவுஸோ, ப⁴த்தக்³கே³ கிம் அஹோஸீ’’தி? ஏகச்சே தே²ரா ஏவம் வத³ந்தி – ‘‘அம்ஹாகம், ஆவுஸோ, ஸப்பி அஹோஸி தேலம் அஹோஸி உத்தரிப⁴ங்க³ம் அஹோஸீ’’தி. மேத்தியபூ⁴மஜகா பன பி⁴க்கூ² ஏவம் வத³ந்தி – ‘‘அம்ஹாகம், ஆவுஸோ, ந கிஞ்சி அஹோஸி, பாகதிகம் யதா²ரந்த⁴ம் கணாஜகம் பி³லங்க³து³திய’’ந்தி.

தேன கோ² பன ஸமயேன கல்யாணப⁴த்திகோ க³ஹபதி ஸங்க⁴ஸ்ஸ சதுக்கப⁴த்தம் தே³தி நிச்சப⁴த்தம். ஸோ ப⁴த்தக்³கே³ ஸபுத்ததா³ரோ உபதிட்டி²த்வா பரிவிஸதி. அஞ்ஞே ஓத³னேன புச்ச²ந்தி, அஞ்ஞே ஸூபேன புச்ச²ந்தி, அஞ்ஞே தேலேன புச்ச²ந்தி, அஞ்ஞே உத்தரிப⁴ங்கே³ன புச்ச²ந்தி. தேன கோ² பன ஸமயேன கல்யாணப⁴த்திகஸ்ஸ க³ஹபதினோ ப⁴த்தம் ஸ்வாதனாய மேத்தியபூ⁴மஜகானம் பி⁴க்கூ²னம் உத்³தி³ட்ட²ம் ஹோதி. அத² கோ² கல்யாணப⁴த்திகோ க³ஹபதி ஆராமம் அக³மாஸி கேனசிதே³வ கரணீயேன. ஸோ யேனாயஸ்மா த³ப்³போ³ மல்லபுத்தோ தேனுபஸங்கமி; உபஸங்கமித்வா ஆயஸ்மந்தம் த³ப்³ப³ம் மல்லபுத்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² கல்யாணப⁴த்திகம் க³ஹபதிம் ஆயஸ்மா த³ப்³போ³ மல்லபுத்தோ த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² கல்யாணப⁴த்திகோ க³ஹபதி ஆயஸ்மதா த³ப்³பே³ன மல்லபுத்தேன த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹம்ஸிதோ ஆயஸ்மந்தம் த³ப்³ப³ம் மல்லபுத்தம் ஏதத³வோச – ‘‘கஸ்ஸ, ப⁴ந்தே, அம்ஹாகம் க⁴ரே ஸ்வாதனாய ப⁴த்தம் உத்³தி³ட்ட²’’ந்தி? ‘‘மேத்தியபூ⁴மஜகானம் கோ², க³ஹபதி, பி⁴க்கூ²னம் தும்ஹாகம் க⁴ரே ஸ்வாதனாய ப⁴த்தம் உத்³தி³ட்ட²’’ந்தி. அத² கோ² கல்யாணப⁴த்திகோ க³ஹபதி அனத்தமனோ அஹோஸி – ‘‘கத²ஞ்ஹி நாம பாபபி⁴க்கூ² அம்ஹாகம் க⁴ரே பு⁴ஞ்ஜிஸ்ஸந்தீ’’தி! க⁴ரம் க³ந்த்வா தா³ஸிம் ஆணாபேஸி – ‘‘யே, ஜே, ஸ்வே ப⁴த்திகா ஆக³ச்ச²ந்தி தே கோட்ட²கே ஆஸனம் பஞ்ஞபேத்வா கணாஜகேன பி³லங்க³து³தியேன பரிவிஸா’’தி. ‘‘ஏவம் அய்யா’’தி கோ² ஸா தா³ஸீ கல்யாணப⁴த்திகஸ்ஸ க³ஹபதினோ பச்சஸ்ஸோஸி.

அத² கோ² மேத்தியபூ⁴மஜகா பி⁴க்கூ² – ‘‘ஹிய்யோ கோ², ஆவுஸோ, அம்ஹாகம் கல்யாணப⁴த்திகஸ்ஸ க³ஹபதினோ க⁴ரே ப⁴த்தம் உத்³தி³ட்ட²ம், ஸ்வே அம்ஹே கல்யாணப⁴த்திகோ க³ஹபதி ஸபுத்ததா³ரோ உபதிட்டி²த்வா பரிவிஸிஸ்ஸதி; அஞ்ஞே ஓத³னேன புச்சி²ஸ்ஸந்தி, அஞ்ஞே ஸூபேன புச்சி²ஸ்ஸந்தி, அஞ்ஞே தேலேன புச்சி²ஸ்ஸந்தி, அஞ்ஞே உத்தரிப⁴ங்கே³ன புச்சி²ஸ்ஸந்தீ’’தி. தே தேனேவ ஸோமனஸ்ஸேன ந சித்தரூபம் ரத்தியா ஸுபிம்ஸு. அத² கோ² மேத்தியபூ⁴மஜகா பி⁴க்கூ² புப்³ப³ண்ஹஸமயம் நிவாஸேத்வா பத்தசீவரம் ஆதா³ய யேன கல்யாணப⁴த்திகஸ்ஸ க³ஹபதினோ நிவேஸனம் தேனுபஸங்கமிம்ஸு. அத்³த³ஸா கோ² ஸா தா³ஸீ மேத்தியபூ⁴மஜகே பி⁴க்கூ² தூ³ரதோவ ஆக³ச்ச²ந்தே. தி³ஸ்வான கோட்ட²கே ஆஸனம் பஞ்ஞபேத்வா மேத்தியபூ⁴மஜகே பி⁴க்கூ² ஏதத³வோச – ‘‘நிஸீத³த², ப⁴ந்தே’’தி. அத² கோ² மேத்தியபூ⁴மஜகானம் பி⁴க்கூ²னம் ஏதத³ஹோஸி – ‘‘நிஸ்ஸம்ஸயம் கோ² ந தாவ ப⁴த்தம் ஸித்³த⁴ம் ப⁴விஸ்ஸதி! யதா² [யாவ (ஸீ.)] மயம் கோட்ட²கே நிஸீதே³ய்யாமா’’தி [நிஸீதா³பீயேய்யாமாதி (ஸீ.), நிஸீதா³பீயாமாதி (ஸ்யா.)]. அத² கோ² ஸா தா³ஸீ கணாஜகேன பி³லங்க³து³தியேன உபக³ச்சி² – ‘‘பு⁴ஞ்ஜத², ப⁴ந்தே’’தி. ‘‘மயம் கோ², ப⁴கி³னி, நிச்சப⁴த்திகா’’தி. ‘‘ஜானாமி அய்யா நிச்சப⁴த்திகாத்த². அபிசாஹம் ஹிய்யோவ க³ஹபதினா ஆணத்தா – ‘யே, ஜே, ஸ்வே ப⁴த்திகா ஆக³ச்ச²ந்தி தே கோட்ட²கே ஆஸனம் பஞ்ஞபேத்வா கணாஜகேன பி³லங்க³து³தியேன பரிவிஸா’தி. பு⁴ஞ்ஜத², ப⁴ந்தே’’தி. அத² கோ² மேத்தியபூ⁴மஜகா பி⁴க்கூ² – ‘‘ஹிய்யோ கோ², ஆவுஸோ, கல்யாணப⁴த்திகோ க³ஹபதி ஆராமம் அக³மாஸி த³ப்³ப³ஸ்ஸ மல்லபுத்தஸ்ஸ ஸந்திகே. நிஸ்ஸம்ஸயம் கோ² மயம் த³ப்³பே³ன மல்லபுத்தேன க³ஹபதினோ அந்தரே [ஸந்திகே (ஸ்யா. கம். க.)] பரிபி⁴ன்னா’’தி. தே தேனேவ தோ³மனஸ்ஸேன ந சித்தரூபம் பு⁴ஞ்ஜிம்ஸு. அத² கோ² மேத்தியபூ⁴மஜகா பி⁴க்கூ² பச்சா²ப⁴த்தம் பிண்ட³பாதப்படிக்கந்தா ஆராமம் க³ந்த்வா பத்தசீவரம் படிஸாமேத்வா ப³ஹாராமகோட்ட²கே ஸங்கா⁴டிபல்லத்தி²காய நிஸீதி³ம்ஸு துண்ஹீபூ⁴தா மங்குபூ⁴தா பத்தக்க²ந்தா⁴ அதோ⁴முகா² பஜ்ஜா²யந்தா அப்படிபா⁴னா.

அத² கோ² மேத்தியா பி⁴க்கு²னீ யேன மேத்தியபூ⁴மஜகா பி⁴க்கூ² தேனுபஸங்கமி; உபஸங்கமித்வா மேத்தியபூ⁴மஜகே பி⁴க்கூ² ஏதத³வோச – ‘‘வந்தா³மி, அய்யா’’தி. ஏவம் வுத்தே மேத்தியபூ⁴மஜகா பி⁴க்கூ² நாலபிம்ஸு. து³தியம்பி கோ²…பே… ததியம்பி கோ² மேத்தியா பி⁴க்கு²னீ மேத்தியபூ⁴மஜகே பி⁴க்கூ² ஏதத³வோச – ‘‘வந்தா³மி, அய்யா’’தி. ததியம்பி கோ² மேத்தியபூ⁴மஜகா பி⁴க்கூ² நாலபிம்ஸு. ‘‘க்யாஹம் அய்யானம் அபரஜ்ஜா²மி? கிஸ்ஸ மம் அய்யா நாலபந்தீ’’தி? ‘‘ததா² ஹி பன த்வம், ப⁴கி³னி, அம்ஹே த³ப்³பே³ன மல்லபுத்தேன விஹேடீ²யமானே அஜ்ஜு²பேக்க²ஸீ’’தி? ‘‘க்யாஹம், அய்யா, கரோமீ’’தி? ‘‘ஸசே கோ² த்வம், ப⁴கி³னி, இச்சே²ய்யாஸி அஜ்ஜேவ ப⁴க³வா த³ப்³ப³ம் மல்லபுத்தம் நாஸாபேய்யா’’தி. ‘‘க்யாஹம், அய்யா, கரோமி, கிம் மயா ஸக்கா காது’’ந்தி? ‘‘ஏஹி த்வம், ப⁴கி³னி, யேன ப⁴க³வா தேனுபஸங்கம; உபஸங்கமித்வா ப⁴க³வந்தம் ஏவம் வதே³ஹி – ‘இத³ம், ப⁴ந்தே, நச்ச²ன்னம் நப்பதிரூபம். யாயம், ப⁴ந்தே, தி³ஸா அப⁴யா அனீதிகா அனுபத்³த³வா ஸாயம் தி³ஸா ஸப⁴யா ஸஈதிகா ஸஉபத்³த³வா. யதோ நிவாதம் ததோ ஸவாதம் [பவாதம் (ஸீ. ஸ்யா.)]. உத³கம் மஞ்ஞே ஆதி³த்தம். அய்யேனம்ஹி த³ப்³பே³ன மல்லபுத்தேன தூ³ஸிதா’’’தி. ‘‘ஏவம், அய்யா’’தி கோ² மேத்தியா பி⁴க்கு²னீ மேத்தியபூ⁴மஜகானம் பி⁴க்கூ²னம் படிஸ்ஸுத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் அட்டா²ஸி. ஏகமந்தம் டி²தா கோ² மேத்தியா பி⁴க்கு²னீ ப⁴க³வந்தம் ஏதத³வோச – ‘‘இத³ம், ப⁴ந்தே, நச்ச²ன்னம் நப்பதிரூபம். யாயம், ப⁴ந்தே, தி³ஸா அப⁴யா அனீதிகா அனுபத்³த³வா ஸாயம் தி³ஸா ஸப⁴யா ஸஈதிகா ஸஉபத்³த³வா. யதோ நிவாதம் ததோ ஸவாதம். உத³கம் மஞ்ஞே ஆதி³த்தம்! அய்யேனம்ஹி த³ப்³பே³ன மல்லபுத்தேன தூ³ஸிதா’’தி.

384. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா ஆயஸ்மந்தம் த³ப்³ப³ம் மல்லபுத்தம் படிபுச்சி² – ‘‘ஸரஸி த்வம், த³ப்³ப³, ஏவரூபம் கத்தா யதா²யம் பி⁴க்கு²னீ ஆஹா’’தி? ‘‘யதா² மம், ப⁴ந்தே, ப⁴க³வா ஜானாதீ’’தி. து³தியம்பி கோ² ப⁴க³வா…பே… ததியம்பி கோ² ப⁴க³வா ஆயஸ்மந்தம் த³ப்³ப³ம் மல்லபுத்தம் ஏதத³வோச – ‘‘ஸரஸி த்வம், த³ப்³ப³, ஏவரூபம் கத்தா யதா²யம் பி⁴க்கு²னீ ஆஹா’’தி? ‘‘யதா² மம், ப⁴ந்தே, ப⁴க³வா ஜானாதீ’’தி. ‘‘ந கோ², த³ப்³ப³, த³ப்³பா³ ஏவம் நிப்³பே³டே²ந்தி. ஸசே தயா கதம் கதந்தி வதே³ஹி, ஸசே தயா அகதம் அகதந்தி வதே³ஹீ’’தி. ‘‘யதோ அஹம், ப⁴ந்தே, ஜாதோ நாபி⁴ஜானாமி ஸுபினந்தேனபி மேது²னம் த⁴ம்மம் படிஸேவிதா, பகே³வ ஜாக³ரோ’’தி! அத² கோ² ப⁴க³வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, மேத்தியம் பி⁴க்கு²னிம் நாஸேத². இமே ச பி⁴க்கூ² அனுயுஞ்ஜதா²’’தி. இத³ம் வத்வா ப⁴க³வா உட்டா²யாஸனா விஹாரம் பாவிஸி.

அத² கோ² தே பி⁴க்கூ² மேத்தியம் பி⁴க்கு²னிம் நாஸேஸும். அத² கோ² மேத்தியபூ⁴மஜகா பி⁴க்கூ² தே பி⁴க்கூ² ஏதத³வோசும் – ‘‘மாவுஸோ, மேத்தியம் பி⁴க்கு²னிம் நாஸேத². ந ஸா கிஞ்சி அபரஜ்ஜ²தி. அம்ஹேஹி ஸா உஸ்ஸாஹிதா குபிதேஹி அனத்தமனேஹி சாவனாதி⁴ப்பாயேஹீ’’தி. ‘‘கிம் பன தும்ஹே, ஆவுஸோ, ஆயஸ்மந்தம் த³ப்³ப³ம் மல்லபுத்தம் அமூலகேன பாராஜிகேன த⁴ம்மேன அனுத்³த⁴ம்ஸேதா²’’தி? ‘‘ஏவமாவுஸோ’’தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம மேத்தியபூ⁴மஜகா பி⁴க்கூ² ஆயஸ்மந்தம் த³ப்³ப³ம் மல்லபுத்தம் அமூலகேன பாராஜிகேன த⁴ம்மேன அனுத்³த⁴ம்ஸேஸ்ஸந்தீ’’தி! அத² கோ² தே பி⁴க்கூ² மேத்தியபூ⁴மஜகே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர தும்ஹே, பி⁴க்க²வே, த³ப்³ப³ம் மல்லபுத்தம் அமூலகேன பாராஜிகேன த⁴ம்மேன அனுத்³த⁴ம்ஸேதா²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… ‘‘கத²ஞ்ஹி நாம தும்ஹே, மோக⁴புரிஸா, த³ப்³ப³ம் மல்லபுத்தம் அமூலகேன பாராஜிகேன த⁴ம்மேன அனுத்³த⁴ம்ஸேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

385. யோ பன பி⁴க்கு² பி⁴க்கு²ம் து³ட்டோ² தோ³ஸோ அப்பதீதோ அமூலகேன பாராஜிகேன த⁴ம்மேன அனுத்³த⁴ம்ஸேய்ய – ‘அப்பேவ நாம நம் இமம்ஹா ப்³ரஹ்மசரியா சாவேய்ய’ந்தி, ததோ அபரேன ஸமயேன ஸமனுக்³கா³ஹீயமானோ வா அஸமனுக்³கா³ஹீயமானோ வா அமூலகஞ்சேவ தம் அதி⁴கரணம் ஹோதி பி⁴க்கு² ச தோ³ஸம் பதிட்டா²தி, ஸங்கா⁴தி³ஸேஸோ’’தி.

386. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

பி⁴க்கு²ந்தி அஞ்ஞம் பி⁴க்கு²ம்.

து³ட்டோ² தோ³ஸோதி குபிதோ அனத்தமனோ அனபி⁴ரத்³தோ⁴ ஆஹதசித்தோ கி²லஜாதோ.

அப்பதீதோதி தேன ச கோபேன தேன ச தோ³ஸேன தாய ச அனத்தமனதாய தாய ச அனபி⁴ரத்³தி⁴யா அப்பதீதோ ஹோதி.

அமூலகம் நாம அதி³ட்ட²ம் அஸுதம் அபரிஸங்கிதம்.

பாராஜிகேன த⁴ம்மேனாதி சதுன்னம் அஞ்ஞதரேன.

அனுத்³த⁴ம்ஸேய்யாதி சோதே³தி வா சோதா³பேதி வா.

அப்பேவ நாம நம் இமம்ஹா ப்³ரஹ்மசரியா சாவேய்யந்தி பி⁴க்கு²பா⁴வா சாவேய்யம், ஸமணத⁴ம்மா சாவேய்யம், ஸீலக்க²ந்தா⁴ சாவேய்யம், தபோகு³ணா சாவேய்யம்.

ததோ அபரேன ஸமயேனாதி யஸ்மிம் க²ணே அனுத்³த⁴ம்ஸிதோ ஹோதி தம் க²ணம் தம் லயம் தம் முஹுத்தம் வீதிவத்தே.

ஸமனுக்³கா³ஹீயமானோதி யேன வத்து²னா அனுத்³த⁴ம்ஸிதோ ஹோதி தஸ்மிம் வத்து²ஸ்மிம் ஸமனுக்³கா³ஹீயமானோ.

அஸமனுக்³கா³ஹீயமானோதி ந கேனசி வுச்சமானோ.

அதி⁴கரணம் நாம சத்தாரி அதி⁴கரணானி – விவாதா³தி⁴கரணம், அனுவாதா³தி⁴கரணம், ஆபத்தாதி⁴கரணம், கிச்சாதி⁴கரணம்.

பி⁴க்கு² ச தோ³ஸம் பதிட்டா²தீதி துச்ச²கம் மயா ப⁴ணிதம், முஸா மயா ப⁴ணிதம், அபூ⁴தம் மயா ப⁴ணிதம், அஜானந்தேன மயா ப⁴ணிதம்.

ஸங்கா⁴தி³ஸேஸோதி…பே… தேனபி வுச்சதி ஸங்கா⁴தி³ஸேஸோதி.

387. அதி³ட்ட²ஸ்ஸ ஹோதி பாராஜிகம் த⁴ம்மம் அஜ்ஜா²பஜ்ஜந்தோ. தஞ்சே சோதே³தி – ‘‘தி³ட்டோ² மயா, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ம் உபோஸதோ² வா பவாரணா வா ஸங்க⁴கம்மம் வா’’தி, ஆபத்தி வாசாய, வாசாய ஸங்கா⁴தி³ஸேஸஸ்ஸ.

அஸுதஸ்ஸ ஹோதி – ‘‘பாராஜிகம் த⁴ம்மம் அஜ்ஜா²பன்னோ’’தி. தஞ்சே சோதே³தி – ‘‘ஸுதோ மயா, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ம் உபோஸதோ² வா பவாரணா வா ஸங்க⁴கம்மம் வா’’தி, ஆபத்தி வாசாய, வாசாய ஸங்கா⁴தி³ஸேஸஸ்ஸ.

அபரிஸங்கிதஸ்ஸ ஹோதி – ‘‘பாராஜிகம் த⁴ம்மம் அஜ்ஜா²பன்னோ’’தி. தஞ்சே சோதே³தி – ‘‘பரிஸங்கிதோ மயா, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ம் உபோஸதோ² வா பவாரணா வா ஸங்க⁴கம்மம் வா’’தி, ஆபத்தி வாசாய, வாசாய ஸங்கா⁴தி³ஸேஸஸ்ஸ.

அதி³ட்ட²ஸ்ஸ ஹோதி பாராஜிகம் த⁴ம்மம் அஜ்ஜா²பஜ்ஜந்தோ. தஞ்சே சோதே³தி – ‘‘தி³ட்டோ² மயா ஸுதோ ச, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

அதி³ட்ட²ஸ்ஸ ஹோதி பாராஜிகம் த⁴ம்மம் அஜ்ஜா²பஜ்ஜந்தோ. தஞ்சே சோதே³தி – ‘‘தி³ட்டோ² மயா பரிஸங்கிதோ ச, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

அதி³ட்ட²ஸ்ஸ ஹோதி பாராஜிகம் த⁴ம்மம் அஜ்ஜா²பஜ்ஜந்தோ. தஞ்சே சோதே³தி – ‘‘தி³ட்டோ² மயா ஸுதோ ச பரிஸங்கிதோ ச, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

அஸுதஸ்ஸ ஹோதி – ‘‘பாராஜிகம் த⁴ம்மம் அஜ்ஜா²பன்னோ’’தி. தஞ்சே சோதே³தி – ‘‘ஸுதோ மயா பரிஸங்கிதோ ச…பே… ஸுதோ மயா தி³ட்டோ² ச…பே… ஸுதோ மயா பரிஸங்கிதோ ச தி³ட்டோ² ச, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

அபரிஸங்கிதஸ்ஸ ஹோதி – ‘‘பாராஜிகம் த⁴ம்மம் அஜ்ஜா²பன்னோ’’தி. தஞ்சே சோதே³தி – ‘‘பரிஸங்கிதோ மயா தி³ட்டோ² ச…பே… பரிஸங்கிதோ மயா ஸுதோ ச…பே… பரிஸங்கிதோ மயா தி³ட்டோ² ச ஸுதோ ச, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

தி³ட்ட²ஸ்ஸ ஹோதி பாராஜிகம் த⁴ம்மம் அஜ்ஜா²பஜ்ஜந்தோ. தஞ்சே சோதே³தி – ‘‘ஸுதோ மயா பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

தி³ட்ட²ஸ்ஸ ஹோதி பாராஜிகம் த⁴ம்மம் அஜ்ஜா²பஜ்ஜந்தோ. தஞ்சே சோதே³தி – ‘‘பரிஸங்கிதோ மயா, பாராஜிகம் த⁴ம்மம் அஜ்ஜா²பன்னோஸி’’…பே… ‘‘ஸுதோ மயா பரிஸங்கிதோ ச, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

ஸுதஸ்ஸ ஹோதி – ‘‘பாராஜிகம் த⁴ம்மம் அஜ்ஜா²பன்னோ’’தி. தஞ்சே சோதே³தி – ‘‘பரிஸங்கிதோ மயா, பாராஜிகம் த⁴ம்மம் அஜ்ஜா²பன்னோஸி…பே… தி³ட்டோ² மயா, பாராஜிகம் த⁴ம்மம் அஜ்ஜா²பன்னோஸி…பே… பரிஸங்கிதோ மயா தி³ட்டோ² ச, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

பரிஸங்கிதஸ்ஸ ஹோதி – ‘‘பாராஜிகம் த⁴ம்மம் அஜ்ஜா²பன்னோ’’தி. தஞ்சே சோதே³தி – ‘‘தி³ட்டோ² மயா, பாராஜிகம் த⁴ம்மம் அஜ்ஜா²பன்னோஸி…பே… ஸுதோ மயா, பாராஜிகம் த⁴ம்மம் அஜ்ஜா²பன்னோஸி…பே… தி³ட்டோ² மயா ஸுதோ ச, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

தி³ட்ட²ஸ்ஸ ஹோதி பாராஜிகம் த⁴ம்மம் அஜ்ஜா²பஜ்ஜந்தோ. தி³ட்டே² வேமதிகோ தி³ட்ட²ம் நோ கப்பேதி தி³ட்ட²ம் நஸ்ஸரதி தி³ட்ட²ம் பமுட்டோ² ஹோதி…பே… ஸுதே வேமதிகோ ஸுதம் நோ கப்பேதி ஸுதம் நஸ்ஸரதி ஸுதம் பமுட்டோ² ஹோதி…பே… பரிஸங்கிதே வேமதிகோ பரிஸங்கிதம் நோ கப்பேதி பரிஸங்கிதம் நஸ்ஸரதி பரிஸங்கிதம் பமுட்டோ² ஹோதி. தஞ்சே சோதே³தி – ‘‘பரிஸங்கிதோ மயா தி³ட்டோ² ச…பே… பரிஸங்கிதோ மயா ஸுதோ ச…பே… பரிஸங்கிதோ மயா தி³ட்டோ² ச ஸுதோ ச, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ம் உபோஸதோ² வா பவாரணா வா ஸங்க⁴கம்மம் வா’’தி, ஆபத்தி வாசாய, வாசாய ஸங்கா⁴தி³ஸேஸஸ்ஸ.

388. அதி³ட்ட²ஸ்ஸ ஹோதி பாராஜிகம் த⁴ம்மம் அஜ்ஜா²பஜ்ஜந்தோ. தஞ்சே சோதா³பேதி – ‘‘தி³ட்டோ²ஸி, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ம் உபோஸதோ² வா பவாரணா வா ஸங்க⁴கம்மம் வா’’தி, ஆபத்தி வாசாய, வாசாய ஸங்கா⁴தி³ஸேஸஸ்ஸ.

அஸுதஸ்ஸ ஹோதி – ‘‘பாராஜிகம் த⁴ம்மம் அஜ்ஜா²பன்னோ’’தி…பே… அபரிஸங்கிதஸ்ஸ ஹோதி – ‘‘பாராஜிகம் த⁴ம்மம் அஜ்ஜா²பன்னோ’’தி. தஞ்சே சோதா³பேதி – ‘‘பரிஸங்கிதோஸி, பாராஜிகம் த⁴ம்மம் அஜ்ஜா²பன்னோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

அதி³ட்ட²ஸ்ஸ ஹோதி பாராஜிகம் த⁴ம்மம் அஜ்ஜா²பஜ்ஜந்தோ. தஞ்சே சோதா³பேதி – ‘‘தி³ட்டோ²ஸி ஸுதோஸி…பே… தி³ட்டோ²ஸி பரிஸங்கிதோஸி…பே… தி³ட்டோ²ஸி ஸுதோஸி பரிஸங்கிதோஸி, பாராஜிகம் த⁴ம்மம் அஜ்ஜா²பன்னோஸி’’…பே… அஸுதஸ்ஸ ஹோதி – ‘‘பாராஜிகம் த⁴ம்மம் அஜ்ஜா²பன்னோ’’தி…பே… அபரிஸங்கிதஸ்ஸ ஹோதி – ‘‘பாராஜிகம் த⁴ம்மம் அஜ்ஜா²பன்னோ’’தி. தஞ்சே சோதா³பேதி – ‘‘பரிஸங்கிதோஸி, தி³ட்டோ²ஸி…பே… பரிஸங்கிதோஸி, ஸுதோஸி…பே… பரிஸங்கிதோஸி, தி³ட்டோ²ஸி, ஸுதோஸி, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

தி³ட்ட²ஸ்ஸ ஹோதி பாராஜிகம் த⁴ம்மம் அஜ்ஜா²பஜ்ஜந்தோ. தஞ்சே சோதா³பேதி – ‘‘ஸுதோஸி’’…பே… தஞ்சே சோதா³பேதி – ‘‘பரிஸங்கிதோஸி’’…பே… தஞ்சே சோதா³பேதி – ‘‘ஸுதோஸி, பரிஸங்கிதோஸி, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

ஸுதஸ்ஸ ஹோதி – ‘‘பாராஜிகம் த⁴ம்மம் அஜ்ஜா²பன்னோ’’தி…பே… பரிஸங்கிதஸ்ஸ ஹோதி – ‘‘பாராஜிகம் த⁴ம்மம் அஜ்ஜா²பன்னோ’’தி. தஞ்சே ‘‘தி³ட்டோ²ஸி’’…பே… தஞ்சே சோதா³பேதி – ‘‘ஸுதோஸி’’…பே… தஞ்சே சோதா³பேதி – ‘‘தி³ட்டோ²ஸி, ஸுதோஸி, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி’’…பே… ஆபத்தி வாசாய, வாசாய ஸங்கா⁴தி³ஸேஸஸ்ஸ.

தி³ட்ட²ஸ்ஸ ஹோதி பாராஜிகம் த⁴ம்மம் அஜ்ஜா²பஜ்ஜந்தோ. தி³ட்டே² வேமதிகோ தி³ட்ட²ம் நோ கப்பேதி தி³ட்ட²ம் நஸ்ஸரதி தி³ட்ட²ம் பமுட்டோ² ஹோதி…பே… ஸுதே வேமதிகோ ஸுதம் நோ கப்பேதி ஸுதம் நஸ்ஸரதி ஸுதம் பமுட்டோ² ஹோதி…பே… பரிஸங்கிதே வேமதிகோ பரிஸங்கிதம் நோ கப்பேதி பரிஸங்கிதம் நஸ்ஸரதி பரிஸங்கிதம் பமுட்டோ² ஹோதி. தஞ்சே சோதா³பேதி – ‘‘பரிஸங்கிதோஸி, தி³ட்டோ²ஸி’’…பே… பரிஸங்கிதம் பமுட்டோ² ஹோதி, தஞ்சே சோதா³பேதி – ‘‘பரிஸங்கிதோஸி ஸுதோஸி’’…பே… பரிஸங்கிதம் பமுட்டோ² ஹோதி, தஞ்சே சோதா³பேதி – ‘‘பரிஸங்கிதோஸி, தி³ட்டோ²ஸி, ஸுதோஸி, பாராஜிகம் த⁴ம்மம் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ம் உபோஸதோ² வா பவாரணா வா ஸங்க⁴கம்மம் வா’’தி, ஆபத்தி வாசாய, வாசாய ஸங்கா⁴தி³ஸேஸஸ்ஸ.

389. அஸுத்³தே⁴ ஸுத்³த⁴தி³ட்டி², ஸுத்³தே⁴ அஸுத்³த⁴தி³ட்டி², அஸுத்³தே⁴ அஸுத்³த⁴தி³ட்டி², ஸுத்³தே⁴ ஸுத்³த⁴தி³ட்டி².

அஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அஜ்ஜா²பன்னோ. தஞ்சே ஸுத்³த⁴தி³ட்டி² ஸமானோ அனோகாஸம் காராபேத்வா சாவனாதி⁴ப்பாயோ வதே³தி, ஆபத்தி ஸங்கா⁴தி³ஸேஸேன து³க்கடஸ்ஸ.

அஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அஜ்ஜா²பன்னோ. தஞ்சே ஸுத்³த⁴தி³ட்டி² ஸமானோ ஓகாஸம் காராபேத்வா சாவனாதி⁴ப்பாயோ வதே³தி, ஆபத்தி ஸங்கா⁴தி³ஸேஸஸ்ஸ.

அஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அஜ்ஜா²பன்னோ. தஞ்சே ஸுத்³த⁴தி³ட்டி² ஸமானோ அனோகாஸம் காராபேத்வா அக்கோஸாதி⁴ப்பாயோ வதே³தி, ஆபத்தி ஓமஸவாதே³ன து³க்கடஸ்ஸ.

அஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அஜ்ஜா²பன்னோ. தஞ்சே ஸுத்³த⁴தி³ட்டி² ஸமானோ ஓகாஸம் காராபேத்வா அக்கோஸாதி⁴ப்பாயோ வதே³தி, ஆபத்தி ஓமஸவாத³ஸ்ஸ.

ஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அனஜ்ஜா²பன்னோ. தஞ்சே அஸுத்³த⁴தி³ட்டி² ஸமானோ அனோகாஸம் காராபேத்வா சாவனாதி⁴ப்பாயோ வதே³தி, ஆபத்தி து³க்கடஸ்ஸ.

ஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அனஜ்ஜா²பன்னோ. தஞ்சே அஸுத்³த⁴தி³ட்டி² ஸமானோ ஓகாஸம் காராபேத்வா சாவனாதி⁴ப்பாயோ வதே³தி, அனாபத்தி.

ஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அனஜ்ஜா²பன்னோ. தஞ்சே அஸுத்³த⁴தி³ட்டி² ஸமானோ அனோகாஸம் காராபேத்வா அக்கோஸாதி⁴ப்பாயோ வதே³தி, ஆபத்தி ஓமஸவாதே³ன து³க்கடஸ்ஸ.

ஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அனஜ்ஜா²பன்னோ. தஞ்சே அஸுத்³த⁴தி³ட்டி² ஸமானோ ஓகாஸம் காராபேத்வா அக்கோஸாதி⁴ப்பாயோ வதே³தி, ஆபத்தி ஓமஸவாத³ஸ்ஸ.

அஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அஜ்ஜா²பன்னோ. தஞ்சே அஸுத்³த⁴தி³ட்டி² ஸமானோ அனோகாஸம் காராபேத்வா சாவனாதி⁴ப்பாயோ வதே³தி, ஆபத்தி து³க்கடஸ்ஸ.

அஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அஜ்ஜா²பன்னோ. தஞ்சே அஸுத்³த⁴தி³ட்டி² ஸமானோ ஓகாஸம் காராபேத்வா சாவனாதி⁴ப்பாயோ வதே³தி, அனாபத்தி.

அஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அஜ்ஜா²பன்னோ. தஞ்சே அஸுத்³த⁴தி³ட்டி² ஸமானோ அனோகாஸம் காராபேத்வா அக்கோஸாதி⁴ப்பாயோ வதே³தி, ஆபத்தி ஓமஸவாதே³ன து³க்கடஸ்ஸ.

அஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அஜ்ஜா²பன்னோ. தஞ்சே அஸுத்³த⁴தி³ட்டி² ஸமானோ ஓகாஸம் காராபேத்வா அக்கோஸாதி⁴ப்பாயோ வதே³தி, ஆபத்தி ஓமஸவாத³ஸ்ஸ.

ஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அனஜ்ஜா²பன்னோ. தஞ்சே ஸுத்³த⁴தி³ட்டி² ஸமானோ அனோகாஸம் காராபேத்வா சாவனாதி⁴ப்பாயோ வதே³தி, ஆபத்தி ஸங்கா⁴தி³ஸேஸேன து³க்கடஸ்ஸ.

ஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அனஜ்ஜா²பன்னோ. தஞ்சே ஸுத்³த⁴தி³ட்டி² ஸமானோ ஓகாஸம் காராபேத்வா சாவனாதி⁴ப்பாயோ வதே³தி, ஆபத்தி ஸங்கா⁴தி³ஸேஸஸ்ஸ.

ஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அனஜ்ஜா²பன்னோ. தஞ்சே ஸுத்³த⁴தி³ட்டி² ஸமானோ அனோகாஸம் காராபேத்வா அக்கோஸாதி⁴ப்பாயோ வதே³தி, ஆபத்தி ஓமஸவாதே³ன து³க்கடஸ்ஸ.

ஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அனஜ்ஜா²பன்னோ தஞ்சே ஸுத்³த⁴தி³ட்டி² ஸமானோ ஓகாஸம் காராபேத்வா அக்கோஸாதி⁴ப்பாயோ வதே³தி, ஆபத்தி ஓமஸவாத³ஸ்ஸ.

390. அனாபத்தி ஸுத்³தே⁴ அஸுத்³த⁴தி³ட்டி²ஸ்ஸ, அஸுத்³தே⁴ அஸுத்³த⁴தி³ட்டி²ஸ்ஸ, உம்மத்தகஸ்ஸ, ஆதி³கம்மிகஸ்ஸாதி.

து³ட்ட²தோ³ஸஸிக்கா²பத³ம் நிட்டி²தம் அட்ட²மம்.