7. விஹாரகாரஸிக்கா²பத³ம்

365. தேன ஸமயேன பு³த்³தோ⁴ ப⁴க³வா கோஸம்பி³யம் விஹரதி கோ⁴ஸிதாராமே. தேன கோ² பன ஸமயேன ஆயஸ்மதோ ச²ன்னஸ்ஸ உபட்டா²கோ க³ஹபதி ஆயஸ்மந்தம் ச²ன்னம் ஏதத³வோச – ‘‘விஹாரவத்து²ம், ப⁴ந்தே, ஜானாஹி அய்யஸ்ஸ விஹாரம் காராபேஸ்ஸாமீ’’தி. அத² கோ² ஆயஸ்மா ச²ன்னோ விஹாரவத்து²ம் ஸோதே⁴ந்தோ அஞ்ஞதரம் சேதியருக்க²ம் சே²தா³பேஸி கா³மபூஜிதம் நிக³மபூஜிதம் நக³ரபூஜிதம் ஜனபத³பூஜிதம் ரட்ட²பூஜிதம். மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா சேதியருக்க²ம் சே²தா³பேஸ்ஸந்தி கா³மபூஜிதம் நிக³மபூஜிதம் நக³ரபூஜிதம் ஜனபத³பூஜிதம் ரட்ட²பூஜிதம்! ஏகிந்த்³ரியம் ஸமணா ஸக்யபுத்தியா ஜீவம் விஹேடே²ந்தீ’’ [விஹேடே²ஸ்ஸந்தி (கத்த²சி)] தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா ச²ன்னோ சேதியருக்க²ம் சே²தா³பேஸ்ஸதி கா³மபூஜிதம்…பே… ரட்ட²பூஜித’’ந்தி! அத² கோ² தே பி⁴க்கூ² ஆயஸ்மந்தம் ச²ன்னம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர த்வம், ச²ன்ன, சேதியருக்க²ம் சே²தா³பேஸி கா³மபூஜிதம்…பே… ரட்ட²பூஜித’’ந்தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… ‘‘கத²ஞ்ஹி நாம த்வம், மோக⁴புரிஸ, சேதியருக்க²ம் சே²தா³பேஸ்ஸஸி கா³மபூஜிதம் நிக³மபூஜிதம் நக³ரபூஜிதம் ஜனபத³பூஜிதம் ரட்ட²பூஜிதம்! ஜீவஸஞ்ஞினோ ஹி, மோக⁴புரிஸ, மனுஸ்ஸா ருக்க²ஸ்மிம். நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

366. ‘‘மஹல்லகம் பன பி⁴க்கு²னா விஹாரம் காரயமானேன ஸஸ்ஸாமிகம் அத்துத்³தே³ஸம் பி⁴க்கூ² அபி⁴னேதப்³பா³ வத்து²தே³ஸனாய. தேஹி பி⁴க்கூ²ஹி வத்து² தே³ஸேதப்³ப³ம் அனாரம்ப⁴ம் ஸபரிக்கமனம். ஸாரம்பே⁴ சே பி⁴க்கு² வத்து²ஸ்மிம் அபரிக்கமனே மஹல்லகம் விஹாரம் காரேய்ய பி⁴க்கூ² வா அனபி⁴னேய்ய வத்து²தே³ஸனாய, ஸங்கா⁴தி³ஸேஸோ’’தி.

367. மஹல்லகோ நாம விஹாரோ ஸஸ்ஸாமிகோ வுச்சதி.

விஹாரோ நாம உல்லித்தோ வா ஹோதி அவலித்தோ வா உல்லித்தாவலித்தோ வா.

காரயமானேனாதி கரோந்தோ வா காராபேந்தோ வா.

ஸஸ்ஸாமிகந்தி அஞ்ஞோ கோசி ஸாமிகோ ஹோதி இத்தீ² வா புரிஸோ வா க³ஹட்டோ² வா பப்³ப³ஜிதோ வா.

அத்துத்³தே³ஸந்தி அத்தனோ அத்தா²ய.

பி⁴க்கூ² அபி⁴னேதப்³பா³ வத்து²தே³ஸனாயாதி தேன விஹாரகாரகேன பி⁴க்கு²னா விஹாரவத்து²ம் ஸோதே⁴த்வா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘அஹம், ப⁴ந்தே, மஹல்லகம் விஹாரம் கத்துகாமோ ஸஸ்ஸாமிகம் அத்துத்³தே³ஸம். ஸோஹம், ப⁴ந்தே, ஸங்க⁴ம் விஹாரவத்து²ஓலோகனம் யாசாமீ’’தி. து³தியம்பி யாசிதப்³பா³. ததியம்பி யாசிதப்³பா³. ஸசே ஸப்³போ³ ஸங்கோ⁴ உஸ்ஸஹதி விஹாரவத்து²ம் ஓலோகேதும் ஸப்³பே³ன ஸங்கே⁴ன ஓலோகேதப்³ப³ம். நோ சே ஸப்³போ³ ஸங்கோ⁴ உஸ்ஸஹதி விஹாரவத்து²ம் ஓலோகேதும், யே தத்த² ஹோந்தி பி⁴க்கூ² ப்³யத்தா படிப³லா ஸாரம்ப⁴ம் அனாரம்ப⁴ம் ஸபரிக்கமனம் அபரிக்கமனம் ஜானிதும் தே யாசித்வா ஸம்மன்னிதப்³பா³. ஏவஞ்ச பன, பி⁴க்க²வே, ஸம்மன்னிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

368. ‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² மஹல்லகம் விஹாரம் கத்துகாமோ ஸஸ்ஸாமிகம் அத்துத்³தே³ஸம். ஸோ ஸங்க⁴ம் விஹாரவத்து²ஓலோகனம் யாசதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமஞ்ச இத்த²ன்னாமஞ்ச பி⁴க்கு² ஸம்மன்னேய்ய இத்த²ன்னாமஸ்ஸ பி⁴க்கு²னோ விஹாரவத்து²ம் ஓலோகேதும். ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² மஹல்லகம் விஹாரம் கத்துகாமோ ஸஸ்ஸாமிகம் அத்துத்³தே³ஸம். ஸோ ஸங்க⁴ம் விஹாரவத்து²ஓலோகனம் யாசதி. ஸங்கோ⁴ இத்த²ன்னாமஞ்ச இத்த²ன்னாமஞ்ச பி⁴க்கூ² ஸம்மன்னதி இத்த²ன்னாமஸ்ஸ பி⁴க்கு²னோ விஹாரவத்து²ம் ஓலோகேதும். யஸ்ஸாயஸ்மதோ க²மதி இத்த²ன்னாமஸ்ஸ ச இத்த²ன்னாமஸ்ஸ ச பி⁴க்கூ²னம் ஸம்முதி இத்த²ன்னாமஸ்ஸ பி⁴க்கு²னோ விஹாரவத்து²ம் ஓலோகேதும், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘ஸம்மதா ஸங்கே⁴ன இத்த²ன்னாமோ ச இத்த²ன்னாமோ ச பி⁴க்கூ² இத்த²ன்னாமஸ்ஸ பி⁴க்கு²னோ விஹாரவத்து²ம் ஓலோகேதும். க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

369. தேஹி ஸம்மதேஹி பி⁴க்கூ²ஹி தத்த² க³ந்த்வா விஹாரவத்து² ஓலோகேதப்³ப³ம்; ஸாரம்ப⁴ம் அனாரம்ப⁴ம் ஸபரிக்கமனம் அபரிக்கமனம் ஜானிதப்³ப³ம். ஸசே ஸாரம்ப⁴ம் ஹோதி அபரிக்கமனம், ‘மாயித⁴ கரீ’தி வத்தப்³போ³. ஸசே அனாரம்ப⁴ம் ஹோதி ஸபரிக்கமனம், ஸங்க⁴ஸ்ஸ ஆரோசேதப்³ப³ம் – ‘அனாரம்ப⁴ம் ஸபரிக்கமன’ந்தி. தேன விஹாரகாரகேன பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘அஹம், ப⁴ந்தே, மஹல்லகம் விஹாரம் கத்துகாமோ ஸஸ்ஸாமிகம் அத்துத்³தே³ஸம். ஸோஹம், ப⁴ந்தே, ஸங்க⁴ம் விஹாரவத்து²தே³ஸனம் யாசாமீ’’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

370. ‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² மஹல்லகம் விஹாரம் கத்துகாமோ ஸஸ்ஸாமிகம் அத்துத்³தே³ஸம். ஸோ ஸங்க⁴ம் விஹாரவத்து²தே³ஸனம் யாசதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமஸ்ஸ பி⁴க்கு²னோ விஹாரவத்து²ம் தே³ஸேய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² மஹல்லகம் விஹாரம் கத்துகாமோ ஸஸ்ஸாமிகம் அத்துத்³தே³ஸம். ஸோ ஸங்க⁴ம் விஹாரவத்து²தே³ஸனம் யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ விஹாரவத்து²ம் தே³ஸேதி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ விஹாரவத்து²ஸ்ஸ தே³ஸனா, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘தே³ஸிதம் ஸங்கே⁴ன இத்த²ன்னாமஸ்ஸ பி⁴க்கு²னோ விஹாரவத்து²ம். க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

371. ஸாரம்ப⁴ம் நாம கிபில்லிகானம் வா ஆஸயோ ஹோதி, உபசிகானம் வா ஆஸயோ ஹோதி, உந்தூ³ரானம் வா…பே… அஹீனம் வா விச்சி²கானம் வா ஸதபதீ³னம் வா ஹத்தீ²னம் வா அஸ்ஸானம் வா ஸீஹானம் வா ப்³யக்³கா⁴னம் வா தீ³பீனம் வா அச்சா²னம் வா தரச்சா²னம் வா ஆஸயோ ஹோதி, யேஸம் கேஸஞ்சி திரச்சா²னக³தானம் பாணானம் ஆஸயோ ஹோதி, புப்³ப³ண்ணனிஸ்ஸிதம் வா ஹோதி, அபரண்ணனிஸ்ஸிதம் வா ஹோதி, அப்³பா⁴கா⁴தனிஸ்ஸிதம் வா ஹோதி, ஆகா⁴தனனிஸ்ஸிதம் வா ஹோதி, ஸுஸானனிஸ்ஸிதம் வா ஹோதி, உய்யானனிஸ்ஸிதம் வா ஹோதி, ராஜவத்து²னிஸ்ஸிதம் வா ஹோதி, ஹத்தி²ஸாலானிஸ்ஸிதம் வா ஹோதி, அஸ்ஸஸாலானிஸ்ஸிதம் வா ஹோதி, ப³ந்த⁴னாகா³ரனிஸ்ஸிதம் வா ஹோதி, பானாகா³ரனிஸ்ஸிதம் வா ஹோதி, ஸூனனிஸ்ஸிதம் வா ஹோதி, ரச்சா²னிஸ்ஸிதம் வா ஹோதி, சச்சரனிஸ்ஸிதம் வா ஹோதி, ஸபா⁴னிஸ்ஸிதம் வா ஹோதி, ஸம்ஸரணனிஸ்ஸிதம் வா ஹோதி. ஏதம் ஸாரம்ப⁴ம் நாம.

அபரிக்கமனம் நாம ந ஸக்கா ஹோதி யதா²யுத்தேன ஸகடேன அனுபரிக³ந்தும், ஸமந்தா நிஸ்ஸேணியா அனுபரிக³ந்தும். ஏதம் அபரிக்கமனம் நாம.

அனாரம்ப⁴ம் நாம ந கிபில்லிகானம் வா ஆஸயோ ஹோதி…பே… ந ஸம்ஸரணனிஸ்ஸிதம் வா ஹோதி. ஏதம் அனாரம்ப⁴ம் நாம.

ஸபரிக்கமனம் நாம ஸக்கா ஹோதி யதா²யுத்தேன ஸகடேன அனுபரிக³ந்தும், ஸமந்தா நிஸ்ஸேணியா அனுபரிக³ந்தும். ஏதம் ஸபரிக்கமனம் நாம.

மஹல்லகோ நாம விஹாரோ ஸஸ்ஸாமிகோ வுச்சதி.

விஹாரோ நாம உல்லித்தோ வா ஹோதி அவலித்தோ வா உல்லித்தாவலித்தோ வா.

காரேய்யாதி கரோதி வா காராபேதி வா.

பி⁴க்கூ² வா அனபி⁴னேய்ய வத்து²தே³ஸனாயாதி ஞத்திது³தியேன கம்மேன விஹாரவத்து²ம் ந தே³ஸாபேத்வா கரோதி வா காராபேதி வா, பயோகே³ து³க்கடம். ஏகம் பிண்ட³ம் அனாக³தே, ஆபத்தி து²ல்லச்சயஸ்ஸ. தஸ்மிம் பிண்டே³ ஆக³தே, ஆபத்தி ஸங்கா⁴தி³ஸேஸஸ்ஸ.

ஸங்கா⁴தி³ஸேஸோதி…பே… தேனபி வுச்சதி – ‘ஸங்கா⁴தி³ஸேஸோ’தி.

372. பி⁴க்கு² விஹாரம் கரோதி அதே³ஸிதவத்து²கம் ஸாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன த்³வின்னம் து³க்கடானம். பி⁴க்கு² விஹாரம் கரோதி அதே³ஸிதவத்து²கம் ஸாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ. பி⁴க்கு² விஹாரம் கரோதி அதே³ஸிதவத்து²கம் அனாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ. பி⁴க்கு² விஹாரம் கரோதி அதே³ஸிதவத்து²கம் அனாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸஸ்ஸ.

பி⁴க்கு² விஹாரம் கரோதி தே³ஸிதவத்து²கம் ஸாரம்ப⁴ம் அபரிக்கமனம், ஆபத்தி த்³வின்னம் து³க்கடானம். பி⁴க்கு² விஹாரம் கரோதி தே³ஸிதவத்து²கம் ஸாரம்ப⁴ம் ஸபரிக்கமனம், ஆபத்தி து³க்கடஸ்ஸ. பி⁴க்கு² விஹாரம் கரோதி தே³ஸிதவத்து²கம் அனாரம்ப⁴ம் அபரிக்கமனம், ஆபத்தி து³க்கடஸ்ஸ. பி⁴க்கு² விஹாரம் கரோதி தே³ஸிதவத்து²கம் அனாரம்ப⁴ம் ஸபரிக்கமனம், அனாபத்தி.

373. பி⁴க்கு² ஸமாதி³ஸதி – ‘‘விஹாரம் மே கரோதா²’’தி. தஸ்ஸ விஹாரம் கரோந்தி அதே³ஸிதவத்து²கம் ஸாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸஸ்ஸ.

பி⁴க்கு² ஸமாதி³ஸதி – ‘‘விஹாரம் மே கரோதா²’’தி. தஸ்ஸ விஹாரம் கரோந்தி தே³ஸிதவத்து²கம் ஸாரம்ப⁴ம் அபரிக்கமனம், ஆபத்தி த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் ஸபரிக்கமனம், அனாபத்தி.

374. பி⁴க்கு² ஸமாதி³ஸித்வா பக்கமதி – ‘‘விஹாரம் மே கரோதா²’’தி. ந ச ஸமாதி³ஸதி – ‘‘தே³ஸிதவத்து²கோ ச ஹோது அனாரம்போ⁴ ச ஸபரிக்கமனோ சா’’தி. தஸ்ஸ விஹாரம் கரோந்தி அதே³ஸிதவத்து²கம் ஸாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸஸ்ஸ.

பி⁴க்கு² ஸமாதி³ஸித்வா பக்கமதி – ‘‘விஹாரம் மே கரோதா²’’தி. ந ச ஸமாதி³ஸதி – ‘‘தே³ஸிதவத்து²கோ ச ஹோது அனாரம்போ⁴ ச ஸபரிக்கமனோ சா’’தி. தஸ்ஸ விஹாரம் கரோந்தி தே³ஸிதவத்து²கம் ஸாரம்ப⁴ம் அபரிக்கமனம், ஆபத்தி த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் ஸபரிக்கமனம், அனாபத்தி.

375. பி⁴க்கு² ஸமாதி³ஸித்வா பக்கமதி – ‘‘விஹாரம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கோ ச ஹோது அனாரம்போ⁴ ச ஸபரிக்கமனோ சா’’தி. தஸ்ஸ விஹாரம் கரோந்தி அதே³ஸிதவத்து²கம் ஸாரம்ப⁴ம் அபரிக்கமனம். ஸோ ஸுணாதி – ‘‘விஹாரோ கிர மே கயிரதி அதே³ஸிதவத்து²கோ ஸாரம்போ⁴ அபரிக்கமனோ’’தி. தேன பி⁴க்கு²னா ஸாமம் வா க³ந்தப்³ப³ம் தூ³தோ வா பாஹேதப்³போ³ – ‘‘தே³ஸிதவத்து²கோ ச ஹோது அனாரம்போ⁴ ச ஸபரிக்கமனோ சா’’தி …பே… ‘‘தே³ஸிதவத்து²கோ ச ஹோது அனாரம்போ⁴ சா’’தி…பே… ‘‘தே³ஸிதவத்து²கோ ச ஹோது ஸபரிக்கமனோ சா’’தி …பே… ‘‘தே³ஸிதவத்து²கோ ஹோதூ’’தி. நோ சே ஸாமம் வா க³ச்சே²ய்ய தூ³தம் வா பஹிணேய்ய, ஆபத்தி து³க்கடஸ்ஸ.

பி⁴க்கு² ஸமாதி³ஸித்வா பக்கமதி – ‘‘விஹாரம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கோ ச ஹோது அனாரம்போ⁴ ச ஸபரிக்கமனோ சா’’தி. தஸ்ஸ விஹாரம் கரோந்தி தே³ஸிதவத்து²கம் ஸாரம்ப⁴ம் அபரிக்கமனம். ஸோ ஸுணாதி – ‘‘விஹாரோ கிர மே கயிரதி தே³ஸிதவத்து²கோ ஸாரம்போ⁴ அபரிக்கமனோ’’தி. தேன பி⁴க்கு²னா ஸாமம் வா க³ந்தப்³ப³ம் தூ³தோ வா பாஹேதப்³போ³ – ‘‘அனாரம்போ⁴ ச ஹோது ஸபரிக்கமனோ சா’’தி…பே… ‘‘அனாரம்போ⁴ ஹோதூ’’தி ‘‘ஸபரிக்கமனோ ஹோதூ’’தி, அனாபத்தி.

376. பி⁴க்கு² ஸமாதி³ஸித்வா பக்கமதி – ‘‘விஹாரம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கோ ச ஹோது அனாரம்போ⁴ ச ஸபரிக்கமனோ சா’’தி. தஸ்ஸ விஹாரம் கரோந்தி அதே³ஸிதவத்து²கம் ஸாரம்ப⁴ம் அபரிக்கமனம், ஆபத்தி காருகானம் திண்ணம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி காருகானம் த்³வின்னம் து³க்கடானம்…பே… அனாரம்ப⁴ம் அபரிக்கமனம், ஆபத்தி காருகானம் த்³வின்னம் து³க்கடானம்…பே… அனாரம்ப⁴ம் ஸபரிக்கமனம், ஆபத்தி காருகானம் து³க்கடஸ்ஸ.

பி⁴க்கு² ஸமாதி³ஸித்வா பக்கமதி – ‘‘விஹாரம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கோ ச ஹோது அனாரம்போ⁴ ச ஸபரிக்கமனோ சா’’தி. தஸ்ஸ விஹாரம் கரோந்தி தே³ஸிதவத்து²கம் ஸாரம்ப⁴ம் அபரிக்கமனம், ஆபத்தி காருகானம் த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி காருகானம் து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி காருகானம் து³க்கடஸ்ஸ…பே… அனாரம்ப⁴ம் ஸபரிக்கமனம், அனாபத்தி.

377. பி⁴க்கு² ஸமாதி³ஸித்வா பக்கமதி – ‘‘விஹாரம் மே கரோதா²’’தி. தஸ்ஸ விஹாரம் கரோந்தி அதே³ஸிதவத்து²கம் ஸாரம்ப⁴ம் அபரிக்கமனம். ஸோ சே விப்பகதே ஆக³ச்ச²தி, தேன பி⁴க்கு²னா ஸோ விஹாரோ அஞ்ஞஸ்ஸ வா தா³தப்³போ³ பி⁴ந்தி³த்வா வா புன காதப்³போ³. நோ சே அஞ்ஞஸ்ஸ வா த³தே³ய்ய பி⁴ந்தி³த்வா வா புன காரேய்ய, ஆபத்தி ஸங்கா⁴தி³ஸேஸேன த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸஸ்ஸ.

பி⁴க்கு² ஸமாதி³ஸித்வா பக்கமதி – ‘‘விஹாரம் மே கரோதா²’’தி. தஸ்ஸ விஹாரம் கரோந்தி தே³ஸிதவத்து²கம் ஸாரம்ப⁴ம் அபரிக்கமனம். ஸோ சே விப்பகதே ஆக³ச்ச²தி, தேன பி⁴க்கு²னா ஸோ விஹாரோ அஞ்ஞஸ்ஸ வா தா³தப்³போ³ பி⁴ந்தி³த்வா வா புன காதப்³போ³. நோ சே அஞ்ஞஸ்ஸ வா த³தே³ய்ய பி⁴ந்தி³த்வா வா புன காரேய்ய, ஆபத்தி த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் ஸபரிக்கமனம், அனாபத்தி.

378. அத்தனா விப்பகதம் அத்தனா பரியோஸாபேதி, ஆபத்தி ஸங்கா⁴தி³ஸேஸஸ்ஸ.

அத்தனா விப்பகதம் பரேஹி பரியோஸாபேதி, ஆபத்தி ஸங்கா⁴தி³ஸேஸஸ்ஸ.

பரேஹி விப்பகதம் அத்தனா பரியோஸாபேதி, ஆபத்தி ஸங்கா⁴தி³ஸேஸஸ்ஸ.

பரேஹி விப்பகதம் பரேஹி பரியோஸாபேதி, ஆபத்தி ஸங்கா⁴தி³ஸேஸஸ்ஸ.

379. அனாபத்தி லேணே கு³ஹாய திணகுடிகாய அஞ்ஞஸ்ஸத்தா²ய வாஸாகா³ரம் ட²பேத்வா ஸப்³ப³த்த². அனாபத்தி உம்மத்தகஸ்ஸ, ஆதி³கம்மிகஸ்ஸாதி.

விஹாரகாரஸிக்கா²பத³ம் நிட்டி²தம் ஸத்தமம்.