6. குடிகாரஸிக்கா²பத³ம்

342. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ஆளவகா பி⁴க்கூ² ஸஞ்ஞாசிகாயோ குடியோ காராபேந்தி அஸ்ஸாமிகாயோ அத்துத்³தே³ஸிகாயோ அப்பமாணிகாயோ. தாயோ ந நிட்டா²னம் க³ச்ச²ந்தி. தே யாசனப³ஹுலா விஞ்ஞத்திப³ஹுலா விஹரந்தி – ‘‘புரிஸம் தே³த², புரிஸத்த²கரம் தே³த², கோ³ணம் தே³த², ஸகடம் தே³த², வாஸிம் தே³த², பரஸும் தே³த², குடா²ரிம் தே³த², குதா³லம் தே³த², நிகா²த³னம் தே³த², வல்லிம் தே³த², வேளும் தே³த², முஞ்ஜம் தே³த², பப்³ப³ஜம் தே³த², திணம் தே³த², மத்திகம் தே³தா²’’தி. மனுஸ்ஸா உபத்³து³தா யாசனாய உபத்³து³தா விஞ்ஞத்தியா பி⁴க்கூ² தி³ஸ்வா உப்³பி³ஜ்ஜந்திபி உத்தஸந்திபி பலாயந்திபி அஞ்ஞேனபி க³ச்ச²ந்தி அஞ்ஞேனபி முக²ம் கரோந்தி த்³வாரம்பி த²கேந்தி, கா³விம்பி தி³ஸ்வா பலாயந்தி பி⁴க்கூ²தி மஞ்ஞமானா.

அத² கோ² ஆயஸ்மா மஹாகஸ்ஸபோ ராஜக³ஹே வஸ்ஸம்வுட்டோ² யேன ஆளவீ தேன பக்காமி. அனுபுப்³பே³ன யேன ஆளவீ தத³வஸரி. தத்ர ஸுத³ம் ஆயஸ்மா மஹாகஸ்ஸபோ ஆளவியம் விஹரதி அக்³கா³ளவே சேதியே. அத² கோ² ஆயஸ்மா மஹாகஸ்ஸபோ புப்³ப³ண்ஹஸமயம் நிவாஸேத்வா பத்தசீவரமாதா³ய ஆளவிம் பிண்டா³ய பாவிஸி. மனுஸ்ஸா ஆயஸ்மந்தம் மஹாகஸ்ஸபம் பஸ்ஸித்வா உப்³பி³ஜ்ஜந்திபி உத்தஸந்திபி பலாயந்திபி அஞ்ஞேனபி க³ச்ச²ந்தி அஞ்ஞேனபி முக²ம் கரோந்தி த்³வாரம்பி த²கேந்தி. அத² கோ² ஆயஸ்மா மஹாகஸ்ஸபோ ஆளவியம் பிண்டா³ய சரித்வா பச்சா²ப⁴த்தம் பிண்ட³பாதப்படிக்கந்தோ பி⁴க்கூ² ஆமந்தேஸி – ‘‘புப்³பா³யம், ஆவுஸோ, ஆளவீ ஸுபி⁴க்கா² அஹோஸி ஸுலப⁴பிண்டா³ ஸுகரா உஞ்சே²ன பக்³க³ஹேன யாபேதும்; ஏதரஹி பனாயம் ஆளவீ து³ப்³பி⁴க்கா² து³ல்லப⁴பிண்டா³, ந ஸுகரா உஞ்சே²ன பக்³க³ஹேன யாபேதும். கோ நு கோ², ஆவுஸோ, ஹேது கோ பச்சயோ, யேனாயம் ஆளவீ து³ப்³பி⁴க்கா² து³ல்லப⁴பிண்டா³, ந ஸுகரா உஞ்சே²ன பக்³க³ஹேன யாபேது’’ந்தி? அத² கோ² தே பி⁴க்கூ² ஆயஸ்மதோ மஹாகஸ்ஸபஸ்ஸ ஏதமத்த²ம் ஆரோசேஸும்.

343. அத² கோ² ப⁴க³வா ராஜக³ஹே யதா²பி⁴ரந்தம் விஹரித்வா யேன ஆளவீ தேன சாரிகம் பக்காமி. அனுபுப்³பே³ன சாரிகம் சரமானோ யேன ஆளவீ தத³வஸரி. தத்ர ஸுத³ம் ப⁴க³வா ஆளவியம் விஹரதி அக்³கா³ளவே சேதியே. அத² கோ² ஆயஸ்மா மஹாகஸ்ஸபோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா மஹாகஸ்ஸபோ ப⁴க³வதோ ஏதமத்த²ம் ஆரோசேஸி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா ஆளவகே பி⁴க்கூ² படிபுச்சி² – ‘‘ஸச்சம் கிர தும்ஹே, பி⁴க்க²வே, ஸஞ்ஞாசிகாயோ குடியோ காராபேத² அஸ்ஸாமிகாயோ அத்துத்³தே³ஸிகாயோ அப்பமாணிகாயோ. தாயோ ந நிட்டா²னம் க³ச்ச²ந்தி. தே தும்ஹே யாசனப³ஹுலா விஞ்ஞத்திப³ஹுலா விஹரத² – ‘புரிஸம் தே³த² புரிஸத்த²கரம் தே³த²…பே… திணம் தே³த² மத்திகம் தே³தா²’தி. மனுஸ்ஸா உபத்³து³தா யாசனாய உபத்³து³தா விஞ்ஞத்தியா பி⁴க்கூ² தி³ஸ்வா உப்³பி³ஜ்ஜந்திபி உத்தஸந்திபி பலாயந்திபி அஞ்ஞேனபி க³ச்ச²ந்தி அஞ்ஞேனபி முக²ம் கரோந்தி த்³வாரம்பி த²கேந்தி, கா³விம்பி தி³ஸ்வா பலாயந்தி பி⁴க்கூ²தி மஞ்ஞமானா’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… ‘‘கத²ஞ்ஹி நாம தும்ஹே, மோக⁴புரிஸா, ஸம்யாசிகாயோ குடியோ காராபேஸ்ஸத² அஸ்ஸாமிகாயோ அத்துத்³தே³ஸிகாயோ அப்பமாணிகாயோ! தாயோ ந நிட்டா²னம் க³ச்ச²ந்தி. தே தும்ஹே யாசனப³ஹுலா விஞ்ஞத்திப³ஹுலா விஹரிஸ்ஸத² – ‘புரிஸம் தே³த² புரிஸத்த²கரம் தே³த²…பே… திணம் தே³த² மத்திகம் தே³தா²’தி! நேதம் மோக⁴புரிஸா, அப்பஸன்னானம் வா பஸாதா³ய…பே…’’ விக³ரஹித்வா த⁴ம்மிம் கத²ம் கத்வா பி⁴க்கூ² ஆமந்தேஸி –

344. ‘‘பூ⁴தபுப்³ப³ம், பி⁴க்க²வே, த்³வே பா⁴தரோ இஸயோ க³ங்க³ம் நதி³ம் உபனிஸ்ஸாய விஹரிம்ஸு. அத² கோ², பி⁴க்க²வே, மணிகண்டோ² நாக³ராஜா க³ங்க³ம் நதி³ம் உத்தரித்வா யேன கனிட்டோ² இஸி தேனுபஸங்கமி; உபஸங்கமித்வா கனிட்ட²ம் இஸிம் ஸத்தக்க²த்தும் போ⁴கே³ஹி பரிக்கி²பித்வா உபரிமுத்³த⁴னி மஹந்தம் ப²ணம் கரித்வா அட்டா²ஸி. அத² கோ², பி⁴க்க²வே, கனிட்டோ² இஸி தஸ்ஸ நாக³ஸ்ஸ ப⁴யா கிஸோ அஹோஸி லூகோ² து³ப்³ப³ண்ணோ உப்பண்டு³ப்பண்டு³கஜாதோ த⁴மனிஸந்த²தக³த்தோ. அத்³த³ஸ கோ², பி⁴க்க²வே, ஜேட்டோ² இஸி கனிட்ட²ம் இஸிம் கிஸம் லூக²ம் து³ப்³ப³ண்ணம் உப்பண்டு³ப்பண்டு³கஜாதம் த⁴மனிஸந்த²தக³த்தம். தி³ஸ்வான கனிட்ட²ம் இஸிம் ஏதத³வோச – ‘‘கிஸ்ஸ த்வம், போ⁴, கிஸோ லூகோ² து³ப்³ப³ண்ணோ உப்பண்டு³ப்பண்டு³கஜாதோ த⁴மனிஸந்த²தக³த்தோ’’தி? ‘‘இத⁴, போ⁴, மணிகண்டோ² நாக³ராஜா க³ங்க³ம் நதி³ம் உத்தரித்வா யேனாஹம் தேனுபஸங்கமி; உபஸங்கமித்வா மம் ஸத்தக்க²த்தும் போ⁴கே³ஹி பரிக்கி²பித்வா உபரிமுத்³த⁴னி மஹந்தம் ப²ணம் கரித்வா அட்டா²ஸி. தஸ்ஸாஹம், போ⁴, நாக³ஸ்ஸ ப⁴யா [ப⁴யாம்ஹி (ஸீ.)] கிஸோ லூகோ² து³ப்³ப³ண்ணோ உப்பண்டு³ப்பண்டு³கஜாதோ த⁴மனிஸந்த²தக³த்தோ’’தி. ‘‘இச்ச²ஸி பன த்வம், போ⁴, தஸ்ஸ நாக³ஸ்ஸ அனாக³மன’’ந்தி? ‘‘இச்சா²மஹம், போ⁴, தஸ்ஸ நாக³ஸ்ஸ அனாக³மன’’ந்தி. ‘‘அபி பன த்வம், போ⁴, தஸ்ஸ நாக³ஸ்ஸ கிஞ்சி பஸ்ஸஸீ’’தி? ‘‘பஸ்ஸாமஹம், போ⁴, மணிமஸ்ஸ [மணிஸ்ஸ (ஸீ. க.)] கண்டே² பிலந்த⁴ன’’ந்தி. ‘‘தேன ஹி த்வம், போ⁴, தம் நாக³ம் மணிம் யாச – ‘மணிம் மே, போ⁴, தே³ஹி; மணினா மே அத்தோ²’’’தி.

அத² கோ², பி⁴க்க²வே, மணிகண்டோ² நாக³ராஜா க³ங்க³ம் நதி³ம் உத்தரித்வா யேன கனிட்டோ² இஸி தேனுபஸங்கமி; உபஸங்கமித்வா ஏகமந்தம் அட்டா²ஸி. ஏகமந்தம் டி²தம் கோ², பி⁴க்க²வே, மணிகண்ட²ம் நாக³ராஜானம் கனிட்டோ² இஸி ஏதத³வோச – ‘‘மணிம் மே, போ⁴, தே³ஹி; மணினா மே அத்தோ²’’தி. அத² கோ², பி⁴க்க²வே, மணிகண்டோ² நாக³ராஜா – ‘பி⁴க்கு² மணிம் யாசதி, பி⁴க்கு²ஸ்ஸ மணினா அத்தோ²’தி கி²ப்பஞ்ஞேவ அக³மாஸி. து³தியம்பி கோ², பி⁴க்க²வே, மணிகண்டோ² நாக³ராஜா க³ங்க³ம் நதி³ம் உத்தரித்வா யேன கனிட்டோ² இஸி தேனுபஸங்கமி. அத்³த³ஸ கோ², பி⁴க்க²வே, கனிட்டோ² இஸி மணிகண்ட²ம் நாக³ராஜானம் தூ³ரதோவ ஆக³ச்ச²ந்தம். தி³ஸ்வான மணிகண்ட²ம் நாக³ராஜானம் ஏதத³வோச – ‘‘மணிம் மே, போ⁴, தே³ஹி; மணினா மே அத்தோ²’’தி. அத² கோ², பி⁴க்க²வே, மணிகண்டோ² நாக³ராஜா – ‘‘பி⁴க்கு² மணிம் யாசதி, பி⁴க்கு²ஸ்ஸ மணினா அத்தோ²’’தி ததோவ படினிவத்தி. ததியம்பி கோ², பி⁴க்க²வே, மணிகண்டோ² நாக³ராஜா க³ங்க³ம் நதி³ம் உத்தரதி. அத்³த³ஸ கோ², பி⁴க்க²வே, கனிட்டோ² இஸி மணிகண்ட²ம் நாக³ராஜானம் க³ங்க³ம் நதி³ம் உத்தரந்தம். தி³ஸ்வான மணிகண்ட²ம் நாக³ராஜானம் ஏதத³வோச – ‘‘மணிம் மே, போ⁴, தே³ஹி; மணினா மே அத்தோ²’’தி. அத² கோ², பி⁴க்க²வே, மணிகண்டோ² நாக³ராஜா கனிட்ட²ம் இஸிம் கா³தா²ஹி அஜ்ஜ²பா⁴ஸி –

[ஜா. 1.3.7 மணிகண்ட²ஜாதகேபி] ‘‘மமன்னபானம் விபுலம் உளாரம்,

உப்பஜ்ஜதீமஸ்ஸ மணிஸ்ஸ ஹேது;

தம் தே ந த³ஸ்ஸம் அதியாசகோஸி;

ந சாபி தே அஸ்ஸமமாக³மிஸ்ஸம்.

[ஜா. 1.3.8 மணிகண்ட²ஜாதகேபி] ‘‘ஸுஸூ யதா² ஸக்க²ரதோ⁴தபாணீ;

தாஸேஸி மம் ஸேலமாயாசமானோ;

தம் தே ந த³ஸ்ஸம் அதியாசகோஸி;

ந சாபி தே அஸ்ஸமமாக³மிஸ்ஸ’’ந்தி.

அத² கோ², பி⁴க்க²வே, மணிகண்டோ² நாக³ராஜா – ‘‘பி⁴க்கு² மணிம் யாசதி, பி⁴க்கு²ஸ்ஸ மணினா அத்தோ²’’தி பக்காமி. ததா² பக்கந்தோவ [ததா³பக்கந்தோவ (க.)] அஹோஸி, ந புன பச்சாக³ஞ்சி². அத² கோ², பி⁴க்க²வே, கனிட்டோ² இஸி தஸ்ஸ நாக³ஸ்ஸ த³ஸ்ஸனீயஸ்ஸ அத³ஸ்ஸனேன பி⁴ய்யோஸோமத்தாய கிஸோ அஹோஸி லூகோ² து³ப்³ப³ண்ணோ, உப்பண்டு³ப்பண்டு³கஜாதோ த⁴மனிஸந்த²தக³த்தோ. அத்³த³ஸ கோ², பி⁴க்க²வே, ஜேட்டோ² இஸி கனிட்ட²ம் இஸிம் பி⁴ய்யோஸோமத்தாய கிஸம் லூக²ம் து³ப்³ப³ண்ணம் உப்பண்டு³ப்பண்டு³கஜாதம் த⁴மனிஸந்த²தக³த்தம். தி³ஸ்வான கனிட்ட²ம் இஸிம் ஏதத³வோச – ‘‘கிஸ்ஸ த்வம், போ⁴, பி⁴ய்யோஸோமத்தாய கிஸோ லூகோ² து³ப்³ப³ண்ணோ உப்பண்டு³ப்பண்டு³கஜாதோ த⁴மனிஸந்த²தக³த்தோ’’தி? ‘‘தஸ்ஸாஹம், போ⁴, நாக³ஸ்ஸ த³ஸ்ஸனீயஸ்ஸ அத³ஸ்ஸனேன பி⁴ய்யோஸோமத்தாய கிஸோ லூகோ² து³ப்³ப³ண்ணோ உப்பண்டு³ப்பண்டு³கஜாதோ த⁴மனிஸந்த²தக³த்தோ’’தி. அத² கோ², பி⁴க்க²வே, ஜேட்டோ² இஸி கனிட்ட²ம் இஸிம் கா³தா²ய அஜ்ஜ²பா⁴ஸி –

[ஜா. 1.3.9 மணிகண்ட²ஜாதகேபி] ‘‘ந தம் யாசே யஸ்ஸ பியம் ஜிகீ³ஸே,

விதே³ஸ்ஸோ [தே³ஸ்ஸோ (ஸீ.), தே³ஸ்ஸோ ச (ஸ்யா.)] ஹோதி அதியாசனாய;

நாகோ³ மணிம் யாசிதோ ப்³ராஹ்மணேன;

அத³ஸ்ஸனஞ்ஞேவ தத³ஜ்ஜ²க³மா’’தி.

தேஸஞ்ஹி நாம, பி⁴க்க²வே, திரச்சா²னக³தானம் பாணானம் அமனாபா ப⁴விஸ்ஸதி யாசனா அமனாபா விஞ்ஞத்தி. கிமங்க³ம் [கிமங்க³ (ஸீ.)] பன மனுஸ்ஸபூ⁴தானம்!

345. ‘‘பூ⁴தபுப்³ப³ம், பி⁴க்க²வே, அஞ்ஞதரோ பி⁴க்கு² ஹிமவந்தபஸ்ஸே விஹரதி அஞ்ஞதரஸ்மிம் வனஸண்டே³. தஸ்ஸ கோ², பி⁴க்க²வே, வனஸண்ட³ஸ்ஸ அவிதூ³ரே மஹந்தம் நின்னம் பல்லலம். அத² கோ²,

வாஸாய உபக³ச்ச²தி. அத² கோ², பி⁴க்க²வே, ஸோ பி⁴க்கு² தஸ்ஸ ஸகுணஸங்க⁴ஸ்ஸ ஸத்³தே³ன உப்³பா³ள்ஹோ யேனாஹம் தேனுபஸங்கமி; உபஸங்கமித்வா மம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² அஹம், பி⁴க்க²வே, தம் பி⁴க்கு²ம் ஏதத³வோச – ‘கச்சி, பி⁴க்கு², க²மனீயம் கச்சி யாபனீயம் கச்சிஸி அப்பகிலமதே²ன அத்³தா⁴னம் ஆக³தோ? குதோ ச த்வம், பி⁴க்கு², ஆக³ச்ச²ஸீ’தி? ‘க²மனீயம், ப⁴க³வா, யாபனீயம், ப⁴க³வா. அப்பகிலமதே²ன சாஹம், ப⁴ந்தே, அத்³தா⁴னம் ஆக³தோ. அத்தி², ப⁴ந்தே, ஹிமவந்தபஸ்ஸே மஹாவனஸண்டோ³. தஸ்ஸ கோ² பன, ப⁴ந்தே, வனஸண்ட³ஸ்ஸ அவிதூ³ரே மஹந்தம் நின்னம் பல்லலம். அத² கோ², ப⁴ந்தே, மஹாஸகுணஸங்கோ⁴ தஸ்மிம் பல்லலே தி³வஸம் கோ³சரம் சரித்வா ஸாயம் தம் வனஸண்ட³ம் வாஸாய உபக³ச்ச²தி. ததோ அஹம், ப⁴க³வா, ஆக³ச்சா²மி – தஸ்ஸ ஸகுணஸங்க⁴ஸ்ஸ ஸத்³தே³ன உப்³பா³ள்ஹோ’தி. ‘இச்ச²ஸி பன த்வம், பி⁴க்கு², தஸ்ஸ ஸகுணஸங்க⁴ஸ்ஸ அனாக³மன’ந்தி? ‘இச்சா²மஹம், ப⁴க³வா, தஸ்ஸ ஸகுணஸங்க⁴ஸ்ஸ அனாக³மன’ந்தி. ‘தேன ஹி த்வம், பி⁴க்கு², தத்த² க³ந்த்வா தம் வனஸண்ட³ம் அஜ்ஜோ²கா³ஹேத்வா ரத்தியா பட²மம் யாமம் திக்க²த்தும் ஸத்³த³மனுஸ்ஸாவேஹி – ஸுணந்து மே, போ⁴ந்தோ ஸகுணா, யாவதிகா இமஸ்மிம் வனஸண்டே³ வாஸம் உபக³தா, பத்தேன மே அத்தோ². ஏகேகம் மே, போ⁴ந்தோ, பத்தம் த³த³ந்தூ’தி. ரத்தியா மஜ்ஜி²மம் யாமம்… ரத்தியா பச்சி²மம் யாமம் திக்க²த்தும் ஸத்³த³மனுஸ்ஸாவேஹி – ‘ஸுணந்து மே, போ⁴ந்தோ ஸகுணா, யாவதிகா இமஸ்மிம் வனஸண்டே³ வாஸம் உபக³தா, பத்தேன மே அத்தோ². ஏகேகம் மே, போ⁴ந்தோ, பத்தம் த³த³ந்தூ’தி.

‘‘அத² கோ², பி⁴க்க²வே, ஸோ பி⁴க்கு² தத்த² க³ந்த்வா தம் வனஸண்ட³ம் அஜ்ஜோ²கா³ஹேத்வா ரத்தியா பட²மம் யாமம் திக்க²த்தும் ஸத்³த³மனுஸ்ஸாவேஸி – ‘ஸுணந்து மே, போ⁴ந்தோ ஸகுணா, யாவதிகா இமஸ்மிம் வனஸண்டே³ வாஸம் உபக³தா, பத்தேன மே அத்தோ². ஏகேகம் மே, போ⁴ந்தோ, பத்தம் த³த³ந்தூ’தி. ரத்தியா மஜ்ஜி²ம யாமம்… ரத்தியா பச்சி²மம் யாமம் திக்க²த்தும் ஸத்³த³மனுஸ்ஸாவேஸி – ‘ஸுணந்து மே, போ⁴ந்தோ ஸகுணா, யாவதிகா இமஸ்மிம் வனஸண்டே³ வாஸம் உபக³தா, பத்தேன மே அத்தோ². ஏகேகம் மே, போ⁴ந்தோ, பத்தம் த³த³ந்தூ’தி. அத² கோ², பி⁴க்க²வே, ஸோ ஸகுணஸங்கோ⁴ – ‘பி⁴க்கு² பத்தம் யாசதி பி⁴க்கு²ஸ்ஸ பத்தேன அத்தோ²’தி தம்ஹா வனஸண்டா³ பக்காமி. ததா² பக்கந்தோவ அஹோஸி ந புன பச்சாக³ஞ்சி². தேஸஞ்ஹி நாம, பி⁴க்க²வே, திரச்சா²னக³தானம் பாணானம் அமனாபா ப⁴விஸ்ஸதி யாசனா அமனாபா விஞ்ஞத்தி. கிமங்க³ம் பன மனுஸ்ஸபூ⁴தானம்’’!

346. ‘‘பூ⁴தபுப்³ப³ம், பி⁴க்க²வே, ரட்ட²பாலஸ்ஸ குலபுத்தஸ்ஸ பிதா ரட்ட²பாலம் குலபுத்தம் கா³தா²ய அஜ்ஜ²பா⁴ஸி –

‘அபாஹம் தே ந ஜானாமி, ரட்ட²பால ப³ஹூ ஜனா;

[ஜா. 1.7.54] தே மம் ஸங்க³ம்ம யாசந்தி, கஸ்மா மம் த்வம் ந யாசஸீ’தி.

[ஜா. 1.7.55] ‘யாசகோ அப்பியோ ஹோதி, யாசம் அத³த³மப்பியோ;

தஸ்மாஹம் தம் ந யாசாமி, மா மே விதே³ஸ்ஸனா அஹூ’தி.

‘‘ஸோ ஹி நாம, பி⁴க்க²வே, ரட்ட²பாலோ குலபுத்தோ ஸகம் பிதரம் ஏவம் வக்க²தி. கிமங்க³ம் பன ஜனோ ஜனம்!

347. ‘‘கி³ஹீனம், பி⁴க்க²வே, து³ஸ்ஸம்ஹரானி போ⁴கா³னி ஸம்ப⁴தானிபி து³ரக்கி²யானி. தத்த² நாம தும்ஹே, மோக⁴புரிஸா, ஏவம் து³ஸ்ஸம்ஹரேஸு போ⁴கே³ஸு ஸம்ப⁴தேஸுபி து³ரக்கி²யேஸு யாசனப³ஹுலா விஞ்ஞத்திப³ஹுலா விஹரிஸ்ஸத² – ‘புரிஸம் தே³த², புரிஸத்த²கரம் தே³த², கோ³ணம் தே³த², ஸகடம் தே³த², வாஸிம் தே³த², பரஸும் தே³த², குடா²ரிம் தே³த², குதா³லம் தே³த², நிகா²த³னம் தே³த², வல்லிம் தே³த², வேளும் தே³த², முஞ்ஜம் தே³த², பப்³ப³ஜம் தே³த², திணம் தே³த², மத்திகம் தே³தா²’’தி! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

348. ‘‘ஸஞ்ஞாசிகாய பன பி⁴க்கு²னா குடிம் காரயமானேன அஸ்ஸாமிகம் அத்துத்³தே³ஸம் பமாணிகா காரேதப்³பா³. தத்ரித³ம் பமாணம் – தீ³க⁴ஸோ த்³வாத³ஸ வித³த்தி²யோ, ஸுக³தவித³த்தி²யா; திரியம் ஸத்தந்தரா. பி⁴க்கூ² அபி⁴னேதப்³பா³ வத்து²தே³ஸனாய. தேஹி பி⁴க்கூ²ஹி வத்து² தே³ஸேதப்³ப³ம் – அனாரம்ப⁴ம் [அனாரப்³ப⁴ம் (க.)] ஸபரிக்கமனம். ஸாரம்பே⁴ [ஸாரப்³பே⁴ (க.)] சே பி⁴க்கு² வத்து²ஸ்மிம் அபரிக்கமனே ஸஞ்ஞாசிகாய குடிம் காரேய்ய, பி⁴க்கூ² வா அனபி⁴னேய்ய வத்து²தே³ஸனாய, பமாணம் வா அதிக்காமேய்ய, ஸங்கா⁴தி³ஸேஸோ’’தி.

349. ஸஞ்ஞாசிகா நாம ஸயம் யாசித்வா புரிஸம்பி புரிஸத்த²கரம்பி கோ³ணம்பி ஸகடம்பி வாஸிம்பி பரஸும்பி குடா²ரிம்பி குதா³லம்பி நிகா²த³னம்பி வல்லிம்பி வேளும்பி முஞ்ஜம்பி பப்³ப³ஜம்பி திணம்பி மத்திகம்பி.

குடி நாம உல்லித்தா வா ஹோதி அவலித்தா வா உல்லித்தாவலித்தா வா.

காரயமானேனாதி கரோந்தோ வா காராபேந்தோ வா.

அஸ்ஸாமிகந்தி ந அஞ்ஞோ கோசி ஸாமிகோ ஹோதி, இத்தீ² வா புரிஸோ வா க³ஹட்டோ² வா பப்³ப³ஜிதோ வா.

அத்துத்³தே³ஸந்தி அத்தனோ அத்தா²ய.

பமாணிகா காரேதப்³பா³. தத்ரித³ம் பமாணம் – தீ³க⁴ஸோ த்³வாத³ஸ வித³த்தி²யோ, ஸுக³தவித³த்தி²யாதி பா³ஹிரிமேன மானேன.

திரியம் ஸத்தந்தராதி அப்³ப⁴ந்தரிமேன மானேன.

பி⁴க்கூ² அபி⁴னேதப்³பா³ வத்து²தே³ஸனாயாதி தேன குடிகாரகேன பி⁴க்கு²னா குடிவத்து²ம் ஸோதே⁴த்வா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘அஹம், ப⁴ந்தே, ஸஞ்ஞாசிகாய குடிம் கத்துகாமோ அஸ்ஸாமிகம் அத்துத்³தே³ஸம். ஸோஹம், ப⁴ந்தே, ஸங்க⁴ம் குடிவத்து²ஓலோகனம் யாசாமீ’’தி. து³தியம்பி யாசிதப்³பா³. ததியம்பி யாசிதப்³பா³. ஸசே ஸப்³போ³ ஸங்கோ⁴ உஸ்ஸஹதி குடிவத்து²ம் ஓலோகேதும், ஸப்³பே³ன ஸங்கே⁴ன ஓலோகேதப்³ப³ம். நோ சே ஸப்³போ³ ஸங்கோ⁴ உஸ்ஸஹதி குடிவத்து²ம் ஓலோகேதும், யே தத்த² ஹோந்தி பி⁴க்கூ² ப்³யத்தா படிப³லா ஸாரம்ப⁴ம் அனாரம்ப⁴ம் ஸபரிக்கமனம் அபரிக்கமனம் ஜானிதும் தே யாசித்வா ஸம்மன்னிதப்³பா³. ஏவஞ்ச பன, பி⁴க்க²வே, ஸம்மன்னிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

350. ‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² ஸஞ்ஞாசிகாய குடிம் கத்துகாமோ அஸ்ஸாமிகம் அத்துத்³தே³ஸம். ஸோ ஸங்க⁴ம் குடிவத்து²ஓலோகனம் யாசதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமஞ்ச இத்த²ன்னாமஞ்ச பி⁴க்கூ² ஸம்மன்னேய்ய இத்த²ன்னாமஸ்ஸ பி⁴க்கு²னோ குடிவத்து²ம் ஓலோகேதும். ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² ஸஞ்ஞாசிகாய குடிம் கத்துகாமோ அஸ்ஸாமிகம் அத்துத்³தே³ஸம். ஸோ ஸங்க⁴ம் குடிவத்து²ஓலோகனம் யாசதி. ஸங்கோ⁴ இத்த²ன்னாமஞ்ச இத்த²ன்னாமஞ்ச பி⁴க்கூ² ஸம்மன்னதி இத்த²ன்னாமஸ்ஸ பி⁴க்கு²னோ குடிவத்து²ம் ஓலோகேதும். யஸ்ஸாயஸ்மதோ க²மதி இத்த²ன்னாமஸ்ஸ ச இத்த²ன்னாமஸ்ஸ ச பி⁴க்கூ²னம் ஸம்முதி [ஸம்மதி (ஸ்யா.)] இத்த²ன்னாமஸ்ஸ பி⁴க்கு²னோ குடிவத்து²ம் ஓலோகேதும், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘ஸம்மதா ஸங்கே⁴ன இத்த²ன்னாமோ ச இத்த²ன்னாமோ ச பி⁴க்கூ² இத்த²ன்னாமஸ்ஸ பி⁴க்கு²னோ குடிவத்து²ம் ஓலோகேதும். க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

351. தேஹி ஸம்மதேஹி பி⁴க்கூ²ஹி தத்த² க³ந்த்வா குடிவத்து² ஓலோகேதப்³ப³ம், ஸாரம்ப⁴ம் அனாரம்ப⁴ம் ஸபரிக்கமனம் அபரிக்கமனம் ஜானிதப்³ப³ம். ஸசே ஸாரம்ப⁴ம் ஹோதி அபரிக்கமனம், ‘மா இத⁴ கரீ’தி வத்தப்³போ³. ஸசே அனாரம்ப⁴ம் ஹோதி ஸபரிக்கமனம், ஸங்க⁴ஸ்ஸ ஆரோசேதப்³ப³ம் – ‘அனாரம்ப⁴ம் ஸபரிக்கமன’ந்தி. தேன குடிகாரகேன பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘அஹம், ப⁴ந்தே, ஸஞ்ஞாசிகாய குடிம் கத்துகாமோ அஸ்ஸாமிகம் அத்துத்³தே³ஸம். ஸோஹம், ப⁴ந்தே, ஸங்க⁴ம் குடிவத்து²தே³ஸனம் யாசாமீ’’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

352. ‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² ஸஞ்ஞாசிகாய குடிம் கத்துகாமோ அஸ்ஸாமிகம் அத்துத்³தே³ஸம். ஸோ ஸங்க⁴ம் குடிவத்து²தே³ஸனம் யாசதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமஸ்ஸ பி⁴க்கு²னோ குடிவத்து²ம் தே³ஸேய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² ஸஞ்ஞாசிகாய குடிம் கத்துகாமோ அஸ்ஸாமிகம் அத்துத்³தே³ஸம். ஸோ ஸங்க⁴ம் குடிவத்து²தே³ஸனம் யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ குடிவத்து²ம் தே³ஸேதி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ குடிவத்து²ஸ்ஸ தே³ஸனா, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘தே³ஸிதம் ஸங்கே⁴ன இத்த²ன்னாமஸ்ஸ பி⁴க்கு²னோ குடிவத்து². க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

353. ஸாரம்ப⁴ம் நாம கிபில்லிகானம் வா ஆஸயோ ஹோதி, உபசிகானம் வா ஆஸயோ ஹோதி, உந்து³ரானம் வா ஆஸயோ ஹோதி, அஹீனம் வா ஆஸயோ ஹோதி, விச்சி²கானம் வா ஆஸயோ ஹோதி, ஸதபதீ³னம் வா ஆஸயோ ஹோதி, ஹத்தீ²னம் வா ஆஸயோ ஹோதி, அஸ்ஸானம் வா ஆஸயோ ஹோதி, ஸீஹானம் வா ஆஸயோ ஹோதி, ப்³யக்³கா⁴னம் வா ஆஸயோ ஹோதி, தீ³பீனம் வா ஆஸயோ ஹோதி, அச்சா²னம் வா ஆஸயோ ஹோதி, தரச்சா²னம் வா ஆஸயோ ஹோதி, யேஸம் கேஸஞ்சி திரச்சா²னக³தானம் பாணானம் ஆஸயோ ஹோதி, புப்³ப³ண்ணனிஸ்ஸிதம் வா ஹோதி, அபரண்ணனிஸ்ஸிதம் வா ஹோதி, அப்³பா⁴கா⁴தனிஸ்ஸிதம் வா ஹோதி, ஆகா⁴தனனிஸ்ஸிதம் வா ஹோதி, ஸுஸானனிஸ்ஸிதம் வா ஹோதி, உய்யானனிஸ்ஸிதம் வா ஹோதி, ராஜவத்து²னிஸ்ஸிதம் வா ஹோதி, ஹத்தி²ஸாலானிஸ்ஸிதம் வா ஹோதி, அஸ்ஸஸாலானிஸ்ஸிதம் வா ஹோதி, ப³ந்த⁴னாகா³ரனிஸ்ஸிதம் வா ஹோதி, பானாகா³ரனிஸ்ஸிதம் வா ஹோதி, ஸூனனிஸ்ஸிதம் வா ஹோதி, ரச்சா²னிஸ்ஸிதம் வா ஹோதி, சச்சரனிஸ்ஸிதம் வா ஹோதி, ஸபா⁴னிஸ்ஸிதம் வா ஹோதி, ஸம்ஸரணனிஸ்ஸிதம் வா [ஸஞ்சரணனிஸ்ஸிதம் வா (க.)] ஹோதி. ஏதம் ஸாரம்ப⁴ம் நாம.

அபரிக்கமனம் நாம ந ஸக்கா ஹோதி யதா²யுத்தேன ஸகடேன அனுபரிக³ந்தும் ஸமந்தா நிஸ்ஸேணியா அனுபரிக³ந்தும். ஏதம் அபரிக்கமனம் நாம.

அனாரம்ப⁴ம் நாம ந கிபில்லிகானம் வா ஆஸயோ ஹோதி, ந உபசிகானம் வா ஆஸயோ ஹோதி, ந உந்து³ரானம் வா ஆஸயோ ஹோதி, ந அஹீனம் வா ஆஸயோ ஹோதி, ந விச்சி²கானம் வா ஆஸயோ ஹோதி, ந ஸதபதீ³னம் வா ஆஸயோ ஹோதி…பே… ந ஸம்ஸரணனிஸ்ஸிதம் வா ஹோதி. ஏதம் அனாரம்ப⁴ம் நாம.

ஸபரிக்கமனம் நாம ஸக்கா ஹோதி யதா²யுத்தேன ஸகடேன அனுபரிக³ந்தும், ஸமந்தா நிஸ்ஸேணியா அனுபரிக³ந்தும். ஏதம் ஸபரிக்கமனம் நாம.

ஸஞ்ஞாசிகா நாம ஸயம் யாசித்வா புரிஸம்பி புரிஸத்த²கரம்பி…பே… மத்திகம்பி.

குடி நாம உல்லித்தா வா ஹோதி வா அவலித்தா வா உல்லித்தாவலித்தா வா.

காரேய்யாதி கரோதி வா காராபேதி வா.

பி⁴க்கூ² வா அனபி⁴னேய்ய, வத்து²தே³ஸனாய பமாணம் வா அதிக்காமேய்யாதி ஞத்திது³தியேன கம்மேன குடிவத்து²ம் ந தே³ஸாபேத்வா, ஆயாமதோ வா வித்தா²ரதோ வா அந்தமஸோ கேஸக்³க³மத்தம்பி அதிக்காமேத்வா கரோதி வா காராபேதி வா, பயோகே³ பயோகே³ து³க்கடம். ஏகம் பிண்ட³ம் அனாக³தே ஆபத்தி து²ல்லச்சயஸ்ஸ. தஸ்மிம் பிண்டே³ ஆக³தே ஆபத்தி ஸங்கா⁴தி³ஸேஸஸ்ஸ.

ஸங்கா⁴தி³ஸேஸோதி…பே… தேனபி வுச்சதி ஸங்கா⁴தி³ஸேஸோதி.

354. பி⁴க்கு² குடிம் கரோதி அதே³ஸிதவத்து²கம் ஸாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன த்³வின்னம் து³க்கடானம். பி⁴க்கு² குடிம் கரோதி அதே³ஸிதவத்து²கம் ஸாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ. பி⁴க்கு² குடிம் கரோதி அதே³ஸிதவத்து²கம் அனாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ. பி⁴க்கு² குடிம் கரோதி அதே³ஸிதவத்து²கம் அனாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸஸ்ஸ.

355. பி⁴க்கு² குடிம் கரோதி தே³ஸிதவத்து²கம் ஸாரம்ப⁴ம் அபரிக்கமனம், ஆபத்தி த்³வின்னம் து³க்கடானம். பி⁴க்கு² குடிம் கரோதி தே³ஸிதவத்து²கம் ஸாரம்ப⁴ம் ஸபரிக்கமனம், ஆபத்தி து³க்கடஸ்ஸ. பி⁴க்கு² குடிம் கரோதி தே³ஸிதவத்து²கம் அனாரம்ப⁴ம் அபரிக்கமனம், ஆபத்தி து³க்கடஸ்ஸ. பி⁴க்கு² குடிம் கரோதி தே³ஸிதவத்து²கம் அனாரம்ப⁴ம் ஸபரிக்கமனம், அனாபத்தி.

பி⁴க்கு² குடிம் கரோதி பமாணாதிக்கந்தம் ஸாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன த்³வின்னம் து³க்கடானம். பி⁴க்கு² குடிம் கரோதி பமாணாதிக்கந்தம் ஸாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ. பி⁴க்கு² குடிம் கரோதி பமாணாதிக்கந்தம் அனாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ. பி⁴க்கு² குடிம் கரோதி பமாணாதிக்கந்தம் அனாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸஸ்ஸ.

பி⁴க்கு² குடிம் கரோதி பமாணிகம் ஸாரம்ப⁴ம் அபரிக்கமனம், ஆபத்தி த்³வின்னம் து³க்கடானம். பி⁴க்கு² குடிம் கரோதி பமாணிகம் ஸாரம்ப⁴ம் ஸபரிக்கமனம், ஆபத்தி து³க்கடஸ்ஸ. பி⁴க்கு² குடிம் கரோதி பமாணிகம் அனாரம்ப⁴ம் அபரிக்கமனம், ஆபத்தி து³க்கடஸ்ஸ. பி⁴க்கு² குடிம் கரோதி பமாணிகம் அனாரம்ப⁴ம் ஸபரிக்கமனம், அனாபத்தி.

பி⁴க்கு² குடிம் கரோதி அதே³ஸிதவத்து²கம் பமாணாதிக்கந்தம் ஸாரம்ப⁴ம் அபரிக்கமனம், ஆபத்தி த்³வின்னம் ஸங்கா⁴தி³ஸேஸேன த்³வின்னம் து³க்கடானம். பி⁴க்கு² குடிம் கரோதி அதே³ஸிதவத்து²கம் பமாணாதிக்கந்தம் ஸாரம்ப⁴ம் ஸபரிக்கமனம், ஆபத்தி த்³வின்னம் ஸங்கா⁴தி³ஸேஸேன து³க்கடஸ்ஸ. பி⁴க்கு² குடிம் கரோதி அதே³ஸிதவத்து²கம் பமாணாதிக்கந்தம் அனாரம்ப⁴ம் அபரிக்கமனம், ஆபத்தி த்³வின்னம் ஸங்கா⁴தி³ஸேஸேன து³க்கடஸ்ஸ. பி⁴க்கு² குடிம் கரோதி அதே³ஸிதவத்து²கம் பமாணாதிக்கந்தம் அனாரம்ப⁴ம் ஸபரிக்கமனம், ஆபத்தி த்³வின்னம் ஸங்கா⁴தி³ஸேஸானம்.

பி⁴க்கு² குடிம் கரோதி தே³ஸிதவத்து²கம் பமாணிகம் ஸாரம்ப⁴ம் அபரிக்கமனம், ஆபத்தி த்³வின்னம் து³க்கடானம். பி⁴க்கு² குடிம் கரோதி தே³ஸிதவத்து²கம் பமாணிகம் ஸாரம்ப⁴ம் ஸபரிக்கமனம், ஆபத்தி து³க்கடஸ்ஸ. பி⁴க்கு² குடிம் கரோதி தே³ஸிதவத்து²கம் பமாணிகம் அனாரம்ப⁴ம் அபரிக்கமனம், ஆபத்தி து³க்கடஸ்ஸ. பி⁴க்கு² குடிம் கரோதி தே³ஸிதவத்து²கம் பமாணிகம் அனாரம்ப⁴ம் ஸபரிக்கமனம், அனாபத்தி.

356. பி⁴க்கு² ஸமாதி³ஸதி – ‘‘குடிம் மே கரோதா²’’தி. தஸ்ஸ குடிம் கரோந்தி அதே³ஸிதவத்து²கம் ஸாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸஸ்ஸ.

பி⁴க்கு² ஸமாதி³ஸதி – ‘‘குடிம் மே கரோதா²’’தி. தஸ்ஸ குடிம் கரோந்தி தே³ஸிதவத்து²கம் ஸாரம்ப⁴ம் அபரிக்கமனம், ஆபத்தி த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் ஸபரிக்கமனம், அனாபத்தி.

பி⁴க்கு² ஸமாதி³ஸதி – ‘‘குடிம் மே கரோதா²’’தி. தஸ்ஸ குடிம் கரோந்தி பமாணாதிக்கந்தம் ஸாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸஸ்ஸ.

பி⁴க்கு² ஸமாதி³ஸதி – ‘‘குடிம் மே கரோதா²’’தி. தஸ்ஸ குடிம் கரோந்தி பமாணிகம் ஸாரம்ப⁴ம் அபரிக்கமனம், ஆபத்தி த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் ஸபரிக்கமனம், அனாபத்தி.

பி⁴க்கு² ஸமாதி³ஸதி – ‘‘குடிம் மே கரோதா²’’தி. தஸ்ஸ குடிம் கரோந்தி அதே³ஸிதவத்து²கம் பமாணாதிக்கந்தம் ஸாரம்ப⁴ம் அபரிக்கமனம், ஆபத்தி த்³வின்னம் ஸங்கா⁴தி³ஸேஸேன த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி த்³வின்னம் ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி த்³வின்னம் ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் ஸபரிக்கமனம், ஆபத்தி த்³வின்னம் ஸங்கா⁴தி³ஸேஸானம்.

பி⁴க்கு² ஸமாதி³ஸதி – ‘‘குடிம் மே கரோதா²’’தி. தஸ்ஸ குடிம் கரோந்தி தே³ஸிதவத்து²கம் பமாணிகம் ஸாரம்ப⁴ம் அபரிக்கமனம், ஆபத்தி த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் ஸபரிக்கமனம், அனாபத்தி.

357. பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ந ச ஸமாதி³ஸதி – ‘‘தே³ஸிதவத்து²கா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி அதே³ஸிதவத்து²கம் ஸாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸஸ்ஸ.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ந ச ஸமாதி³ஸதி – ‘‘தே³ஸிதவத்து²கா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி தே³ஸிதவத்து²கம் ஸாரம்ப⁴ம் அபரிக்கமனம், ஆபத்தி த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் ஸபரிக்கமனம், அனாபத்தி.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ந ச ஸமாதி³ஸதி – ‘‘பமாணிகா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி பமாணாதிக்கந்தம் ஸாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸஸ்ஸ.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ந ச ஸமாதி³ஸதி – ‘‘பமாணிகா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி பமாணிகம் ஸாரம்ப⁴ம் அபரிக்கமனம், ஆபத்தி த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் ஸபரிக்கமனம், அனாபத்தி.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ந ச ஸமாதி³ஸதி – ‘‘தே³ஸிதவத்து²கா ச ஹோது பமாணிகா ச அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி அதே³ஸிதவத்து²கம் பமாணாதிக்கந்தம் ஸாரம்ப⁴ம் அபரிக்கமனம், ஆபத்தி த்³வின்னம் ஸங்கா⁴தி³ஸேஸேன த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி த்³வின்னம் ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி த்³வின்னம் ஸங்கா⁴தி³ஸேஸேன து³க்கடஸ்ஸ …பே… அனாரம்ப⁴ம் ஸபரிக்கமனம், ஆபத்தி த்³வின்னம் ஸங்கா⁴தி³ஸேஸானம்.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ந ச ஸமாதி³ஸதி – ‘‘தே³ஸிதவத்து²கா ச ஹோது பமாணிகா ச அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி தே³ஸிதவத்து²கம் பமாணிகம் ஸாரம்ப⁴ம் அபரிக்கமனம், ஆபத்தி த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் ஸபரிக்கமனம், அனாபத்தி.

358. பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி அதே³ஸிதவத்து²கம் ஸாரம்ப⁴ம் அபரிக்கமனம். ஸோ ஸுணாதி – ‘‘குடி கிர மே கயிரதி அதே³ஸிதவத்து²கா ஸாரம்பா⁴ அபரிக்கமனா’’தி. தேன பி⁴க்கு²னா ஸாமம் வா க³ந்தப்³ப³ம் தூ³தோ வா பாஹேதப்³போ³ – ‘‘தே³ஸிதவத்து²கா ச ஹோது அனாரம்பா⁴ ச ஸபரிக்கமனா சா’’தி. நோ சே ஸாமம் வா க³ச்சே²ய்ய தூ³தம் வா பஹிணேய்ய, ஆபத்தி து³க்கடஸ்ஸ.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி அதே³ஸிதவத்து²கம் ஸாரம்ப⁴ம் ஸபரிக்கமனம். ஸோ ஸுணாதி – ‘‘குடி கிர மே கயிரதி அதே³ஸிதவத்து²கா ஸாரம்பா⁴ ஸபரிக்கமனா’’தி. தேன பி⁴க்கு²னா ஸாமம் வா க³ந்தப்³ப³ம் தூ³தோ வா பாஹேதப்³போ³ – ‘‘தே³ஸிதவத்து²கா ச ஹோது அனாரம்பா⁴ சா’’தி. நோ சே ஸாமம் வா க³ச்சே²ய்ய தூ³தம் வா பஹிணேய்ய, ஆபத்தி து³க்கடஸ்ஸ.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி அதே³ஸிதவத்து²கம் அனாரம்ப⁴ம் அபரிக்கமனம். ஸோ ஸுணாதி – ‘‘குடி கிர மே கயிரதி அதே³ஸிதவத்து²கா அனாரம்பா⁴ அபரிக்கமனா’’தி. தேன பி⁴க்கு²னா ஸாமம் வா க³ந்தப்³ப³ம் தூ³தோ வா பாஹேதப்³போ³ – ‘‘தே³ஸிதவத்து²கா ச ஹோது ஸபரிக்கமனா சா’’தி. நோ சே ஸாமம் வா க³ச்சே²ய்ய தூ³தம் வா பஹிணேய்ய, ஆபத்தி து³க்கடஸ்ஸ.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி அதே³ஸிதவத்து²கம் அனாரம்ப⁴ம் ஸபரிக்கமனம். ஸோ ஸுணாதி – ‘‘குடி கிர மே கயிரதி அதே³ஸிதவத்து²கா அனாரம்பா⁴ ஸபரிக்கமனா’’தி. தேன பி⁴க்கு²னா ஸாமம் வா க³ந்தப்³ப³ம் தூ³தோ வா பாஹேதப்³போ³ – ‘‘தே³ஸிதவத்து²கா ஹோதூ’’தி. நோ சே ஸாமம் வா க³ச்சே²ய்ய தூ³தம் வா பஹிணேய்ய, ஆபத்தி து³க்கடஸ்ஸ.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி தே³ஸிதவத்து²கம் ஸாரம்ப⁴ம் அபரிக்கமனம். ஸோ ஸுணாதி – ‘‘குடி கிர மே கயிரதி தே³ஸிதவத்து²கா ஸாரம்பா⁴ அபரிக்கமனா’’தி. தேன பி⁴க்கு²னா ஸாமம் வா க³ந்தப்³ப³ம் தூ³தோ வா பாஹேதப்³போ³ – ‘‘அனாரம்பா⁴ ச ஹோது ஸபரிக்கமனா சா’’தி. நோ சே ஸாமம் வா க³ச்சே²ய்ய தூ³தம் வா பஹிணேய்ய, ஆபத்தி து³க்கடஸ்ஸ.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி தே³ஸிதவத்து²கம் ஸாரம்ப⁴ம் ஸபரிக்கமனம். ஸோ ஸுணாதி – ‘‘குடி கிர மே கயிரதி தே³ஸிதவத்து²கா ஸாரம்பா⁴ ஸபரிக்கமனா’’தி. தேன பி⁴க்கு²னா ஸாமம் வா க³ந்தப்³ப³ம் தூ³தோ வா பாஹேதப்³போ³ – ‘‘அனாரம்பா⁴ ஹோதூ’’தி. நோ சே ஸாமம் வா க³ச்சே²ய்ய தூ³தம் வா பஹிணேய்ய, ஆபத்தி து³க்கடஸ்ஸ.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி தே³ஸிதவத்து²கம் அனாரம்ப⁴ம் அபரிக்கமனம். ஸோ ஸுணாதி – ‘‘குடி கிர மே கயிரதி தே³ஸிதவத்து²கா அனாரம்பா⁴ அபரிக்கமனா’’தி. தேன பி⁴க்கு²னா ஸாமம் வா க³ந்தப்³ப³ம் தூ³தோ வா பாஹேதப்³போ³ – ‘‘ஸபரிக்கமனா ஹோதூ’’தி. நோ சே ஸாமம் வா க³ச்சே²ய்ய தூ³தம் வா பஹிணேய்ய, ஆபத்தி து³க்கடஸ்ஸ.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி தே³ஸிதவத்து²கம் அனாரம்ப⁴ம் ஸபரிக்கமனம், அனாபத்தி.

359. பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘பமாணிகா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி பமாணாதிக்கந்தம் ஸாரம்ப⁴ம் அபரிக்கமனம். ஸோ ஸுணாதி – ‘‘குடி கிர மே கயிரதி பமாணாதிக்கந்தா ஸாரம்பா⁴ அபரிக்கமனா’’தி. தேன பி⁴க்கு²னா ஸாமம் வா க³ந்தப்³ப³ம் தூ³தோ வா பாஹேதப்³போ³ – ‘‘பமாணிகா ச ஹோது அனாரம்பா⁴ ச ஸபரிக்கமனா சா’’தி…பே… ‘‘பமாணிகா ச ஹோது அனாரம்பா⁴ சா’’தி…பே… ‘‘பமாணிகா ச ஹோது ஸபரிக்கமனா சா’’தி…பே… ‘‘பமாணிகா ஹோதூ’’தி. நோ சே ஸாமம் வா க³ச்சே²ய்ய தூ³தம் வா பஹிணேய்ய, ஆபத்தி து³க்கடஸ்ஸ.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘பமாணிகா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி பமாணிகம் ஸாரம்ப⁴ம் அபரிக்கமனம். ஸோ ஸுணாதி – ‘‘குடி கிர மே கயிரதி பமாணிகா ஸாரம்பா⁴ அபரிக்கமனா’’தி. தேன பி⁴க்கு²னா ஸாமம் வா க³ந்தப்³ப³ம் தூ³தோ வா பாஹேதப்³போ³ – ‘‘அனாரம்பா⁴ ச ஹோது ஸபரிக்கமனா சா’’தி…பே… ‘‘அனாரம்பா⁴ ஹோதூ’’தி…பே… ‘‘ஸபரிக்கமனா ஹோதூ’’தி…பே… அனாபத்தி.

360. பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கா ச ஹோது பமாணிகா ச அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி அதே³ஸிதவத்து²கம் பமாணாதிக்கந்தம் ஸாரம்ப⁴ம் அபரிக்கமனம். ஸோ ஸுணாதி – ‘‘குடி கிர மே கயிரதி அதே³ஸிதவத்து²கா பமாணாதிக்கந்தா ஸாரம்பா⁴ அபரிக்கமனா’’தி. தேன பி⁴க்கு²னா ஸாமம் வா க³ந்தப்³ப³ம் தூ³தோ வா பாஹேதப்³போ³ – ‘‘தே³ஸிதவத்து²கா ச ஹோது பமாணிகா ச அனாரம்பா⁴ ச ஸபரிக்கமனா சா’’தி…பே… ‘‘தே³ஸிதவத்து²கா ச ஹோது பமாணிகா ச அனாரம்பா⁴ சா’’தி…பே… ‘‘தே³ஸிதவத்து²கா ச ஹோது பமாணிகா ச ஸபரிக்கமனா சா’’தி…பே… ‘‘தே³ஸிதவத்து²கா ச ஹோது பமாணிகா சா’’தி. நோ சே ஸாமம் வா க³ச்சே²ய்ய தூ³தம் வா பஹிணேய்ய, ஆபத்தி து³க்கடஸ்ஸ.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கா ச ஹோது பமாணிகா ச அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி தே³ஸிதவத்து²கம் பமாணிகம் ஸாரம்ப⁴ம் அபரிக்கமனம். ஸோ ஸுணாதி – ‘‘குடி கிர மே கயிரதி தே³ஸிதவத்து²கா பமாணிகா ஸாரம்பா⁴ அபரிக்கமனா’’தி. தேன பி⁴க்கு²னா ஸாமம் வா க³ந்தப்³ப³ம் தூ³தோ வா பாஹேதப்³போ³ – ‘‘அனாரம்பா⁴ ச ஹோது ஸபரிக்கமனா சா’’தி…பே… ‘‘அனாரம்பா⁴ ஹோதூ’’தி…பே… ‘‘ஸபரிக்கமனா ஹோதூ’’தி…பே… அனாபத்தி.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி அதே³ஸிதவத்து²கம் ஸாரம்ப⁴ம் அபரிக்கமனம், ஆபத்தி காருகானம் திண்ணம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி காருகானம் த்³வின்னம் து³க்கடானம்…பே… அனாரம்ப⁴ம் அபரிக்கமனம், ஆபத்தி காருகானம் த்³வின்னம் து³க்கடானம்…பே… அனாரம்ப⁴ம் ஸபரிக்கமனம், ஆபத்தி காருகானம் து³க்கடஸ்ஸ.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி தே³ஸிதவத்து²கம் ஸாரம்ப⁴ம் அபரிக்கமனம், ஆபத்தி காருகானம் த்³வின்னம் து³க்காடனம்…பே… ஸாரம்ப⁴ம் ஸபரிக்கமனம், ஆபத்தி காருகானம் து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி காருகானம் து³க்கடஸ்ஸ…பே… அனாரம்ப⁴ம் ஸபரிக்கமனம், அனாபத்தி.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘பமாணிகா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி பமாணாதிக்கந்தம் ஸாரம்ப⁴ம் அபரிக்கமனம், ஆபத்தி காருகானம் திண்ணம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி காருகானம் த்³வின்னம் து³க்கடானம்…பே… அனாரம்ப⁴ம் அபரிக்கமனம், ஆபத்தி காருகானம் த்³வின்னம் து³க்கடானம்…பே… அனாரம்ப⁴ம் ஸபரிக்கமனம் ஆபத்தி காருகானம் து³க்கடஸ்ஸ.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘பமாணிகா ச ஹோது அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி பமாணிகம் ஸாரம்ப⁴ம் அபரிக்கமனம், ஆபத்தி காருகானம் த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி காருகானம் து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி காருகானம் து³க்கடஸ்ஸ…பே… அனாரம்ப⁴ம் ஸபரிக்கமனம், அனாபத்தி.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கா ச ஹோது பமாணிகா ச அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி அதே³ஸிதவத்து²கம் பமாணாதிக்கந்தம் ஸாரம்ப⁴ம் அபரிக்கமனம், ஆபத்தி காருகானம் சதுன்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி காருகானம் திண்ணம் து³க்கடானம்…பே… அனாரம்ப⁴ம் அபரிக்கமனம், ஆபத்தி காருகானம் திண்ணம் து³க்கடானம்…பே… அனாரம்ப⁴ம் ஸபரிக்கமனம், ஆபத்தி காருகானம் த்³வின்னம் து³க்கடானம்.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. ஸமாதி³ஸதி ச – ‘‘தே³ஸிதவத்து²கா ச ஹோது பமாணிகா ச அனாரம்பா⁴ ச ஸபரிக்கமனா சா’’தி. தஸ்ஸ குடிம் கரோந்தி தே³ஸிதவத்து²கம் பமாணிகம் ஸாரம்ப⁴ம் அபரிக்கமனம், ஆபத்தி காருகானம் த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி காருகானம் து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி காருகானம் து³க்கடஸ்ஸ…பே… அனாரம்ப⁴ம் ஸபரிக்கமனம், அனாபத்தி.

361. பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. தஸ்ஸ குடிம் கரோந்தி அதே³ஸிதவத்து²கம் ஸாரம்ப⁴ம் அபரிக்கமனம். ஸோ சே விப்பகதே ஆக³ச்ச²தி, தேன பி⁴க்கு²னா ஸா குடி அஞ்ஞஸ்ஸ வா தா³தப்³பா³ பி⁴ந்தி³த்வா வா புன காதப்³பா³. நோ சே அஞ்ஞஸ்ஸ வா த³தே³ய்ய பி⁴ந்தி³த்வா வா புன காரேய்ய, ஆபத்தி ஸங்கா⁴தி³ஸேஸேன த்³வின்னம் து³க்கடானம்.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. தஸ்ஸ குடிம் கரோந்தி அதே³ஸிதவத்து²கம் ஸாரம்ப⁴ம் ஸபரிக்கமனம். ஸோ சே விப்பகதே ஆக³ச்ச²தி, தேன பி⁴க்கு²னா ஸா குடி அஞ்ஞஸ்ஸ வா தா³தப்³பா³ பி⁴ந்தி³த்வா வா புன காதப்³பா³. நோ சே அஞ்ஞஸ்ஸ வா த³தே³ய்ய பி⁴ந்தி³த்வா வா புன காரேய்ய, ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் அபரிக்கமனம்…பே… ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் ஸபரிக்கமனம்…பே… ஆபத்தி ஸங்கா⁴தி³ஸேஸஸ்ஸ.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. தஸ்ஸ குடிம் கரோந்தி தே³ஸிதவத்து²கம் ஸாரம்ப⁴ம் அபரிக்கமனம். ஸோ சே விப்பகதே ஆக³ச்ச²தி, தேன பி⁴க்கு²னா ஸா குடி அஞ்ஞஸ்ஸ வா தா³தப்³பா³ பி⁴ந்தி³த்வா வா புன காதப்³பா³. நோ சே அஞ்ஞஸ்ஸ வா த³தே³ய்ய பி⁴ந்தி³த்வா வா புன காரேய்ய, ஆபத்தி த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் ஸபரிக்கமனம், அனாபத்தி.

362. பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. தஸ்ஸ குடிம் கரோந்தி பமாணாதிக்கந்தம் ஸாரம்ப⁴ம் அபரிக்கமனம். ஸோ சே விப்பகதே ஆக³ச்ச²தி, தேன பி⁴க்கு²னா ஸா குடி அஞ்ஞஸ்ஸ வா தா³தப்³பா³ பி⁴ந்தி³த்வா வா புன காதப்³பா³. நோ சே அஞ்ஞஸ்ஸ வா த³தே³ய்ய பி⁴ந்தி³த்வா வா புன காரேய்ய, ஆபத்தி ஸங்கா⁴தி³ஸேஸேன த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் ஸபரிக்கமனம், ஆபத்தி ஸங்கா⁴தி³ஸேஸஸ்ஸ.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. தஸ்ஸ குடிம் கரோந்தி பமாணிகம் ஸாரம்ப⁴ம் அபரிக்கமனம். ஸோ சே விப்பகதே ஆக³ச்ச²தி, தேன பி⁴க்கு²னா ஸா குடி அஞ்ஞஸ்ஸ வா தா³தப்³பா³ பி⁴ந்தி³த்வா வா புன காதப்³பா³. நோ சே அஞ்ஞஸ்ஸ வா த³தே³ய்ய பி⁴ந்தி³த்வா வா புன காரேய்ய, ஆபத்தி த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் ஸபரிக்கமனம், அனாபத்தி.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. தஸ்ஸ குடிம் கரோந்தி அதே³ஸிதவத்து²கம் பமாணாதிக்கந்தம் ஸாரம்ப⁴ம் அபரிக்கமனம். ஸோ சே விப்பகதே ஆக³ச்ச²தி, தேன பி⁴க்கு²னா ஸா குடி அஞ்ஞஸ்ஸ வா தா³தப்³பா³ பி⁴ந்தி³த்வா வா புன காதப்³பா³. நோ சே அஞ்ஞஸ்ஸ வா த³தே³ய்ய பி⁴ந்தி³த்வா வா புன காரேய்ய, ஆபத்தி த்³வின்னம் ஸங்கா⁴தி³ஸேஸேன த்³வின்னம் து³க்கடானம்…பே… ஸாரம்ப⁴ம் ஸபரிக்கமனம், ஆபத்தி த்³வின்னம் ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி த்³வின்னம் ஸங்கா⁴தி³ஸேஸேன து³க்கடஸ்ஸ…பே… அனாரம்ப⁴ம் ஸபரிக்கமனம், ஆபத்தி த்³வின்னம் ஸங்கா⁴தி³ஸேஸானம்.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. தஸ்ஸ குடிம் கரோந்தி தே³ஸிதவத்து²கம் பமாணிகம் ஸாரம்ப⁴ம் அபரிக்கமனம். ஸோ சே விப்பகதே ஆக³ச்ச²தி, தேன பி⁴க்கு²னா ஸா குடி அஞ்ஞஸ்ஸ வா தா³தப்³பா³ பி⁴ந்தி³த்வா வா புன காதப்³பா³. நோ சே அஞ்ஞஸ்ஸ வா த³தே³ய்ய பி⁴ந்தி³த்வா வா புன காரேய்ய, ஆபத்தி த்³வின்னம் து³க்காடானம்…பே… ஸாரம்ப⁴ம் ஸபரிக்கமனம், ஆபத்தி து³க்கடஸ்ஸ…பே… அனாரம்ப⁴ம் அபரிக்கமனம், ஆபத்தி து³க்கடஸ்ஸ.

பி⁴க்கு² ஸமாதி³ஸித்வா பக்கமதி – ‘‘குடிம் மே கரோதா²’’தி. தஸ்ஸ குடிம் கரோந்தி தே³ஸிதவத்து²கம் பமாணிகம் அனாரம்ப⁴ம் ஸபரிக்கமனம், அனாபத்தி.

363. அத்தனா விப்பகதம் அத்தனா பரியோஸாபேதி, ஆபத்தி ஸங்கா⁴தி³ஸேஸஸ்ஸ.

அத்தனா விப்பகதம் பரேஹி பரியோஸாபேதி [பரியோஸாவாபேதி (க.)], ஆபத்தி ஸங்கா⁴தி³ஸேஸஸ்ஸ.

பரேஹி விப்பகதம் அத்தனா பரியோஸாபேதி, ஆபத்தி ஸங்கா⁴தி³ஸேஸஸ்ஸ.

பரேஹி விப்பகதம் பரேஹி பரியோஸாபேதி [பரியோஸாவாபேதி (க.)], ஆபத்தி ஸங்கா⁴தி³ஸேஸஸ்ஸ.

364. அனாபத்தி லேணே கு³ஹாய திணகுடிகாய அஞ்ஞஸ்ஸத்தா²ய வாஸாகா³ரம் ட²பேத்வா ஸப்³ப³த்த², அனாபத்தி உம்மத்தகஸ்ஸ ஆதி³கம்மிகஸ்ஸாதி.

குடிகாரஸிக்கா²பத³ம் நிட்டி²தம் ச²ட்ட²ம்.