3. து³ட்டு²ல்லவாசாஸிக்கா²பத³ம்

283. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உதா³யீ அரஞ்ஞே விஹரதி. தஸ்ஸாயஸ்மதோ விஹாரோ அபி⁴ரூபோ ஹோதி த³ஸ்ஸனீயோ பாஸாதி³கோ. தேன கோ² பன ஸமயேன ஸம்ப³ஹுலா இத்தி²யோ ஆராமம் ஆக³மம்ஸு விஹாரபேக்கி²காயோ. அத² கோ² தா இத்தி²யோ யேனாயஸ்மா உதா³யீ தேனுபஸங்கமிம்ஸு; உபஸங்கமித்வா ஆயஸ்மந்தம் உதா³யிம் ஏதத³வோசும் – ‘‘இச்சா²ம மயம், ப⁴ந்தே, அய்யஸ்ஸ விஹாரம் பேக்கி²து’’ந்தி. அத² கோ² ஆயஸ்மா உதா³யீ தா இத்தி²யோ விஹாரம் பேக்கா²பேத்வா தாஸம் இத்தீ²னம் வச்சமக்³க³ம் பஸ்ஸாவமக்³க³ம் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி யாசதிபி ஆயாசதிபி புச்ச²திபி படிபுச்ச²திபி ஆசிக்க²திபி அனுஸாஸதிபி அக்கோஸதிபி. யா தா இத்தி²யோ சி²ன்னிகா து⁴த்திகா அஹிரிகாயோ தா ஆயஸ்மதா உதா³யினா ஸத்³தி⁴ம் உஹஸந்திபி உல்லபந்திபி உஜ்ஜக்³க⁴ந்திபி உப்பண்டே³ந்திபி. யா பன தா இத்தி²யோ ஹிரிமனா தா நிக்க²மித்வா பி⁴க்கூ² உஜ்ஜா²பேந்தி – ‘‘இத³ம், ப⁴ந்தே, நச்ச²ன்னம் நப்பதிரூபம். ஸாமிகேனபி மயம் ஏவம் வுத்தா ந இச்சே²ய்யாம, கிம் பனாய்யேன உதா³யினா’’தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உதா³யீ மாதுகா³மம் து³ட்டு²ல்லாஹி வாசாஹி ஓபா⁴ஸிஸ்ஸதீ’’தி! அத² கோ² தே பி⁴க்கூ² ஆயஸ்மந்தம் உதா³யிம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா ஆயஸ்மந்தம் உதா³யிம் படிபுச்சி² – ‘‘ஸச்சம் கிர த்வம், உதா³யி, மாதுகா³மம் து³ட்டு²ல்லாஹி வாசாஹி ஓபா⁴ஸஸீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், மோக⁴புரிஸ, அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம த்வம், மோக⁴புரிஸ, மாதுகா³மம் து³ட்டு²ல்லாஹி வாசாஹி ஓபா⁴ஸிஸ்ஸஸி! நனு மயா, மோக⁴புரிஸ, அனேகபரியாயேன விராகா³ய த⁴ம்மோ தே³ஸிதோ நோ ஸராகா³ய…பே… காமபரிளாஹானம் வூபஸமோ அக்கா²தோ. நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

284. ‘‘யோ பன பி⁴க்கு² ஓதிண்ணோ விபரிணதேன சித்தேன மாதுகா³மம் து³ட்டு²ல்லாஹி வாசாஹி ஓபா⁴ஸேய்ய யதா² தம் யுவா யுவதிம் மேது²னுபஸம்ஹிதாஹி, ஸங்கா⁴தி³ஸேஸோ’’தி.

285. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ஓதிண்ணோ நாம ஸாரத்தோ அபேக்க²வா படிப³த்³த⁴சித்தோ.

விபரிணதந்தி ரத்தம்பி சித்தம் விபரிணதம், து³ட்ட²ம்பி சித்தம் விபரிணதம் மூள்ஹம்பி சித்தம் விபரிணதம். அபிச, ரத்தம் சித்தம் இமஸ்மிம் அத்தே² அதி⁴ப்பேதம் விபரிணதந்தி.

மாதுகா³மோ நாம மனுஸ்ஸித்தீ², ந யக்கீ², ந பேதீ, ந திரச்சா²னக³தா. விஞ்ஞூ படிப³லா ஸுபா⁴ஸிதது³ப்³பா⁴ஸிதம் து³ட்டு²ல்லாது³ட்டு²ல்லம் ஆஜானிதும்.

து³ட்டு²ல்லா நாம வாசா வச்சமக்³க³பஸ்ஸாவமக்³க³மேது²னத⁴ம்மப்படிஸம்யுத்தா வாசா.

ஓபா⁴ஸேய்யாதி அஜ்ஜா²சாரோ வுச்சதி.

யதா² தம் யுவா யுவதிந்தி த³ஹரோ த³ஹரிம், தருணோ தருணிம், காமபோ⁴கீ³ காமபோ⁴கி³னிம்.

மேது²னுபஸம்ஹிதாஹீதி மேது²னத⁴ம்மப்படிஸம்யுத்தாஹி.

ஸங்கா⁴தி³ஸேஸோதி …பே… தேனபி வுச்சதி ஸங்கா⁴தி³ஸேஸோதி.

த்³வே மக்³கே³ ஆதி³ஸ்ஸ வண்ணம்பி ப⁴ணதி, அவண்ணம்பி ப⁴ணதி, யாசதிபி, ஆயாசதிபி, புச்ச²திபி, படிபுச்ச²திபி, ஆசிக்க²திபி, அனுஸாஸதிபி, அக்கோஸதிபி.

வண்ணம் ப⁴ணதி நாம த்³வே மக்³கே³ தோ²மேதி வண்ணேதி பஸம்ஸதி.

அவண்ணம் ப⁴ணதி நாம த்³வே மக்³கே³ கு²ம்ஸேதி வம்பே⁴தி க³ரஹதி.

யாசதி நாம தே³ஹி மே, அரஹஸி மே தா³துந்தி.

ஆயாசதி நாம கதா³ தே மாதா பஸீதி³ஸ்ஸதி, கதா³ தே பிதா பஸீதி³ஸ்ஸதி, கதா³ தே தே³வதாயோ பஸீதி³ஸ்ஸந்தி, கதா³ [கதா³ தே (ஸ்யா.)] ஸுக²ணோ ஸுலயோ ஸுமுஹுத்தோ ப⁴விஸ்ஸதி, கதா³ தே மேது²னம் த⁴ம்மம் லபி⁴ஸ்ஸாமீதி.

புச்ச²தி நாம கத²ம் த்வம் ஸாமிகஸ்ஸ தே³ஸி, கத²ம் ஜாரஸ்ஸ தே³ஸீதி?

படிபுச்ச²தி நாம ஏவம் கிர த்வம் ஸாமிகஸ்ஸ தே³ஸி, ஏவம் ஜாரஸ்ஸ தே³ஸீதி.

ஆசிக்க²தி நாம புட்டோ² ப⁴ணதி – ‘‘ஏவம் தே³ஹி. ஏவம் தே³ந்தா ஸாமிகஸ்ஸ பியா ப⁴விஸ்ஸஸி மனாபா சா’’தி.

அனுஸாஸதி நாம அபுட்டோ² ப⁴ணதி – ‘‘ஏவம் தே³ஹி. ஏவம் தே³ந்தா ஸாமிகஸ்ஸ பியா ப⁴விஸ்ஸதி மனாபா சா’’தி.

அக்கோஸதி நாம அனிமித்தாஸி, நிமித்தமத்தாஸி, அலோஹிதாஸி, து⁴வலோஹிதாஸி, து⁴வசோளாஸி, பக்³க⁴ரந்தீஸி, ஸிக²ரணீஸி, இத்தி²பண்ட³காஸி, வேபுரிஸிகாஸி, ஸம்பி⁴ன்னாஸி, உப⁴தோப்³யஞ்ஜனாஸீதி.

286. இத்தீ² ச ஹோதி இத்தி²ஸஞ்ஞீ ஸாரத்தோ ச. பி⁴க்கு² ச நம் இத்தி²யா வச்சமக்³க³ம் பஸ்ஸாவமக்³க³ம் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி யாசதிபி ஆயாசதிபி புச்ச²திபி படிபுச்ச²திபி ஆசிக்க²திபி அனுஸாஸதிபி அக்கோஸதிபி, ஆபத்தி ஸங்கா⁴தி³ஸேஸஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. பி⁴க்கு² ச நம் த்³வின்னம் இத்தீ²னம் வச்சமக்³க³ம் பஸ்ஸாவமக்³க³ம் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே… அக்கோஸதிபி, ஆபத்தி த்³வின்னம் ஸங்கா⁴தி³ஸேஸானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் வச்சமக்³க³ம் பஸ்ஸாவமக்³க³ம் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே… அக்கோஸதிபி, ஆபத்தி ஸங்கா⁴தி³ஸேஸேன து³க்கடஸ்ஸ…பே….

இத்தீ² ச ஹோதி இத்தி²ஸஞ்ஞீ ஸாரத்தோ ச. பி⁴க்கு² ச நம் இத்தி²யா வச்சமக்³க³ம் பஸ்ஸாவமக்³க³ம் ட²பேத்வா அத⁴க்க²கம் உப்³ப⁴ஜாணுமண்ட³லம் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே… அக்கோஸதிபி, ஆபத்தி து²ல்லச்சயஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. பி⁴க்கு² ச நம் த்³வின்னம் இத்தீ²னம் வச்சமக்³க³ம் பஸ்ஸாவமக்³க³ம் ட²பேத்வா அத⁴க்க²கம் உப்³ப⁴ஜாணுமண்ட³லம் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே… அக்கோஸதிபி, ஆபத்தி த்³வின்னம் து²ல்லச்சயானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் வச்சமக்³க³ம் பஸ்ஸாவமக்³க³ம் ட²பேத்வா அத⁴க்க²கம் உப்³ப⁴ஜாணுமண்ட³லம் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே… அக்கோஸதிபி, ஆபத்தி து²ல்லச்சயேன து³க்கடஸ்ஸ…பே….

இத்தீ² ச ஹோதி இத்தி²ஸஞ்ஞீ ஸாரத்தோ ச. பி⁴க்கு² ச நம் இத்தி²யா உப்³ப⁴க்க²கம் அதோ⁴ஜாணுமண்ட³லம் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே… அக்கோஸதிபி, ஆபத்தி து³க்கடஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. பி⁴க்கு² ச நம் த்³வின்னம் இத்தீ²னம் உப்³ப⁴க்க²கம் அதோ⁴ஜாணுமண்ட³லம் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே… அக்கோஸதிபி, ஆபத்தி த்³வின்னம் து³க்கடானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் உப்³ப⁴க்க²கம் அதோ⁴ஜாணுமண்ட³லம் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே… அக்கோஸதிபி, ஆபத்தி த்³வின்னம் து³க்கடானம்…பே….

இத்தீ² ச ஹோதி இத்தி²ஸஞ்ஞீ ஸாரத்தோ ச. பி⁴க்கு² ச நம் இத்தி²யா காயபடிப³த்³த⁴ம் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே… அக்கோஸதிபி, ஆபத்தி து³க்கடஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. பி⁴க்கு² ச நம் த்³வின்னம் இத்தீ²னம் காயபடிப³த்³த⁴ம் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே… அக்கோஸதிபி, ஆபத்தி த்³வின்னம் து³க்கடானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயபடிப³த்³த⁴ம் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே… அக்கோஸதிபி, ஆபத்தி த்³வின்னம் து³க்கடானம்…பே….

287. அனாபத்தி அத்த²புரேக்கா²ரஸ்ஸ, த⁴ம்மபுரேக்கா²ரஸ்ஸ, அனுஸாஸனிபுரேக்கா²ரஸ்ஸ, உம்மத்தகஸ்ஸ, ஆதி³கம்மிகஸ்ஸாதி.

வினீதவத்து²உத்³தா³னகா³தா²

லோஹிதம் கக்கஸாகிண்ணம், க²ரம் தீ³க⁴ஞ்ச வாபிதம்;

கச்சி ஸம்ஸீத³தி மக்³கோ³, ஸத்³தா⁴ தா³னேன கம்முனாதி.

வினீதவத்து²

288. தேன கோ² பன ஸமயேன அஞ்ஞதரா இத்தீ² நவரத்தம் கம்ப³லம் பாருதா ஹோதி. அஞ்ஞதரோ பி⁴க்கு² ஸாரத்தோ தம் இத்தி²ம் ஏதத³வோச – ‘‘லோஹிதம் கோ² தே, ப⁴கி³னீ’’தி. ஸா ந படிவிஜானி. ‘‘ஆமாய்ய, நவரத்தோ கம்ப³லோ’’தி. தஸ்ஸ குக்குச்சம் அஹோஸி ‘‘ப⁴க³வதா ஸிக்கா²பத³ம் பஞ்ஞத்தம், கச்சி நு கோ² அஹம் ஸங்கா⁴தி³ஸேஸம் ஆபத்திம் ஆபன்னோ’’தி? ப⁴க³வதோ ஏதமத்த²ம் ஆரோசேஸி. ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரா இத்தீ² க²ரகம்ப³லம் பாருதா ஹோதி. அஞ்ஞதரோ பி⁴க்கு² ஸாரத்தோ தம் இத்தி²ம் ஏதத³வோச – ‘‘கக்கஸலோமம் கோ² தே, ப⁴கி³னீ’’தி. ஸா ந படிவிஜானி. ‘‘ஆமாய்ய, க²ரகம்ப³லகோ’’தி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரா இத்தீ² நவாவுதம் கம்ப³லம் பாருதா ஹோதி. அஞ்ஞதரோ பி⁴க்கு² ஸாரத்தோ தம் இத்தி²ம் ஏதத³வோச – ‘‘ஆகிண்ணலோமம் கோ² தே, ப⁴கி³னீ’’தி. ஸா ந படிவிஜானி. ‘‘ஆமாய்ய, நவாவுதோ கம்ப³லோ’’தி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரா இத்தீ² க²ரகம்ப³லம் பாருதா ஹோதி. அஞ்ஞதரோ பி⁴க்கு² ஸாரத்தோ தம் இத்தி²ம் ஏதத³வோச – ‘‘க²ரலோமம் கோ² தே, ப⁴கி³னீ’’தி. ஸா ந படிவிஜானி. ‘‘ஆமாய்ய, க²ரகம்ப³லகோ’’தி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரா இத்தீ² பாவாரம் [தீ³க⁴பாவாரம் (ஸ்யா.)] பாருதா ஹோதி. அஞ்ஞதரோ பி⁴க்கு² ஸாரத்தோ தம் இத்தி²ம் ஏதத³வோச – ‘‘தீ³க⁴லோமம் கோ² தே, ப⁴கி³னீ’’தி. ஸா ந படிவிஜானி. ‘‘ஆமாய்ய, பாவாரோ’’ [தீ³க⁴பாவாரோ (ஸ்யா.)] தி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.

289. தேன கோ² பன ஸமயேன அஞ்ஞதரா இத்தீ² கே²த்தம் வபாபேத்வா ஆக³ச்ச²தி. அஞ்ஞதரோ பி⁴க்கு² ஸாரத்தோ தம் இத்தி²ம் ஏதத³வோச – ‘‘வாபிதம் கோ² தே, ப⁴கி³னீ’’தி? ஸா ந படிவிஜானி. ‘‘ஆமாய்ய, நோ ச கோ² படிவுத்த’’ந்தி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² பரிப்³பா³ஜிகம் படிபதே² பஸ்ஸித்வா ஸாரத்தோ தம் பரிப்³பா³ஜிகம் ஏதத³வோச – ‘‘கச்சி, ப⁴கி³னி, மக்³கோ³ ஸம்ஸீத³தீ’’தி? ஸா ந படிவிஜானி. ‘‘ஆம பி⁴க்கு², படிபஜ்ஜிஸ்ஸஸீ’’தி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² ஸாரத்தோ அஞ்ஞதரம் இத்தி²ம் ஏதத³வோச – ‘‘ஸத்³தா⁴ஸி த்வம், ப⁴கி³னி. அபிச, யம் ஸாமிகஸ்ஸ தே³ஸி தம் நாம்ஹாகம் தே³ஸீ’’தி. ‘‘கிம், ப⁴ந்தே’’தி? ‘‘மேது²னத⁴ம்ம’’ந்தி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ ஸங்கா⁴தி³ஸேஸ’’ந்தி.

தேன கோ² பன ஸமயேன அஞ்ஞதரோ பி⁴க்கு² ஸாரத்தோ அஞ்ஞதரம் இத்தி²ம் ஏதத³வோச – ‘‘ஸத்³தா⁴ஸி த்வம், ப⁴கி³னி. அபிச, யம் அக்³க³தா³னம் தம் நாம்ஹாகம் தே³ஸீ’’தி. ‘‘கிம், ப⁴ந்தே, அக்³க³தா³ன’’ந்தி? ‘‘மேது²னத⁴ம்ம’’ந்தி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ ஸங்கா⁴தி³ஸேஸ’’ந்தி.

தேன கோ² பன ஸமயேன அஞ்ஞதரா இத்தீ² கம்மம் கரோதி. அஞ்ஞதரோ பி⁴க்கு² ஸாரத்தோ தம் இத்தி²ம் ஏதத³வோச – ‘‘திட்ட², ப⁴கி³னி, அஹம் கரிஸ்ஸாமீதி…பே… நிஸீத³, ப⁴கி³னி, அஹம் கரிஸ்ஸாமீதி…பே… நிபஜ்ஜ, ப⁴கி³னி, அஹம் கரிஸ்ஸாமீ’’தி. ஸா ந படிவிஜானி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.

து³ட்டு²ல்லவாசாஸிக்கா²பத³ம் நிட்டி²தம் ததியம்.