4. அத்தகாமபாரிசரியஸிக்கா²பத³ம்

290. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உதா³யீ ஸாவத்தி²யம் குலூபகோ ஹோதி, ப³ஹுகானி குலானி உபஸங்கமதி. தேன கோ² பன ஸமயேன அஞ்ஞதரா இத்தீ² மதபதிகா அபி⁴ரூபா ஹோதி த³ஸ்ஸனீயா பாஸாதி³கா. அத² கோ² ஆயஸ்மா உதா³யீ புப்³ப³ண்ஹஸமயம் நிவாஸேத்வா பத்தசீவரமாதா³ய யேன தஸ்ஸா இத்தி²யா நிவேஸனம் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² ஸா இத்தீ² யேனாயஸ்மா உதா³யீ தேனுபஸங்கமி; உபஸங்கமித்வா ஆயஸ்மந்தம் உதா³யிம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² தம் இத்தி²ம் ஆயஸ்மா உதா³யீ த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² ஸா இத்தீ² ஆயஸ்மதா உதா³யினா த⁴ம்மியா கதா²ய ஸந்த³ஸ்ஸிதா ஸமாத³பிதா ஸமுத்தேஜிதா ஸம்பஹம்ஸிதா ஆயஸ்மந்தம் உதா³யிம் ஏதத³வோச – ‘‘வதே³ய்யாத², ப⁴ந்தே, யேன அத்தோ². படிப³லா மயம் அய்யஸ்ஸ தா³தும் யதி³த³ம் சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ர’’ந்தி.

‘‘ந கோ² தே, ப⁴கி³னி, அம்ஹாகம் து³ல்லபா⁴ யதி³த³ம் சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா. அபிச, யோ அம்ஹாகம் து³ல்லபோ⁴ தம் தே³ஹீ’’தி. ‘‘கிம், ப⁴ந்தே’’தி? ‘‘மேது²னத⁴ம்ம’’ந்தி. ‘‘அத்தோ², ப⁴ந்தே’’தி? ‘‘அத்தோ², ப⁴கி³னீ’’தி. ‘‘ஏஹி, ப⁴ந்தே’’தி, ஓவரகம் பவிஸித்வா ஸாடகம் நிக்கி²பித்வா மஞ்சகே உத்தானா நிபஜ்ஜி. அத² கோ² ஆயஸ்மா உதா³யீ யேன ஸா இத்தீ² தேனுபஸங்கமி; உபஸங்கமித்வா – ‘‘கோ இமம் வஸலம் து³க்³க³ந்த⁴ம் ஆமஸிஸ்ஸதீ’’தி, நிட்டு²ஹித்வா பக்காமி. அத² கோ² ஸா இத்தீ² உஜ்ஜா²யதி கி²ய்யதி விபாசேதி – ‘‘அலஜ்ஜினோ இமே ஸமணா ஸக்யபுத்தியா து³ஸ்ஸீலா முஸாவாதி³னோ. இமே ஹி நாம த⁴ம்மசாரினோ ஸமசாரினோ ப்³ரஹ்மசாரினோ ஸச்சவாதி³னோ ஸீலவந்தோ கல்யாணத⁴ம்மா படிஜானிஸ்ஸந்தி! நத்தி² இமேஸம் ஸாமஞ்ஞம் நத்தி² இமேஸம் ப்³ரஹ்மஞ்ஞம், நட்ட²ம் இமேஸம் ஸாமஞ்ஞம் நட்ட²ம் இமேஸம் ப்³ரஹ்மஞ்ஞம், குதோ இமேஸம் ஸாமஞ்ஞம் குதோ இமேஸம் ப்³ரஹ்மஞ்ஞம், அபக³தா இமே ஸாமஞ்ஞா அபக³தா இமே ப்³ரஹ்மஞ்ஞா. கத²ஞ்ஹி நாம ஸமணோ உதா³யீ மம் ஸாமம் மேது²னத⁴ம்மம் யாசித்வா, ‘கோ இமம் வஸலம் து³க்³க³ந்த⁴ம் ஆமஸிஸ்ஸதீ’’தி நிட்டு²ஹித்வா பக்கமிஸ்ஸதி! கிம் மே பாபகம் கிம் மே து³க்³க³ந்த⁴ம், கஸ்ஸாஹம் கேன ஹாயாமீ’’தி? அஞ்ஞாபி இத்தி²யோ உஜ்ஜா²யந்தி கி²ய்யந்தி விபாசேந்தி – ‘‘அலஜ்ஜினோ இமே ஸமணா ஸக்யபுத்தியா து³ஸ்ஸீலா முஸாவாதி³னோ…பே… கத²ஞ்ஹி நாம ஸமணோ உதா³யீ இமிஸ்ஸா ஸாமம் மேது²னத⁴ம்மம் யாசித்வா, ‘கோ இமம் வஸலம் து³க்³க³ந்த⁴ம் ஆமஸிஸ்ஸதீ’தி நிட்டு²ஹித்வா பக்கமிஸ்ஸதி! கிம் இமிஸ்ஸா பாபகம் கிம் இமிஸ்ஸா து³க்³க³ந்த⁴ம், கஸ்ஸாயம் கேன ஹாயதீ’’தி? அஸ்ஸோஸும் கோ² பி⁴க்கூ² தாஸம் இத்தீ²னம் உஜ்ஜா²யந்தீனம் கி²ய்யந்தீனம் விபாசேந்தீனம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உதா³யீ மாதுகா³மஸ்ஸ ஸந்திகே அத்தகாமபாரிசரியாய வண்ணம் பா⁴ஸிஸ்ஸதீ’’தி!

அத² கோ² தே பி⁴க்கூ² ஆயஸ்மந்தம் உதா³யிம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா ஆயஸ்மந்தம் உதா³யிம் படிபுச்சி² – ‘‘ஸச்சம் கிர த்வம், உதா³யி, மாதுகா³மஸ்ஸ ஸந்திகே அத்தகாமபாரிசரியாய வண்ணம் பா⁴ஸஸீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், மோக⁴புரிஸ, அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம த்வம், மோக⁴புரிஸ, மாதுகா³மஸ்ஸ ஸந்திகே அத்தகாமபாரிசரியாய வண்ணம் பா⁴ஸிஸ்ஸஸி! நனு மயா, மோக⁴புரிஸ, அனேகபரியாயேன விராகா³ய த⁴ம்மோ தே³ஸிதோ நோ ஸராகா³ய…பே… காமபரிளாஹானம் வூபஸமோ அக்கா²தோ? நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

291. ‘‘யோ பன பி⁴க்கு² ஓதிண்ணோ விபரிணதேன சித்தேன மாதுகா³மஸ்ஸ ஸந்திகே அத்தகாமபாரிசரியாய வண்ணம் பா⁴ஸேய்ய – ‘ஏதத³க்³க³ம், ப⁴கி³னி, பாரிசரியானம் யா மாதி³ஸம் ஸீலவந்தம் கல்யாணத⁴ம்மம் ப்³ரஹ்மசாரிம் ஏதேன த⁴ம்மேன பரிசரேய்யாதி மேது²னுபஸம்ஹிதேன’, ஸங்கா⁴தி³ஸேஸோ’’தி.

292. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ஓதிண்ணோ நாம ஸாரத்தோ அபேக்க²வா படிப³த்³த⁴சித்தோ.

விபரிணதந்தி ரத்தம்பி சித்தம் விபரிணத்தம், து³ட்ட²ம்பி சித்தம் விபரிணதம், மூள்ஹம்பி சித்தம் விபரிணதம். அபிச, ரத்தம் சித்தம் இமஸ்மிம் அத்தே² அதி⁴ப்பேதம் விபரிணதந்தி.

மாதுகா³மோ நாம மனுஸ்ஸித்தீ², ந யக்கீ², ந பேதீ, ந திரச்சா²னக³தா. விஞ்ஞூ படிப³லா ஸுபா⁴ஸிதது³ப்³பா⁴ஸிதம் து³ட்ட²ல்லாது³ட்டு²ல்லம் ஆஜானிதும்.

மாதுகா³மஸ்ஸ ஸந்திகேதி மாதுகா³மஸ்ஸ ஸாமந்தா, மாதுகா³மஸ்ஸ அவிதூ³ரே.

அத்தகாமந்தி அத்தனோ காமம் அத்தனோ ஹேதும் அத்தனோ அதி⁴ப்பாயம் அத்தனோ பாரிசரியம்.

ஏதத³க்³க³ந்தி ஏதம் அக்³க³ம் ஏதம் ஸேட்ட²ம் ஏதம் மோக்க²ம் ஏதம் உத்தமம் ஏதம் பவரம்.

யாதி க²த்தியீ [க²த்தியா (ஸ்யா.)] வா ப்³ராஹ்மணீ வா வேஸ்ஸீ வா ஸுத்³தீ³ வா.

மாதி³ஸந்தி க²த்தியம் வா ப்³ராஹ்மணம் வா வேஸ்ஸம் வா ஸுத்³த³ம் வா.

ஸீலவந்தந்தி பாணாதிபாதா படிவிரதம், அதி³ன்னாதா³னா படிவிரதம், முஸாவாதா³ படிவிரதம்.

ப்³ரஹ்மசாரிந்தி மேது²னத⁴ம்மா படிவிரதம்.

கல்யாணத⁴ம்மோ நாம தேன ச ஸீலேன தேன ச ப்³ரஹ்மசரியேன கல்யாணத⁴ம்மோ ஹோதி.

ஏதேன த⁴ம்மேனாதி மேது²னத⁴ம்மேன.

பரிசரேய்யாதி அபி⁴ரமேய்ய.

மேது²னுபஸம்ஹிதேனாதி மேது²னத⁴ம்மப்படிஸம்யுத்தேன.

ஸங்கா⁴தி³ஸேஸோதி…பே… தேனபி வுச்சதி ஸங்கா⁴தி³ஸேஸோதி.

293. இத்தீ² ச ஹோதி இத்தி²ஸஞ்ஞீ ஸாரத்தோ ச. பி⁴க்கு² ச நம் இத்தி²யா ஸந்திகே அத்தகாமபாரிசரியாய வண்ணம் பா⁴ஸதி, ஆபத்தி ஸங்கா⁴தி³ஸேஸஸ்ஸ.

இத்தீ² ச ஹோதி வேமதிகோ…பே… பண்ட³கஸஞ்ஞீ… புரிஸஸஞ்ஞீ… திரச்சா²னக³தஸஞ்ஞீ ஸாரத்தோ ச. பி⁴க்கு² ச நம் இத்தி²யா ஸந்திகே அத்தகாமபாரிசரியாய வண்ணம் பா⁴ஸதி, ஆபத்தி து²ல்லச்சயஸ்ஸ.

பண்ட³கோ ச ஹோதி பண்ட³கஸஞ்ஞீ ஸாரத்தோ ச. பி⁴க்கு² ச நம் பண்ட³கஸ்ஸ ஸந்திகே அத்தகாமபாரிசரியாய வண்ணம் பா⁴ஸதி, ஆபத்தி து²ல்லச்சயஸ்ஸ.

பண்ட³கோ ச ஹோதி வேமதிகோ…பே… புரிஸஸஞ்ஞீ… திரச்சா²னக³தஸஞ்ஞீ… இத்தி²ஸஞ்ஞீ ஸாரத்தோ ச. பி⁴க்கு² ச நம் பண்ட³கஸ்ஸ ஸந்திகே அத்தகாமபாரிசரியாய வண்ணம் பா⁴ஸதி, ஆபத்தி து³க்கடஸ்ஸ.

புரிஸோ ச ஹோதி…பே… திரச்சா²னக³தோ ச ஹோதி திரச்சா²னக³தஸஞ்ஞீ…பே… வேமதிகோ இத்தி²ஸஞ்ஞீ… பண்ட³கஸஞ்ஞீ… புரிஸஸஞ்ஞீ ஸாரத்தோ ச. பி⁴க்கு² ச நம் திரச்சா²னக³தஸ்ஸ ஸந்திகே அத்தகாமபாரிசரியாய வண்ணம் பா⁴ஸதி, ஆபத்தி து³க்கடஸ்ஸ.

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. பி⁴க்கு² ச நம் த்³வின்னம் இத்தீ²னம் ஸந்திகே அத்தகாமபாரிசரியாய வண்ணம் பா⁴ஸதி, ஆபத்தி த்³வின்னம் ஸங்கா⁴தி³ஸேஸானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் ஸந்திகே அத்தகாமபாரிசரியாய வண்ணம் பா⁴ஸதி, ஆபத்தி ஸங்கா⁴தி³ஸேஸேன து³க்கடஸ்ஸ…பே….

294. அனாபத்தி ‘‘சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன உபட்ட²ஹா’’தி ப⁴ணதி, உம்மத்தகஸ்ஸ ஆதி³கம்மிகஸ்ஸாதி.

வினீதவத்து²உத்³தா³னகா³தா²

கத²ம் வஞ்ஜா² லபே⁴ புத்தம், பியா ச ஸுப⁴கா³ ஸியம்;

கிம் த³ஜ்ஜம் கேனுபட்டே²ய்யம், கத²ம் க³ச்சே²ய்யம் ஸுக்³க³திந்தி.

வினீதவத்து²

295. தேன கோ² பன ஸமயேன அஞ்ஞதரா வஞ்ஜா² இத்தீ² குலூபகம் பி⁴க்கு²ம் ஏதத³வோச – ‘‘கதா²ஹம், ப⁴ந்தே, விஜாயேய்ய’’ந்தி? ‘‘தேன ஹி, ப⁴கி³னி, அக்³க³தா³னம் தே³ஹீ’’தி. ‘‘கிம், ப⁴ந்தே, அக்³க³தா³ன’’ந்தி? ‘‘மேது²னத⁴ம்ம’’ந்தி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ ஸங்கா⁴தி³ஸேஸ’’ந்தி.

தேன கோ² பன ஸமயேன அஞ்ஞதரா விஜாயினீ இத்தீ² குலூபகம் பி⁴க்கு²ம் ஏதத³வோச – ‘‘கதா²ஹம், ப⁴ந்தே, புத்தம் லபே⁴ய்ய’’ந்தி? ‘‘தேன ஹி, ப⁴கி³னி, அக்³க³தா³னம் தே³ஹீ’’தி. ‘‘கிம், ப⁴ந்தே, அக்³க³தா³ன’’ந்தி? ‘‘மேது²னத⁴ம்ம’’ந்தி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ ஸங்கா⁴தி³ஸேஸ’’ந்தி.

தேன கோ² பன ஸமயேன அஞ்ஞதரா இத்தீ² குலூபகம் பி⁴க்கு²ம் ஏதத³வோச – ‘‘கதா²ஹம், ப⁴ந்தே, ஸாமிகஸ்ஸ பியா அஸ்ஸ’’ந்தி? ‘‘தேன ஹி, ப⁴கி³னி, அக்³க³தா³னம் தே³ஹீ’’தி. ‘‘கிம், ப⁴ந்தே, அக்³க³தா³ன’’ந்தி? ‘‘மேது²னத⁴ம்ம’’ந்தி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ ஸங்கா⁴தி³ஸேஸ’’ந்தி.

தேன கோ² பன ஸமயேன அஞ்ஞதரா இத்தீ² குலூபகம் பி⁴க்கு²ம் ஏதத³வோச – ‘‘கதா²ஹம், ப⁴ந்தே, ஸுப⁴கா³ அஸ்ஸ’’ந்தி? ‘‘தேன ஹி, ப⁴கி³னி, அக்³க³தா³னம் தே³ஹீ’’தி. ‘‘கிம், ப⁴ந்தே, அக்³க³தா³ன’’ந்தி? ‘‘மேது²னத⁴ம்ம’’ந்தி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ ஸங்கா⁴தி³ஸேஸ’’ந்தி.

தேன கோ² பன ஸமயேன அஞ்ஞதரா இத்தீ² குலூபகம் பி⁴க்கு²ம் ஏதத³வோச – ‘‘க்யாஹம், ப⁴ந்தே, அய்யஸ்ஸ த³ஜ்ஜாமீ’’தி? ‘‘அக்³க³தா³னம், ப⁴கி³னீ’’தி. ‘‘கிம், ப⁴ந்தே, அக்³க³தா³ன’’ந்தி? ‘‘மேது²னத⁴ம்ம’’ந்தி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ ஸங்கா⁴தி³ஸேஸ’’ந்தி.

தேன கோ² பன ஸமயேன அஞ்ஞதரா இத்தீ² குலூபகம் பி⁴க்கு²ம் ஏதத³வோச – ‘‘கேனாஹம், ப⁴ந்தே, அய்யம் உபட்டே²மீ’’தி? ‘‘அக்³க³தா³னேன, ப⁴கி³னீ’’தி. ‘‘கிம், ப⁴ந்தே, அக்³க³தா³ன’’ந்தி? ‘‘மேது²னத⁴ம்ம’’ந்தி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ ஸங்கா⁴தி³ஸேஸ’’ந்தி.

தேன கோ² பன ஸமயேன அஞ்ஞதரா இத்தீ² குலூபகம் பி⁴க்கு²ம் ஏதத³வோச – ‘‘கதா²ஹம்,

ப⁴ந்தே, ஸுக³திம் க³ச்சே²ய்ய’’ந்தி? ‘‘தேன ஹி, ப⁴கி³னி, அக்³க³தா³னம் தே³ஹீ’’தி. ‘‘கிம், ப⁴ந்தே, அக்³க³தா³ன’’ந்தி? ‘‘மேது²னத⁴ம்ம’’ந்தி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ ஸங்கா⁴தி³ஸேஸ’’ந்தி.

அத்தகாமபாரிசரியஸிக்கா²பத³ம் நிட்டி²தம் சதுத்த²ம்.