2. காயஸம்ஸக்³க³ஸிக்கா²பத³ம்

269. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உதா³யீ அரஞ்ஞே விஹரதி. தஸ்ஸாயஸ்மதோ விஹாரோ அபி⁴ரூபோ ஹோதி த³ஸ்ஸனீயோ பாஸாதி³கோ, மஜ்ஜே²க³ப்³போ⁴, ஸமந்தாபரியாகா³ரோ, ஸுபஞ்ஞத்தம் மஞ்சபீட²ம் பி⁴ஸிபி³ம்போ³ஹனம், பானீயம் பரிபோ⁴ஜனீயம் ஸுபட்டி²தம், பரிவேணம் ஸுஸம்மட்ட²ம். ப³ஹூ மனுஸ்ஸா ஆயஸ்மதோ உதா³யிஸ்ஸ விஹாரபேக்க²கா ஆக³ச்ச²ந்தி. அஞ்ஞதரோபி ப்³ராஹ்மணோ ஸபஜாபதிகோ யேனாயஸ்மா உதா³யீ தேனுபஸங்கமி; உபஸங்கமித்வா ஆயஸ்மந்தம் உதா³யிம் ஏதத³வோச – ‘‘இச்சா²ம மயம் போ⁴தோ உதா³யிஸ்ஸ விஹாரம் பேக்கி²து’’ந்தி. ‘‘தேன ஹி, ப்³ராஹ்மண, பேக்க²ஸ்ஸூ’’தி, அவாபுரணம் [அபாபுரணம் (ஸ்யா.)] ஆதா³ய க⁴டிகம் உக்³கா⁴டேத்வா கவாடம் பணாமேத்வா விஹாரம் பாவிஸி. ஸோபி கோ² ப்³ராஹ்மணோ ஆயஸ்மதோ உதா³யிஸ்ஸ பிட்டி²தோ பாவிஸி. ஸாபி கோ² ப்³ராஹ்மணீ தஸ்ஸ ப்³ராஹ்மணஸ்ஸ பிட்டி²தோ பாவிஸி. அத² கோ² ஆயஸ்மா உதா³யீ ஏகச்சே வாதபானே விவரந்தோ ஏகச்சே வாதபானே த²கேந்தோ க³ப்³ப⁴ம் அனுபரிக³ந்த்வா பிட்டி²தோ ஆக³ந்த்வா தஸ்ஸா ப்³ராஹ்மணியா அங்க³மங்கா³னி பராமஸி. அத² கோ² ஸோ ப்³ராஹ்மணோ ஆயஸ்மதா உதா³யினா ஸத்³தி⁴ம் படிஸம்மோதி³த்வா அக³மாஸி. அத² கோ² ஸோ ப்³ராஹ்மணோ அத்தமனோ அத்தமனவாசம் நிச்சா²ரேஸி – ‘‘உளாரா இமே ஸமணா ஸக்யபுத்தியா யே இமே ஏவரூபே அரஞ்ஞே விஹரந்தி. ப⁴வம்பி உதா³யீ உளாரோ யோ ஏவரூபே அரஞ்ஞே விஹரதீ’’தி.

ஏவம் வுத்தே ஸா ப்³ராஹ்மணீ தம் ப்³ராஹ்மணம் ஏதத³வோச – ‘‘குதோ தஸ்ஸ உளாரத்ததா! யதே²வ மே த்வம் அங்க³மங்கா³னி பராமஸி ஏவமேவ மே ஸமணோ உதா³யீ அங்க³மங்கா³னி பராமஸீ’’தி. அத² கோ² ஸோ ப்³ராஹ்மணோ உஜ்ஜா²யதி கி²ய்யதி விபாசேதி – ‘‘அலஜ்ஜினோ இமே ஸமணா ஸக்யபுத்தியா து³ஸ்ஸீலா முஸாவாதி³னோ. இமே ஹி நாம த⁴ம்மசாரினோ ஸமசாரினோ ப்³ரஹ்மசாரினோ ஸச்சவாதி³னோ ஸீலவந்தோ கல்யாணத⁴ம்மா படிஜானிஸ்ஸந்தி! நத்தி² இமேஸம் ஸாமஞ்ஞம் நத்தி² இமேஸம் ப்³ரஹ்மஞ்ஞம், நட்ட²ம் இமேஸம் ஸாமஞ்ஞம் நட்ட²ம் இமேஸம் ப்³ரஹ்மஞ்ஞம், குதோ இமேஸம் ஸாமஞ்ஞம் குதோ இமேஸம் ப்³ரஹ்மஞ்ஞம், அபக³தா இமே ஸாமஞ்ஞா அபக³தா இமே ப்³ரஹ்மஞ்ஞா. கத²ஞ்ஹி நாம ஸமணோ உதா³யீ மம ப⁴ரியாய அங்க³மங்கா³னி பராமஸிஸ்ஸதி! ந ஹி ஸக்கா குலித்தீ²ஹி குலதீ⁴தாஹி குலகுமாரீஹி குலஸுண்ஹாஹி குலதா³ஸீஹி ஆராமம் வா விஹாரம் வா க³ந்தும். ஸசே [ஸசே ஹி (ஸ்யா.)] குலித்தி²யோ குலதீ⁴தரோ [குலதீ⁴தாயோ (ஸீ. ஸ்யா.)] குலகுமாரியோ குலஸுண்ஹாயோ குலதா³ஸியோ ஆராமம் வா விஹாரம் வா க³ச்சே²ய்யும், தாபி ஸமணா ஸக்யபுத்தியா தூ³ஸேய்யு’’ந்தி!

அஸ்ஸோஸும் கோ² பி⁴க்கு² தஸ்ஸ ப்³ராஹ்மணஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உதா³யீ மாதுகா³மேன ஸத்³தி⁴ம் காயஸம்ஸக்³க³ம் ஸமாபஜ்ஜிஸ்ஸதீ’’தி! அத² கோ² தே பி⁴க்கூ² ஆயஸ்மந்தம் உதா³யிம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா ஆயஸ்மந்தம் உதா³யிம் படிபுச்சி² – ‘‘ஸச்சம் கிர த்வம், உதா³யி, மாதுகா³மேன ஸத்³தி⁴ம் காயஸம்ஸக்³க³ம் ஸமாபஜ்ஜஸீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், மோக⁴புரிஸ, அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம த்வம், மோக⁴புரிஸ, மாதுகா³மேன ஸத்³தி⁴ம் காயஸம்ஸக்³க³ம் ஸமாபஜ்ஜிஸ்ஸஸி! நனு மயா, மோக⁴புரிஸ, அனேகபரியாயேன விராகா³ய த⁴ம்மோ தே³ஸிதோ நோ ஸராகா³ய…பே… காமபரிளாஹானம் வூபஸமோ அக்கா²தோ. நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

270. ‘‘யோ பன பி⁴க்கு² ஓதிண்ணோ விபரிணதேன சித்தேன மாதுகா³மேன ஸத்³தி⁴ம் காயஸம்ஸக்³க³ம் ஸமாபஜ்ஜேய்ய ஹத்த²க்³கா³ஹம் வா வேணிக்³கா³ஹம் வா அஞ்ஞதரஸ்ஸ வா அஞ்ஞதரஸ்ஸ வா அங்க³ஸ்ஸ பராமஸனம், ஸங்கா⁴தி³ஸேஸோ’’தி.

271. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ஓதிண்ணோ நாம ஸாரத்தோ அபேக்க²வா படிப³த்³த⁴சித்தோ.

விபரிணதந்தி ரத்தம்பி சித்தம் விபரிணதம். து³ட்ட²ம்பி சித்தம் விபரிணதம். மூள்ஹம்பி சித்தம் விபரிணதம். அபிச, ரத்தம் சித்தம் இமஸ்மிம் அத்தே² அதி⁴ப்பேதம் விபரிணதந்தி.

மாதுகா³மோ நாம மனுஸ்ஸித்தீ², ந யக்கீ² ந பேதீ, ந திரச்சா²னக³தா. அந்தமஸோ தத³ஹுஜாதாபி தா³ரிகா, பகே³வ மஹத்தரீ.

ஸத்³தி⁴ந்தி ஏகதோ.

காயஸம்ஸக்³க³ம் ஸமாபஜ்ஜேய்யாதி அஜ்ஜா²சாரோ வுச்சதி.

ஹத்தோ² நாம கப்பரம் உபாதா³யம் யாவ அக்³க³னகா².

வேணீ நாம ஸுத்³த⁴கேஸா வா, ஸுத்தமிஸ்ஸா வா, மாலாமிஸ்ஸா வா, ஹிரஞ்ஞமிஸ்ஸா வா, ஸுவண்ணமிஸ்ஸா வா, முத்தாமிஸ்ஸா வா, மணிமிஸ்ஸா வா.

அங்க³ம் நாம ஹத்த²ஞ்ச வேணிஞ்ச ட²பேத்வா அவஸேஸம் அங்க³ம் நாம.

272. ஆமஸனா, பராமஸனா, ஓமஸனா, உம்மஸனா, ஓலங்க⁴னா, உல்லங்க⁴னா, ஆகட்³ட⁴னா, பதிகட்³ட⁴னா, அபி⁴னிக்³க³ண்ஹனா, அபி⁴னிப்பீளனா, க³ஹணம், சு²பனம்.

ஆமஸனா நாம ஆமட்ட²மத்தா.

பராமஸனா நாம இதோசிதோ ச ஸம்சோபனா.

ஓமஸனா நாம ஹேட்டா² ஓரோபனா.

உம்மஸனா நாம உத்³த⁴ம் உச்சாரணா.

ஓலங்க⁴னா நாம ஹேட்டா² ஓனமனா.

உல்லங்க⁴னா நாம உத்³த⁴ம் உச்சாரணா.

ஆகட்³ட⁴னா நாம ஆவிஞ்ச²னா [ஆவிஞ்ஜனா (ஸீ. ஸ்யா.)].

பதிகட்³ட⁴னா நாம பதிப்பணாமனா.

அபி⁴னிக்³க³ண்ஹனா நாம அங்க³ம் க³ஹேத்வா நிப்பீளனா.

அபி⁴னிப்பீளனா நாம கேனசி ஸஹ நிப்பீளனா.

க³ஹணம் நாம க³ஹிதமத்தம்.

சு²பனம் நாம பு²ட்ட²மத்தம்.

ஸங்கா⁴தி³ஸேஸோதி…பே… தேனபி வுச்சதி ஸங்கா⁴தி³ஸேஸோதி.

273. இத்தீ² ச ஹோதி இத்தி²ஸஞ்ஞீ ஸாரத்தோ ச பி⁴க்கு² ச. நம் இத்தி²யா காயேன காயம் ஆமஸதி பராமஸதி ஓமஸதி உம்மஸதி ஓலங்கே⁴தி உல்லங்கே⁴தி ஆகட்³ட⁴தி பதிகட்³ட⁴தி அபி⁴னிக்³க³ண்ஹாதி அபி⁴னிப்பீளேதி க³ண்ஹாதி சு²பதி, ஆபத்தி ஸங்கா⁴தி³ஸேஸஸ்ஸ.

இத்தீ² ச ஹோதி வேமதிகோ ஸாரத்தோ ச. பி⁴க்கு² ச நம் இத்தி²யா காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து²ல்லச்சயஸ்ஸ.

இத்தீ² ச ஹோதி பண்ட³கஸஞ்ஞீ ஸாரத்தோ ச. பி⁴க்கு² ச நம் இத்தி²யா காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து²ல்லச்சயஸ்ஸ.

இத்தீ² ச ஹோதி புரிஸஸஞ்ஞீ ஸாரத்தோ ச. பி⁴க்கு² ச நம் இத்தி²யா காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து²ல்லச்சயஸ்ஸ.

இத்தீ² ச ஹோதி திரச்சா²னக³தஸஞ்ஞீ ஸாரத்தோ ச. பி⁴க்கு² ச நம் இத்தி²யா காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து²ல்லச்சயஸ்ஸ.

பண்ட³கோ ச ஹோதி பண்ட³கஸஞ்ஞீ ஸாரத்தோ ச. பி⁴க்கு² ச நம் பண்ட³கஸ்ஸ காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து²ல்லச்சயஸ்ஸ.

பண்ட³கோ ச ஹோதி வேமதிகோ ஸாரத்தோ ச. பி⁴க்கு² ச நம் பண்ட³கஸ்ஸ காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து³க்கடஸ்ஸ.

பண்ட³கோ ச ஹோதி புரிஸஸஞ்ஞீ ஸாரத்தோ ச. பி⁴க்கு² ச நம் பண்ட³கஸ்ஸ காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து³க்கடஸ்ஸ.

பண்ட³கோ ச ஹோதி திரச்சா²னக³தஸஞ்ஞீ ஸாரத்தோ ச. பி⁴க்கு² ச நம் பண்ட³கஸ்ஸ காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து³க்கடஸ்ஸ.

பண்ட³கோ ச ஹோதி இத்தி²ஸஞ்ஞீ ஸாரத்தோ ச. பி⁴க்கு² ச நம் பண்ட³கஸ்ஸ காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து³க்கடஸ்ஸ.

புரிஸோ ச ஹோதி புரிஸஸஞ்ஞீ ஸாரத்தோ ச. பி⁴க்கு² ச நம் புரிஸஸ்ஸ காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து³க்கடஸ்ஸ.

புரிஸோ ச ஹோதி வேமதிகோ…பே… புரிஸோ ச ஹோதி திரச்சா²னக³தஸஞ்ஞீ… புரிஸோ ச ஹோதி இத்தி²ஸஞ்ஞீ… புரிஸோ ச ஹோதி பண்ட³கஸஞ்ஞீ ஸாரத்தோ ச. பி⁴க்கு² ச நம் புரிஸஸ்ஸ காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து³க்கடஸ்ஸ.

திரச்சா²னக³தோ ச ஹோதி திரச்சா²னக³தஸஞ்ஞீ ஸாரத்தோ ச. பி⁴க்கு² ச நம் திரச்சா²னக³தஸ்ஸ காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து³க்கடஸ்ஸ.

திரச்சா²னக³தோ ச ஹோதி வேமதிகோ…பே… திரச்சா²னக³தோ ச ஹோதி இத்தி²ஸஞ்ஞீ… திரச்சா²னக³தோ ச ஹோதி பண்ட³கஸஞ்ஞீ… திரச்சா²னக³தோ ச ஹோதி. புரிஸஸஞ்ஞீ ஸாரத்தோ ச. பி⁴க்கு² ச நம் திரச்சா²னக³தஸ்ஸ காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து³க்கடஸ்ஸ.

ஏகமூலகம் நிட்டி²தம்.

274. த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. பி⁴க்கு² ச நம் த்³வின்னம் இத்தீ²னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் ஸங்கா⁴தி³ஸேஸானம்.

த்³வே இத்தி²யோ த்³வின்னம் இத்தீ²னம் வேமதிகோ ஸாரத்தோ ச. பி⁴க்கு² ச நம் த்³வின்னம் இத்தீ²னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து²ல்லச்சயானம்.

த்³வே இத்தி²யோ த்³வின்னம் இத்தீ²னம் பண்ட³கஸஞ்ஞீ…பே… புரிஸஸஞ்ஞீ… திரச்சா²னக³தஸஞ்ஞீ ஸாரத்தோ ச. பி⁴க்கு² ச த்³வின்னம் இத்தீ²னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து²ல்லச்சயானம்.

த்³வே பண்ட³கா த்³வின்னம் பண்ட³கானம் பண்ட³கஸஞ்ஞீ ஸாரத்தோ ச பி⁴க்கு² ச நம் த்³வின்னம் பண்ட³கானம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து²ல்லச்சயானம்.

த்³வே பண்ட³கா த்³வின்னம் பண்ட³கானம் வேமதிகோ…பே… புரிஸஸஞ்ஞீ… திரச்சா²னக³தஸஞ்ஞீ… இத்தி²ஸஞ்ஞீ ஸாரத்தோ ச. பி⁴க்கு² ச நம் த்³வின்னம் பண்ட³கானம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து³க்கடானம்.

த்³வே புரிஸா த்³வின்னம் புரிஸானம் புரிஸஸஞ்ஞீ ஸாரத்தோ ச பி⁴க்கு² ச நம் த்³வின்னம் புரிஸானம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து³க்கடானம்.

த்³வே புரிஸா த்³வின்னம் புரிஸானம் வேமதிகோ…பே… திரச்சா²னக³தஸஞ்ஞீ… இத்தி²ஸஞ்ஞீ… பண்ட³கஸஞ்ஞீ ஸாரத்தோ ச. பி⁴க்கு² ச நம் த்³வின்னம் புரிஸானம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து³க்கடானம்.

த்³வே திரச்சா²னக³தா த்³வின்னம் திரச்சா²னக³தானம் திரச்சா²னக³தஸஞ்ஞீ ஸாரத்தோ ச. பி⁴க்கு² ச நம் த்³வின்னம் திரச்சா²னக³தானம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து³க்கடானம்.

த்³வே திரச்சா²னக³தா த்³வின்னம் திரச்சா²னக³தானம் வேமதிகோ…பே… இத்தி²ஸஞ்ஞீ… பண்ட³கஸஞ்ஞீ … புரிஸஸஞ்ஞீ ஸாரத்தோ ச. பி⁴க்கு² ச நம் த்³வின்னம் திரச்சா²னக³தானம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து³க்கடானம்.

275. இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி ஸங்கா⁴தி³ஸேஸேன து³க்கடஸ்ஸ.

இத்தீ² ச பண்ட³கோ ச உபி⁴ன்னம் வேமதிகோ ஸாரத்தோ ச. பி⁴க்கு² ச நம் உபி⁴ன்னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து²ல்லச்சயேன து³க்கடஸ்ஸ.

இத்தீ² ச பண்ட³கோ ச உபி⁴ன்னம் பண்ட³கஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து²ல்லச்சயானம்.

இத்தீ² ச பண்ட³கோ ச உபி⁴ன்னம் புரிஸஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து²ல்லச்சயேன து³க்கடஸ்ஸ.

இத்தீ² ச பண்ட³கோ ச உபி⁴ன்னம் திரச்சா²னக³தஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து²ல்லச்சயேன து³க்கடஸ்ஸ.

இத்தீ² ச புரிஸோ ச உபி⁴ன்னம் இத்தி²ஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி ஸங்கா⁴தி³ஸேஸேன து³க்கடஸ்ஸ.

இத்தீ² ச புரிஸோ ச உபி⁴ன்னம் வேமதிகோ…பே… பண்ட³கஸஞ்ஞீ… புரிஸஸஞ்ஞீ… திரச்சா²னக³தஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து²ல்லச்சயேன து³க்கடஸ்ஸ.

இத்தீ² ச திரச்சா²னக³தோ ச உபி⁴ன்னம் இத்தி²ஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி ஸங்கா⁴தி³ஸேஸேன து³க்கடஸ்ஸ.

இத்தீ² ச திரச்சா²னக³தோ ச உபி⁴ன்னம் வேமதிகோ…பே… பண்ட³கஸஞ்ஞீ… புரிஸஸஞ்ஞீ … திரச்சா²னக³தஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து²ல்லச்சயேன து³க்கடஸ்ஸ.

பண்ட³கோ ச புரிஸோ ச உபி⁴ன்னம் பண்ட³கஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து²ல்லச்சயேன து³க்கடஸ்ஸ.

பண்ட³கோ ச புரிஸோ ச உபி⁴ன்னம் வேமதிகோ…பே… புரிஸஸஞ்ஞீ… திரச்சா²னக³தஸஞ்ஞீ… இத்தி²ஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து³க்கடானம்.

பண்ட³கோ ச திரச்சா²னக³தோ ச உபி⁴ன்னம் பண்ட³கஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து²ல்லச்சயேன து³க்கடஸ்ஸ.

பண்ட³கோ ச திரச்சா²னக³தோ ச உபி⁴ன்னம் வேமதிகோ…பே… புரிஸஸஞ்ஞீ… திரச்சா²னக³தஸஞ்ஞீ… இத்தி²ஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து³க்கடானம்.

புரிஸோ ச திரச்சா²னக³தோ ச உபி⁴ன்னம் புரிஸஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து³க்கடானம்.

புரிஸோ ச திரச்சா²னக³தோ ச உபி⁴ன்னம் வேமதிகோ…பே… திரச்சா²னக³தஸஞ்ஞீ… இத்தி²ஸஞ்ஞீ… பண்ட³கஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயேன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து³க்கடானம்.

து³மூலகம் நிட்டி²தம்.

276. இத்தீ² ச ஹோதி இத்தி²ஸஞ்ஞீ ஸாரத்தோ ச. பி⁴க்கு² ச நம் இத்தி²யா காயேன காயபடிப³த்³த⁴ம் ஆமஸதி பராமஸதி…பே… க³ண்ஹாதி சு²பதி, ஆபத்தி து²ல்லச்சயஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. பி⁴க்கு² ச நம் த்³வின்னம் இத்தீ²னம் காயேன காயபடிப³த்³த⁴ம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து²ல்லச்சயானம் …பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயேன காயபடிப³த்³த⁴ம் ஆமஸதி பராமஸதி…பே… க³ண்ஹாதி சு²பதி, ஆபத்தி து²ல்லச்சயேன து³க்கடஸ்ஸ…பே….

இத்தீ² ச ஹோதி இத்தி²ஸஞ்ஞீ ஸாரத்தோ ச. பி⁴க்கு² ச நம் இத்தி²யா காயபடிப³த்³தே⁴ன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து²ல்லச்சயஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. பி⁴க்கு² ச நம் த்³வின்னம் இத்தீ²னம் காயபடிப³த்³தே⁴ன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து²ல்லச்சயானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயபடிப³த்³தே⁴ன காயம் ஆமஸதி பராமஸதி…பே… க³ண்ஹாதி சு²பதி, ஆபத்தி து²ல்லச்சயேன து³க்கடஸ்ஸ…பே….

இத்தீ² ச ஹோதி இத்தி²ஸஞ்ஞீ ஸாரத்தோ ச. பி⁴க்கு² ச நம் இத்தி²யா காயபடிப³த்³தே⁴ன காயபடிப³த்³த⁴ம் ஆமஸதி பராமஸதி…பே… க³ண்ஹாதி சு²பதி, ஆபத்தி து³க்கடஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. பி⁴க்கு² ச நம் த்³வின்னம் இத்தீ²னம் காயபடிப³த்³தே⁴ன காயபடிப³த்³த⁴ம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து³க்கடானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் காயபடிப³த்³தே⁴ன காயபடிப³த்³த⁴ம் ஆமஸதி பராமஸதி…பே… க³ண்ஹாதி சு²பதி, ஆபத்தி த்³வின்னம் து³க்கடானம்…பே….

இத்தீ² ச ஹோதி இத்தி²ஸஞ்ஞீ ஸாரத்தோ ச. பி⁴க்கு² ச நம் இத்தி²யா நிஸ்ஸக்³கி³யேன காயம் ஆமஸதி ஆபத்தி து³க்கடஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. பி⁴க்கு² ச நம் த்³வின்னம் இத்தீ²னம் நிஸ்ஸக்³கி³யேன காயம் ஆமஸதி, ஆபத்தி த்³வின்னம் து³க்கடானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் நிஸ்ஸக்³கி³யேன காயம் ஆமஸதி, ஆபத்தி த்³வின்னம் து³க்கடானம்…பே….

இத்தீ² ச ஹோதி இத்தி²ஸஞ்ஞீ ஸாரத்தோ ச. பி⁴க்கு² ச நம் இத்தி²யா நிஸ்ஸக்³கி³யேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. பி⁴க்கு² ச நம் த்³வின்னம் இத்தீ²னம் நிஸ்ஸக்³கி³யேன காயபடிப³த்³த⁴ம் ஆமஸதி, ஆபத்தி த்³வின்னம் து³க்கடானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் நிஸ்ஸக்³கி³யேன காயபடிப³த்³த⁴ம் ஆமஸதி, ஆபத்தி த்³வின்னம் து³க்கடானம்…பே….

இத்தீ² ச ஹோதி இத்தி²ஸஞ்ஞீ ஸாரத்தோ ச. பி⁴க்கு² ச நம் இத்தி²யா நிஸ்ஸக்³கி³யேன நிஸ்ஸக்³கி³யம் ஆமஸதி, ஆபத்தி து³க்கடஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. பி⁴க்கு² ச நம் த்³வின்னம் இத்தீ²னம் நிஸ்ஸக்³கி³யேன நிஸ்ஸக்³கி³யம் ஆமஸதி, ஆபத்தி த்³வின்னம் து³க்கடானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. பி⁴க்கு² ச நம் உபி⁴ன்னம் நிஸ்ஸக்³கி³யேன நிஸ்ஸக்³கி³யம் ஆமஸதி, ஆபத்தி த்³வின்னம் து³க்கடானம்…பே….

பி⁴க்கு²பேய்யாலோ நிட்டி²தோ.

277. இத்தீ² ச ஹோதி இத்தி²ஸஞ்ஞீ ஸாரத்தோ ச. இத்தீ² ச நம் பி⁴க்கு²ஸ்ஸ காயேன காயம் ஆமஸதி பராமஸதி ஓமஸதி உம்மஸதி ஓலங்கே⁴தி உல்லங்கே⁴தி ஆகட்³ட⁴தி பதிகட்³ட⁴தி அபி⁴னிக்³க³ண்ஹாதி அபி⁴னிப்பீளேதி க³ண்ஹாதி சு²பதி, ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி ஸங்கா⁴தி³ஸேஸஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. இத்தி²யோ ச நம் பி⁴க்கு²ஸ்ஸ காயேன காயம் ஆமஸந்தி பராமஸந்தி ஓமஸந்தி உம்மஸந்தி ஓலங்கே⁴ந்தி உல்லங்கே⁴ந்தி ஆகட்³ட⁴ந்தி பதிகட்³ட⁴ந்தி அபி⁴னிக்³க³ண்ஹந்தி அபி⁴னிப்பீளேந்தி க³ண்ஹந்தி சு²பந்தி, ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி த்³வின்னம் ஸங்கா⁴தி³ஸேஸானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. உபோ⁴ ச நம் பி⁴க்கு²ஸ்ஸ காயேன காயம் ஆமஸந்தி பராமஸந்தி…பே… க³ண்ஹந்தி சு²பந்தி, ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி ஸங்கா⁴தி³ஸேஸேன து³க்கடஸ்ஸ…பே….

இத்தீ² ச ஹோதி இத்தி²ஸஞ்ஞீ ஸாரத்தோ ச. இத்தீ² ச நம் பி⁴க்கு²ஸ்ஸ காயேன காயபடிப³த்³த⁴ம் ஆமஸதி பராமஸதி…பே… க³ண்ஹாதி சு²பதி, ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி து²ல்லச்சயஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. இத்தி²யோ ச நம் பி⁴க்கு²ஸ்ஸ காயேன காயபடிப³த்³த⁴ம் ஆமஸந்தி பராமஸந்தி…பே… க³ண்ஹந்தி சு²பந்தி, ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி த்³வின்னம் து²ல்லச்சயானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. உபோ⁴ ச நம் பி⁴க்கு²ஸ்ஸ காயேன காயபடிப³த்³த⁴ம் ஆமஸந்தி பராமஸந்தி…பே… க³ண்ஹந்தி சு²பந்தி, ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி து²ல்லச்சயேன து³க்கடஸ்ஸ…பே….

இத்தீ² ச ஹோதி இத்தி²ஸஞ்ஞீ ஸாரத்தோ ச. இத்தீ² ச நம் பி⁴க்கு²ஸ்ஸ காயபடிப³த்³தே⁴ன காயம் ஆமஸதி பராமஸதி…பே… க³ண்ஹாதி சு²பதி ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி து²ல்லச்சயஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. இத்தி²யோ ச நம் பி⁴க்கு²ஸ்ஸ காயபடிப³த்³தே⁴ன காயம் ஆமஸந்தி பராமஸந்தி…பே… க³ண்ஹந்தி சு²பந்தி, ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி த்³வின்னம் து²ல்லச்சயானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. உபோ⁴ ச நம் பி⁴க்கு²ஸ்ஸ காயபடிப³த்³தே⁴ன காயம் ஆமஸந்தி பராமஸந்தி…பே… க³ண்ஹந்தி சு²பந்தி, ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி து²ல்லச்சயேன து³க்கடஸ்ஸ…பே….

278. இத்தீ² ச ஹோதி இத்தி²ஸஞ்ஞீ ஸாரத்தோ ச. இத்தீ² ச நம் பி⁴க்கு²ஸ்ஸ காயபடிப³த்³தே⁴ன காயபடிப³த்³த⁴ம் ஆமஸதி பராமஸதி…பே… க³ண்ஹாதி சு²பதி, ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி து³க்கடஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. இத்தி²யோ ச நம் பி⁴க்கு²ஸ்ஸ காயபடிப³த்³தே⁴ன காயபடிப³த்³த⁴ம் ஆமஸந்தி பராமஸந்தி…பே… க³ண்ஹந்தி சு²பந்தி, ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி த்³வின்னம் து³க்கடானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. உபோ⁴ ச நம் பி⁴க்கு²ஸ்ஸ காயபடிப³த்³தே⁴ன காயபடிப³த்³த⁴ம் ஆமஸந்தி பராமஸந்தி…பே… க³ண்ஹந்தி சு²பந்தி, ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி த்³வின்னம் து³க்கடானம்…பே….

இத்தீ² ச ஹோதி இத்தி²ஸஞ்ஞீ ஸாரத்தோ ச. இத்தீ² ச நம் பி⁴க்கு²ஸ்ஸ நிஸ்ஸக்³கி³யேன காயம் ஆமஸதி. ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி து³க்கடஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. இத்தி²யோ ச நம் பி⁴க்கு²ஸ்ஸ நிஸ்ஸக்³கி³யேன காயம் ஆமஸந்தி. ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி த்³வின்னம் து³க்கடானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. உபோ⁴ ச நம் பி⁴க்கு²ஸ்ஸ நிஸ்ஸக்³கி³யேன காயம் ஆமஸந்தி. ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி த்³வின்னம் து³க்கடானம்…பே….

இத்தீ² ச ஹோதி இத்தி²ஸஞ்ஞீ ஸாரத்தோ ச. இத்தீ² ச நம் பி⁴க்கு²ஸ்ஸ நிஸ்ஸக்³கி³யேன காயபடிப³த்³த⁴ம் ஆமஸதி. ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி து³க்கடஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. இத்தி²யோ ச நம் பி⁴க்கு²ஸ்ஸ நிஸ்ஸக்³கி³யேன காயபடிப³த்³த⁴ம் ஆமஸந்தி. ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி த்³வின்னம் து³க்கடானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. உபோ⁴ ச நம் பி⁴க்கு²ஸ்ஸ நிஸ்ஸக்³கி³யேன காயபடிப³த்³த⁴ம் ஆமஸந்தி. ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி த்³வின்னம் து³க்கடானம்…பே….

இத்தீ² ச ஹோதி இத்தி²ஸஞ்ஞீ ஸாரத்தோ ச. இத்தீ² ச நம் பி⁴க்கு²ஸ்ஸ நிஸ்ஸக்³கி³யேன நிஸ்ஸக்³கி³யம் ஆமஸதி. ஸேவனாதி⁴ப்பாயோ காயேன வாயமதி, ந ச ப²ஸ்ஸம் படிவிஜானாதி, ஆபத்தி து³க்கடஸ்ஸ…பே….

த்³வே இத்தி²யோ த்³வின்னம் இத்தீ²னம் இத்தி²ஸஞ்ஞீ ஸாரத்தோ ச. இத்தி²யோ ச நம் பி⁴க்கு²ஸ்ஸ நிஸ்ஸக்³கி³யேன நிஸ்ஸக்³கி³யம் ஆமஸந்தி. ஸேவனாதி⁴ப்பாயோ காயேன வாயமதி, ந ச ப²ஸ்ஸம் படிவிஜானாதி, ஆபத்தி த்³வின்னம் து³க்கடானம்…பே….

இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஸாரத்தோ ச. உபோ⁴ ச நம் பி⁴க்கு²ஸ்ஸ நிஸ்ஸக்³கி³யேன நிஸ்ஸக்³கி³யம் ஆமஸந்தி. ஸேவனாதி⁴ப்பாயோ காயேன வாயமதி, ந ச ப²ஸ்ஸம் படிவிஜானாதி, ஆபத்தி த்³வின்னம் து³க்கடானம்…பே….

279. ஸேவனாதி⁴ப்பாயோ காயேன வாயமதி ப²ஸ்ஸம் படிவிஜானாதி, ஆபத்தி ஸங்கா⁴தி³ஸேஸஸ்ஸ.

ஸேவனாதி⁴ப்பாயோ காயேன வாயமதி, ந ச ப²ஸ்ஸம் படிவிஜானாதி, ஆபத்தி து³க்கடஸ்ஸ.

ஸேவனாதி⁴ப்பாயோ ந ச காயேன வாயமதி, ப²ஸ்ஸம் படிவிஜானாதி, அனாபத்தி.

ஸேவனாதி⁴ப்பாயோ ந ச காயேன வாயமதி, ந ச ப²ஸ்ஸம் படிவிஜானாதி, அனாபத்தி.

மோக்கா²தி⁴ப்பாயோ காயேன வாயமதி, ப²ஸ்ஸம் படிவிஜானாதி, அனாபத்தி.

மோக்கா²தி⁴ப்பாயோ காயேன வாயமதி, ந ச ப²ஸ்ஸம் படிவிஜானாதி, அனாபத்தி.

மோக்கா²தி⁴ப்பாயோ ந ச காயேன வாயமதி, ப²ஸ்ஸம் படிவிஜானாதி, அனாபத்தி.

மோக்கா²தி⁴ப்பாயோ ந ச காயேன வாயமதி, ந ச ப²ஸ்ஸம் படிவிஜானாதி, அனாபத்தி.

280. அனாபத்தி அஸஞ்சிச்ச, அஸதியா, அஜானந்தஸ்ஸ, அஸாதி³யந்தஸ்ஸ, உம்மத்தகஸ்ஸ, கி²த்தசித்தஸ்ஸ, வேத³னாட்டஸ்ஸ, ஆதி³கம்மிகஸ்ஸாதி.

வினீதவத்து²உத்³தா³னகா³தா²

மாதா தீ⁴தா ப⁴கி³னீ ச, ஜாயா யக்கீ² ச பண்ட³கோ;

ஸுத்தா மதா திரச்சா²னா, தா³ருதி⁴தலிகாய ச.

ஸம்பீளே ஸங்கமோ மக்³கோ³, ருக்கோ² நாவா ச ரஜ்ஜு ச;

த³ண்டோ³ பத்தம் பணாமேஸி, வந்தே³ வாயமி நச்சு²பேதி.

வினீதவத்து²

281. தேன கோ² பன ஸமயேன அஞ்ஞதரோ பி⁴க்கு² மாதுயா மாதுபேமேன ஆமஸி. தஸ்ஸ குக்குச்சம் அஹோஸி – ‘‘ப⁴க³வதா ஸிக்கா²பத³ம் பஞ்ஞத்தம், கச்சி நு கோ² அஹம் ஸங்கா⁴தி³ஸேஸம் ஆபத்திம் ஆபன்னோ’’தி? ப⁴க³வதோ ஏதமத்த²ம் ஆரோசேஸி. ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² தீ⁴துயா தீ⁴துபேமேன ஆமஸி…பே… ப⁴கி³னியா ப⁴கி³னிபேமேன ஆமஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² புராணது³தியிகாய காயஸம்ஸக்³க³ம் ஸமாபஜ்ஜி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ ஸங்கா⁴தி³ஸேஸ’’ந்தி.

தேன கோ² பன ஸமயேன அஞ்ஞதரோ பி⁴க்கு² யக்கி²னியா காயஸம்ஸக்³க³ம் ஸமாபஜ்ஜி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² பண்ட³கஸ்ஸ காயஸம்ஸக்³க³ம் ஸமாபஜ்ஜி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² ஸுத்தித்தி²யா காயஸம்ஸக்³க³ம் ஸமாபஜ்ஜி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ ஸங்கா⁴தி³ஸேஸ’’ந்தி.

தேன கோ² பன ஸமயேன அஞ்ஞதரோ பி⁴க்கு² மதித்தி²யா காயஸம்ஸக்³க³ம் ஸமாபஜ்ஜி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² திரச்சா²னக³தித்தி²யா காயஸம்ஸக்³க³ம் ஸமாபஜ்ஜி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² தா³ருதீ⁴தலிகாய காயஸம்ஸக்³க³ம் ஸமாபஜ்ஜி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.

282. தேன கோ² பன ஸமயேன ஸம்ப³ஹுலா இத்தி²யோ அஞ்ஞதரம் பி⁴க்கு²ம் ஸம்பீளேத்வா பா³ஹாபரம்பராய ஆனேஸும். தஸ்ஸ குக்குச்சம் அஹோஸி…பே… ‘‘ஸாதி³யி த்வம், பி⁴க்கூ²’’தி? ‘‘நாஹம், ப⁴க³வா, ஸாதி³யி’’ந்தி. ‘‘அனாபத்தி, பி⁴க்கூ², அஸாதி³யந்தஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² இத்தி²யா அபி⁴ரூள்ஹம் ஸங்கமம் ஸாரத்தோ ஸஞ்சாலேஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² இத்தி²ம் படிபதே² பஸ்ஸித்வா ஸாரத்தோ அம்ஸகூடேன பஹாரம் அதா³ஸி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ ஸங்கா⁴தி³ஸேஸ’’ந்தி.

தேன கோ² பன ஸமயேன அஞ்ஞதரோ பி⁴க்கு² இத்தி²யா அபி⁴ரூள்ஹம் ருக்க²ம் ஸாரத்தோ ஸஞ்சாலேஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² இத்தி²யா அபி⁴ரூள்ஹம் நாவம் ஸாரத்தோ ஸஞ்சாலேஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² இத்தி²யா க³ஹிதம் ரஜ்ஜும் ஸாரத்தோ ஆவிஞ்சி² [ஆவிஞ்ஜி (ஸீ. ஸ்யா.)]. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² இத்தி²யா க³ஹிதம் த³ண்ட³ம் ஸாரத்தோ ஆவிஞ்சி². தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² ஸாரத்தோ இத்தி²ம் பத்தேன பணாமேஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² இத்தி²யா வந்த³ந்தியா ஸாரத்தோ பாத³ம் உச்சாரேஸி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ ஸங்கா⁴தி³ஸேஸ’’ந்தி.

தேன கோ² பன ஸமயேன அஞ்ஞதரோ பி⁴க்கு² இத்தி²ம் க³ஹேஸ்ஸாமீதி வாயமித்வா ந சு²பி.

தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.

காயஸம்ஸக்³க³ஸிக்கா²பத³ம் நிட்டி²தம் து³தியம்.