12. து³ப்³ப³சஸிக்கா²பத³ம்

424. தேன ஸமயேன பு³த்³தோ⁴ ப⁴க³வா கோஸம்பி³யம் விஹரதி கோ⁴ஸிதாராமே. தேன கோ² பன ஸமயேன ஆயஸ்மா ச²ன்னோ அனாசரம் ஆசரதி. பி⁴க்கூ² ஏவமாஹம்ஸு – ‘‘மாவுஸோ, ச²ன்ன, ஏவரூபம் அகாஸி. நேதம் கப்பதீ’’தி. ஸோ ஏவம் வதே³தி – ‘‘கிம் நு கோ² நாம தும்ஹே, ஆவுஸோ, மம் வத்தப்³ப³ம் மஞ்ஞத²? அஹம் கோ² நாம தும்ஹே வதே³ய்யம். அம்ஹாகம் பு³த்³தோ⁴ அம்ஹாகம் த⁴ம்மோ அம்ஹாகம் அய்யபுத்தேன த⁴ம்மோ அபி⁴ஸமிதோ. ஸேய்யதா²பி நாம மஹாவாதோ வாயந்தோ திணகட்ட²பண்ணஸடம் [திணகட்ட²பண்ணகஸடம் (க.)] ஏகதோ உஸ்ஸாரேய்ய, ஸேய்யதா² வா பன நதீ³ பப்³ப³தேய்யா ஸங்க²ஸேவாலபணகம் ஏகதோ உஸ்ஸாரேய்ய, ஏவமேவ தும்ஹே நானானாமா நானாகோ³த்தா நானாஜச்சா நானாகுலா பப்³ப³ஜிதா ஏகதோ உஸ்ஸரிதா. கிம் நு கோ² நாம தும்ஹே, ஆவுஸோ, மம் வத்தப்³ப³ம் மஞ்ஞத²? அஹம் கோ² நாம தும்ஹே வதே³ய்யம்! அம்ஹாகம் பு³த்³தோ⁴ அம்ஹாகம் த⁴ம்மோ அம்ஹாகம் அய்யபுத்தேன த⁴ம்மோ அபி⁴ஸமிதோ’’தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா ச²ன்னோ பி⁴க்கூ²ஹி ஸஹத⁴ம்மிகம் வுச்சமானோ அத்தானம் அவசனீயம் கரிஸ்ஸதீ’’தி! அத² கோ² தே பி⁴க்கூ² ஆயஸ்மந்தம் ச²ன்னம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர த்வம், ச²ன்ன, பி⁴க்கூ²ஹி ஸஹத⁴ம்மிகம் வுச்சமானோ அத்தானம் அவசனீயம் கரோஸீ’’தி? ‘‘ஸச்சம் ப⁴க³வா’’தி. விக³ரஹி பு³த்³தோ⁴ ப⁴க³வா…பே… ‘‘கத²ஞ்ஹி நாம த்வம், மோக⁴புரிஸ, பி⁴க்கூ²ஹி ஸஹத⁴ம்மிகம் வுச்சமானோ அத்தானம் அவசனீயம் கரிஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

425. ‘‘பி⁴க்கு² பனேவ து³ப்³ப³சஜாதிகோ ஹோதி உத்³தே³ஸபரியாபன்னேஸு ஸிக்கா²பதே³ஸு பி⁴க்கூ²ஹி ஸஹத⁴ம்மிகம் வுச்சமானோ அத்தானம் அவசனீயம் கரோதி – ‘மா மம் ஆயஸ்மந்தோ கிஞ்சி அவசுத்த² கல்யாணம் வா பாபகம் வா, அஹம்பாயஸ்மந்தே ந கிஞ்சி வக்கா²மி கல்யாணம் வா பாபகம் வா, விரமதா²யஸ்மந்தோ மம வசனாயா’தி, ஸோ பி⁴க்கு² பி⁴க்கூ²ஹி ஏவமஸ்ஸ வசனீயோ – ‘மாயஸ்மா அத்தானம் அவசனீயம் அகாஸி, வசனீயமேவாயஸ்மா அத்தானம் கரோது, ஆயஸ்மாபி பி⁴க்கூ² வதே³து ஸஹத⁴ம்மேன, பி⁴க்கூ²பி ஆயஸ்மந்தம் வக்க²ந்தி ஸஹத⁴ம்மேன. ஏவம் ஸம்வத்³தா⁴ ஹி தஸ்ஸ ப⁴க³வதோ பரிஸா யதி³த³ம் அஞ்ஞமஞ்ஞவசனேன அஞ்ஞமஞ்ஞவுட்டா²பனேனாதி. ஏவஞ்ச ஸோ பி⁴க்கு²ம் பி⁴க்கூ²ஹி வுச்சமானோ ததே²வ பக்³க³ண்ஹேய்ய, ஸோ பி⁴க்கு² பி⁴க்கூ²ஹி யாவததியம் ஸமனுபா⁴ஸிதப்³போ³ தஸ்ஸ படினிஸ்ஸக்³கா³ய. யாவததியஞ்சே ஸமனுபா⁴ஸீயமானோ தம் படினிஸ்ஸஜ்ஜேய்ய, இச்சேதம் குஸலம்; நோ சே படினிஸ்ஸஜ்ஜேய்ய, ஸங்கா⁴தி³ஸேஸோ’’தி.

426. பி⁴க்கூ² பனேவ து³ப்³ப³சஜாதிகோ ஹோதீதி து³ப்³ப³சோ ஹோதி தோ³வசஸ்ஸகரணேஹி த⁴ம்மேஹி ஸமன்னாக³தோ அக்க²மோ அப்பத³க்கி²ணக்³கா³ஹீ அனுஸாஸனிம்.

உத்³தே³ஸபரியாபன்னேஸு ஸிக்கா²பதே³ஸூதி பாதிமோக்க²பரியாபன்னேஸு ஸிக்கா²பதே³ஸு.

பி⁴க்கூ²ஹீதி அஞ்ஞேஹி பி⁴க்கூ²ஹி.

ஸஹத⁴ம்மிகம் நாம யம் ப⁴க³வதா பஞ்ஞத்தம் ஸிக்கா²பத³ம், ஏதம் ஸஹத⁴ம்மிகம் நாம.

தேன வுச்சமானோ அத்தானம் அவசனீயம் கரோதி – ‘‘மா மம் ஆயஸ்மந்தோ கிஞ்சி அவசுத்த² கல்யாணம் வா பாபகம் வா, அஹம்பாயஸ்மந்தே ந கிஞ்சி வக்கா²மி கல்யாணம் வா பாபகம் வா. விரமதா²யஸ்மந்தோ மம வசனாயா’’தி.

ஸோ பி⁴க்கூ²தி யோ ஸோ து³ப்³ப³சஜாதிகோ பி⁴க்கு².

பி⁴க்கூ²ஹீதி அஞ்ஞேஹி பி⁴க்கூ²ஹி. யே பஸ்ஸந்தி யே ஸுணந்தி தேஹி வத்தப்³போ³ – ‘‘மாயஸ்மா அத்தானம் அவசனீயம் அகாஸி. வசனீயமேவ ஆயஸ்மா அத்தானம் கரோது. ஆயஸ்மாபி பி⁴க்கூ² வதே³து ஸஹத⁴ம்மேன, பி⁴க்கூ²பி ஆயஸ்மந்தம் வக்க²ந்தி ஸஹத⁴ம்மேன. ஏவம் ஸம்வத்³தா⁴ ஹி தஸ்ஸ ப⁴க³வதோ பரிஸா யதி³த³ம் அஞ்ஞமஞ்ஞவசனேன அஞ்ஞமஞ்ஞவுட்டா²பனேனா’’தி. து³தியம்பி வத்தப்³போ³. ததியம்பி வத்தப்³போ³. ஸசே படினிஸ்ஸஜ்ஜதி, இச்சேதம் குஸலம்; நோ சே படினிஸ்ஸஜ்ஜதி, ஆபத்தி து³க்கடஸ்ஸ. ஸுத்வா ந வத³ந்தி, ஆபத்தி து³க்கடஸ்ஸ. ஸோ பி⁴க்கு² ஸங்க⁴மஜ்ஜ²ம்பி ஆகட்³டி⁴த்வா வத்தப்³போ³ – ‘‘மாயஸ்மா அத்தானம் அவசனீயம் அகாஸி…பே… அஞ்ஞமஞ்ஞவுட்டா²பனேனா’’தி. து³தியம்பி வத்தப்³போ³. ததியம்பி வத்தப்³போ³. ஸசே படினிஸ்ஸஜ்ஜதி, இச்சேதம் குஸலம்; நோ சே படினிஸ்ஸஜ்ஜதி, ஆபத்தி து³க்கடஸ்ஸ. ஸோ பி⁴க்கு² ஸமனுபா⁴ஸிதப்³போ³. ஏவஞ்ச பன, பி⁴க்க²வே, ஸமனுபா⁴ஸிதப்³போ³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

427. ‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² பி⁴க்கூ²ஹி ஸஹத⁴ம்மிகம் வுச்சமானோ அத்தானம் அவசனீயம் கரோதி. ஸோ தம் வத்து²ம் ந படினிஸ்ஸஜ்ஜதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²ம் ஸமனுபா⁴ஸேய்ய தஸ்ஸ வத்து²ஸ்ஸ படினிஸ்ஸக்³கா³ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² பி⁴க்கூ²ஹி ஸஹத⁴ம்மிகம் வுச்சமானோ அத்தானம் அவசனீயம் கரோதி. ஸோ தம் வத்து²ம் ந படினிஸ்ஸஜ்ஜதி. ஸங்கோ⁴ இத்த²ன்னாமம் பி⁴க்கு²ம் ஸமனுபா⁴ஸதி தஸ்ஸ வத்து²ஸ்ஸ படினிஸ்ஸக்³கா³ய. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ ஸமனுபா⁴ஸனா தஸ்ஸ வத்து²ஸ்ஸ படினிஸ்ஸக்³கா³ய, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி – ‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² பி⁴க்கூ²ஹி ஸஹத⁴ம்மிகம் வுச்சமானோ அத்தானம் அவசனீயம் கரோதி. ஸோ தம் வத்து²ம் ந படினிஸ்ஸஜ்ஜதி. ஸங்கோ⁴ இத்த²ன்னாமம் பி⁴க்கு²ம் ஸமனுபா⁴ஸதி தஸ்ஸ வத்து²ஸ்ஸ படினிஸ்ஸக்³கா³ய. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ ஸமனுபா⁴ஸனா தஸ்ஸ வத்து²ஸ்ஸ படினிஸ்ஸக்³கா³ய, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘ஸமனுப⁴ட்டோ² ஸங்கே⁴ன இத்த²ன்னாமோ பி⁴க்கு² தஸ்ஸ வத்து²ஸ்ஸ படினிஸ்ஸக்³கா³ய. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

428. ஞத்தியா து³க்கடம், த்³வீஹி கம்மவாசாஹி து²ல்லச்சயா, கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ. ஸங்கா⁴தி³ஸேஸம் அஜ்ஜா²பஜ்ஜந்தஸ்ஸ ஞத்தியா து³க்கடம், த்³வீஹி கம்மவாசாஹி து²ல்லச்சயா படிப்பஸ்ஸம்ப⁴ந்தி.

ஸங்கா⁴தி³ஸேஸோதி…பே… தேனபி வுச்சதி ஸங்கா⁴தி³ஸேஸோதி.

429. த⁴ம்மகம்மே த⁴ம்மகம்மஸஞ்ஞீ ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ.

த⁴ம்மகம்மே வேமதிகோ ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ.

த⁴ம்மகம்மே அத⁴ம்மகம்மஸஞ்ஞீ ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ.

அத⁴ம்மகம்மே த⁴ம்மகம்மஸஞ்ஞீ, ஆபத்தி து³க்கடஸ்ஸ.

அத⁴ம்மகம்மே வேமதிகோ, ஆபத்தி து³க்கடஸ்ஸ.

அத⁴ம்மகம்மே அத⁴ம்மகம்மஸஞ்ஞீ, ஆபத்தி து³க்கடஸ்ஸ.

430. அனாபத்தி அஸமனுபா⁴ஸந்தஸ்ஸ, படினிஸ்ஸஜ்ஜந்தஸ்ஸ, உம்மத்தகஸ்ஸ, ஆதி³கம்மிகஸ்ஸாதி.

து³ப்³ப³சஸிக்கா²பத³ம் நிட்டி²தம் த்³வாத³ஸமம்.