13. குலதூ³ஸகஸிக்கா²பத³ம்

431. [இத³ம் வத்து² சூளவ. 21] தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஸ்ஸஜிபுனப்³ப³ஸுகா நாம [நாம பி⁴க்கூ² (க.)] கீடாகி³ரிஸ்மிம் ஆவாஸிகா ஹோந்தி அலஜ்ஜினோ பாபபி⁴க்கூ². தே [சூளவ. 293] ஏவரூபம் அனாசாரம் ஆசரந்தி – மாலாவச்ச²ம் ரோபேந்திபி ரோபாபேந்திபி, ஸிஞ்சந்திபி ஸிஞ்சாபேந்திபி, ஓசினந்திபி ஓசினாபேந்திபி, க³ந்தே²ந்திபி க³ந்தா²பேந்திபி, ஏகதோவண்டிகமாலம் கரோந்திபி காராபேந்திபி, உப⁴தோவண்டிகமாலம் கரோந்திபி காராபேந்திபி, மஞ்ஜரிகம் கரோந்திபி காராபேந்திபி, விதூ⁴திகம் கரோந்திபி காராபேந்திபி, வடம்ஸகம் கரோந்திபி காராபேந்திபி, ஆவேளம் கரோந்திபி காராபேந்திபி, உரச்ச²த³ம் கரோந்திபி காராபேந்திபி. தே குலித்தீ²னம் குலதீ⁴தானம் குலகுமாரீனம் குலஸுண்ஹானம் குலதா³ஸீனம் ஏகதோவண்டிகமாலம் ஹரந்திபி ஹராபேந்திபி, உப⁴தோவண்டிகமாலம் ஹரந்திபி ஹராபேந்திபி, மஞ்ஜரிகம் ஹரந்திபி ஹராபேந்திபி, விதூ⁴திகம் ஹரந்திபி ஹராபேந்திபி, வடம்ஸகம் ஹரந்திபி ஹராபேந்திபி, ஆவேளம் ஹரந்திபி ஹராபேந்திபி, உரச்ச²த³ம் ஹரந்திபி ஹராபேந்திபி. தே குலித்தீ²ஹி குலதீ⁴தாஹி குலகுமாரீஹி குலஸுண்ஹாஹி குலதா³ஸீஹி ஸத்³தி⁴ம் ஏகபா⁴ஜனேபி பு⁴ஞ்ஜந்தி, ஏகதா²லகேபி பிவந்தி, ஏகாஸனேபி நிஸீத³ந்தி, ஏகமஞ்சேபி துவட்டேந்தி, ஏகத்த²ரணாபி துவட்டேந்தி, ஏகபாவுரணாபி துவட்டேந்தி, ஏகத்த²ரணபாவுரணாபி துவட்டேந்தி, விகாலேபி பு⁴ஞ்ஜந்தி, மஜ்ஜம்பி பிவந்தி, மாலாக³ந்த⁴விலேபனம்பி தா⁴ரேந்தி, நச்சந்திபி கா³யந்திபி வாதே³ந்திபி லாஸேந்திபி, நச்சந்தியாபி நச்சந்தி, நச்சந்தியாபி கா³யந்தி, நச்சந்தியாபி வாதே³ந்தி, நச்சந்தியாபி லாஸேந்தி, கா³யந்தியாபி நச்சந்தி, கா³யந்தியாபி கா³யந்தி, கா³யந்தியாபி வாதே³ந்தி, கா³யந்தியாபி லாஸேந்தி, வாதே³ந்தியாபி நச்சந்தி, வாதே³ந்தியாபி கா³யந்தி, வாதே³ந்தியாபி வாதே³ந்தி, வாதே³ந்தியாபி லாஸேந்தி, லாஸேந்தியாபி நச்சந்தி, லாஸேந்தியாபி கா³யந்தி, லாஸேந்தியாபி வாதே³ந்தி, லாஸேந்தியாபி லாஸேந்தி. அட்ட²பதே³பி கீளந்தி, த³ஸபதே³பி கீளந்தி, ஆகாஸேபி கீளந்தி, பரிஹாரபதே²பி கீளந்தி, ஸந்திகாயபி கீளந்தி, க²லிகாயபி கீளந்தி, க⁴டிகாயபி கீளந்தி, ஸலாகஹத்தே²னபி கீளந்தி, அக்கே²னபி கீளந்தி, பங்க³சீரேனபி கீளந்தி, வங்ககேனபி கீளந்தி, மோக்க²சிகாயபி கீளந்தி, சிங்கு³லகேனபி கீளந்தி, பத்தாள்ஹகேனபி கீளந்தி, ரத²கேனபி கீளந்தி, த⁴னுகேனபி கீளந்தி, அக்க²ரிகாயபி கீளந்தி, மனேஸிகாயபி கீளந்தி, யதா²வஜ்ஜேனபி கீளந்தி. ஹத்தி²ஸ்மிம்பி ஸிக்க²ந்தி, அஸ்ஸஸ்மிம்பி ஸிக்க²ந்தி, ரத²ஸ்மிம்பி ஸிக்க²ந்தி, த⁴னுஸ்மிம்பி ஸிக்க²ந்தி, த²ருஸ்மிம்பி ஸிக்க²ந்தி, ஹத்தி²ஸ்ஸபி புரதோ தா⁴வந்தி, அஸ்ஸஸ்ஸபி புரதோ தா⁴வந்தி, ரத²ஸ்ஸபி புரதோ [புரதோ தா⁴வந்தி (ஸ்யா.)] தா⁴வந்திபி ஆதா⁴வந்திபி, உஸ்ஸேளேந்திபி, அப்போ²டேந்திபி, நிப்³பு³ஜ்ஜ²ந்திபி, முட்டீ²ஹிபி யுஜ்ஜ²ந்தி, ரங்க³மஜ்ஜே²பி ஸங்கா⁴டிம் பத்த²ரித்வா நச்சகிம் [நச்சந்திம் (ஸீ. ஸ்யா.)] ஏவம் வத³ந்தி – இத⁴, ப⁴கி³னி, நச்சஸ்ஸூதி, நலாடிகம்பி தே³ந்தி, விவித⁴ம்பி அனாசாரம் ஆசரந்தி.

432. தேன கோ² பன ஸமயேன அஞ்ஞதரோ பி⁴க்கு² காஸீஸு வஸ்ஸம்வுட்டோ² ஸாவத்தி²ம் க³ச்ச²ந்தோ ப⁴க³வந்தம் த³ஸ்ஸனாய, யேன கீடாகி³ரி தத³வஸரி. அத² கோ² ஸோ பி⁴க்கு² புப்³ப³ண்ஹஸமயம் நிவாஸேத்வா பத்தசீவரமாதா³ய கீடாகி³ரிம் பிண்டா³ய பாவிஸி பாஸாதி³கேன அபி⁴க்கந்தேன படிக்கந்தேன ஆலோகிதேன விலோகிதேன ஸமிஞ்ஜிதேன பஸாரிதேன ஓக்கி²த்தசக்கு² இரியாபத²ஸம்பன்னோ. மனுஸ்ஸா தம் பி⁴க்கு²ம் பஸ்ஸித்வா ஏவமாஹம்ஸு – ‘‘க்வாயம் அப³லப³லோ விய மந்த³மந்தோ³ விய பா⁴குடிகபா⁴குடிகோ விய? கோ இமஸ்ஸ உபக³தஸ்ஸ பிண்ட³கம் த³ஸ்ஸதி? அம்ஹாகம் பன அய்யா அஸ்ஸஜிபுனப்³ப³ஸுகா ஸண்ஹா ஸகி²லா ஸுக²ஸம்பா⁴ஸா மிஹிதபுப்³ப³ங்க³மா ஏஹிஸ்வாக³தவாதி³னோ அப்³பா⁴குடிகா உத்தானமுகா² புப்³ப³பா⁴ஸினோ. தேஸம் கோ² நாம பிண்டோ³ தா³தப்³போ³’’தி.

அத்³த³ஸா கோ² அஞ்ஞதரோ உபாஸகோ தம் பி⁴க்கு²ம் கீடாகி³ரிஸ்மிம் பிண்டா³ய சரந்தம். தி³ஸ்வான யேன ஸோ பி⁴க்கு² தேனுபஸங்கமி; உபஸங்கமித்வா தம் பி⁴க்கு²ம் அபி⁴வாதே³த்வா ஏதத³வோச – ‘‘அபி, ப⁴ந்தே, பிண்டோ³ லப்³ப⁴தீ’’தி? ‘‘ந கோ², ஆவுஸோ, பிண்டோ³ லப்³ப⁴தீ’’தி. ‘‘ஏஹி, ப⁴ந்தே, க⁴ரம் க³மிஸ்ஸாமா’’தி. அத² கோ² ஸோ உபாஸகோ தம் பி⁴க்கு²ம் க⁴ரம் நேத்வா போ⁴ஜேத்வா ஏதத³வோச – ‘‘கஹம், ப⁴ந்தே, அய்யோ க³மிஸ்ஸதீ’’தி? ‘‘ஸாவத்தி²ம் கோ² அஹம், ஆவுஸோ, க³மிஸ்ஸாமி ப⁴க³வந்தம் த³ஸ்ஸனாயா’’தி. ‘‘தேன ஹி, ப⁴ந்தே, மம வசனேன ப⁴க³வதோ பாதே³ ஸிரஸா வந்த³, ஏவஞ்ச வதே³ஹி – ‘து³ட்டோ², ப⁴ந்தே, கீடாகி³ரிஸ்மிம் ஆவாஸோ. அஸ்ஸஜிபுனப்³ப³ஸுகா நாம கீடாகி³ரிஸ்மிம் ஆவாஸிகா அலஜ்ஜினோ பாபபி⁴க்கூ². தே ஏவரூபம் அனாசாரம் ஆசரந்தி – மாலாவச்ச²ம் ரோபேந்திபி ரோபாபேந்திபி, ஸிஞ்சந்திபி ஸிஞ்சாபேந்திபி…பே… விவித⁴ம்பி அனாசாரம் ஆசரந்தி. யேபி தே, ப⁴ந்தே, மனுஸ்ஸா புப்³பே³ ஸத்³தா⁴ அஹேஸும் பஸன்னா தேபி ஏதரஹி அஸ்ஸத்³தா⁴ அப்பஸன்னா. யானிபி தானி ஸங்க⁴ஸ்ஸ புப்³பே³ தா³னபதா²னி தானிபி ஏதரஹி உபச்சி²ன்னானி. ரிஞ்சந்தி பேஸலா பி⁴க்கூ², நிவஸந்தி பாபபி⁴க்கூ². ஸாது⁴, ப⁴ந்தே, ப⁴க³வா கீடாகி³ரிம் பி⁴க்கூ² பஹிணேய்ய யதா²யம் கீடாகி³ரிஸ்மிம் ஆவாஸோ ஸண்ட²ஹேய்யா’’’தி.

ஏவமாவுஸோதி கோ² ஸோ பி⁴க்கு² தஸ்ஸ உபாஸகஸ்ஸ படிஸ்ஸுத்வா யேன ஸாவத்தி² தேன பக்காமி. அனுபுப்³பே³ன யேன ஸாவத்தி² ஜேதவனம் அனாத²பிண்டி³கஸ்ஸ ஆராமோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஆசிண்ணம் கோ² பனேதம் பு³த்³தா⁴னம் ப⁴க³வந்தானம் ஆக³ந்துகேஹி பி⁴க்கூ²ஹி ஸத்³தி⁴ம் படிஸம்மோதி³தும். அத² கோ² ப⁴க³வா தம் பி⁴க்கு²ம் ஏதத³வோச – ‘‘கச்சி, பி⁴க்கு², க²மனீயம் கச்சி யாபனீயம், கச்சிஸி அப்பகிலமதே²ன அத்³தா⁴னம் ஆக³தோ, குதோ ச த்வம் பி⁴க்கு² ஆக³ச்ச²ஸீ’’தி? ‘‘க²மனீயம், ப⁴க³வா, யாபனீயம், ப⁴க³வா. அப்பகிலமதே²ன சாஹம், ப⁴ந்தே, அத்³தா⁴னம் ஆக³தோ. இதா⁴ஹம், ப⁴ந்தே, காஸீஸு வஸ்ஸம்வுட்டோ² ஸாவத்தி²ம் ஆக³ச்ச²ந்தோ ப⁴க³வந்தம் த³ஸ்ஸனாய யேன கீடாகி³ரி தத³வஸரிம். அத² க்²வாஹம், ப⁴ந்தே, புப்³ப³ண்ஹஸமயம் நிவாஸேத்வா பத்தசீவரமாதா³ய கீடாகி³ரிம் பிண்டா³ய பாவிஸிம். அத்³த³ஸா கோ² மம், ப⁴ந்தே, அஞ்ஞதரோ உபாஸகோ கீடாகி³ரிஸ்மிம் பிண்டா³ய சரந்தம். தி³ஸ்வான யேனாஹம் தேனுபஸங்கமி; உபஸங்கமித்வா மம் அபி⁴வாதே³த்வா ஏதத³வோச – ‘அபி, ப⁴ந்தே, பிண்டோ³ லப்³ப⁴தீ’தி? ‘ந கோ², ஆவுஸோ, பிண்டோ³ லப்³ப⁴தீ’தி. ‘ஏஹி, ப⁴ந்தே, க⁴ரம் க³மிஸ்ஸாமா’தி. அத² கோ², ப⁴ந்தே, ஸோ உபாஸகோ மம் க⁴ரம் நேத்வா போ⁴ஜேத்வா ஏதத³வோச – ‘கஹம், ப⁴ந்தே, அய்யோ க³மிஸ்ஸஸீ’தி? ‘ஸாவத்தி²ம் கோ² அஹம், ஆவுஸோ, க³மிஸ்ஸாமி ப⁴க³வந்தம் த³ஸ்ஸனாயா’தி. தேன ஹி, ப⁴ந்தே, மம வசனேன ப⁴க³வதோ பாதே³ ஸிரஸா வந்த³, ஏவஞ்ச வதே³ஹி – ‘து³ட்டோ², ப⁴ந்தே, கீடாகி³ரிஸ்மிம் ஆவாஸோ, அஸ்ஸஜிபுனப்³ப³ஸுகா நாம கீடாகி³ரிஸ்மிம் ஆவாஸிகா அலஜ்ஜினோ பாபபி⁴க்கூ². தே ஏவரூபம் அனாசாரம் ஆசரந்தி – மாலாவச்ச²ம் ரோபேந்திபி ரோபாபேந்திபி, ஸிஞ்சந்திபி ஸிஞ்சாபேந்திபி…பே… விவித⁴ம்பி அனாசாரம் ஆசரந்தி. யேபி தே, ப⁴ந்தே, மனுஸ்ஸா புப்³பே³ ஸத்³தா⁴ அஹேஸும் பஸன்னா தேபி ஏதரஹி அஸ்ஸத்³தா⁴ அப்பஸன்னா, யானிபி தானி ஸங்க⁴ஸ்ஸ புப்³பே³ தா³னபதா²னி தானிபி ஏதரஹி உபச்சி²ன்னானி, ரிஞ்சந்தி பேஸலா பி⁴க்கூ² நிவஸந்தி பாபபி⁴க்கூ². ஸாது⁴, ப⁴ந்தே, ப⁴க³வா கீடாகி³ரிம் பி⁴க்கூ² பஹிணேய்ய யதா²யம் கீடாகி³ரிஸ்மிம் ஆவாஸோ ஸண்ட²ஹேய்யா’தி. ததோ அஹம், ப⁴க³வா, ஆக³ச்சா²மீ’’தி.

433. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ² படிபுச்சி² – ‘‘ஸச்சம் கிர, பி⁴க்க²வே, அஸ்ஸஜிபுனப்³ப³ஸுகா நாம கீடாகி³ரிஸ்மிம் ஆவாஸிகா அலஜ்ஜினோ பாபபி⁴க்கூ² தே ஏவரூபம் அனாசாரம் ஆசரந்தி – மாலாவச்ச²ம் ரோபேந்திபி ரோபாபேந்திபி, ஸிஞ்சந்திபி ஸிஞ்சாபேந்திபி …பே… விவித⁴ம்பி அனாசாரம் ஆசரந்தி, யேபி தே, பி⁴க்க²வே, மனுஸ்ஸா புப்³பே³ ஸத்³தா⁴ அஹேஸும் பஸன்னா தேபி ஏதரஹி அஸ்ஸத்³தா⁴ அப்பஸன்னா; யானிபி தானி ஸங்க⁴ஸ்ஸ புப்³பே³ தா³னபதா²னி தானிபி ஏதரஹி உபச்சி²ன்னானி; ரிஞ்சந்தி பேஸலா பி⁴க்கூ² நிவஸந்தி பாபபி⁴க்கூ²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… ‘‘கத²ஞ்ஹி நாம தே, பி⁴க்க²வே, மோக⁴புரிஸா ஏவரூபம் அனாசாரம் ஆசரிஸ்ஸந்தி – மாலாவச்ச²ம் ரோபேஸ்ஸந்திபி ரோபாபேஸ்ஸந்திபி, ஸஞ்சிஸ்ஸந்திபி ஸிஞ்சாபேஸ்ஸந்திபி, ஓசினிஸ்ஸந்திபி ஓசினாபேஸ்ஸந்திபி, க³ந்தி²ஸ்ஸந்திபி க³ந்தா²பேஸ்ஸந்திபி, ஏகதோவண்டிகமாலம் கரிஸ்ஸந்திபி காராபேஸ்ஸந்திபி, உப⁴தோவண்டிகமாலம் கரிஸ்ஸந்திபி காராபேஸ்ஸந்திபி, மஞ்ஜரிகம் கரிஸ்ஸந்திபி காராபேஸ்ஸந்திபி, விதூ⁴திகம் கரிஸ்ஸந்திபி காராபேஸ்ஸந்திபி, வடம்ஸகம் கரிஸ்ஸந்திபி காராபேஸ்ஸந்திபி, ஆவேளம் கரிஸ்ஸந்திபி காராபேஸ்ஸந்திபி, உரச்ச²த³ம் கரிஸ்ஸந்திபி காராபேஸ்ஸந்திபி. தே குலித்தீ²னம் குலதீ⁴தானம் குலகுமாரீனம் குலஸுண்ஹானம் குலதா³ஸீனம் ஏகதோவண்டிகமாலம் ஹரிஸ்ஸந்திபி ஹாராபேஸ்ஸந்திபி, உப⁴தோவண்டிகமாலம் ஹரிஸ்ஸந்திபி ஹாராபேஸ்ஸந்திபி, மஞ்ஜரிகம் ஹரிஸ்ஸந்திபி ஹாராபேஸ்ஸந்திபி, விதூ⁴திகம் ஹரிஸ்ஸந்திபி ஹாராபேஸ்ஸந்திபி, வடம்ஸகம் ஹரிஸ்ஸந்திபி ஹாராபேஸ்ஸந்திபி, ஆவேளம் ஹரிஸ்ஸந்திபி ஹாராபேஸ்ஸந்திபி, உரச்ச²த³ம் ஹரிஸ்ஸந்திபி ஹாராபேஸ்ஸந்திபி. தே குலித்தீ²ஹி குலதீ⁴தாஹி குலகுமாரீஹி குலஸுண்ஹாஹி குலதா³ஸீஹி ஸத்³தி⁴ம் ஏகபா⁴ஜனேபி பு⁴ஞ்ஜிஸ்ஸந்தி, ஏகதா²லகேபி பிவிஸ்ஸந்தி, ஏகாஸனேபி நிஸீதி³ஸ்ஸந்தி, ஏகமஞ்சேபி துவட்டிஸ்ஸந்தி, ஏகத்த²ரணாபி துவட்டிஸ்ஸந்தி, ஏகபாவுரணாபி துவட்டிஸ்ஸந்தி, ஏகத்த²ரணபாவுரணாபி துவட்டிஸ்ஸந்தி, விகாலேபி பு⁴ஞ்ஜிஸ்ஸந்தி, மஜ்ஜம்பி பிவிஸ்ஸந்தி, மாலாக³ந்த⁴விலேபனம்பி தா⁴ரிஸ்ஸந்தி, நச்சிஸ்ஸந்திபி கா³யிஸ்ஸந்திபி வாதே³ஸ்ஸந்திபி லாஸேஸ்ஸந்திபி, நச்சந்தியாபி நச்சிஸ்ஸந்தி நச்சந்தியாபி கா³யிஸ்ஸந்தி நச்சந்தியாபி வாதே³ஸ்ஸந்தி நச்சந்தியாபி லாஸேஸ்ஸந்தி, கா³யந்தியாபி நச்சிஸ்ஸந்தி கா³யந்தியாபி கா³யிஸ்ஸந்தி கா³யந்தியாபி வாதே³ஸ்ஸந்தி கா³யந்தியாபி லாஸேஸ்ஸந்தி, வாதே³ந்தியாபி நச்சிஸ்ஸந்தி வாதே³ந்தியாபி கா³யிஸ்ஸந்தி வாதே³ந்தியாபி வாதே³ஸ்ஸந்தி வாதே³ந்தியாபி லாஸேஸ்ஸந்தி, லாஸேந்தியாபி நச்சிஸ்ஸந்தி லாஸேந்தியாபி கா³யிஸ்ஸந்தி லாஸேந்தியாபி வாதே³ஸ்ஸந்தி லாஸேந்தியாபி லாஸேஸ்ஸந்தி, அட்ட²பதே³பி கீளிஸ்ஸந்தி த³ஸபதே³பி கீளிஸ்ஸந்தி, அகாஸேபி கீளிஸ்ஸந்தி, பரிஹாரபதே²பி கீளிஸ்ஸந்தி, ஸந்திகாயபி கீளிஸ்ஸந்தி, க²லிகாயபி கீளிஸ்ஸந்தி, க⁴டிகாயபி கீளிஸ்ஸந்தி, ஸலாகஹத்தே²னபி கீளிஸ்ஸந்தி, அக்கே²னபி கீளிஸ்ஸந்தி, பங்க³சீரேனபி கீளிஸ்ஸந்தி, வங்ககேனபி கீளிஸ்ஸந்தி, மோக்க²சிகாயபி கீளிஸ்ஸந்தி, சிங்கு³லகேனபி கீளிஸ்ஸந்தி, பத்தாள்ஹகேனபி கீளிஸ்ஸந்தி, ரத²கேனபி கீளிஸ்ஸந்தி, த⁴னுகேனபி கீளிஸ்ஸந்தி, அக்க²ரிகாயபி கீளிஸ்ஸந்தி, மனேஸிகாயபி கீளிஸ்ஸந்தி, யதா²வஜ்ஜேனபி கீளிஸ்ஸந்தி, ஹத்தி²ஸ்மிம்பி ஸிக்கி²ஸ்ஸந்தி, அஸ்ஸஸ்மிம்பி ஸிக்கி²ஸ்ஸந்தி, ரத²ஸ்மிம்பி ஸிக்கி²ஸ்ஸந்தி, த⁴னுஸ்மிம்பி ஸிக்கி²ஸ்ஸந்தி, த²ருஸ்மிம்பி ஸிக்கி²ஸ்ஸந்தி, ஹத்தி²ஸ்ஸபி புரதோ தா⁴விஸ்ஸந்தி, அஸ்ஸஸ்ஸபி புரதோ தா⁴விஸ்ஸந்தி, ரத²ஸ்ஸபி புரதோ [புரதோ தா⁴விஸ்ஸந்தி (ஸ்யா.)] தா⁴விஸ்ஸந்திபி ஆதா⁴விஸ்ஸந்திபி, உஸ்ஸேளேஸ்ஸந்திபி, அப்போ²டேஸ்ஸந்திபி, நிப்³பு³ஜ்ஜி²ஸ்ஸந்திபி, முட்டீ²ஹிபி யுஜ்ஜி²ஸ்ஸந்தி, ரங்க³மஜ்ஜே²பி ஸங்கா⁴டிம் பத்த²ரித்வா நச்சகிம் ஏவம் வக்க²ந்தி ‘‘இத⁴ ப⁴கி³னி நச்சஸ்ஸூ’’தி நலாடிகம்பி த³ஸ்ஸந்தி, விவித⁴ம்பி அனாசாரம் ஆசரிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… விக³ரஹித்வா த⁴ம்மிம் கத²ம் கத்வா ஸாரிபுத்தமோக்³க³ல்லானே ஆமந்தேஸி – ‘‘க³ச்ச²த² தும்ஹே, ஸாரிபுத்தா, கீடாகி³ரிம் க³ந்த்வா அஸ்ஸஜிபுனப்³ப³ஸுகானம் பி⁴க்கூ²னம் கீடாகி³ரிஸ்மா பப்³பா³ஜனீயகம்மம் கரோத². தும்ஹாகம் ஏதே ஸத்³தி⁴விஹாரிகா’’தி.

‘‘கத²ம் மயம், ப⁴ந்தே, அஸ்ஸஜிபுனப்³ப³ஸுகானம் பி⁴க்கூ²னம் கீடாகி³ரிஸ்மா பப்³பா³ஜனீயகம்மம் கரோம? சண்டா³ தே பி⁴க்கூ² ப²ருஸா’’தி. ‘‘தேன ஹி தும்ஹே, ஸாரிபுத்தா, ப³ஹுகேஹி பி⁴க்கூ²ஹி ஸத்³தி⁴ம் க³ச்ச²தா²’’தி. ‘‘ஏவம், ப⁴ந்தே’’தி கோ² ஸாரிபுத்தமோக்³க³ல்லானா ப⁴க³வதோ பச்சஸ்ஸோஸும். ‘‘ஏவஞ்ச பன, பி⁴க்க²வே, காதப்³ப³ம். பட²மம் அஸ்ஸஜிபுனப்³ப³ஸுகா பி⁴க்கூ² சோதே³தப்³பா³. சோதே³த்வா ஸாரேதப்³பா³. ஸாரேத்வா ஆபத்திம் ரோபேதப்³பா³. ஆபத்திம் ரோபேத்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

434. ‘‘ஸுணாது மே, ப⁴ந்தே, ஸங்கோ⁴. இமே அஸ்ஸஜிபுனப்³ப³ஸுகா பி⁴க்கூ² குலதூ³ஸகா பாபஸமாசாரா. இமேஸம் பாபகா ஸமாசாரா தி³ஸ்ஸந்தி சேவ ஸுய்யந்தி ச. குலானி ச இமேஹி து³ட்டா²னி தி³ஸ்ஸந்தி சேவ ஸுய்யந்தி ச. யதி³ ஸங்க⁴ஸ்ஸ பத்தகல்லம், ஸங்கோ⁴ அஸ்ஸஜிபுனப்³ப³ஸுகானம் பி⁴க்கூ²னம் கீடாகி³ரிஸ்மா பப்³பா³ஜனீயகம்மம் கரேய்ய – ‘ந அஸ்ஸஜிபுனப்³ப³ஸுகேஹி பி⁴க்கூ²ஹி கீடாகி³ரிஸ்மிம் வத்த²ப்³ப³’ந்தி. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. இமே அஸ்ஸஜிபுனப்³ப³ஸுகா பி⁴க்கூ² குலதூ³ஸகா பாபஸமாசாரா. இமேஸம் பாபகா ஸமாசாரா தி³ஸ்ஸந்தி சேவ ஸுய்யந்தி ச. குலானி ச இமேஹி து³ட்டா²னி தி³ஸ்ஸந்தி சேவ ஸுய்யந்தி ச. ஸங்கோ⁴ அஸ்ஸஜிபுனப்³ப³ஸுகானம் பி⁴க்கூ²னம் கீடாகி³ரிஸ்மா பப்³பா³ஜனீயகம்மம் கரோதி – ‘ந அஸ்ஸஜிபுனப்³ப³ஸுகேஹி பி⁴க்கூ²ஹி கீடாகி³ரிஸ்மிம் வத்த²ப்³ப³’ந்தி. யஸ்ஸாயஸ்மதோ க²மதி அஸ்ஸஜிபுனப்³ப³ஸுகானம் பி⁴க்கூ²னம் கீடாகி³ரிஸ்மா பப்³பா³ஜனீயகம்மஸ்ஸ கரணம் – ‘ந அஸ்ஸஜிபுனப்³ப³ஸுகேஹி பி⁴க்கூ²ஹி கீடாகி³ரிஸ்மிம் வத்த²ப்³ப³’ந்தி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி – ஸுணாது மே, ப⁴ந்தே, ஸங்கோ⁴…பே… ஸோ பா⁴ஸேய்ய.

‘‘கதம் ஸங்கே⁴ன அஸ்ஸஜிபுனப்³ப³ஸுகானம் பி⁴க்கூ²னம் கீடாகி³ரிஸ்மா பப்³பா³ஜனீயகம்மம் – ‘ந அஸ்ஸஜிபுனப்³ப³ஸுகேஹி பி⁴க்கூ²ஹி கீடாகி³ரிஸ்மிம் வத்த²ப்³ப³’ந்தி. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

435. அத² கோ² ஸாரிபுத்தமோக்³க³ல்லானப்பமுகோ² பி⁴க்கு²ஸங்கோ⁴ கீடாகி³ரிம் க³ந்த்வா அஸ்ஸஜிபுனப்³ப³ஸுகானம் பி⁴க்கூ²னம் கீடாகி³ரிஸ்மா பப்³பா³ஜனீயகம்மம் அகாஸி – ‘ந அஸ்ஸஜிபுனப்³ப³ஸுகேஹி பி⁴க்கூ²ஹி கீடாகி³ரிஸ்மிம் வத்த²ப்³ப³’ந்தி. தே ஸங்கே⁴ன பப்³பா³ஜனீயகம்மகதா ந ஸம்மா வத்தந்தி, ந லோமம் பாதேந்தி, ந நேத்தா²ரம் வத்தந்தி, ந பி⁴க்கூ² க²மாபேந்தி, அக்கோஸந்தி பரிபா⁴ஸந்தி ச²ந்த³கா³மிதா தோ³ஸகா³மிதா மோஹகா³மிதா ப⁴யகா³மிதா பாபேந்தி, பக்கமந்திபி, விப்³ப⁴மந்திபி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அஸ்ஸஜிபுனப்³ப³ஸுகா பி⁴க்கூ² ஸங்கே⁴ன பப்³பா³ஜனீயகம்மகதா ந ஸம்மா வத்திஸ்ஸந்தி, ந லோமம் பாதேஸ்ஸந்தி, ந நேத்தா²ரம் வத்திஸ்ஸந்தி, ந பி⁴க்கூ² க²மாபேஸ்ஸந்தி, அக்கோஸிஸ்ஸந்தி பரிபா⁴ஸிஸ்ஸந்தி, ச²ந்த³கா³மிதா தோ³ஸகா³மிதா மோஹகா³மிதா ப⁴யகா³மிதா பாபேஸ்ஸந்தி பக்கமிஸ்ஸந்திபி விப்³ப⁴மிஸ்ஸந்திபீ’’தி! அத² கோ² தே பி⁴க்கூ² அஸ்ஸஜிபுனப்³ப³ஸுகே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர, பி⁴க்க²வே, அஸ்ஸஜிபுனப்³ப³ஸுகா பி⁴க்கூ² ஸங்கே⁴ன பப்³பா³ஜனீயகம்மகதா ந ஸம்மா வத்தந்தி…பே… விப்³ப⁴மந்திபீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

436. ‘‘பி⁴க்கு² பனேவ அஞ்ஞதரம் கா³மம் வா நிக³மம் வா உபனிஸ்ஸாய விஹரதி குலதூ³ஸகோ பாபஸமாசாரோ. தஸ்ஸ கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச, குலானி ச தேன து³ட்டா²னி தி³ஸ்ஸந்தி சேவ ஸுய்யந்தி ச. ஸோ பி⁴க்கு² பி⁴க்கூ²ஹி ஏவமஸ்ஸ வசனீயோ – ‘ஆயஸ்மா கோ² குலதூ³ஸகோ பாபஸமாசாரோ, ஆயஸ்மதோ கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச, குலானி சாயஸ்மதா து³ட்டா²னி தி³ஸ்ஸந்தி சேவ ஸுய்யந்தி ச. பக்கமதாயஸ்மா இமம்ஹா ஆவாஸா. அலம் தே இத⁴ வாஸேனா’தி. ஏவஞ்ச ஸோ பி⁴க்கு² பி⁴க்கூ²ஹி வுச்சமானோ தே பி⁴க்கூ² ஏவம் வதே³ய்ய – ‘ச²ந்த³கா³மினோ ச பி⁴க்கூ² தோ³ஸகா³மினோ ச பி⁴க்கூ² மோஹகா³மினோ ச பி⁴க்கூ² ப⁴யகா³மினோ ச பி⁴க்கூ² தாதி³ஸிகாய ஆபத்தியா ஏகச்சம் பப்³பா³ஜேந்தி ஏகச்சம் ந பப்³பா³ஜேந்தீ’தி, ஸோ பி⁴க்கு² பி⁴க்கூ²ஹி ஏவமஸ்ஸ வசனீயோ – ‘மாயஸ்மா ஏவம் அவச. ந ச பி⁴க்கூ² ச²ந்த³கா³மினோ. ந ச பி⁴க்கூ² தோ³ஸகா³மினோ. ந ச பி⁴க்கூ² மோஹகா³மினோ. ந ச பி⁴க்கூ² ப⁴யகா³மினோ. ஆயஸ்மா கோ² குலதூ³ஸகோ பாபஸமாசாரோ. ஆயஸ்மதோ கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச. குலானி சாயஸ்மதா து³ட்டா²னி தி³ஸ்ஸந்தி சேவ ஸுய்யந்தி ச. பக்கமதாயஸ்மா இமம்ஹா ஆவாஸா. அலம் தே இத⁴ வாஸேனா’தி. ஏவஞ்ச ஸோ பி⁴க்கு² பி⁴க்கூ²ஹி வுச்சமானோ ததே²வ பக்³க³ண்ஹேய்ய, ஸோ பி⁴க்கு² பி⁴க்கூ²ஹி யாவததியம் ஸமனுபா⁴ஸிதப்³போ³ தஸ்ஸ படினிஸ்ஸக்³கா³ய. யாவததியஞ்சே ஸமனுபா⁴ஸீயமானோ தம் படினிஸ்ஸஜ்ஜேய்ய, இச்சேதம் குஸலம்; நோ சே படினிஸ்ஸஜ்ஜேய்ய, ஸங்கா⁴தி³ஸேஸோ’’தி.

437. பி⁴க்கு² பனேவ அஞ்ஞதரம் கா³மம் வா நிக³மம் வாதி கா³மோபி நிக³மோபி நக³ரம்பி கா³மோ சேவ நிக³மோ ச.

உபனிஸ்ஸாய விஹரதீதி தத்த² படிப³த்³தா⁴ ஹோந்தி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா.

குலம் நாம சத்தாரி குலானி – க²த்தியகுலம், ப்³ராஹ்மணகுலம், வேஸ்ஸகுலம், ஸுத்³த³குலம்.

குலதூ³ஸகோதி குலானி தூ³ஸேதி புப்பே²ன வா ப²லேன வா சுண்ணேன வா மத்திகாய வா த³ந்தகட்டே²ன வா வேளுயா வா [வேளுனா வா (ஸ்யா.)] வேஜ்ஜிகாய வா ஜங்க⁴பேஸனிகேன வா.

பாபஸமாசாரோதி மாலாவச்ச²ம் ரோபேதிபி ரோபாபேதிபி, ஸிஞ்சதிபி ஸிஞ்சாபேதிபி, ஓசினாதிபி ஓசினாபேதிபி, க³ந்தே²திபி க³ந்தா²பேதிபி.

தி³ஸ்ஸந்தி சேவ ஸுய்யந்தி சாதி யே ஸம்முகா² தே பஸ்ஸந்தி, யே திரோக்கா² தே ஸுணந்தி.

குலானி ச தேன து³ட்டா²னீதி புப்³பே³ ஸத்³தா⁴ ஹுத்வா தம் ஆக³ம்ம அஸ்ஸத்³தா⁴ ஹோந்தி, பஸன்னா ஹுத்வா அப்பஸன்னா ஹோந்தி.

தி³ஸ்ஸந்தி சேவ ஸுய்யந்தி சாதி யே ஸம்முகா² தே பஸ்ஸந்தி, யே திரோக்கா² தே ஸுணந்தி.

ஸோ பி⁴க்கூ²தி யோ ஸோ குலதூ³ஸகோ பி⁴க்கு².

பி⁴க்கூ²ஹீதி அஞ்ஞேஹி பி⁴க்கூ²ஹி. யே பஸ்ஸந்தி யே ஸுணந்தி. தேஹி வத்தப்³போ³ – ‘‘ஆயஸ்மா கோ² குலதூ³ஸகோ பாபஸமாசாரோ. ஆயஸ்மதோ கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச. குலானி சாயஸ்மதா து³ட்டா²னி தி³ஸ்ஸந்தி சேவ ஸுய்யந்தி ச. பக்கமதாயஸ்மா இமம்ஹா ஆவாஸா. அலம் தே இத⁴ வாஸேனா’’தி.

ஏவஞ்ச ஸோ பி⁴க்கு² பி⁴க்கூ²ஹி வுச்சமானோ தே பி⁴க்கூ² ஏவம் வதே³ய்ய – ‘‘ச²ந்த³கா³மினோ ச பி⁴க்கூ², தோ³ஸகா³மினோ ச பி⁴க்கூ², மோஹகா³மினோ ச பி⁴க்கூ², ப⁴யகா³மினோ ச பி⁴க்கூ². தாதி³ஸிகாய ஆபத்தியா ஏகச்சம் பப்³பா³ஜேந்தி ஏகச்சம் ந பப்³பா³ஜேந்தீ’’தி.

ஸோ பி⁴க்கூ²தி யோ ஸோ கம்மகதோ பி⁴க்கு².

பி⁴க்கூ²ஹீதி அஞ்ஞேஹி பி⁴க்கூ²ஹி. யே பஸ்ஸந்தி யே ஸுணந்தி தேஹி வத்தப்³போ³ – ‘‘மாயஸ்மா ஏவம் அவச. ந ச பி⁴க்கூ² ச²ந்த³கா³மினோ, ந ச பி⁴க்கூ² தோ³ஸகா³மினோ, ந ச பி⁴க்கூ² மோஹகா³மினோ, ந ச பி⁴க்கூ² ப⁴யகா³மினோ. ஆயஸ்மா கோ² குலதூ³ஸகோ பாபஸமாசாரோ. ஆயஸ்மதோ கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச. குலானி சாயஸ்மதா து³ட்டா²னி தி³ஸ்ஸந்தி சேவ ஸுய்யந்தி ச. பக்கமதாயஸ்மா இமம்ஹா ஆவாஸா. அலம் தே இத⁴ வாஸேனா’’தி. து³தியம்பி வத்தப்³போ³. ததியம்பி வத்தப்³போ³.

ஸசே படினிஸ்ஸஜ்ஜதி, இச்சேதம் குஸலம். நோ சே படினிஸ்ஸஜ்ஜதி, ஆபத்தி து³க்கடஸ்ஸ. ஸுத்வா ந வத³ந்தி, ஆபத்தி து³க்கடஸ்ஸ. ஸோ பி⁴க்கு² ஸங்க⁴மஜ்ஜ²ம்பி ஆகட்³டி⁴த்வா வத்தப்³போ³ – ‘‘மாயஸ்மா ஏவம் அவச. ந ச பி⁴க்கூ² ச²ந்த³கா³மினோ, ந ச பி⁴க்கூ² தோ³ஸகா³மினோ, ந ச பி⁴க்கூ² மோஹகா³மினோ, ந ச பி⁴க்கூ² ப⁴யகா³மினோ. ஆயஸ்மா கோ² குலதூ³ஸகோ பாபஸமாசாரோ. ஆயஸ்மதோ கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச. குலானி சாயஸ்மதா து³ட்டா²னி தி³ஸ்ஸந்தி சேவ ஸுய்யந்தி ச. பக்கமதாயஸ்மா இமம்ஹா ஆவாஸா. அலம் தே இத⁴ வாஸேனா’’தி. து³தியம்பி வத்தப்³போ³. ததியம்பி வத்தப்³போ³. ஸசே படினிஸ்ஸஜ்ஜதி, இச்சேதம் குஸலம். நோ சே படினிஸ்ஸஜ்ஜதி, ஆபத்தி து³க்கடஸ்ஸ. ஸோ பி⁴க்கு² ஸமனுபா⁴ஸிதப்³போ³. ஏவஞ்ச பன, பி⁴க்க²வே, ஸமனுபா⁴ஸிதப்³போ³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

438. ‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² ஸங்கே⁴ன பப்³பா³ஜனீயகம்மகதோ பி⁴க்கூ² ச²ந்த³கா³மிதா தோ³ஸகா³மிதா மோஹகா³மிதா ப⁴யகா³மிதா பாபேதி. ஸோ தம் வத்து²ம் ந படினிஸ்ஸஜ்ஜதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²ம் ஸமனுபா⁴ஸேய்ய தஸ்ஸ வத்து²ஸ்ஸ படினிஸ்ஸக்³கா³ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² ஸங்கே⁴ன பப்³பா³ஜனீயகம்மகதோ பி⁴க்கூ² ச²ந்த³கா³மிதா தோ³ஸகா³மிதா மோஹகா³மிதா ப⁴யகா³மிதா பாபேதி. ஸோ தம் வத்து²ம் ந படினிஸ்ஸஜ்ஜதி. ஸங்கோ⁴ இத்த²ன்னாமம் பி⁴க்கு²ம் ஸமனுபா⁴ஸதி தஸ்ஸ வத்து²ஸ்ஸ படினிஸ்ஸக்³கா³ய. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ ஸமனுபா⁴ஸனா தஸ்ஸ வத்து²ஸ்ஸ படினிஸ்ஸக்³கா³ய, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி…பே….

‘‘ஸமனுப⁴ட்டோ² ஸங்கே⁴ன இத்த²ன்னாமோ பி⁴க்கு² தஸ்ஸ வத்து²ஸ்ஸ படினிஸ்ஸக்³கா³ய. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

439. ஞத்தியா து³க்கடம், த்³வீஹி கம்மவாசாஹி து²ல்லச்சயா, கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ. ஸங்கா⁴தி³ஸேஸம் அஜ்ஜா²பஜ்ஜந்தஸ்ஸ ஞத்தியா து³க்கடம், த்³வீஹி கம்மவாசாஹி து²ல்லச்சயா படிப்பஸ்ஸம்ப⁴ந்தி.

ஸங்கா⁴தி³ஸேஸோதி ஸங்கோ⁴வ தஸ்ஸா ஆபத்தியா பரிவாஸம் தே³தி, மூலாய படிகஸ்ஸதி, மானத்தம் தே³தி, அப்³பே⁴தி; ந ஸம்ப³ஹுலா, ந ஏகபுக்³க³லோ. தேன வுச்சதி – ‘ஸங்கா⁴தி³ஸேஸோ’தி, தஸ்ஸேவ ஆபத்தினிகாயஸ்ஸ நாமகம்மம் அதி⁴வசனம். தேனபி வுச்சதி ஸங்கா⁴தி³ஸேஸோதி.

440. த⁴ம்மகம்மே த⁴ம்மகம்மஸஞ்ஞீ ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ.

த⁴ம்மகம்மே வேமதிகோ ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ.

த⁴ம்மகம்மே அத⁴ம்மகம்மஸஞ்ஞீ ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ.

அத⁴ம்மகம்மே த⁴ம்மகம்மஸஞ்ஞீ, ஆபத்தி து³க்கடஸ்ஸ.

அத⁴ம்மகம்மே வேமதிகோ, ஆபத்தி து³க்கடஸ்ஸ.

அத⁴ம்மகம்மே அத⁴ம்மகம்மஸஞ்ஞீ, ஆபத்தி து³க்கடஸ்ஸ.

441. அனாபத்தி அஸமனுபா⁴ஸந்தஸ்ஸ, படினிஸ்ஸஜ்ஜந்தஸ்ஸ, உம்மத்தகஸ்ஸ, ஆதி³கம்மிகஸ்ஸாதி.

குலதூ³ஸகஸிக்கா²பத³ம் நிட்டி²தம் தேரஸமம்.

442. உத்³தி³ட்டா² கோ², ஆயஸ்மந்தோ, தேரஸ ஸங்கா⁴தி³ஸேஸா த⁴ம்மா, நவ பட²மாபத்திகா, சத்தாரோ யாவததியகா. யேஸம் பி⁴க்கு² அஞ்ஞதரம் வா அஞ்ஞதரம் வா ஆபஜ்ஜித்வா யாவதீஹம் ஜானம் படிச்சா²தே³தி தாவதீஹம் தேன பி⁴க்கு²னா அகாமா பரிவத்த²ப்³ப³ம். பரிவுத்த²பரிவாஸேன பி⁴க்கு²னா உத்தரி சா²ரத்தம் பி⁴க்கு²மானத்தாய படிபஜ்ஜிதப்³ப³ம். சிண்ணமானத்தோ பி⁴க்கு² யத்த² ஸியா வீஸதிக³ணோ பி⁴க்கு²ஸங்கோ⁴ தத்த² ஸோ பி⁴க்கு² அப்³பே⁴தப்³போ³. ஏகேனபி சே ஊனோ வீஸதிக³ணோ பி⁴க்கு²ஸங்கோ⁴ தம் பி⁴க்கு²ம் அப்³பே⁴ய்ய, ஸோ ச பி⁴க்கு² அனப்³பி⁴தோ, தே ச பி⁴க்கூ² கா³ரய்ஹா, அயம் தத்த² ஸாமீசி. தத்தா²யஸ்மந்தே புச்சா²மி – ‘கச்சித்த² பரிஸுத்³தா⁴’? து³தியம்பி புச்சா²மி – ‘கச்சித்த² பரிஸுத்³தா⁴’? ததியம்பி புச்சா²மி – ‘கச்சித்த² பரிஸுத்³தா⁴’? பரிஸுத்³தே⁴த்தா²யஸ்மந்தோ. தஸ்மா துண்ஹீ, ஏவமேதம் தா⁴ரயாமீதி.

தேரஸகம் நிட்டி²தம்.

தஸ்ஸுத்³தா³னம் –

விஸ்ஸட்டி² காயஸம்ஸக்³க³ம், து³ட்டு²ல்லம் அத்தகாமஞ்ச;

ஸஞ்சரித்தம் குடீ சேவ, விஹாரோ ச அமூலகம்.

கிஞ்சிலேஸஞ்ச பே⁴தோ³ ச, தஸ்ஸேவ அனுவத்தகா;

து³ப்³ப³சம் குலதூ³ஸஞ்ச, ஸங்கா⁴தி³ஸேஸா தேரஸாதி.

ஸங்கா⁴தி³ஸேஸகண்ட³ம் நிட்டி²தம்.