2. து³தியபாராஜிகம்

84. தேன ஸமயேன பு³த்³தோ⁴ ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே. தேன கோ² பன ஸமயேன ஸம்ப³ஹுலா ஸந்தி³ட்டா² ஸம்ப⁴த்தா பி⁴க்கூ² இஸிகி³லிபஸ்ஸே திணகுடியோ கரித்வா வஸ்ஸம் உபக³ச்சி²ம்ஸு. ஆயஸ்மாபி த⁴னியோ கும்ப⁴காரபுத்தோ திணகுடிகம் கரித்வா வஸ்ஸம் உபக³ச்சி². அத² கோ² தே பி⁴க்கூ² வஸ்ஸம்வுட்டா² தேமாஸச்சயேன திணகுடியோ பி⁴ந்தி³த்வா திணஞ்ச கட்ட²ஞ்ச படிஸாமேத்வா ஜனபத³சாரிகம் பக்கமிம்ஸு. ஆயஸ்மா பன த⁴னியோ கும்ப⁴காரபுத்தோ தத்தே²வ வஸ்ஸம் வஸி, தத்த² ஹேமந்தம், தத்த² கி³ம்ஹம். அத² கோ² ஆயஸ்மதோ த⁴னியஸ்ஸ கும்ப⁴காரபுத்தஸ்ஸ கா³மம் பிண்டா³ய பவிட்ட²ஸ்ஸ திணஹாரியோ கட்ட²ஹாரியோ திணகுடிகம் பி⁴ந்தி³த்வா திணஞ்ச கட்ட²ஞ்ச ஆதா³ய அக³மம்ஸு. து³தியம்பி கோ² ஆயஸ்மா த⁴னியோ கும்ப⁴காரபுத்தோ திணஞ்ச கட்ட²ஞ்ச ஸம்கட்³டி⁴த்வா திணகுடிகம் அகாஸி. து³தியம்பி கோ² ஆயஸ்மதோ த⁴னியஸ்ஸ கும்ப⁴காரபுத்தஸ்ஸ கா³மம் பிண்டா³ய பவிட்ட²ஸ்ஸ திணஹாரியோ கட்ட²ஹாரியோ திணகுடிகம் பி⁴ந்தி³த்வா திணஞ்ச கட்ட²ஞ்ச ஆதா³ய அக³மம்ஸு. ததியம்பி கோ² ஆயஸ்மா த⁴னியோ கும்ப⁴காரபுத்தோ திணஞ்ச கட்ட²ஞ்ச ஸம்கட்³டி⁴த்வா திணகுடிகம் அகாஸி. ததியம்பி கோ² ஆயஸ்மதோ த⁴னியஸ்ஸ கும்ப⁴காரபுத்தஸ்ஸ கா³மம் பிண்டா³ய பவிட்ட²ஸ்ஸ திணஹாரியோ கட்ட²ஹாரியோ திணகுடிகம் பி⁴ந்தி³த்வா திணஞ்ச கட்ட²ஞ்ச ஆதா³ய அக³மம்ஸு.

அத² கோ² ஆயஸ்மதோ த⁴னியஸ்ஸ கும்ப⁴காரபுத்தஸ்ஸ ஏதத³ஹோஸி – ‘‘யாவததியகம் கோ² மே கா³மம் பிண்டா³ய பவிட்ட²ஸ்ஸ திணஹாரியோ கட்ட²ஹாரியோ திணகுடிகம் பி⁴ந்தி³த்வா திணஞ்ச கட்ட²ஞ்ச ஆதா³ய அக³மம்ஸு. அஹம் கோ² பன ஸுஸிக்கி²தோ அனவயோ ஸகே ஆசரியகே கும்ப⁴காரகம்மே பரியோதா³தஸிப்போ. யம்னூனாஹம் ஸாமம் சிக்க²ல்லம் மத்³தி³த்வா ஸப்³ப³மத்திகாமயம் குடிகம் கரேய்ய’’ந்தி! அத² கோ² ஆயஸ்மா த⁴னியோ கும்ப⁴காரபுத்தோ ஸாமம் சிக்க²ல்லம் மத்³தி³த்வா ஸப்³ப³மத்திகாமயம் குடிகம் கரித்வா திணஞ்ச கட்ட²ஞ்ச கோ³மயஞ்ச ஸம்கட்³டி⁴த்வா தம் குடிகம் பசி. ஸா அஹோஸி குடிகா அபி⁴ரூபா த³ஸ்ஸனீயா பாஸாதி³கா லோஹிதிகா [லோஹிதகா (ஸ்யா.)], ஸேய்யதா²பி இந்த³கோ³பகோ. ஸேய்யதா²பி நாம கிங்கணிகஸத்³தோ³ [கிங்கிணிகஸத்³தோ³ (ஸீ. ஸ்யா.)] ஏவமேவம் தஸ்ஸா குடிகாய ஸத்³தோ³ அஹோஸி.

85. அத² கோ² ப⁴க³வா ஸம்ப³ஹுலேஹி பி⁴க்கூ²ஹி ஸத்³தி⁴ம் கி³ஜ்ஜ²கூடா பப்³ப³தா ஓரோஹந்தோ அத்³த³ஸ தம் குடிகம் அபி⁴ரூபம் த³ஸ்ஸனீயம் பாஸாதி³கம் லோஹிதிகம். தி³ஸ்வான பி⁴க்கூ² ஆமந்தேஸி – ‘‘கிம் ஏதம், பி⁴க்க²வே, அபி⁴ரூபம் த³ஸ்ஸனீயம் பாஸாதி³கம் லோஹிதிகம், ஸேய்யதா²பி இந்த³கோ³பகோ’’தி? அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். விக³ரஹி பு³த்³தோ⁴ ப⁴க³வா – ‘‘அனனுச்ச²விகம், பி⁴க்க²வே, தஸ்ஸ மோக⁴புரிஸஸ்ஸ அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம ஸோ, பி⁴க்க²வே, மோக⁴புரிஸோ ஸப்³ப³மத்திகாமயம் குடிகம் கரிஸ்ஸதி! ந ஹி நாம, பி⁴க்க²வே, தஸ்ஸ மோக⁴புரிஸஸ்ஸ பாணேஸு அனுத்³த³யா அனுகம்பா அவிஹேஸா ப⁴விஸ்ஸதி! க³ச்ச²தே²தம், பி⁴க்க²வே, குடிகம் பி⁴ந்த³த². மா பச்சி²மா ஜனதா பாணேஸு பாதப்³யதம் ஆபஜ்ஜி. ந ச, பி⁴க்க²வே, ஸப்³ப³மத்திகாமயா குடிகா காதப்³பா³. யோ கரேய்ய, ஆபத்தி து³க்கடஸ்ஸா’’தி. ‘‘ஏவம், ப⁴ந்தே’’தி, கோ² தே பி⁴க்கூ² ப⁴க³வதோ படிஸ்ஸுணித்வா யேன ஸா குடிகா தேனுபஸங்கமிம்ஸு; உபஸங்கமித்வா தம் குடிகம் பி⁴ந்தி³ம்ஸு. அத² கோ² ஆயஸ்மா த⁴னியோ கும்ப⁴காரபுத்தோ தே பி⁴க்கூ² ஏதத³வோச – ‘‘கிஸ்ஸ மே தும்ஹே, ஆவுஸோ, குடிகம் பி⁴ந்த³தா²’’தி? ‘‘ப⁴க³வா, ஆவுஸோ, பே⁴தா³பேதீ’’தி. ‘‘பி⁴ந்த³தா²வுஸோ, ஸசே த⁴ம்மஸ்ஸாமீ பே⁴தா³பேதீ’’தி.

86. அத² கோ² ஆயஸ்மதோ த⁴னியஸ்ஸ கும்ப⁴காரபுத்தஸ்ஸ ஏதத³ஹோஸி – ‘‘யாவததியகம் கோ² மே கா³மம் பிண்டா³ய பவிட்ட²ஸ்ஸ திணஹாரியோ கட்ட²ஹாரியோ திணகுடிகம் பி⁴ந்தி³த்வா திணஞ்ச கட்ட²ஞ்ச ஆதா³ய அக³மம்ஸு. யாபி மயா ஸப்³ப³மத்திகாமயா குடிகா கதா ஸாபி ப⁴க³வதா பே⁴தா³பிதா. அத்தி² ச மே தா³ருக³ஹே க³ணகோ ஸந்தி³ட்டோ². யம்னூனாஹம் தா³ருக³ஹே க³ணகம் தா³ரூனி யாசித்வா தா³ருகுடிகம் கரேய்ய’’ந்தி. அத² கோ² ஆயஸ்மா த⁴னியோ கும்ப⁴காரபுத்தோ யேன தா³ருக³ஹே க³ணகோ தேனுபஸங்கமி; உபஸங்கமித்வா தா³ருக³ஹே க³ணகம் ஏதத³வோச – ‘‘யாவததியகம் கோ² மே, ஆவுஸோ, கா³மம் பிண்டா³ய பவிட்ட²ஸ்ஸ திணஹாரியோ கட்ட²ஹாரியோ திணகுடிகம் பி⁴ந்தி³த்வா திணஞ்ச கட்ட²ஞ்ச ஆதா³ய அக³மம்ஸு. யாபி மயா ஸப்³ப³மத்திகாமயா குடிகா கதா ஸாபி ப⁴க³வதா பே⁴தா³பிதா. தே³ஹி மே, ஆவுஸோ, தா³ரூனி. இச்சா²மி தா³ருகுடிகம் [தா³ருகுட்³டி³கம் குடிகம் (ஸீ.)] காது’’ந்தி. ‘‘நத்தி², ப⁴ந்தே, தாதி³ஸானி தா³ரூனி யானாஹம் அய்யஸ்ஸ த³தே³ய்யம். அத்தி², ப⁴ந்தே, தே³வக³ஹதா³ரூனி நக³ரபடிஸங்கா²ரிகானி ஆபத³த்தா²ய நிக்கி²த்தானி. ஸசே தானி தா³ரூனி ராஜா தா³பேதி ஹராபேத², ப⁴ந்தே’’தி. ‘‘தி³ன்னானி, ஆவுஸோ, ரஞ்ஞா’’தி. அத² கோ² தா³ருக³ஹே க³ணகஸ்ஸ ஏதத³ஹோஸி – ‘‘இமே கோ² ஸமணா ஸக்யபுத்தியா த⁴ம்மசாரினோ ஸமசாரினோ [ஸம்மசாரினோ (க.)] ப்³ரஹ்மசாரினோ ஸச்சவாதி³னோ ஸீலவந்தோ கல்யாணத⁴ம்மா. ராஜாபிமேஸம் அபி⁴ப்பஸன்னோ. நாரஹதி அதி³ன்னம் தி³ன்னந்தி வத்து’’ந்தி. அத² கோ² தா³ருக³ஹே க³ணகோ ஆயஸ்மந்தம் த⁴னியம் கும்ப⁴காரபுத்தம் ஏதத³வோச – ‘‘ஹராபேத², ப⁴ந்தே’’தி. அத² கோ² ஆயஸ்மா த⁴னியோ கும்ப⁴காரபுத்தோ தானி தா³ரூனி க²ண்டா³க²ண்டி³கம் சே²தா³பேத்வா ஸகடேஹி நிப்³பா³ஹாபேத்வா தா³ருகுடிகம் அகாஸி.

87. அத² கோ² வஸ்ஸகாரோ ப்³ராஹ்மணோ மக³த⁴மஹாமத்தோ ராஜக³ஹே கம்மந்தே அனுஸஞ்ஞாயமானோ யேன தா³ருக³ஹே க³ணகோ தேனுபஸங்கமி; உபஸங்கமித்வா தா³ருக³ஹே க³ணகம் ஏதத³வோச – ‘‘யானி தானி, ப⁴ணே, தே³வக³ஹதா³ரூனி நக³ரபடிஸங்கா²ரிகானி ஆபத³த்தா²ய நிக்கி²த்தானி கஹம் தானி தா³ரூனீ’’தி? ‘‘தானி, ஸாமி, தா³ரூனி தே³வேன அய்யஸ்ஸ த⁴னியஸ்ஸ கும்ப⁴காரபுத்தஸ்ஸ தி³ன்னானீ’’தி. அத² கோ² வஸ்ஸகாரோ ப்³ராஹ்மணோ மக³த⁴மஹாமத்தோ அனத்தமனோ அஹோஸி – ‘‘கத²ஞ்ஹி நாம தே³வோ தே³வக³ஹதா³ரூனி நக³ரபடிஸங்கா²ரிகானி ஆபத³த்தா²ய நிக்கி²த்தானி த⁴னியஸ்ஸ கும்ப⁴காரபுத்தஸ்ஸ த³ஸ்ஸதீ’’தி! அத² கோ² வஸ்ஸகாரோ ப்³ராஹ்மணோ மக³த⁴மஹாமத்தோ யேன ராஜா மாக³தோ⁴ ஸேனியோ பி³ம்பி³ஸாரோ தேனுபஸங்கமி; உபஸங்கமித்வா ராஜானம் மாக³த⁴ம் ஸேனியம் பி³ம்பி³ஸாரம் ஏதத³வோச – ‘‘ஸச்சம் கிர, தே³வேன [ஸச்சம் கிர தே³வ தே³வேன (ஸீ.)] தே³வக³ஹதா³ரூனி நக³ரபடிஸங்கா²ரிகானி ஆபத³த்தா²ய நிக்கி²த்தானி த⁴னியஸ்ஸ கும்ப⁴காரபுத்தஸ்ஸ தி³ன்னானீ’’தி? ‘‘கோ ஏவமாஹா’’தி? ‘‘தா³ருக³ஹே க³ணகோ, தே³வா’’தி. ‘‘தேன ஹி, ப்³ராஹ்மண, தா³ருக³ஹே க³ணகம் ஆணாபேஹீ’’தி. அத² கோ² வஸ்ஸகாரோ ப்³ராஹ்மணோ மக³த⁴மஹாமத்தோ தா³ருக³ஹே க³ணகம் ப³ந்த⁴ம் [ப³த்³த⁴ம் (ஸீ.)] ஆணாபேஸி. அத்³த³ஸ கோ² ஆயஸ்மா த⁴னியோ கும்ப⁴காரபுத்தோ தா³ருக³ஹே க³ணகம் ப³ந்த⁴ம் நிய்யமானம். தி³ஸ்வான தா³ருக³ஹே க³ணகம் ஏதத³வோச – ‘‘கிஸ்ஸ த்வம், ஆவுஸோ, ப³ந்தோ⁴ நிய்யாஸீ’’தி? ‘‘தேஸம், ப⁴ந்தே, தா³ரூனம் கிச்சா’’தி. ‘‘க³ச்சா²வுஸோ, அஹம்பி ஆக³ச்சா²மீ’’தி. ‘‘ஏய்யாஸி, ப⁴ந்தே, புராஹம் ஹஞ்ஞாமீ’’தி.

88. அத² கோ² ஆயஸ்மா த⁴னியோ கும்ப⁴காரபுத்தோ யேன ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ நிவேஸனம் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² ராஜா மாக³தோ⁴ ஸேனியோ பி³ம்பி³ஸாரோ யேனாயஸ்மா த⁴னியோ கும்ப⁴காரபுத்தோ தேனுபஸங்கமி; உபஸங்கமித்வா ஆயஸ்மந்தம் த⁴னியம் கும்ப⁴காரபுத்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ராஜா மாக³தோ⁴ ஸேனியோ பி³ம்பி³ஸாரோ ஆயஸ்மந்தம் த⁴னியம் கும்ப⁴காரபுத்தம் ஏதத³வோச – ‘‘ஸச்சம் கிர மயா, ப⁴ந்தே, தே³வக³ஹதா³ரூனி நக³ரபடிஸங்கா²ரிகானி ஆபத³த்தா²ய நிக்கி²த்தானி அய்யஸ்ஸ தி³ன்னானீ’’தி? ‘‘ஏவம், மஹாராஜா’’தி. ‘‘மயம் கோ², ப⁴ந்தே, ராஜானோ நாம ப³ஹுகிச்சா ப³ஹுகரணீயா, த³த்வாபி ந ஸரேய்யாம; இங்க⁴, ப⁴ந்தே, ஸராபேஹீ’’தி. ‘‘ஸரஸி த்வம், மஹாராஜ, பட²மாபி⁴ஸித்தோ ஏவரூபிம் வாசம் பா⁴ஸிதா – ‘‘தி³ன்னஞ்ஞேவ ஸமணப்³ராஹ்மணானம் திணகட்டோ²த³கம் பரிபு⁴ஞ்ஜந்தூ’’தி. ‘‘ஸராமஹம், ப⁴ந்தே. ஸந்தி, ப⁴ந்தே, ஸமணப்³ராஹ்மணா லஜ்ஜினோ குக்குச்சகா ஸிக்கா²காமா. தேஸம் அப்பமத்தகேபி குக்குச்சம் உப்பஜ்ஜதி. தேஸம் மயா ஸந்தா⁴ய பா⁴ஸிதம், தஞ்ச கோ² அரஞ்ஞே அபரிக்³க³ஹிதம். ஸோ த்வம், ப⁴ந்தே, தேன லேஸேன தா³ரூனி அதி³ன்னம் ஹரிதும் மஞ்ஞஸி! கத²ஞ்ஹி நாம மாதி³ஸோ ஸமணம் வா ப்³ராஹ்மணம் வா விஜிதே வஸந்தம் ஹனேய்ய வா ப³ந்தே⁴ய்ய வா பப்³பா³ஜேய்ய வா! க³ச்ச², ப⁴ந்தே, லோமேன த்வம் முத்தோஸி. மாஸ்ஸு புனபி ஏவரூபம் அகாஸீ’’தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘அலஜ்ஜினோ இமே ஸமணா ஸக்யபுத்தியா து³ஸ்ஸீலா முஸாவாதி³னோ. இமே ஹி நாம த⁴ம்மசாரினோ ஸமசாரினோ ப்³ராஹ்மசாரினோ ஸச்சவாதி³னோ ஸீலவந்தோ கல்யாணத⁴ம்மா படிஜானிஸ்ஸந்தி! நத்தி² இமேஸம் ஸாமஞ்ஞம், நத்தி² இமேஸம் ப்³ரஹ்மஞ்ஞம். நட்ட²ம் இமேஸம் ஸாமஞ்ஞம், நட்ட²ம் இமேஸம் ப்³ரஹ்மஞ்ஞம். குதோ இமேஸம் ஸாமஞ்ஞம், குதோ இமேஸம் ப்³ரஹ்மஞ்ஞம்! அபக³தா இமே ஸாமஞ்ஞா, அபக³தா இமே ப்³ரஹ்மஞ்ஞா. ராஜானம்பி இமே வஞ்சேந்தி, கிம் பனஞ்ஞே மனுஸ்ஸே’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா² ஸந்துட்டா² லஜ்ஜினோ குக்குச்சகா ஸிக்கா²காமா தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா த⁴னியோ கும்ப⁴காரபுத்தோ ரஞ்ஞோ தா³ரூனி அதி³ன்னம் ஆதி³யிஸ்ஸதீ’’தி! அத² கோ² தே பி⁴க்கூ² ஆயஸ்மந்தம் த⁴னியம் கும்ப⁴காரபுத்தம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா ஆயஸ்மந்தம் த⁴னியம் கும்ப⁴காரபுத்தம் படிபுச்சி² – ‘‘ஸச்சம் கிர த்வம், த⁴னிய, ரஞ்ஞோ தா³ரூனி அதி³ன்னம் ஆதி³யீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், மோக⁴புரிஸ, அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம த்வம், மோக⁴புரிஸ, ரஞ்ஞோ தா³ரூனி அதி³ன்னம் ஆதி³யிஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய பஸன்னானம் வா பி⁴ய்யோபா⁴வாய; அத²க்²வேதம், மோக⁴புரிஸ, அப்பஸன்னானஞ்சேவ அப்பஸாதா³ய பஸன்னானஞ்ச ஏகச்சானம் அஞ்ஞத²த்தாயா’’தி.

தேன கோ² பன ஸமயேன அஞ்ஞதரோ புராணவோஹாரிகோ மஹாமத்தோ பி⁴க்கூ²ஸு பப்³ப³ஜிதோ ப⁴க³வதோ அவிதூ³ரே நிஸின்னோ ஹோதி. அத² கோ² ப⁴க³வா தம் பி⁴க்கு²ம் ஏதத³வோச – ‘‘கித்தகேன கோ² பி⁴க்கு² ராஜா மாக³தோ⁴ ஸேனியோ பி³ம்பி³ஸாரோ சோரம் க³ஹேத்வா ஹனதி வா ப³ந்த⁴தி வா பப்³பா³ஜேதி வா’’தி? ‘‘பாதே³ன வா, ப⁴க³வா, பாதா³ரஹேன வா’’தி [பாதா³ரஹேனவா அதிரேகபாதே³னவாதி (ஸ்யா.)]. தேன கோ² பன ஸமயேன ராஜக³ஹே பஞ்சமாஸகோ பாதோ³ ஹோதி. அத² கோ² ப⁴க³வா ஆயஸ்மந்தம் த⁴னியம் கும்ப⁴காரபுத்தம் அனேகபரியாயேன விக³ரஹித்வா து³ப்³ப⁴ரதாய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

89. ‘‘யோ பன பி⁴க்கு² அதி³ன்னம் தே²ய்யஸங்கா²தம் ஆதி³யேய்ய, யதா²ரூபே அதி³ன்னாதா³னே ராஜானோ சோரம் க³ஹேத்வா ஹனேய்யும் வா ப³ந்தே⁴ய்யும் வா பப்³பா³ஜேய்யும் வா – ‘சோரோஸி பா³லோஸி மூள்ஹோஸி தே²னோஸீ’தி, ததா²ரூபம் பி⁴க்கு² அதி³ன்னம் ஆதி³யமானோ அயம்பி பாராஜிகோ ஹோதி அஸம்வாஸோ’’தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

90. தேன கோ² பன ஸமயேன ச²ப்³ப³க்³கி³யா பி⁴க்கூ² ரஜகத்த²ரணம் க³ந்த்வா ரஜகப⁴ண்டி³கம் அவஹரித்வா ஆராமம் ஹரித்வா பா⁴ஜேஸும். பி⁴க்கூ² ஏவமாஹம்ஸு – ‘‘மஹாபுஞ்ஞத்த² தும்ஹே, ஆவுஸோ. ப³ஹும் தும்ஹாகம் சீவரம் உப்பன்ன’’ந்தி. ‘‘குதோ ஆவுஸோ, அம்ஹாகம் புஞ்ஞம், இதா³னி மயம் ரஜகத்த²ரணம் க³ந்த்வா ரஜகப⁴ண்டி³கம் அவஹரிம்ஹா’’தி. ‘‘நனு, ஆவுஸோ, ப⁴க³வதா ஸிக்கா²பத³ம் பஞ்ஞத்தம். கிஸ்ஸ தும்ஹே, ஆவுஸோ, ரஜகப⁴ண்டி³கம் அவஹரித்தா²’’தி? ‘‘ஸச்சம், ஆவுஸோ, ப⁴க³வதா ஸிக்கா²பத³ம் பஞ்ஞத்தம். தஞ்ச கோ² கா³மே, நோ அரஞ்ஞே’’தி. ‘‘நனு, ஆவுஸோ, ததே²வேதம் ஹோதி. அனனுச்ச²விகம், ஆவுஸோ, அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம தும்ஹே, ஆவுஸோ, ரஜகப⁴ண்டி³கம் அவஹரிஸ்ஸத²! நேதம், ஆவுஸோ, அப்பஸன்னானம் வா பஸாதா³ய பஸன்னானம் வா பி⁴ய்யோபா⁴வாய; அத²க்²வேதம், ஆவுஸோ, அப்பஸன்னானஞ்சேவ அப்பஸாதா³ய பஸன்னானஞ்ச ஏகச்சானம் அஞ்ஞத²த்தாயா’’தி. அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா ச²ப்³ப³க்³கி³யே பி⁴க்கூ² படிபுச்சி² – ‘‘ஸச்சம் கிர தும்ஹே, பி⁴க்க²வே, ரஜகத்த²ரணம் க³ந்த்வா ரஜகப⁴ண்டி³கம் அவஹரித்தா²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், மோக⁴புரிஸா, அனனுலோமிகம் அப்படிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம தும்ஹே, மோக⁴புரிஸா, ரஜகப⁴ண்டி³கம் அவஹரிஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய பஸன்னானம் வா பி⁴ய்யோபா⁴வாய; அத² க்²வேதம், மோக⁴புரிஸா, அப்பஸன்னானஞ்சேவ அப்பஸாதா³ய பஸன்னானஞ்ச ஏகச்சானம் அஞ்ஞத²த்தாயா’’தி. அத² கோ² ப⁴க³வா ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா து³ப்³ப⁴ரதாய…பே… வீரியாரம்ப⁴ஸ்ஸ வண்ணம் பா⁴ஸித்வா பி⁴க்கூ²னம் தத³னுச்ச²விகம் தத³னுலோமிகம் த⁴ம்மிம் கத²ம் கத்வா பி⁴க்கூ² ஆமந்தேஸி…பே… ‘‘ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

91. ‘‘யோ பன பி⁴க்கு² கா³மா வா அரஞ்ஞா வா அதி³ன்னம் தே²ய்யஸங்கா²தம் ஆதி³யேய்ய, யதா²ரூபே அதி³ன்னாதா³னே ராஜானோ சோரம் க³ஹேத்வா ஹனேய்யும் வா ப³ந்தே⁴ய்யும் வா பப்³பா³ஜேய்யும் வா – ‘சோரோஸி பா³லோஸி மூள்ஹோஸி தே²னோஸீ’தி, ததா²ரூபம் பி⁴க்கு² அதி³ன்னம் ஆதி³யமானோ அயம்பி பாராஜிகோ ஹோதி அஸம்வாஸோ’’தி.

92. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

கா³மோ நாம ஏககுடிகோபி கா³மோ, த்³விகுடிகோபி கா³மோ, திகுடிகோபி கா³மோ, சதுகுடிகோபி கா³மோ, ஸமனுஸ்ஸோபி கா³மோ, அமனுஸ்ஸோபி கா³மோ, பரிக்கி²த்தோபி கா³மோ, அபரிக்கி²த்தோபி கா³மோ, கோ³னிஸாதி³னிவிட்டோ²பி கா³மோ, யோபி ஸத்தோ² அதிரேகசதுமாஸனிவிட்டோ² ஸோபி வுச்சதி கா³மோ.

கா³மூபசாரோ நாம பரிக்கி²த்தஸ்ஸ கா³மஸ்ஸ இந்த³கீ²லே [இந்த³கி²லே (க.)] டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ, அபரிக்கி²த்தஸ்ஸ கா³மஸ்ஸ க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ.

அரஞ்ஞம் நாம ட²பேத்வா கா³மஞ்ச கா³மூபசாரஞ்ச அவஸேஸம் அரஞ்ஞம் நாம.

அதி³ன்னம் நாமம் யம் அதி³ன்னம் அனிஸ்ஸட்ட²ம் அபரிச்சத்தம் ரக்கி²தம் கோ³பிதம் மமாயிதம் பரபரிக்³க³ஹிதம். ஏதம் அதி³ன்னம் நாம.

தே²ய்யஸங்கா²தந்தி தே²ய்யசித்தோ அவஹரணசித்தோ.

ஆதி³யேய்யாதி ஆதி³யேய்ய ஹரேய்ய அவஹரேய்ய இரியாபத²ம் விகோபேய்ய டா²னா சாவேய்ய ஸங்கேதம் வீதினாமேய்ய.

யதா²ரூபம் நாம பாத³ம் வா பாதா³ரஹம் வா அதிரேகபாத³ம் வா.

ராஜானோ நாம பத²ப்³யாராஜா பதே³ஸராஜா மண்ட³லிகா அந்தரபோ⁴கி³கா அக்க²த³ஸ்ஸா மஹாமத்தா, யே வா பன சே²ஜ்ஜபே⁴ஜ்ஜம் கரோந்தா அனுஸாஸந்தி. ஏதே ராஜானோ நாம.

சோரோ நாம யோ பஞ்சமாஸகம் வா அதிரேகபஞ்சமாஸகம் வா அக்³க⁴னகம் அதி³ன்னம் தே²ய்யஸங்கா²தம் ஆதி³யதி. ஏஸோ சோரோ நாம.

ஹனேய்யும் வாதி ஹத்தே²ன வா பாதே³ன வா கஸாய வா வேத்தேன வா அட்³ட⁴த³ண்ட³கேன வா சே²ஜ்ஜாய வா ஹனேய்யும்.

ப³ந்தே⁴ய்யும் வாதி ரஜ்ஜுப³ந்த⁴னேன வா அந்து³ப³ந்த⁴னேன வா ஸங்க²லிகப³ந்த⁴னேன வா க⁴ரப³ந்த⁴னேன வா நக³ரப³ந்த⁴னேன வா கா³மப³ந்த⁴னேன வா நிக³மப³ந்த⁴னேன வா ப³ந்தே⁴ய்யும், புரிஸகு³த்திம் வா கரேய்யும்.

பப்³பா³ஜேய்யும் வாதி கா³மா வா நிக³மா வா நக³ரா வா ஜனபதா³ வா ஜனபத³பதே³ஸா வா பப்³பா³ஜேய்யும்.

சோரோஸி பா³லோஸி மூள்ஹோஸி தே²னோஸீதி பரிபா⁴ஸோ ஏஸோ.

ததா²ரூபம் நாம பாத³ம் வா பாதா³ரஹம் வா அதிரேகபாத³ம் வா.

ஆதி³யமானோதி ஆதி³யமானோ ஹரமானோ அவஹரமானோ இரியாபத²ம் விகோபயமானோ டா²னா சாவயமானோ ஸங்கேதம் வீதினாமயமானோ.

அயம்பீதி புரிமம் உபாதா³ய வுச்சதி.

பாராஜிகோ ஹோதீதி ஸேய்யதா²பி நாம பண்டு³பலாஸோ ப³ந்த⁴னா பவுத்தோ [ஹரிதத்தாய (ஸீ. ஸ்யா.)] அப⁴ப்³போ³ ஹரிதத்தா²ய [ஹரிதத்தாய (ஸீ. ஸ்யா.)], ஏவமேவ பி⁴க்கு² பாத³ம் வா பாதா³ரஹம் வா அதிரேகபாத³ம் வா அதி³ன்னம் தே²ய்யஸங்கா²தம் ஆதி³யித்வா அஸ்ஸமணோ ஹோதி அஸக்யபுத்தியோ. தேன வுச்சதி – ‘பாராஜிகோ ஹோதீ’தி.

அஸம்வாஸோதி ஸம்வாஸோ நாம ஏககம்மம் ஏகுத்³தே³ஸோ ஸமஸிக்க²தா. ஏஸோ ஸம்வாஸோ நாம. ஸோ தேன ஸத்³தி⁴ம் நத்தி². தேன வுச்சதி – ‘அஸம்வாஸோ’தி.

93. பூ⁴மட்ட²ம் த²லட்ட²ம் ஆகாஸட்ட²ம் வேஹாஸட்ட²ம் உத³கட்ட²ம் நாவட்ட²ம் யானட்ட²ம் பா⁴ரட்ட²ம் ஆராமட்ட²ம் விஹாரட்ட²ம் கே²த்தட்ட²ம் வத்து²ட்ட²ம் கா³மட்ட²ம் அரஞ்ஞட்ட²ம் உத³கம் த³ந்தபோணம் [த³ந்தபோனம் (ஸீ. க.)] வனப்பதி ஹரணகம் உபனிதி⁴ ஸுங்ககா⁴தம் பாணோ அபத³ம் த்³விபத³ம் சதுப்பத³ம் ப³ஹுப்பத³ம் ஓசரகோ ஓணிரக்கோ² ஸம்விதா³வஹாரோ ஸங்கேதகம்மம் நிமித்தகம்மந்தி.

94. பூ⁴மட்ட²ம் நாம ப⁴ண்ட³ம் பூ⁴மியம் நிக்கி²த்தம் ஹோதி நிகா²தம் படிச்ச²ன்னம். பூ⁴மட்ட²ம் ப⁴ண்ட³ம் அவஹரிஸ்ஸாமீதி தே²ய்யசித்தோ து³தியம் வா பரியேஸதி குதா³லம் வா பிடகம் வா பரியேஸதி க³ச்ச²தி வா, ஆபத்தி து³க்கடஸ்ஸ. தத்த² ஜாதகம் கட்ட²ம் வா லதம் வா சி²ந்த³தி, ஆபத்தி து³க்கடஸ்ஸ. தத்த² பம்ஸும் க²ணதி வா ப்³யூஹதி [வியூஹதி (ஸ்யா.)] வா உத்³த⁴ரதி வா, ஆபத்தி து³க்கடஸ்ஸ. கும்பி⁴ம் ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. அத்தனோ பா⁴ஜனம் பவேஸேத்வா பஞ்சமாஸகம் வா அதிரேகபஞ்சமாஸகம் வா அக்³க⁴னகம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. அத்தனோ பா⁴ஜனக³தம் வா கரோதி முட்டி²ம் வா சி²ந்த³தி, ஆபத்தி பாராஜிகஸ்ஸ. ஸுத்தாருள்ஹம் ப⁴ண்ட³ம் பாமங்க³ம் வா கண்ட²ஸுத்தகம் வா கடிஸுத்தகம் வா ஸாடகம் வா வேட²னம் வா தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. கோடியம் க³ஹேத்வா உச்சாரேதி, ஆபத்தி து²ல்லச்சயஸ்ஸ. க⁴ம்ஸந்தோ நீஹரதி, ஆபத்தி து²ல்லச்சயஸ்ஸ. அந்தமஸோ கேஸக்³க³மத்தம்பி கும்பி⁴முகா² மோசேதி, ஆபத்தி பாராஜிகஸ்ஸ. ஸப்பிம் வா தேலம் வா மது⁴ம் வா பா²ணிதம் வா பஞ்சமாஸகம் வா அதிரேகபஞ்சமாஸகம் வா அக்³க⁴னகம் தே²ய்யசித்தோ ஏகேன பயோகே³ன பிவதி, ஆபத்தி பாராஜிகஸ்ஸ. தத்தே²வ பி⁴ந்த³தி வா ச²ட்³டே³தி வா ஜா²பேதி வா அபரிபோ⁴க³ம் வா கரோதி, ஆபத்தி து³க்கடஸ்ஸ.

95. த²லட்ட²ம் நாம ப⁴ண்ட³ம் த²லே நிக்கி²த்தம் ஹோதி. த²லட்ட²ம் ப⁴ண்ட³ம் அவஹரிஸ்ஸாமீதி தே²ய்யசித்தோ து³தியம் வா பரியேஸதி க³ச்ச²தி வா, ஆபத்தி து³க்கடஸ்ஸ. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ.

96. ஆகாஸட்ட²ம் நாம ப⁴ண்ட³ம் ஆகாஸக³தம் ஹோதி. மோரோ வா கபிஞ்ஜரோ வா தித்திரோ வா வட்டகோ வா, ஸாடகம் வா வேட²னம் வா ஹிரஞ்ஞம் வா ஸுவண்ணம் வா சி²ஜ்ஜமானம் பததி. ஆகாஸட்ட²ம் ப⁴ண்ட³ம் அவஹரிஸ்ஸாமீதி தே²ய்யசித்தோ து³தியம் வா பரியேஸதி க³ச்ச²தி வா, ஆபத்தி து³க்கடஸ்ஸ. க³மனம் உபச்சி²ந்த³தி, ஆபத்தி து³க்கடஸ்ஸ. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ.

97. வேஹாஸட்ட²ம் நாம ப⁴ண்ட³ம் வேஹாஸக³தம் ஹோதி. மஞ்சே வா பீடே² வா சீவரவம்ஸே வா சீவரரஜ்ஜுயா வா பி⁴த்திகி²லே வா நாக³த³ந்தே வா ருக்கே² வா லக்³கி³தம் ஹோதி, அந்தமஸோ பத்தாதா⁴ரகேபி. வேஹாஸட்ட²ம் ப⁴ண்ட³ம் அவஹரிஸ்ஸாமீதி தே²ய்யசித்தோ து³தியம் வா பரியேஸதி க³ச்ச²தி வா, ஆபத்தி து³க்கடஸ்ஸ. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ.

98. உத³கட்ட²ம் நாம ப⁴ண்ட³ம் உத³கே நிக்கி²த்தம் ஹோதி. உத³கட்ட²ம் ப⁴ண்ட³ம் அவஹரிஸ்ஸாமீதி தே²ய்யசித்தோ து³தியம் வா பரியேஸதி க³ச்ச²தி வா, ஆபத்தி து³க்கடஸ்ஸ. நிமுஜ்ஜதி வா உம்முஜ்ஜதி வா, ஆபத்தி து³க்கடஸ்ஸ. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. தத்த² ஜாதகம் உப்பலம் வா பது³மம் வா புண்ட³ரீகம் வா பி⁴ஸம் வா மச்ச²ம் வா கச்ச²பம் வா பஞ்சமாஸகம் வா அதிரேகபஞ்சமாஸகம் வா அக்³க⁴னகம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ.

99. நாவா நாம யாய தரதி. நாவட்ட²ம் நாம ப⁴ண்ட³ம் நாவாய நிக்கி²த்தம் ஹோதி. ‘‘நாவட்ட²ம் ப⁴ண்ட³ம் அவஹரிஸ்ஸாமீ’’தி தே²ய்யசித்தோ து³தியம் வா பரியேஸதி க³ச்ச²தி வா, ஆபத்தி து³க்கடஸ்ஸ. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. நாவம் அவஹரிஸ்ஸாமீதி தே²ய்யசித்தோ து³தியம் வா பரியேஸதி க³ச்ச²தி வா, ஆபத்தி து³க்கடஸ்ஸ. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. ப³ந்த⁴னம் மோசேதி, ஆபத்தி து³க்கடஸ்ஸ. ப³ந்த⁴னம் மோசேத்வா ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. உத்³த⁴ம் வா அதோ⁴ வா திரியம் வா அந்தமஸோ கேஸக்³க³மத்தம்பி ஸங்காமேதி, ஆபத்தி பாராஜிகஸ்ஸ.

100. யானம் நாம வய்ஹம் ரதோ² ஸகடம் ஸந்த³மானிகா. யானட்ட²ம் நாம ப⁴ண்ட³ம் யானே நிக்கி²த்தம் ஹோதி. யானட்ட²ம் ப⁴ண்ட³ம் அவஹரிஸ்ஸாமீதி தே²ய்யசித்தோ து³தியம் வா பரியேஸதி க³ச்ச²தி வா, ஆபத்தி து³க்கடஸ்ஸ. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. யானம் அவஹரிஸ்ஸாமீதி தே²ய்யசித்தோ து³தியம் வா பரியேஸதி க³ச்ச²தி வா, ஆபத்தி து³க்கடஸ்ஸ. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ.

101. பா⁴ரோ நாம ஸீஸபா⁴ரோ க²ந்த⁴பா⁴ரோ கடிபா⁴ரோ ஓலம்ப³கோ. ஸீஸே பா⁴ரம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. க²ந்த⁴ம் ஓரோபேதி, ஆபத்தி பாராஜிகஸ்ஸ. க²ந்தே⁴ பா⁴ரம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. கடிம் ஓரோபேதி, ஆபத்தி பாராஜிகஸ்ஸ. கடியா பா⁴ரம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. ஹத்தே²ன க³ண்ஹாதி, ஆபத்தி பாராஜிகஸ்ஸ. ஹத்தே² பா⁴ரம் தே²ய்யசித்தோ பூ⁴மியம் நிக்கி²பதி, ஆபத்தி பாராஜிகஸ்ஸ. தே²ய்யசித்தோ பூ⁴மிதோ க³ண்ஹாதி, ஆபத்தி பாராஜிகஸ்ஸ.

102. ஆராமோ நாம புப்பா²ராமோ ப²லாராமோ. ஆராமட்ட²ம் நாம ப⁴ண்ட³ம் ஆராமே சதூஹி டா²னேஹி நிக்கி²த்தம் ஹோதி – பூ⁴மட்ட²ம் த²லட்ட²ம், ஆகாஸட்ட²ம், வேஹாஸட்ட²ம். ஆராமட்ட²ம் ப⁴ண்ட³ம் அவஹரிஸ்ஸாமீதி தே²ய்யசித்தோ து³தியம் வா பரியேஸதி க³ச்ச²தி வா, ஆபத்தி து³க்கடஸ்ஸ. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. தத்த² ஜாதகம் மூலம் வா தசம் வா பத்தம் வா புப்ப²ம் வா ப²லம் வா பஞ்சமாஸகம் வா அதிரேகபஞ்சமாஸகம் வா அக்³க⁴னகம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. ஆராமம் அபி⁴யுஞ்ஜதி, ஆபத்தி து³க்கடஸ்ஸ. ஸாமிகஸ்ஸ விமதிம் உப்பாதே³தி, ஆபத்தி து²ல்லச்சயஸ்ஸ. ஸாமிகோ ந மய்ஹம் ப⁴விஸ்ஸதீதி து⁴ரம் நிக்கி²பதி, ஆபத்தி பாராஜிகஸ்ஸ. த⁴ம்மம் சரந்தோ ஸாமிகம் பராஜேதி, ஆபத்தி பாராஜிகஸ்ஸ. த⁴ம்மம் சரந்தோ பரஜ்ஜதி, ஆபத்தி து²ல்லச்சயஸ்ஸ.

103. விஹாரட்ட²ம் நாம ப⁴ண்ட³ம் விஹாரே சதூஹி டா²னேஹி நிக்கி²த்தம் ஹோதி – பூ⁴மட்ட²ம், த²லட்ட²ம், ஆகாஸட்ட²ம், வேஹாஸட்ட²ம். விஹாரட்ட²ம் ப⁴ண்ட³ம் அவஹரிஸ்ஸாமீதி தே²ய்யசித்தோ து³தியம் வா பரியேஸதி க³ச்ச²தி வா, ஆபத்தி து³க்கடஸ்ஸ. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. விஹாரம் அபி⁴யுஞ்ஜதி, ஆபத்தி து³க்கடஸ்ஸ. ஸாமிகஸ்ஸ விமதிம் உப்பாதே³தி, ஆபத்தி து²ல்லச்சயஸ்ஸ. ஸாமிகோ ந மய்ஹம் ப⁴விஸ்ஸதீதி து⁴ரம் நிக்கி²பதி, ஆபத்தி பாராஜிகஸ்ஸ. த⁴ம்மம் சரந்தோ ஸாமிகம் பராஜேதி, ஆபத்தி பாராஜிகஸ்ஸ. த⁴ம்மம் சரந்தோ பரஜ்ஜதி, ஆபத்தி து²ல்லச்சயஸ்ஸ.

104. கே²த்தம் நாம யத்த² புப்³ப³ண்ணம் வா அபரண்ணம் வா ஜாயதி. கே²த்தட்ட²ம் நாம ப⁴ண்ட³ம் கே²த்தே சதூஹி டா²னேஹி நிக்கி²த்தம் ஹோதி – பூ⁴மட்ட²ம், த²லட்ட²ம், ஆகாஸட்ட²ம், வேஹாஸட்ட²ம். கே²த்தட்ட²ம் ப⁴ண்ட³ம் அவஹரிஸ்ஸாமீதி தே²ய்யசித்தோ து³தியம் வா பரியேஸதி க³ச்ச²தி வா, ஆபத்தி, து³க்கடஸ்ஸ. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. தத்த² ஜாதகம் புப்³ப³ண்ணம் வா அபரண்ணம் வா பஞ்சமாஸகம் வா அதிரேகபஞ்சமாஸகம் வா அக்³க⁴னகம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. கே²த்தம் அபி⁴யுஞ்ஜதி, ஆபத்தி து³க்கடஸ்ஸ. ஸாமிகஸ்ஸ விமதிம் உப்பாதே³தி, ஆபத்தி து²ல்லச்சயஸ்ஸ. ஸாமிகோ ந மய்ஹம் ப⁴விஸ்ஸதீதி து⁴ரம் நிக்கி²பதி, ஆபத்தி பாராஜிகஸ்ஸ. த⁴ம்மம் சரந்தோ ஸாமிகம் பராஜேதி, ஆபத்தி பாராஜிகஸ்ஸ. த⁴ம்மம் சரந்தோ பரஜ்ஜதி, ஆபத்தி து²ல்லச்சயஸ்ஸ. கி²லம் வா ரஜ்ஜும் வா வதிம் வா மரியாத³ம் வா ஸங்காமேதி, ஆபத்தி து³க்கடஸ்ஸ. ஏகம் பயோக³ம் அனாக³தே, ஆபத்தி து²ல்லச்சயஸ்ஸ. தஸ்மிம் பயோகே³ ஆக³தே, ஆபத்தி பாராஜிகஸ்ஸ.

105. வத்து² நாம ஆராமவத்து² விஹாரவத்து². வத்து²ட்ட²ம் நாம ப⁴ண்ட³ம் வத்து²ஸ்மிம் சதூஹி டா²னேஹி நிக்கி²த்தம் ஹோதி – பூ⁴மட்ட²ம், த²லட்ட²ம், ஆகாஸட்ட²ம், வேஹாஸட்ட²ம். வத்து²ட்ட²ம் ப⁴ண்ட³ம் அவஹரிஸ்ஸாமீதி தே²ய்யசித்தோ து³தியம் வா பரியேஸதி க³ச்ச²தி வா, ஆபத்தி து³க்கடஸ்ஸ. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. வத்து²ம் அபி⁴யுஞ்ஜதி, ஆபத்தி து³க்கடஸ்ஸ. ஸாமிகஸ்ஸ விமதிம் உப்பாதே³தி, ஆபத்தி து²ல்லச்சயஸ்ஸ. ஸாமிகோ ந மய்ஹம் ப⁴விஸ்ஸதீதி து⁴ரம் நிக்கி²பதி, ஆபத்தி பாராஜிகஸ்ஸ. த⁴ம்மம் சரந்தோ ஸாமிகம் பராஜேதி, ஆபத்தி பாராஜிகஸ்ஸ. த⁴ம்மம் சரந்தோ பரஜ்ஜதி, ஆபத்தி து²ல்லச்சயஸ்ஸ. கீ²லம் வா ரஜ்ஜும் வா வதிம் வா பாகாரம் வா ஸங்காமேதி, ஆபத்தி து³க்கடஸ்ஸ. ஏகம் பயோக³ம் அனாக³தே ஆபத்தி து²ல்லச்சயஸ்ஸ. தஸ்மிம் பயோகே³ ஆக³தே ஆபத்தி பாராஜிகஸ்ஸ.

106. கா³மட்ட²ம் நாம ப⁴ண்ட³ம் கா³மே சதூஹி டா²னேஹி நிக்கி²த்தம் ஹோதி – பூ⁴மட்ட²ம், த²லட்ட²ம், ஆகாஸட்ட²ம், வேஹாஸட்ட²ம். கா³மட்ட²ம் ப⁴ண்ட³ம் அவஹரிஸ்ஸாமீதி தே²ய்யசித்தோ து³தியம் வா பரியேஸதி க³ச்ச²தி வா, ஆபத்தி து³க்கடஸ்ஸ. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ.

107. அரஞ்ஞம் நாம யம் மனுஸ்ஸானம் பரிக்³க³ஹிதம் ஹோதி, தம் அரஞ்ஞம். அரஞ்ஞட்ட²ம் நாம ப⁴ண்ட³ம் அரஞ்ஞே சதூஹி டா²னேஹி நிக்கி²த்தம் ஹோதி – பூ⁴மட்ட²ம், த²லட்ட²ம், ஆகாஸட்ட²ம், வேஹாஸட்ட²ம். அரஞ்ஞட்ட²ம் ப⁴ண்ட³ம் அவஹரிஸ்ஸாமீதி தே²ய்யசித்தோ து³தியம் வா பரியேஸதி க³ச்ச²தி வா, ஆபத்தி து³க்கடஸ்ஸ. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. தத்த² ஜாதகம் கட்ட²ம் வா லதம் வா திணம் வா பஞ்சமாஸகம் வா அதிரேகபஞ்சமாஸகம் வா அக்³க⁴னகம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ.

108. உத³கம் நாம பா⁴ஜனக³தம் வா ஹோதி போக்க²ரணியா வா தளாகே வா. தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. அத்தனோ பா⁴ஜனம் பவேஸேத்வா பஞ்சமாஸகம் வா அதிரேகபஞ்சமாஸகம் வா அக்³க⁴னகம் உத³கம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. அத்தனோ பா⁴ஜனக³தம் கரோதி, ஆபத்தி பாராஜிகஸ்ஸ. மரியாத³ம் பி⁴ந்த³தி, ஆபத்தி து³க்கடஸ்ஸ. மரியாத³ம் பி⁴ந்தி³த்வா பஞ்சமாஸகம் வா அதிரேகபஞ்சமாஸகம் வா அக்³க⁴னகம் உத³கம் நிக்கா²மேதி, ஆபத்தி பாராஜிகஸ்ஸ. அதிரேகமாஸகம் வா ஊனபஞ்சமாஸகம் வா அக்³க⁴னகம் உத³கம் நிக்கா²மேதி, ஆபத்தி து²ல்லச்சயஸ்ஸ. மாஸகம் வா ஊனமாஸகம் வா அக்³க⁴னகம் உத³கம் நிக்கா²மேதி, ஆபத்தி து³க்கடஸ்ஸ.

109. த³ந்தபோணம் நாம சி²ன்னம் வா அச்சி²ன்னம் வா. பஞ்சமாஸகம் வா அதிரேகபஞ்சமாஸகம் வா அக்³க⁴னகம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ.

110. வனப்பதி நாம யோ மனுஸ்ஸானம் பரிக்³க³ஹிதோ ஹோதி ருக்கோ² பரிபோ⁴கோ³. தே²ய்யசித்தோ சி²ந்த³தி, பஹாரே பஹாரே ஆபத்தி து³க்கடஸ்ஸ. ஏகம் பஹாரம் அனாக³தே, ஆபத்தி து²ல்லச்சயஸ்ஸ. தஸ்மிம் பஹாரே ஆக³தே, ஆபத்தி பாராஜிகஸ்ஸ.

111. ஹரணகம் நாம அஞ்ஞஸ்ஸ ஹரணகம் ப⁴ண்ட³ம். தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. ஸஹப⁴ண்ட³ஹாரகம் பத³ஸா நேஸ்ஸாமீதி பட²மம் பாத³ம் ஸங்காமேதி, ஆபத்தி து²ல்லச்சயஸ்ஸ. து³தியம் பாத³ம் ஸங்காமேதி, ஆபத்தி பாராஜிகஸ்ஸ. பதிதம் ப⁴ண்ட³ம் க³ஹேஸ்ஸாமீதி பாதாபேதி, ஆபத்தி து³க்கடஸ்ஸ. பதிதம் ப⁴ண்ட³ம் பஞ்சமாஸகம் வா அதிரேகபஞ்சமாஸகம் வா அக்³க⁴னகம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ.

112. உபனிதி⁴ நாம உபனிக்கி²த்தம் ப⁴ண்ட³ம். தே³ஹி மே ப⁴ண்ட³ந்தி வுச்சமானோ நாஹம் க³ண்ஹாமீதி ப⁴ணதி, ஆபத்தி து³க்கடஸ்ஸ. ஸாமிகஸ்ஸ விமதிம் உப்பாதே³தி, ஆபத்தி து²ல்லச்சயஸ்ஸ. ஸாமிகோ ந மய்ஹம் த³ஸ்ஸதீதி து⁴ரம் நிக்கி²பதி, ஆபத்தி பாராஜிகஸ்ஸ. த⁴ம்மம் சரந்தோ ஸாமிகம் பராஜேதி, ஆபத்தி பாராஜிகஸ்ஸ. த⁴ம்மம் சரந்தோ பரஜ்ஜதி, ஆபத்தி து²ல்லச்சயஸ்ஸ.

113. ஸுங்ககா⁴தம் நாம ரஞ்ஞா ட²பிதம் ஹோதி பப்³ப³தக²ண்டே³ வா நதீ³தித்தே² வா கா³மத்³வாரே வா – ‘அத்ர பவிட்ட²ஸ்ஸ ஸுங்கம் க³ண்ஹந்தூ’தி. தத்ர பவிஸித்வா ராஜக்³க³ம் [ராஜக்³க⁴ம் (ஸீ. ஸ்யா.)] ப⁴ண்ட³ம் பஞ்சமாஸகம் வா அதிரேகபஞ்சமாஸகம் வா அக்³க⁴னகம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. பட²மம் பாத³ம் ஸுங்ககா⁴தம் அதிக்காமேதி, ஆபத்தி து²ல்லச்சயஸ்ஸ. து³தியம் பாத³ம் அதிக்காமேதி, ஆபத்தி பாராஜிகஸ்ஸ. அந்தோஸுங்ககா⁴தே டி²தோ ப³ஹிஸுங்ககா⁴தம் பாதேதி, ஆபத்தி பாராஜிகஸ்ஸ. ஸுங்கம் பரிஹரதி, ஆபத்தி து³க்கடஸ்ஸ.

114. பாணோ நாம மனுஸ்ஸபாணோ வுச்சதி. தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. பத³ஸா நேஸ்ஸாமீதி பட²மம் பாத³ம் ஸங்காமேதி, ஆபத்தி து²ல்லச்சயஸ்ஸ. து³தியம் பாத³ம் ஸங்காமேதி, ஆபத்தி பாராஜிகஸ்ஸ.

அபத³ம் நாம அஹி மச்சா². பஞ்சமாஸகம் வா அதிரேகபஞ்சமாஸகம் வா அக்³க⁴னகம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ.

115. த்³விபத³ம் நாம மனுஸ்ஸா, பக்க²ஜாதா. தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. பத³ஸா நேஸ்ஸாமீதி பட²மம் பாத³ம் ஸங்காமேதி, ஆபத்தி து²ல்லச்சயஸ்ஸ. து³தியம் பாத³ம் ஸங்காமேதி, ஆபத்தி பாராஜிகஸ்ஸ.

116. சதுப்பத³ம் நாம – ஹத்தீ² அஸ்ஸா ஓட்டா² கோ³ணா க³த்³ரபா⁴ பஸுகா. தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. பத³ஸா நேஸ்ஸாமீதி பட²மம் பாத³ம் ஸங்காமேதி, ஆபத்தி து²ல்லச்சயஸ்ஸ. து³தியம் பாத³ம் ஸங்காமேதி, ஆபத்தி து²ல்லச்சயஸ்ஸ. ததியம் பாத³ம் ஸங்காமேதி, ஆபத்தி து²ல்லச்சயஸ்ஸ. சதுத்த²ம் பாத³ம் ஸங்காமேதி, ஆபத்தி பாராஜிகஸ்ஸ.

117. ப³ஹுப்பத³ம் நாம – விச்சி²கா ஸதபதீ³ உச்சாலிங்க³பாணகா. பஞ்சமாஸகம் வா அதிரேகபஞ்சமாஸகம் வா அக்³க⁴னகம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ. பத³ஸா நேஸ்ஸாமீதி ஸங்காமேதி, பதே³ பதே³ ஆபத்தி து²ல்லச்சயஸ்ஸ. பச்சி²மம் பாத³ம் ஸங்காமேதி, ஆபத்தி பாராஜிகஸ்ஸ.

118. ஓசரகோ நாம ப⁴ண்ட³ம் ஓசரித்வா ஆசிக்க²தி – ‘‘இத்த²ன்னாமம் ப⁴ண்ட³ம் அவஹரா’’தி, ஆபத்தி து³க்கடஸ்ஸ. ஸோ தம் ப⁴ண்ட³ம் அவஹரதி, ஆபத்தி உபி⁴ன்னம் பாராஜிகஸ்ஸ.

ஓணிரக்கோ² நாம ஆஹடம் ப⁴ண்ட³ம் கோ³பேந்தோ பஞ்சமாஸகம் வா அதிரேகபஞ்சமாஸகம் வா அக்³க⁴னகம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ.

ஸம்விதா³வஹாரோ நாம ஸம்ப³ஹுலா ஸம்வித³ஹித்வா ஏகோ ப⁴ண்ட³ம் அவஹரதி, ஆபத்தி ஸப்³பே³ஸம் பாராஜிகஸ்ஸ.

119. ஸங்கேதகம்மம் நாம ஸங்கேதம் கரோதி – ‘‘புரேப⁴த்தம் வா பச்சா²ப⁴த்தம் வா ரத்திம் வா தி³வா வா தேன ஸங்கேதேன தம் ப⁴ண்ட³ம் அவஹரா’’தி, ஆபத்தி து³க்கடஸ்ஸ. தேன ஸங்கேதேன தம் ப⁴ண்ட³ம் அவஹரதி, ஆபத்தி உபி⁴ன்னம் பாராஜிகஸ்ஸ. தம் ஸங்கேதம் புரே வா பச்சா² வா தம் ப⁴ண்ட³ம் அவஹரதி, மூலட்ட²ஸ்ஸ அனாபத்தி. அவஹாரகஸ்ஸ ஆபத்தி பாராஜிகஸ்ஸ.

120. நிமித்தகம்மம் நாம நிமித்தம் கரோதி. அக்கி²ம் வா நிக²ணிஸ்ஸாமி ப⁴முகம் வா உக்கி²பிஸ்ஸாமி ஸீஸம் வா உக்கி²பிஸ்ஸாமி, தேன நிமித்தேன தம் ப⁴ண்ட³ம் அவஹராதி, ஆபத்தி து³க்கடஸ்ஸ. தேன நிமித்தேன தம் ப⁴ண்ட³ம் அவஹரதி, ஆபத்தி உபி⁴ன்னம் பாராஜிகஸ்ஸ. தம் நிமித்தம் புரே வா பச்சா² வா தம் ப⁴ண்ட³ம் அவஹரதி, மூலட்ட²ஸ்ஸ அனாபத்தி. அவஹாரகஸ்ஸ ஆபத்தி பாராஜிகஸ்ஸ.

121. பி⁴க்கு² பி⁴க்கு²ம் ஆணாபேதி – ‘‘இத்த²ன்னாமம் ப⁴ண்ட³ம் அவஹரா’’தி, ஆபத்தி து³க்கடஸ்ஸ. ஸோ தம் மஞ்ஞமானோ தம் அவஹரதி, ஆபத்தி உபி⁴ன்னம் பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமம் ப⁴ண்ட³ம் அவஹரா’’தி, ஆபத்தி து³க்கடஸ்ஸ. ஸோ தம் மஞ்ஞமானோ அஞ்ஞம் அவஹரதி, மூலட்ட²ஸ்ஸ அனாபத்தி. அவஹாரகஸ்ஸ ஆபத்தி பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமம் ப⁴ண்ட³ம் அவஹரா’’தி, ஆபத்தி து³க்கடஸ்ஸ. ஸோ அஞ்ஞம் மஞ்ஞமானோ தம் அவஹரதி, ஆபத்தி உபி⁴ன்னம் பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமம் ப⁴ண்ட³ம் அவஹரா’’தி, ஆபத்தி து³க்கடஸ்ஸ. ஸோ அஞ்ஞம் மஞ்ஞமானோ அஞ்ஞம் அவஹரதி, மூலட்ட²ஸ்ஸ அனாபத்தி. அவஹாரகஸ்ஸ ஆபத்தி பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமஸ்ஸ பாவத³ – ‘இத்த²ன்னாமோ இத்த²ன்னாமஸ்ஸ பாவத³து – இத்த²ன்னாமோ இத்த²ன்னாமம் ப⁴ண்ட³ம் அவஹரதூ’’’தி, ஆபத்தி து³க்கடஸ்ஸ. ஸோ இதரஸ்ஸ ஆரோசேதி, ஆபத்தி து³க்கடஸ்ஸ. அவஹாரகோ படிக்³க³ண்ஹாதி, மூலட்ட²ஸ்ஸ ஆபத்தி து²ல்லச்சயஸ்ஸ. ஸோ தம் ப⁴ண்ட³ம் அவஹரதி, ஆபத்தி ஸப்³பே³ஸம் பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமஸ்ஸ பாவத³ – ‘இத்த²ன்னாமோ இத்த²ன்னாமஸ்ஸ பாவத³து – இத்த²ன்னாமோ இத்த²ன்னாமம் ப⁴ண்ட³ம் அவஹரதூ’’’தி, ஆபத்தி து³க்கடஸ்ஸ. ஸோ அஞ்ஞம் ஆணாபேதி, ஆபத்தி து³க்கடஸ்ஸ. அவஹாரகோ படிக்³க³ண்ஹாதி, ஆபத்தி து³க்கடஸ்ஸ. ஸோ தம் ப⁴ண்ட³ம் அவஹரதி, மூலட்ட²ஸ்ஸ அனாபத்தி. ஆணாபகஸ்ஸ ச அவஹாரகஸ்ஸ ச ஆபத்தி பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமம் ப⁴ண்ட³ம் அவஹரா’’தி, ஆபத்தி து³க்கடஸ்ஸ. ஸோ க³ந்த்வா புன பச்சாக³ச்ச²தி – ‘‘நாஹம் ஸக்கோமி தம் ப⁴ண்ட³ம் அவஹரிது’’ந்தி. ஸோ புன ஆணாபேதி – ‘‘யதா³ ஸக்கோஸி ததா³ தம் ப⁴ண்ட³ம் அவஹரா’’தி, ஆபத்தி து³க்கடஸ்ஸ. ஸோ தம் ப⁴ண்ட³ம் அவஹரதி, ஆபத்தி உபி⁴ன்னம் பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமம் ப⁴ண்ட³ம் அவஹரா’’தி, ஆபத்தி து³க்கடஸ்ஸ. ஸோ ஆணாபேத்வா விப்படிஸாரீ ந ஸாவேதி – ‘‘மா அவஹரீ’’தி. ஸோ தம் ப⁴ண்ட³ம் அவஹரதி, ஆபத்தி உபி⁴ன்னம் பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமம் ப⁴ண்ட³ம் அவஹரா’’தி, ஆபத்தி து³க்கடஸ்ஸ. ஸோ ஆணாபேத்வா விப்படிஸாரீ ஸாவேதி – ‘‘மா அவஹரீ’’தி. ஸோ ‘‘ஆணத்தோ அஹம் தயா’’தி, தம் ப⁴ண்ட³ம் அவஹரதி, மூலட்ட²ஸ்ஸ அனாபத்தி. அவஹாரகஸ்ஸ ஆபத்தி பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமம் ப⁴ண்ட³ம் அவஹரா’’தி, ஆபத்தி து³க்கடஸ்ஸ. ஸோ ஆணாபேத்வா விப்படிஸாரீ ஸாவேதி – ‘‘மா அவஹரீ’’தி. ஸோ ‘‘ஸாதூ⁴’’தி [ஸுட்டூ²தி (க.)]? ஓரமதி, உபி⁴ன்னம் அனாபத்தி.

122. பஞ்சஹி ஆகாரேஹி அதி³ன்னம் ஆதி³யந்தஸ்ஸ ஆபத்தி பாராஜிகஸ்ஸ – பரபரிக்³க³ஹிதஞ்ச ஹோதி, பரபரிக்³க³ஹிதஸஞ்ஞீ ச, க³ருகோ ச ஹோதி பரிக்கா²ரோ, பஞ்சமாஸகோ வா அதிரேகபஞ்சமாஸகோ வா, தே²ய்யசித்தஞ்ச பச்சுபட்டி²தம் ஹோதி. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ.

123. பஞ்சஹி ஆகாரேஹி அதி³ன்னம் ஆதி³யந்தஸ்ஸ ஆபத்தி து²ல்லச்சயஸ்ஸ – பரபரிக்³க³ஹிதஞ்ச ஹோதி, பரபரிக்³க³ஹிதஸஞ்ஞீ ச, லஹுகோ ச ஹோதி பரிக்கா²ரோ, அதிரேகமாஸகோ வா ஊனபஞ்சமாஸகோ வா, தே²ய்யசித்தஞ்ச பச்சுபட்டி²தம் ஹோதி. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து³க்கடஸ்ஸ. டா²னா சாவேதி, ஆபத்தி து²ல்லச்சயஸ்ஸ.

124. பஞ்சஹி ஆகாரேஹி அதி³ன்னம் ஆதி³யந்தஸ்ஸ ஆபத்தி து³க்கடஸ்ஸ. பரபரிக்³க³ஹிதஞ்ச ஹோதி, பரபரிக்³க³ஹிதஸஞ்ஞீ ச, லஹுகோ ச ஹோதி பரிக்கா²ரோ, மாஸகோ வா ஊனமாஸகோ வா, தே²ய்யசித்தஞ்ச பச்சுபட்டி²தம் ஹோதி. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து³க்கடஸ்ஸ. டா²னா சாவேதி, ஆபத்தி து³க்கடஸ்ஸ.

125. ச²ஹி ஆகாரேஹி அதி³ன்னம் ஆதி³யந்தஸ்ஸ ஆபத்தி பாராஜிகஸ்ஸ. ந ச ஸகஸஞ்ஞீ, ந ச விஸ்ஸாஸக்³கா³ஹீ, ந ச தாவகாலிகம், க³ருகோ ச ஹோதி பரிக்கா²ரோ, பஞ்சமாஸகோ வா அதிரேகபஞ்சமாஸகோ வா, தே²ய்யசித்தஞ்ச பச்சுபட்டி²தம் ஹோதி. ஆமஸதி, ஆபத்தி து³க்கடஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ.

126. ச²ஹி ஆகாரேஹி அதி³ன்னம் ஆதி³யந்தஸ்ஸ ஆபத்தி து²ல்லச்சயஸ்ஸ. ந ச ஸகஸஞ்ஞீ, ந ச விஸ்ஸாஸக்³கா³ஹீ, ந ச தாவகாலிகம், லஹுகோ ச ஹோதி பரிக்கா²ரோ அதிரேகமாஸகோ வா ஊனபஞ்சமாஸகோ வா, தே²ய்யசித்தஞ்ச பச்சுபட்டி²தம் ஹோதி. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து³க்கடஸ்ஸ. டா²னா சாவேதி, ஆபத்தி து²ல்லச்சயஸ்ஸ.

127. ச²ஹி ஆகாரேஹி அதி³ன்னம் ஆதி³யந்தஸ்ஸ ஆபத்தி து³க்கடஸ்ஸ. ந ச ஸகஸஞ்ஞீ, ந ச விஸ்ஸாஸக்³கா³ஹீ, ந ச தாவகாலிகம், லஹுகோ ச ஹோதி பரிக்கா²ரோ, மாஸகோ வா ஊனமாஸகோ வா, தே²ய்யசித்தஞ்ச பச்சுபட்டி²தம் ஹோதி. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து³க்கடஸ்ஸ. டா²னா சாவேதி, ஆபத்தி து³க்கடஸ்ஸ.

128. பஞ்சஹி ஆகாரேஹி அதி³ன்னம் ஆதி³யந்தஸ்ஸ ஆபத்தி து³க்கடஸ்ஸ. ந ச பரபரிக்³க³ஹிதம் ஹோதி, பரபரிக்³க³ஹிதஸஞ்ஞீ ச, க³ருகோ ச ஹோதி பரிக்கா²ரோ, பஞ்சமாஸகோ வா அதிரேகபஞ்சமாஸகோ வா, தே²ய்யசித்தஞ்ச பச்சுபட்டி²தம் ஹோதி. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து³க்கடஸ்ஸ. டா²னா சாவேதி, ஆபத்தி து³க்கடஸ்ஸ.

129. பஞ்சஹி ஆகாரேஹி அதி³ன்னம் ஆதி³யந்தஸ்ஸ ஆபத்தி து³க்கடஸ்ஸ. ந ச பரபரிக்³க³ஹிதம் ஹோதி, பரபரிக்³க³ஹிதஸஞ்ஞீ ச, லஹுகோ ச ஹோதி பரிக்கா²ரோ, அதிரேகமாஸகோ வா ஊனபஞ்சமாஸகோ வா, தே²ய்யசித்தஞ்ச பச்சுபட்டி²தம் ஹோதி. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து³க்கடஸ்ஸ. டா²னா சாவேதி, ஆபத்தி து³க்கடஸ்ஸ.

130. பஞ்சஹி ஆகாரேஹி அதி³ன்னம் ஆதி³யந்தஸ்ஸ ஆபத்தி து³க்கடஸ்ஸ. ந ச பரபரிக்³க³ஹிதம் ஹோதி, பரபரிக்³க³ஹிதஸஞ்ஞீ ச, லஹுகோ ச ஹோதி பரிக்கா²ரோ, மாஸகோ வா ஊனமாஸகோ வா, தே²ய்யசித்தஞ்ச பச்சுபட்டி²தம் ஹோதி. ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து³க்கடஸ்ஸ. டா²னா சாவேதி, ஆபத்தி து³க்கடஸ்ஸ.

131. அனாபத்தி ஸஸஞ்ஞிஸ்ஸ, விஸ்ஸாஸக்³கா³ஹே, தாவகாலிகே, பேதபரிக்³க³ஹே, திரச்சா²னக³தபரிக்³க³ஹே, பம்ஸுகூலஸஞ்ஞிஸ்ஸ, உம்மத்தகஸ்ஸ, (கி²த்தசித்தஸ்ஸ வேத³னாட்டஸ்ஸ) [(கி²த்தசித்தஸ்ஸ வேத³னாட்டஸ்ஸ) கத்த²சி நத்தி²] ஆதி³கம்மிகஸ்ஸாதி.

அதி³ன்னாதா³னம்ஹி பட²மபா⁴ணவாரோ நிட்டி²தோ.

வினீதவத்து²உத்³தா³னகா³தா²

ரஜகேஹி பஞ்ச அக்கா²தா, சதுரோ அத்த²ரணேஹி ச;

அந்த⁴காரேன வே பஞ்ச, பஞ்ச ஹாரணகேன ச.

நிருத்தியா பஞ்ச அக்கா²தா, வாதேஹி அபரே து³வே;

அஸம்பி⁴ன்னே குஸாபாதோ, ஜந்தக்³கே³ன [ஜந்தாக⁴ரேன (ஸ்யா.)] ஸஹா த³ஸ.

விகா⁴ஸேஹி பஞ்ச அக்கா²தா, பஞ்ச சேவ அமூலகா;

து³ப்³பி⁴க்கே² குரமம்ஸஞ்ச [கூரமம்ஸஞ்ச (ஸ்யா.)], பூவஸக்க²லிமோத³கா.

ச²பரிக்கா²ரத²விகா, பி⁴ஸிவம்ஸா ந நிக்க²மே;

கா²த³னீயஞ்ச விஸ்ஸாஸம், ஸஸஞ்ஞாயபரே து³வே.

ஸத்த நாவஹராமாதி, ஸத்த சேவ அவாஹரும்;

ஸங்க⁴ஸ்ஸ அவஹரும் ஸத்த, புப்பே²ஹி அபரே து³வே.

தயோ ச வுத்தவாதி³னோ, மணி தீணி அதிக்கமே;

ஸூகரா ச மிகா³ மச்சா², யானஞ்சாபி பவத்தயி.

து³வே பேஸீ து³வே தா³ரூ, பம்ஸுகூலம் து³வே த³கா;

அனுபுப்³ப³விதா⁴னேன, தத³ஞ்ஞோ ந பரிபூரயி.

ஸாவத்தி²யா சதுரோ முட்டீ², த்³வே விகா⁴ஸா து³வே திணா;

ஸங்க⁴ஸ்ஸ பா⁴ஜயும் ஸத்த, ஸத்த சேவ அஸ்ஸாமிகா.

தா³ருத³கா மத்திகா த்³வே திணானி;

ஸங்க⁴ஸ்ஸ ஸத்த அவஹாஸி ஸேய்யம்;

ஸஸ்ஸாமிகம் ந சாபி நீஹரேய்ய;

ஹரேய்ய ஸஸ்ஸாமிகம் தாவகாலிகம்.

சம்பா ராஜக³ஹே சேவ, வேஸாலியா ச அஜ்ஜுகோ;

பா³ராணஸீ ச கோஸம்பீ³, ஸாக³லா த³ள்ஹிகேன சாதி.

வினீதவத்து²

132. தேன கோ² பன ஸமயேன ச²ப்³ப³க்³கி³யா பி⁴க்கூ² ரஜகத்த²ரணம் க³ந்த்வா ரஜகப⁴ண்டி³கம் அவஹரிம்ஸு. தேஸம் குக்குச்சம் அஹோஸி – ‘‘ப⁴க³வதா ஸிக்கா²பத³ம் பஞ்ஞத்தம். கச்சி நு கோ² மயம் பாராஜிகம் ஆபத்திம் ஆபன்னா’’தி. ப⁴க³வதோ ஏதமத்த²ம் ஆரோசேஸும். ‘‘ஆபத்திம் தும்ஹே, பி⁴க்க²வே, ஆபன்னா பாராஜிக’’ந்தி.

தேன கோ² பன ஸமயேன அஞ்ஞதரோ பி⁴க்கு² ரஜகத்த²ரணம் க³ந்த்வா மஹக்³க⁴ம் து³ஸ்ஸம் பஸ்ஸித்வா தே²ய்யசித்தம் உப்பாதே³ஸி. தஸ்ஸ குக்குச்சம் அஹோஸி – ‘‘ப⁴க³வதா ஸிக்கா²பத³ம் பஞ்ஞத்தம், கச்சி நு கோ² அஹம் பாராஜிகம் ஆபத்திம் ஆபன்னோ’’தி? ப⁴க³வதோ ஏதமத்த²ம் ஆரோசேஸி. ‘‘அனாபத்தி, பி⁴க்கு², சித்துப்பாதே³’’தி.

தேன கோ² பன ஸமயேன அஞ்ஞதரோ பி⁴க்கு² ரஜகத்த²ரணம் க³ந்த்வா மஹக்³க⁴ம் து³ஸ்ஸம் பஸ்ஸித்வா தே²ய்யசித்தோ ஆமஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ. ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² ரஜகத்த²ரணம் க³ந்த்வா மஹக்³க⁴ம் து³ஸ்ஸம் பஸ்ஸித்வா தே²ய்யசித்தோ ப²ந்தா³பேஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ. ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² ரஜகத்த²ரணம் க³ந்த்வா மஹக்³க⁴ம் து³ஸ்ஸம் பஸ்ஸித்வா தே²ய்யசித்தோ டா²னா சாவேஸி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

133. தேன கோ² பன ஸமயேன அஞ்ஞதரோ பிண்ட³சாரிகோ பி⁴க்கு² மஹக்³க⁴ம் உத்தரத்த²ரணம் பஸ்ஸித்வா தே²ய்யசித்தம் உப்பாதே³ஸி…பே… தே²ய்யசித்தோ ஆமஸி…பே… தே²ய்யசித்தோ ப²ந்தா³பேஸி…பே… தே²ய்யசித்தோ டா²னா சாவேஸி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

134. தேன கோ² பன ஸமயேன அஞ்ஞதரோ பி⁴க்கு² தி³வா ப⁴ண்ட³ம் பஸ்ஸித்வா நிமித்தம் அகாஸி – ‘ரத்திம் அவஹரிஸ்ஸாமீ’தி. ஸோ தம் மஞ்ஞமானோ தம் அவஹரி…பே… தம் மஞ்ஞமானோ அஞ்ஞம் அவஹரி…பே… அஞ்ஞம் மஞ்ஞமானோ தம் அவஹரி…பே… அஞ்ஞம் மஞ்ஞமானோ அஞ்ஞம் அவஹரி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

தேன கோ² பன ஸமயேன அஞ்ஞதரோ பி⁴க்கு² தி³வா ப⁴ண்ட³ம் பஸ்ஸித்வா நிமித்தம் அகாஸி – ‘‘ரத்திம் அவஹரிஸ்ஸாமீ’’தி. ஸோ தம் மஞ்ஞமானோ அத்தனோ ப⁴ண்ட³ம் அவஹரி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ. ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² அஞ்ஞஸ்ஸ ப⁴ண்ட³ம் ஹரந்தோ ஸீஸே பா⁴ரம் தே²ய்யசித்தோ ஆமஸி…பே… தே²ய்யசித்தோ ப²ந்தா³பேஸி…பே… தே²ய்யசித்தோ க²ந்த⁴ம் ஓரோபேஸி…பே… க²ந்தே⁴ பா⁴ரம் தே²ய்யசித்தோ ஆமஸி…பே… தே²ய்யசித்தோ ப²ந்தா³பேஸி…பே… தே²ய்யசித்தோ கடிம் ஓரோபேஸி…பே… கடியா பா⁴ரம் தே²ய்யசித்தோ ஆமஸி…பே… தே²ய்யசித்தோ ப²ந்தா³பேஸி…பே… தே²ய்யசித்தோ ஹத்தே²ன அக்³க³ஹேஸி…பே… ஹத்தே² பா⁴ரம் தே²ய்யசித்தோ பூ⁴மியம் நிக்கி²பி…பே… தே²ய்யசித்தோ பூ⁴மிதோ அக்³க³ஹேஸி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

135. தேன கோ² பன ஸமயேன அஞ்ஞதரோ பி⁴க்கு² அஜ்ஜோ²காஸே சீவரம் பத்த²ரித்வா விஹாரம் பாவிஸி. அஞ்ஞதரோ பி⁴க்கு² – ‘மாயித³ம் சீவரம் நஸ்ஸீ’தி, படிஸாமேஸி. ஸோ நிக்க²மித்வா தம் பி⁴க்கு²ம் புச்சி² – ‘‘ஆவுஸோ, மய்ஹம் சீவரம் கேன அவஹட’’ந்தி? ஸோ ஏவமாஹ – ‘‘மயா அவஹட’’ந்தி. ‘‘ஸோ தம் ஆதி³யி, அஸ்ஸமணோஸி த்வ’’ந்தி. தஸ்ஸ குக்குச்சம் அஹோஸி…பே…. ப⁴க³வதோ ஏதமத்த²ம் ஆரோசேஸி. ‘‘கிம்சித்தோ த்வம், பி⁴க்கூ²’’தி? ‘‘நிருத்திபதோ² அஹம், ப⁴க³வா’’தி. ‘‘அனாபத்தி, பி⁴க்கு², நிருத்திபதே²’’தி.

தேன கோ² பன ஸமயேன அஞ்ஞதரோ பி⁴க்கு² பீடே² சீவரம் நிக்கி²பித்வா. பீடே² நிஸீத³னம் நிக்கி²பித்வா… ஹேட்டா²பீடே² பத்தம் நிக்கி²பித்வா விஹாரம் பாவிஸி. அஞ்ஞதரோ பி⁴க்கு² – ‘‘மாயம் பத்தோ நஸ்ஸீ’’தி படிஸாமேஸி. ஸோ நிக்க²மித்வா தம் பி⁴க்கு²ம் புச்சி² – ‘‘ஆவுஸோ, மய்ஹம் பத்தோ கேன அவஹடோ’’தி? ஸோ ஏவமாஹ – ‘‘மயா அவஹடோ’’தி. ‘‘ஸோ தம் ஆதி³யி, அஸ்ஸமணோஸி த்வ’’ந்தி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², நிருத்திபதே²’’தி.

தேன கோ² பன ஸமயேன அஞ்ஞதரா பி⁴க்கு²னீ வதியா சீவரம் பத்த²ரித்வா விஹாரம் பாவிஸி. அஞ்ஞதரா பி⁴க்கு²னீ – ‘மாயித³ம் சீவரம் நஸ்ஸீ’தி படிஸாமேஸி. ஸா நிக்க²மித்வா தம் பி⁴க்கு²னிம் புச்சி² – ‘‘அய்யே, மய்ஹம் சீவரம் கேன அவஹட’’ந்தி? ஸா ஏவமாஹ – ‘‘மயா அவஹட’’ந்தி. ‘‘ஸா தம் ஆதி³யி, அஸ்ஸமணீஸி த்வ’’ந்தி. தஸ்ஸா குக்குச்சம் அஹோஸி. அத² கோ² ஸா பி⁴க்கு²னீ பி⁴க்கு²னீனம் ஏதமத்த²ம் ஆரோசேஸி. பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘அனாபத்தி, பி⁴க்க²வே, நிருத்திபதே²’’தி.

136. தேன கோ² பன ஸமயேன அஞ்ஞதரோ பி⁴க்கு² வாதமண்ட³லிகாய உக்கி²த்தம் ஸாடகம் பஸ்ஸித்வா ஸாமிகானம் த³ஸ்ஸாமீதி, அக்³க³ஹேஸி. ஸாமிகா தம் பி⁴க்கு²ம் சோதே³ஸும் – ‘‘அஸ்ஸமணோஸி த்வ’’ந்தி. தஸ்ஸ குக்குச்சம் அஹோஸி…பே… ‘‘கிம்சித்தோ த்வம் பி⁴க்கூ²’’தி? ‘‘அதே²ய்யசித்தோ அஹம், ப⁴க³வா’’தி. அனாபத்தி, பி⁴க்கு², அதே²ய்யசித்தஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² வாதமண்ட³லிகாய உக்கி²த்தம் வேட²னம் பஸ்ஸித்வா ‘புரே ஸாமிகா பஸ்ஸந்தீ’தி தே²ய்யசித்தோ அக்³க³ஹேஸி. ஸாமிகா தம் பி⁴க்கு²ம் சோதே³ஸும் – ‘‘அஸ்ஸமணோஸி த்வ’’ந்தி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

137. தேன கோ² பன ஸமயேன அஞ்ஞதரோ பி⁴க்கு² ஸுஸானம் க³ந்த்வா அபி⁴ன்னே ஸரீரே பம்ஸுகூலம் அக்³க³ஹேஸி. தஸ்மிஞ்ச ஸரீரே பேதோ அதி⁴வத்தோ² ஹோதி. அத² கோ² ஸோ பேதோ தம் பி⁴க்கு²ம் ஏதத³வோச – ‘‘மா, ப⁴ந்தே, மய்ஹம் ஸாடகம் அக்³க³ஹேஸீ’’தி. ஸோ பி⁴க்கு² அனாதி³யந்தோ அக³மாஸி. அத² கோ² தம் ஸரீரம் உட்ட²ஹித்வா தஸ்ஸ பி⁴க்கு²னோ பிட்டி²தோ பிட்டி²தோ அனுப³ந்தி⁴. அத² கோ² ஸோ பி⁴க்கு² விஹாரம் பவிஸித்வா த்³வாரம் த²கேஸி. அத² கோ² தம் ஸரீரம் தத்தே²வ பரிபதி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ. ந ச, பி⁴க்க²வே, அபி⁴ன்னே ஸரீரே பம்ஸுகூலம் க³ஹேதப்³ப³ம். ஸோ க³ண்ஹேய்ய, ஆபத்தி து³க்கடஸ்ஸா’’தி.

138. தேன கோ² பன ஸமயேன அஞ்ஞதரோ பி⁴க்கு² ஸங்க⁴ஸ்ஸ சீவரே பா⁴ஜீயமானே தே²ய்யசித்தோ குஸம் ஸங்காமேத்வா சீவரம் அக்³க³ஹேஸி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

139. தேன கோ² பன ஸமயேன ஆயஸ்மா ஆனந்தோ³ ஜந்தாக⁴ரே அஞ்ஞதரஸ்ஸ பி⁴க்கு²னோ அந்தரவாஸகம் அத்தனோ மஞ்ஞமானோ நிவாஸேஸி. அத² கோ² ஸோ பி⁴க்கு² ஆயஸ்மந்தம் ஆனந்த³ம் ஏதத³வோச – ‘‘கிஸ்ஸ மே த்வம், ஆவுஸோ ஆனந்த³, அந்தரவாஸகம் நிவாஸேஸீ’’தி? ‘‘ஸகஸஞ்ஞீ அஹம், ஆவுஸோ’’தி. ப⁴க³வதோ ஏதமத்த²ம் ஆரோசேஸும். ‘‘அனாபத்தி, பி⁴க்க²வே, ஸகஸஞ்ஞிஸ்ஸா’’தி.

140. தேன கோ² பன ஸமயேன ஸம்ப³ஹுலா பி⁴க்கூ² கி³ஜ்ஜ²கூடா பப்³ப³தா ஓரோஹந்தா ஸீஹவிகா⁴ஸம் பஸ்ஸித்வா பசாபேத்வா பரிபு⁴ஞ்ஜிம்ஸு. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, ஸீஹவிகா⁴ஸே’’தி.

தேன கோ² பன ஸமயேன ஸம்ப³ஹுலா பி⁴க்கூ² கி³ஜ்ஜ²கூடா பப்³ப³தா ஓரோஹந்தா ப்³யக்³க⁴விகா⁴ஸம் பஸ்ஸித்வா… தீ³பிவிகா⁴ஸம் பஸ்ஸித்வா… தரச்ச²விகா⁴ஸம் பஸ்ஸித்வா… கோகவிகா⁴ஸம் பஸ்ஸித்வா பசாபேத்வா பரிபு⁴ஞ்ஜிம்ஸு. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, திரச்சா²னக³தபரிக்³க³ஹே’’தி.

141. தேன கோ² பன ஸமயேன அஞ்ஞதரோ பி⁴க்கு² ஸங்க⁴ஸ்ஸ ஓத³னே பா⁴ஜீயமானே – ‘அபரஸ்ஸ பா⁴க³ம் தே³ஹீ’தி அமூலகம் அக்³க³ஹேஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ. ஆபத்தி ஸம்பஜானமுஸாவாதே³ பாசித்தியஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² ஸங்க⁴ஸ்ஸ கா²த³னீயே பா⁴ஜியமானே… ஸங்க⁴ஸ்ஸ பூவே பா⁴ஜியமானே… ஸங்க⁴ஸ்ஸ உச்சு²ம்ஹி பா⁴ஜியமானே… ஸங்க⁴ஸ்ஸ திம்ப³ரூஸகே பா⁴ஜியமானே – ‘அபரஸ்ஸ பா⁴க³ம் தே³ஹீ’தி அமூலகம் அக்³க³ஹேஸி. தஸ்ஸ குக்குச்சம் அஹோஸி…பே…. ‘‘அனாபத்தி, பி⁴க்கு², பாராஜிகஸ்ஸ. ஆபத்தி ஸம்பஜானமுஸாவாதே³ பாசித்தியஸ்ஸா’’தி.

142. தேன கோ² பன ஸமயேன அஞ்ஞதரோ பி⁴க்கு² து³ப்³பி⁴க்கே² ஓத³னீயக⁴ரம் பவிஸித்வா பத்தபூரம் ஓத³னம் தே²ய்யசித்தோ அவஹரி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

தேன கோ² பன ஸமயேன அஞ்ஞதரோ பி⁴க்கு² து³ப்³பி⁴க்கே² ஸூனக⁴ரம் [ஸூனாக⁴ரம் (ஸீ. ஸ்யா)] பவிஸித்வா பத்தபூரம் மம்ஸம் தே²ய்யசித்தோ அவஹரி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

தேன கோ² பன ஸமயேன அஞ்ஞதரோ பி⁴க்கு² து³ப்³பி⁴க்கே² பூவக⁴ரம் பவிஸித்வா பத்தபூரம் பூவம் தே²ய்யசித்தோ அவஹரி…பே… பத்தபூரா ஸக்க²லியோ தே²ய்யசித்தோ அவஹரி…பே… பத்தபூரே மோத³கே தே²ய்யசித்தோ அவஹரி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

143. தேன கோ² பன ஸமயேன அஞ்ஞதரோ பி⁴க்கு² தி³வா பரிக்கா²ரம் பஸ்ஸித்வா நிமித்தம் அகாஸி – ‘‘ரத்திம் அவஹரிஸ்ஸாமீ’’தி. ஸோ தம் மஞ்ஞமானோ தம் அவஹரி…பே… தம் மஞ்ஞமானோ அஞ்ஞம் அவஹரி…பே… அஞ்ஞம் மஞ்ஞமானோ தம் அவஹரி…பே… அஞ்ஞம் மஞ்ஞமானோ அஞ்ஞம் அவஹரி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

தேன கோ² பன ஸமயேன அஞ்ஞதரோ பி⁴க்கு² தி³வா பரிக்கா²ரம் பஸ்ஸித்வா நிமித்தம் அகாஸி – ‘‘ரத்திம் அவஹரிஸ்ஸாமீ’’தி. ஸோ தம் மஞ்ஞமானோ அத்தனோ பரிக்கா²ரம் அவஹரி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ. ஆபத்தி து³க்கடஸ்ஸா’’தி.

144. தேன கோ² பன ஸமயேன அஞ்ஞதரோ பி⁴க்கு² பீடே² த²விகம் பஸ்ஸித்வா – ‘‘இதோ க³ண்ஹந்தோ பாராஜிகோ ப⁴விஸ்ஸாமீ’’தி ஸஹ பீட²கேன ஸங்காமேத்வா அக்³க³ஹேஸி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

தேன கோ² பன ஸமயேன அஞ்ஞதரோ பி⁴க்கு² ஸங்க⁴ஸ்ஸ பி⁴ஸிம் தே²ய்யசித்தோ அவஹரி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

145. தேன கோ² பன ஸமயேன அஞ்ஞதரோ பி⁴க்கு² சீவரவம்ஸே சீவரம் தே²ய்யசித்தோ அவஹரி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

தேன கோ² பன ஸமயேன அஞ்ஞதரோ பி⁴க்கு² விஹாரே சீவரம் அவஹரித்வா – ‘‘இதோ நிக்க²மந்தோ பாராஜிகோ ப⁴விஸ்ஸாமீ’’தி விஹாரா ந நிக்க²மி…பே… ப⁴க³வதோ ஏதமத்த²ம் ஆரோசேஸும். ‘‘நிக்க²மி [நிக்க²மேய்ய (ஸீ. ஸ்யா.)] வா ஸோ, பி⁴க்க²வே, மோக⁴புரிஸோ ந வா நிக்க²மி [நிக்க²மேய்ய (ஸீ. ஸ்யா.)], ஆபத்தி பாராஜிகஸ்ஸா’’தி.

146. தேன கோ² பன ஸமயேன த்³வே பி⁴க்கூ² ஸஹாயகா ஹோந்தி. ஏகோ பி⁴க்கு² கா³மம் பிண்டா³ய பாவிஸி. து³தியோ பி⁴க்கு² ஸங்க⁴ஸ்ஸ கா²த³னீயே பா⁴ஜீயமானே ஸஹாயகஸ்ஸ பா⁴க³ம் க³ஹேத்வா தஸ்ஸ விஸ்ஸஸந்தோ பரிபு⁴ஞ்ஜி. ஸோ ஜானித்வா தம் சோதே³ஸி – ‘‘அஸ்ஸமணோஸி த்வ’’ந்தி. தஸ்ஸ குக்குச்சம் அஹோஸி…பே… ‘‘கிம் சித்தோ த்வம், பி⁴க்கூ²’’தி? ‘‘விஸ்ஸாஸக்³கா³ஹோ அஹம், ப⁴க³வா’’தி. ‘‘அனாபத்தி, பி⁴க்கு², விஸ்ஸாஸக்³கா³ஹே’’தி.

147. தேன கோ² பன ஸமயேன ஸம்ப³ஹுலா பி⁴க்கூ² சீவரகம்மம் கரோந்தி. ஸங்க⁴ஸ்ஸ கா²த³னீயே பா⁴ஜீயமானே ஸப்³பே³ஸம் படிவிஸா ஆஹரித்வா உபனிக்கி²த்தா ஹோந்தி. அஞ்ஞதரோ பி⁴க்கு² அஞ்ஞதரஸ்ஸ பி⁴க்கு²னோ படிவிஸம் அத்தனோ மஞ்ஞமானோ பரிபு⁴ஞ்ஜி. ஸோ ஜானித்வா தம் சோதே³ஸி – ‘‘அஸ்ஸமணோஸி த்வ’’ந்தி. தஸ்ஸ குக்குச்சம் அஹோஸி…பே… ‘‘கிம்சித்தோ த்வம், பி⁴க்கூ²’’தி? ‘‘ஸகஸஞ்ஞீ அஹம், ப⁴க³வா’’தி. ‘‘அனாபத்தி, பி⁴க்கு², ஸகஸஞ்ஞிஸ்ஸா’’தி.

தேன கோ² பன ஸமயேன ஸம்ப³ஹுலா பி⁴க்கூ² சீவரகம்மம் கரோந்தி. ஸங்க⁴ஸ்ஸ கா²த³னீயே பா⁴ஜியமானே அஞ்ஞதரஸ்ஸ பி⁴க்கு²னோ பத்தேன அஞ்ஞதரஸ்ஸ பி⁴க்கு²னோ படிவிஸோ ஆஹரித்வா உபனிக்கி²த்தோ ஹோதி. பத்தஸாமிகோ பி⁴க்கு² அத்தனோ மஞ்ஞமானோ பரிபு⁴ஞ்ஜி. ஸோ ஜானித்வா தம் சோதே³ஸி – ‘‘அஸ்ஸமணோஸி த்வ’’ந்தி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², ஸகஸஞ்ஞிஸ்ஸா’’தி.

148. தேன கோ² பன ஸமயேன அம்ப³சோரகா அம்ப³ம் பாதேத்வா ப⁴ண்டி³கம் ஆதா³ய அக³மம்ஸு. ஸாமிகா தே சோரகே அனுப³ந்தி⁴ம்ஸு. சோரகா ஸாமிகே பஸ்ஸித்வா ப⁴ண்டி³கம் பாதேத்வா பலாயிம்ஸு. பி⁴க்கூ² பம்ஸுகூலஸஞ்ஞினோ படிக்³க³ஹாபேத்வா பரிபு⁴ஞ்ஜிம்ஸு. ஸாமிகா தே பி⁴க்கூ² சோதே³ஸும் – ‘‘அஸ்ஸமணாத்த² தும்ஹே’’தி. தேஸம் குக்குச்சம் அஹோஸி…பே… ப⁴க³வதோ ஏதமத்த²ம் ஆரோசேஸும். ‘‘கிம்சித்தா தும்ஹே, பி⁴க்க²வே’’தி? ‘‘பம்ஸுகூலஸஞ்ஞினோ மயம், ப⁴க³வா’’தி. ‘‘அனாபத்தி, பி⁴க்க²வே, பம்ஸுகூலஸஞ்ஞிஸ்ஸா’’தி.

தேன கோ² பன ஸமயேன ஜம்பு³சோரகா… லபு³ஜசோரகா… பனஸசோரகா… தாலபக்கசோரகா… உச்சு²சோரகா… திம்ப³ரூஸகசோரகா திம்ப³ரூஸகே உச்சினித்வா ப⁴ண்டி³கம் ஆதா³ய அக³மம்ஸு. ஸாமிகா தே சோரகே அனுப³ந்தி⁴ம்ஸு. சோரகா ஸாமிகே பஸ்ஸித்வா ப⁴ண்டி³கம் பாதேத்வா பலாயிம்ஸு. பி⁴க்கூ² பம்ஸுகூலஸஞ்ஞினோ படிக்³க³ஹாபேத்வா பரிபு⁴ஞ்ஜிம்ஸு. ஸாமிகா தே பி⁴க்கூ² சோதே³ஸும் – ‘‘அஸ்ஸமணாத்த² தும்ஹே’’தி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, பம்ஸுகூலஸஞ்ஞிஸ்ஸா’’தி.

தேன கோ² பன ஸமயேன அம்ப³சோரகா அம்ப³ம் பாதேத்வா ப⁴ண்டி³கம் ஆதா³ய அக³மம்ஸு. ஸாமிகா தே சோரகே அனுப³ந்தி⁴ம்ஸு. சோரகா ஸாமிகே பஸ்ஸித்வா ப⁴ண்டி³கம் பாதேத்வா பலாயிம்ஸு. பி⁴க்கூ² – ‘புரே ஸாமிகா பஸ்ஸந்தீ’தி, தே²ய்யசித்தா பரிபு⁴ஞ்ஜிம்ஸு. ஸாமிகா தே பி⁴க்கூ² சோதே³ஸும் – ‘‘அஸ்ஸமணாத்த² தும்ஹே’’தி. தேஸம் குக்குச்சம் அஹோஸி…பே… ‘‘ஆபத்திம் தும்ஹே, பி⁴க்க²வே, ஆபன்னா பாராஜிக’’ந்தி.

தேன கோ² பன ஸமயேன ஜம்பு³சோரகா… லபு³ஜசோரகா… பனஸசோரகா… தாலபக்கசோரகா… உச்சு²சோரகா… திம்ப³ரூஸகசோரகா திம்ப³ரூஸகே உச்சினித்வா ப⁴ண்டி³கம் ஆதா³ய அக³மம்ஸு. ஸாமிகா தே சோரகே அனுப³ந்தி⁴ம்ஸு. சோரகா ஸாமிகே பஸ்ஸித்வா ப⁴ண்டி³கம் பாதேத்வா பலாயிம்ஸு. பி⁴க்கூ² – ‘புரே ஸாமிகா பஸ்ஸந்தீ’தி, தே²ய்யசித்தா பரிபு⁴ஞ்ஜிம்ஸு. ஸாமிகா தே பி⁴க்கூ² சோதே³ஸும் – ‘‘அஸ்ஸமணாத்த² தும்ஹே’’தி. தேஸம் குக்குச்சம் அஹோஸி…பே… ‘‘ஆபத்திம் தும்ஹே, பி⁴க்க²வே, ஆபன்னா பாராஜிக’’ந்தி.

தேன கோ² பன ஸமயேன அஞ்ஞதரோ பி⁴க்கு² ஸங்க⁴ஸ்ஸ அம்ப³ம் தே²ய்யசித்தோ அவஹரி… ஸங்க⁴ஸ்ஸ ஜம்பு³ம்… ஸங்க⁴ஸ்ஸ லபு³ஜம்… ஸங்க⁴ஸ்ஸ பனஸம்… ஸங்க⁴ஸ்ஸ தாலபக்கம்… ஸங்க⁴ஸ்ஸ உச்சு²ம்… ஸங்க⁴ஸ்ஸ திம்ப³ரூஸகம் தே²ய்யசித்தோ அவஹரி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

149. தேன கோ² பன ஸமயேன அஞ்ஞதரோ பி⁴க்கு² புப்பா²ராமம் க³ந்த்வா ஓசிதம் புப்ப²ம் பஞ்சமாஸக்³க⁴னகம் தே²ய்யசித்தோ அவஹரி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

தேன கோ² பன ஸமயேன அஞ்ஞதரோ பி⁴க்கு² புப்பா²ராமம் க³ந்த்வா புப்ப²ம் ஓசினித்வா பஞ்சமாஸக்³க⁴னகம் தே²ய்யசித்தோ அவஹரி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு² ஆபன்னோ பாராஜிக’’ந்தி.

150. தேன கோ² பன ஸமயேன அஞ்ஞதரோ பி⁴க்கு² கா³மகம் க³ச்ச²ந்தோ அஞ்ஞதரம் பி⁴க்கு²ம் ஏதத³வோச – ‘‘ஆவுஸோ, துய்ஹம் உபட்டா²ககுலம் வுத்தோ வஜ்ஜேமீ’’தி. ஸோ க³ந்த்வா ஏகம் ஸாடகம் ஆஹராபேத்வா அத்தனா பரிபு⁴ஞ்ஜி. ஸோ ஜானித்வா தம் சோதே³ஸி – ‘‘அஸ்ஸமணோஸி த்வ’’ந்தி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ. ந ச, பி⁴க்க²வே, வுத்தோ வஜ்ஜேமீதி வத்தப்³போ³. யோ வதே³ய்ய, ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கா³மகம் க³ச்ச²தி. அஞ்ஞதரோ பி⁴க்கு² தம் பி⁴க்கு²ம் ஏதத³வோச – ‘‘ஆவுஸோ, மய்ஹம் உபட்டா²ககுலம் வுத்தோ வஜ்ஜேஹீ’’தி. ஸோ க³ந்த்வா யுக³ஸாடகம் ஆஹராபேத்வா ஏகம் அத்தனா பரிபு⁴ஞ்ஜி, ஏகம் தஸ்ஸ பி⁴க்கு²னோ அதா³ஸி. ஸோ ஜானித்வா தம் சோதே³ஸி – ‘‘அஸ்ஸமணோஸி த்வ’’ந்தி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ. ந ச, பி⁴க்க²வே, வுத்தோ வஜ்ஜேஹீதி வத்தப்³போ³. யோ வதே³ய்ய, ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கா³மகம் க³ச்ச²ந்தோ அஞ்ஞதரம் பி⁴க்கு²ம் ஏதத³வோச – ‘‘ஆவுஸோ, துய்ஹம் உபட்டா²ககுலம் வுத்தோ வஜ்ஜேமீ’’தி. ஸோபி ஏவமாஹ – ‘‘வுத்தோ வஜ்ஜேஹீ’’தி. ஸோ க³ந்த்வா ஆள்ஹகம் ஸப்பிம் துலம் கு³ளம் தோ³ணம் தண்டு³லம் ஆஹராபேத்வா அத்தனா பரிபு⁴ஞ்ஜி. ஸோ ஜானித்வா தம் சோதே³ஸி – ‘‘அஸ்ஸமணோஸி த்வ’’ந்தி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ. ந ச, பி⁴க்க²வே, வுத்தோ வஜ்ஜேமீதி வத்தப்³போ³, ந ச வுத்தோ வஜ்ஜேஹீதி வத்தப்³போ³. யோ வதே³ய்ய, ஆபத்தி து³க்கடஸ்ஸா’’தி.