3. ததியபாராஜிகம்

162. [இத³ம் வத்து² ஸம். நி. 5.985] தேன ஸமயேன பு³த்³தோ⁴ ப⁴க³வா வேஸாலியம் விஹரதி மஹாவனே கூடாகா³ரஸாலாயம். தேன கோ² பன ஸமயேன ப⁴க³வா பி⁴க்கூ²னம் அனேகபரியாயேன அஸுப⁴கத²ம் கதே²தி, அஸுபா⁴ய வண்ணம் பா⁴ஸதி, அஸுப⁴பா⁴வனாய வண்ணம் பா⁴ஸதி, ஆதி³ஸ்ஸ ஆதி³ஸ்ஸ அஸுப⁴ஸமாபத்தியா வண்ணம் பா⁴ஸதி. அத² கோ² ப⁴க³வா பி⁴க்கூ² ஆமந்தேஸி – ‘‘இச்சா²மஹம், பி⁴க்க²வே, அத்³த⁴மாஸம் படிஸல்லீயிதும். நம்ஹி கேனசி உபஸங்கமிதப்³போ³, அஞ்ஞத்ர ஏகேன பிண்ட³பாதனீஹாரகேனா’’தி. ‘‘ஏவம், ப⁴ந்தே’’தி, கோ² தே பி⁴க்கூ² ப⁴க³வதோ படிஸ்ஸுணித்வா நாஸ்ஸுத⁴ கோசி ப⁴க³வந்தம் உபஸங்கமதி, அஞ்ஞத்ர ஏகேன பிண்ட³பாதனீஹாரகேன. பி⁴க்கூ² – ‘‘ப⁴க³வா கோ² அனேகபரியாயேன அஸுப⁴கத²ம் கதே²தி, அஸுபா⁴ய வண்ணம் பா⁴ஸதி, அஸுப⁴பா⁴வனாய வண்ணம் பா⁴ஸதி, ஆதி³ஸ்ஸ ஆதி³ஸ்ஸ அஸுப⁴ஸமாபத்தியா வண்ணம் பா⁴ஸதீ’’தி (தே) [( ) (?) ஏவமுபரிபி ஈதி³ஸேஸு டா²னேஸு] அனேகாகாரவோகாரம் அஸுப⁴பா⁴வனானுயோக³மனுயுத்தா விஹரந்தி. தே ஸகேன காயேன அட்டீயந்தி ஹராயந்தி ஜிகு³ச்ச²ந்தி. ஸேய்யதா²பி நாம இத்தீ² வா புரிஸோ வா த³ஹரோ யுவா மண்ட³னகஜாதிகோ ஸீஸம்ன்ஹாதோ அஹிகுணபேன வா குக்குரகுணபேன வா மனுஸ்ஸகுணபேன வா கண்டே² ஆஸத்தேன அட்டீயேய்ய ஹராயேய்ய ஜிகு³ச்சே²ய்ய, ஏவமேவ தே பி⁴க்கூ² ஸகேன காயேன அட்டீயந்தா ஹராயந்தா ஜிகு³ச்ச²ந்தா அத்தனாபி அத்தானம் ஜீவிதா வோரோபேந்தி, அஞ்ஞமஞ்ஞம்பி ஜீவிதா வோரோபேந்தி, மிக³லண்டி³கம்பி ஸமணகுத்தகம் உபஸங்கமித்வா ஏவம் வத³ந்தி – ‘‘ஸாது⁴ நோ, ஆவுஸோ, ஜீவிதா வோரோபேஹி. இத³ம் தே பத்தசீவரம் ப⁴விஸ்ஸதீ’’தி. அத² கோ² மிக³லண்டி³கோ ஸமணகுத்தகோ பத்தசீவரேஹி ப⁴டோ ஸம்ப³ஹுலே பி⁴க்கூ² ஜீவிதா வோரோபேத்வா லோஹிதகம் [லோஹிதக³தம் (க.)] அஸிம் ஆதா³ய யேன வக்³க³முதா³ நதீ³ தேனுபஸங்கமி.

163. அத² கோ² மிக³லண்டி³கஸ்ஸ ஸமணகுத்தகஸ்ஸ லோஹிதகம் தம் அஸிம் தோ⁴வந்தஸ்ஸ அஹுதே³வ குக்குச்சம் அஹு விப்படிஸாரோ – ‘‘அலாபா⁴ வத மே, ந வத மே லாபா⁴; து³ல்லத்³த⁴ம் வத மே, ந வத மே ஸுலத்³த⁴ம். ப³ஹும் வத மயா அபுஞ்ஞம் பஸுதம், யோஹம் பி⁴க்கூ² ஸீலவந்தே கல்யாணத⁴ம்மே ஜீவிதா வோரோபேஸி’’ந்தி. அத² கோ² அஞ்ஞதரா மாரகாயிகா தே³வதா அபி⁴ஜ்ஜமானே உத³கே ஆக³ந்த்வா மிக³லண்டி³கம் ஸமணகுத்தகம் ஏதத³வோச – ‘‘ஸாது⁴ ஸாது⁴ ஸப்புரிஸ, லாபா⁴ தே ஸப்புரிஸ, ஸுலத்³த⁴ம் தே ஸப்புரிஸ. ப³ஹும் தயா ஸப்புரிஸ புஞ்ஞம் பஸுதம், யம் த்வம் அதிண்ணே தாரேஸீ’’தி. அத² கோ² மிக³லண்டி³கோ ஸமணகுத்தகோ – ‘‘லாபா⁴ கிர மே, ஸுலத்³த⁴ம் கிர மே, ப³ஹும் கிர மயா புஞ்ஞம் பஸுதம், அதிண்ணோ கிராஹம் தாரேமீ’’தி திண்ஹம் அஸிம் ஆதா³ய விஹாரேன விஹாரம் பரிவேணேன பரிவேணம் உபஸங்கமித்வா ஏவம் வதே³தி – ‘‘கோ அதிண்ணோ, கம் தாரேமீ’’தி? தத்த² யே தே பி⁴க்கூ² அவீதராகா³ தேஸம் தஸ்மிம் ஸமயே ஹோதியேவ ப⁴யம் ஹோதி ச²ம்பி⁴தத்தம் ஹோதி லோமஹம்ஸோ. யே பன தே பி⁴க்கூ² வீதராகா³ தேஸம் தஸ்மிம் ஸமயே ந ஹோதி ப⁴யம் ந ஹோதி ச²ம்பி⁴தத்தம் ந ஹோதி லோமஹம்ஸோ. அத² கோ² மிக³லண்டி³கோ ஸமணகுத்தகோ ஏகம்பி பி⁴க்கு²ம் ஏகாஹேன ஜீவிதா வோரோபேஸி, த்³வேபி பி⁴க்கூ² ஏகாஹேன ஜீவிதா வோரோபேஸி, தயோபி பி⁴க்கூ² ஏகாஹேன ஜீவிதா வோரோபேஸி, சத்தாரோபி பி⁴க்கூ² ஏகாஹேன ஜீவிதா வோரோபேஸி, பஞ்சபி பி⁴க்கூ² ஏகாஹேன ஜீவிதா வோரோபேஸி, த³ஸபி பி⁴க்கூ² ஏகாஹேன ஜீவிதா வோரோபேஸி, வீஸம்பி பி⁴க்கூ² ஏகாஹேன ஜீவிதா வோரோபேஸி, திம்ஸம்பி பி⁴க்கூ² ஏகாஹேன ஜீவிதா வோரோபேஸி, சத்தாலீஸம்பி பி⁴க்கூ² ஏகாஹேன ஜீவிதா வோரோபேஸி, பஞ்ஞாஸம்பி பி⁴க்கூ² ஏகாஹேன ஜீவிதா வோரோபேஸி, ஸட்டி²ம்பி பி⁴க்கூ² ஏகாஹேன ஜீவிதா வோரோபேஸி.

164. அத² கோ² ப⁴க³வா தஸ்ஸ அத்³த⁴மாஸஸ்ஸ அச்சயேன படிஸல்லானா வுட்டி²தோ ஆயஸ்மந்தம் ஆனந்த³ம் ஆமந்தேஸி – ‘‘கிம் நு கோ², ஆனந்த³, தனுபூ⁴தோ விய பி⁴க்கு²ஸங்கோ⁴’’தி? ‘‘ததா² ஹி பன, ப⁴ந்தே, ப⁴க³வா பி⁴க்கூ²னம் அனேகபரியாயேன அஸுப⁴கத²ம் கதே²தி, அஸுபா⁴ய வண்ணம் பா⁴ஸதி, அஸுப⁴பா⁴வனாய வண்ணம் பா⁴ஸதி, ஆதி³ஸ்ஸ ஆதி³ஸ்ஸ அஸுப⁴ஸமாபத்தியா வண்ணம் பா⁴ஸதி. தே ச, ப⁴ந்தே, பி⁴க்கூ² – ‘ப⁴க³வா கோ² அனேகபரியாயேன அஸுப⁴கத²ம் கதே²தி, அஸுபா⁴ய வண்ணம் பா⁴ஸதி, அஸுப⁴பா⁴வனாய வண்ணம் பா⁴ஸதி, ஆதி³ஸ்ஸ ஆதி³ஸ்ஸ அஸுப⁴ஸமாபத்தியா வண்ணம் பா⁴ஸதீ’தி, தே அனேகாகாரவோகாரம் அஸுப⁴பா⁴வனானுயோக³மனுயுத்தா விஹரந்தி. தே ஸகேன காயேன அட்டீயந்தி ஹராயந்தி ஜிகு³ச்ச²ந்தி. ஸேய்யதா²பி நாம இத்தீ² வா புரிஸோ வா த³ஹரோ யுவா மண்ட³னகஜாதிகோ ஸீஸம்ன்ஹாதோ அஹிகுணபேன வா குக்குரகுணபேன வா மனுஸ்ஸகுணபேன வா கண்டே² ஆஸத்தேன அட்டீயேய்ய ஹராயேய்ய ஜிகு³ச்சே²ய்ய, ஏவமேவ தே பி⁴க்கூ² ஸகேன காயேன அட்டீயந்தா ஹராயந்தா ஜிகு³ச்ச²ந்தா அத்தனாபி அத்தானம் ஜீவிதா வோரோபேந்தி, அஞ்ஞமஞ்ஞம்பி ஜீவிதா வோரோபேந்தி, மிக³லண்டி³கம்பி ஸமணகுத்தகம் உபஸங்கமித்வா ஏவம் வத³ந்தி – ‘ஸாது⁴ நோ, ஆவுஸோ, ஜீவிதா வோரோபேஹி. இத³ம் தே பத்தசீவரம் ப⁴விஸ்ஸதீ’தி. அத² கோ², ப⁴ந்தே, மிக³லண்டி³கோ ஸமணகுத்தகோ பத்தசீவரேஹி ப⁴டோ ஏகம்பி பி⁴க்கு²ம் ஏகாஹேன ஜீவிதா வோரோபேஸி…பே… ஸட்டி²ம்பி பி⁴க்கூ² ஏகாஹேன ஜீவிதா வோரோபேஸி. ஸாது⁴, ப⁴ந்தே, ப⁴க³வா அஞ்ஞம் பரியாயம் ஆசிக்க²து யதா²யம் பி⁴க்கு²ஸங்கோ⁴ அஞ்ஞாய ஸண்ட²ஹேய்யா’’தி. ‘‘தேனஹானந்த³, யாவதிகா பி⁴க்கூ² வேஸாலிம் உபனிஸ்ஸாய விஹரந்தி தே ஸப்³பே³ உபட்டா²னஸாலாயம் ஸன்னிபாதேஹீ’’தி. ‘‘ஏவம், ப⁴ந்தே’’தி, கோ² ஆயஸ்மா ஆனந்தோ³ ப⁴க³வதோ படிஸ்ஸுணித்வா யாவதிகா பி⁴க்கூ² வேஸாலிம் உபனிஸ்ஸாய விஹரந்தி தே ஸப்³பே³ உபட்டா²னஸாலாயம் ஸன்னிபாதேத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் ஏதத³வோச – ‘‘ஸன்னிபதிதோ, ப⁴ந்தே பி⁴க்கு²ஸங்கோ⁴; யஸ்ஸ தா³னி, ப⁴ந்தே, ப⁴க³வா காலம் மஞ்ஞதீ’’தி.

165. அத² கோ² ப⁴க³வா யேன உபட்டா²னஸாலா தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா பி⁴க்கூ² ஆமந்தேஸி – ‘‘அயம்பி கோ², பி⁴க்க²வே, ஆனாபானஸ்ஸதிஸமாதி⁴ பா⁴விதோ ப³ஹுலீகதோ ஸந்தோ சேவ பணீதோ ச அஸேசனகோ ச ஸுகோ² ச விஹாரோ உப்பன்னுப்பன்னே ச பாபகே அகுஸலே த⁴ம்மே டா²னஸோ அந்தரதா⁴பேதி வூபஸமேதி. ஸேய்யதா²பி, பி⁴க்க²வே, கி³ம்ஹானம் பச்சி²மே மாஸே உஹதம் [ஊஹதம் (க.)] ரஜோஜல்லம் தமேனம் மஹா அகாலமேகோ⁴ டா²னஸோ அந்தரதா⁴பேதி வூபஸமேதி, ஏவமேவ கோ², பி⁴க்க²வே, ஆனாபானஸ்ஸதிஸமாதி⁴ பா⁴விதோ ப³ஹுலீகதோ ஸந்தோ சேவ பணீதோ ச அஸேசனகோ ச ஸுகோ² ச விஹாரோ உப்பன்னுப்பன்னே ச பாபகே அகுஸலே த⁴ம்மே டா²னஸோ அந்தரதா⁴பேதி வூபஸமேதி. கத²ம் பா⁴விதோ ச, பி⁴க்க²வே, ஆனாபானஸ்ஸதிஸமாதி⁴ கத²ம் ப³ஹுலீகதோ ஸந்தோ சேவ பணீதோ ச அஸேசனகோ ச ஸுகோ² ச விஹாரோ உப்பன்னுப்பன்னே ச பாபகே அகுஸலே த⁴ம்மே டா²னஸோ அந்தரதா⁴பேதி வூபஸமேதி? இத⁴, பி⁴க்க²வே, பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா நிஸீத³தி பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா. ஸோ ஸதோவ அஸ்ஸஸதி ஸதோ பஸ்ஸஸதி. தீ³க⁴ம் வா அஸ்ஸஸந்தோ தீ³க⁴ம் அஸ்ஸஸாமீதி பஜானாதி, தீ³க⁴ம் வா பஸ்ஸஸந்தோ தீ³க⁴ம் பஸ்ஸஸாமீதி பஜானாதி. ரஸ்ஸம் வா அஸ்ஸஸந்தோ ரஸ்ஸம் அஸ்ஸஸாமீதி பஜானாதி, ரஸ்ஸம் வா பஸ்ஸஸந்தோ ரஸ்ஸம் பஸ்ஸஸாமீதி பஜானாதி. ஸப்³ப³காயப்படிஸம்வேதீ³ அஸ்ஸஸிஸ்ஸாமீதி ஸிக்க²தி. ஸப்³ப³காயப்படிஸம்வேதீ³ பஸ்ஸஸிஸ்ஸாமீதி ஸிக்க²தி. பஸ்ஸம்ப⁴யம் காயஸங்கா²ரம் அஸ்ஸஸிஸ்ஸாமீதி ஸிக்க²தி. பஸ்ஸம்ப⁴யம் காயஸங்கா²ரம் பஸ்ஸஸிஸ்ஸாமீதி ஸிக்க²தி. பீதிப்படிஸம்வேதீ³ அஸ்ஸஸிஸ்ஸாமீதி ஸிக்க²தி. பீதிப்படிஸம்வேதீ³ பஸ்ஸஸிஸ்ஸாமீதி ஸிக்க²தி. ஸுக²ப்படிஸம்வேதீ³ அஸ்ஸஸிஸ்ஸாமீதி ஸிக்க²தி. ஸுக²ப்படிஸம்வேதீ³ பஸ்ஸஸிஸ்ஸாமீதி ஸிக்க²தி. சித்தஸங்கா²ரப்படிஸம்வேதீ³ அஸ்ஸஸிஸ்ஸாமீதி ஸிக்க²தி. சித்தஸங்கா²ரப்படிஸம்வேதீ³ பஸ்ஸஸிஸ்ஸாமீதி ஸிக்க²தி. பஸ்ஸம்ப⁴யம் சித்தஸங்கா²ரம் அஸ்ஸஸிஸ்ஸாமீதி ஸிக்க²தி. பஸ்ஸம்ப⁴யம் சித்தஸங்கா²ரம் பஸ்ஸஸிஸ்ஸாமீதி ஸிக்க²தி. சித்தப்படிஸம்வேதீ³ அஸ்ஸஸிஸ்ஸாமீதி ஸிக்க²தி. சித்தப்படிஸம்வேதீ³ பஸ்ஸஸிஸ்ஸாமீதி ஸிக்க²தி. அபி⁴ப்பமோத³யம் சித்தம்…பே… ஸமாத³ஹம் சித்தம்…பே… விமோசயம் சித்தம்…பே… அனிச்சானுபஸ்ஸீ…பே… விராகா³னுபஸ்ஸீ…பே… நிரோதா⁴னுபஸ்ஸீ…பே… படினிஸ்ஸக்³கா³னுபஸ்ஸீ அஸ்ஸஸிஸ்ஸாமீதி ஸிக்க²தி. படினிஸ்ஸக்³கா³னுபஸ்ஸீ பஸ்ஸஸிஸ்ஸாமீதி ஸிக்க²தி. ஏவம் பா⁴விதோ கோ², பி⁴க்க²வே, ஆனாபானஸ்ஸதிஸமாதி⁴ ஏவம் ப³ஹுலீகதோ ஸந்தோ சேவ பணீதோ ச அஸேசனகோ ச ஸுகோ² ச விஹாரோ உப்பன்னுப்பன்னே ச பாபகே அகுஸலே த⁴ம்மே டா²னஸோ அந்தரதா⁴பேதி வூபஸமேதீ’’தி.

166. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ² படிபுச்சி² – ‘‘ஸச்சம் கிர, பி⁴க்க²வே, பி⁴க்கூ² அத்தனாபி அத்தானம் ஜீவிதா வோரோபேந்தி, அஞ்ஞமஞ்ஞம்பி ஜீவிதா வோரோபேந்தி மிக³லண்டி³கம்பி ஸமணகுத்தகம் உபஸங்கமித்வா ஏவம் வத³ந்தி – ‘ஸாது⁴ நோ, ஆவுஸோ, ஜீவிதா வோரோபேஹி, இத³ம் தே பத்தசீவரம் ப⁴விஸ்ஸதீ’’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், பி⁴க்க²வே, தேஸம் பி⁴க்கூ²னம் அனனுலோமிகம் அப்படிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம தே, பி⁴க்க²வே, பி⁴க்கூ² அத்தனாபி அத்தானம் ஜீவிதா வோரோபேஸ்ஸந்தி, அஞ்ஞமஞ்ஞம்பி ஜீவிதா வோரோபேஸ்ஸந்தி, மிக³லண்டி³கம்பி ஸமணகுத்தகம் உபஸங்கமித்வா ஏவம் வக்க²ந்தி – ‘ஸாது⁴ நோ, ஆவுஸோ, ஜீவிதா வோரோபேஹி, இத³ம் தே பத்தசீவரம் ப⁴விஸ்ஸதீ’தி. நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

167. ‘‘யோ பன பி⁴க்கு² ஸஞ்சிச்ச மனுஸ்ஸவிக்³க³ஹம் ஜீவிதா வோரோபேய்ய ஸத்த²ஹாரகம் வாஸ்ஸ பரியேஸேய்ய, அயம்பி பாராஜிகோ ஹோதி அஸம்வாஸோ’’தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

168. தேன கோ² பன ஸமயேன அஞ்ஞதரோ உபாஸகோ கி³லானோ ஹோதி. தஸ்ஸ பஜாபதி அபி⁴ரூபா ஹோதி த³ஸ்ஸனீயா பாஸாதி³கா. ச²ப்³ப³க்³கி³யா பி⁴க்கூ² தஸ்ஸா இத்தி²யா படிப³த்³த⁴சித்தா ஹோந்தி. அத² கோ² ச²ப்³ப³க்³கி³யானம் பி⁴க்கூ²னம் ஏதத³ஹோஸி – ‘‘ஸசே கோ² ஸோ, ஆவுஸோ, உபாஸகோ ஜீவிஸ்ஸதி ந மயம் தம் இத்தி²ம் லபி⁴ஸ்ஸாம. ஹந்த³ மயம், ஆவுஸோ, தஸ்ஸ உபாஸகஸ்ஸ மரணவண்ணம் ஸம்வண்ணேமா’’தி. அத² கோ² ச²ப்³ப³க்³கி³யா பி⁴க்கூ² யேன ஸோ உபாஸகோ தேனுபஸங்கமிம்ஸு; உபஸங்கமித்வா தம் உபாஸகம் ஏதத³வோசும் – ‘‘த்வம் கோ²ஸி, உபாஸக, கதகல்யாணோ கதகுஸலோ கதபீ⁴ருத்தாணோ அகதபாபோ அகதலுத்³தோ³ அகதகிப்³பி³ஸோ. கதம் தயா கல்யாணம், அகதம் தயா பாபம். கிம் துய்ஹிமினா பாபகேன து³ஜ்ஜீவிதேன! மதம் தே ஜீவிதா ஸேய்யோ. இதோ த்வம் காலங்கதோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜிஸ்ஸஸி. தத்த² தி³ப்³பே³ஹி பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ பரிசாரேஸ்ஸஸீ’’தி.

169. அத² கோ² ஸோ உபாஸகோ – ‘‘ஸச்சம் கோ² அய்யா ஆஹம்ஸு. அஹஞ்ஹி கதகல்யாணோ கதகுஸலோ கதபீ⁴ருத்தாணோ அகதபாபோ அகதலுத்³தோ³ அகதகிப்³பி³ஸோ. கதம் மயா கல்யாணம், அகதம் மயா பாபம். கிம் மய்ஹிமினா பாபகேன து³ஜ்ஜீவிதேன! மதம் மே ஜீவிதா ஸேய்யோ. இதோ அஹம் காலங்கதோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜிஸ்ஸாமி. தத்த² தி³ப்³பே³ஹி பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ பரிசாரேஸ்ஸாமீ’’தி, ஸோ அஸப்பாயானி சேவ போ⁴ஜனானி பு⁴ஞ்ஜி அஸப்பாயானி ச கா²த³னீயானி கா²தி³ அஸப்பாயானி ச ஸாயனீயானி ஸாயி அஸப்பாயானி ச பானானி பிவி. தஸ்ஸ அஸப்பாயானி சேவ போ⁴ஜனானி பு⁴ஞ்ஜதோ அஸப்பாயானி ச கா²த³னீயானி கா²த³தோ அஸப்பாயானி ச ஸாயனீயானி ஸாயதோ அஸப்பாயானி ச பானானி பிவதோ க²ரோ ஆபா³தோ⁴ உப்பஜ்ஜி. ஸோ தேனேவ ஆபா³தே⁴ன காலமகாஸி. தஸ்ஸ பஜாபதி உஜ்ஜா²யதி கி²ய்யதி விபாசேதி – ‘‘அலஜ்ஜினோ இமே ஸமணா ஸக்யபுத்தியா து³ஸ்ஸீலா முஸாவாதி³னோ. இமே ஹி நாம த⁴ம்மசாரினோ ஸமசாரினோ ப்³ரஹ்மசாரினோ ஸச்சவாதி³னோ ஸீலவந்தோ கல்யாணத⁴ம்மா படிஜானிஸ்ஸந்தி! நத்தி² இமேஸம் ஸாமஞ்ஞம் நத்தி² இமேஸம் ப்³ரஹ்மஞ்ஞம், நட்ட²ம் இமேஸம் ஸாமஞ்ஞம் நட்ட²ம் இமேஸம் ப்³ரஹ்மஞ்ஞம், குதோ இமேஸம் ஸாமஞ்ஞம் குதோ இமேஸம் ப்³ரஹ்மஞ்ஞம், அபக³தா இமே ஸாமஞ்ஞா அபக³தா இமே ப்³ரஹ்மஞ்ஞா. இமே மே ஸாமிகஸ்ஸ மரணவண்ணம் ஸம்வண்ணேஸும். இமேஹி மே ஸாமிகோ மாரிதோ’’தி. அஞ்ஞேபி மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘அலஜ்ஜினோ இமே ஸமணா ஸக்யபுத்தியா து³ஸ்ஸீலா முஸாவாதி³னோ. இமே ஹி நாம த⁴ம்மசாரினோ ஸமசாரினோ ப்³ரஹ்மசாரினோ ஸச்சவாதி³னோ ஸீலவந்தோ கல்யாணத⁴ம்மா படிஜானிஸ்ஸந்தி! நத்தி² இமேஸம் ஸாமஞ்ஞம் நத்தி² இமேஸம் ப்³ரஹ்மஞ்ஞம், நட்ட²ம் இமேஸம் ஸாமஞ்ஞம் நட்ட²ம் இமேஸம் ப்³ரஹ்மஞ்ஞம், குதோ இமேஸம் ஸாமஞ்ஞம் குதோ இமேஸம் ப்³ரஹ்மஞ்ஞம், அபக³தா இமே ஸாமஞ்ஞா அபக³தா இமே ப்³ரஹ்மஞ்ஞா. இமே உபாஸகஸ்ஸ மரணவண்ணம் ஸம்வண்ணேஸும். இமேஹி உபாஸகோ மாரிதோ’’தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² உபாஸகஸ்ஸ மரணவண்ணம் ஸம்வண்ணிஸ்ஸந்தீ’’தி!

170. அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர தும்ஹே, பி⁴க்க²வே, உபாஸகஸ்ஸ மரணவண்ணம் ஸம்வண்ணேதா²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், மோக⁴புரிஸா, அனனுலோமிகம் அப்படிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம தும்ஹே, மோக⁴புரிஸா, உபாஸகஸ்ஸ மரணவண்ணம் ஸம்வண்ணிஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

171. ‘‘யோ பன பி⁴க்கு² ஸஞ்சிச்ச மனுஸ்ஸவிக்³க³ஹம் ஜீவிதா வோரோபேய்ய ஸத்த²ஹாரகம் வாஸ்ஸ பரியேஸேய்ய மரணவண்ணம் வா ஸம்வண்ணேய்ய மரணாய வா ஸமாத³பேய்ய – ‘அம்போ⁴ புரிஸ, கிம் துய்ஹிமினா பாபகேன து³ஜ்ஜீவிதேன, மதம் தே ஜீவிதா ஸேய்யோ’தி, இதி சித்தமனோ சித்தஸங்கப்போ அனேகபரியாயேன மரணவண்ணம் வா ஸம்வண்ணேய்ய, மரணாய வா ஸமாத³பேய்ய, அயம்பி பாராஜிகோ ஹோதி அஸம்வாஸோ’’தி.

172. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ஸஞ்சிச்சாதி ஜானந்தோ ஸஞ்ஜானந்தோ சேச்ச அபி⁴விதரித்வா வீதிக்கமோ.

மனுஸ்ஸவிக்³க³ஹோ நாம யம் மாதுகுச்சி²ஸ்மிம் பட²மம் சித்தம் உப்பன்னம் பட²மம் விஞ்ஞாணம் பாதுபூ⁴தம், யாவ மரணகாலா ஏத்த²ந்தரே ஏஸோ மனுஸ்ஸவிக்³க³ஹோ நாம.

ஜீவிதா வோரோபேய்யாதி ஜீவிதிந்த்³ரியம் உபச்சி²ந்த³தி உபரோதே⁴தி ஸந்ததிம் விகோபேதி.

ஸத்த²ஹாரகம் வாஸ்ஸ பரியேஸேய்யாதி அஸிம் வா ஸத்திம் வா பே⁴ண்டி³ம் வா [பே⁴ந்தி³ம் வா (க.)] லகு³ளம் வா [ஸூலம்வா லகு³ளம்வா (ஸ்யா.)] பாஸாணம் வா ஸத்த²ம் வா விஸம் வா ரஜ்ஜும் வா.

மரணவண்ணம் வா ஸம்வண்ணேய்யாதி ஜீவிதே ஆதீ³னவம் த³ஸ்ஸேதி, மரணே வண்ணம் ப⁴ணதி.

மரணாய வா ஸமாத³பேய்யாதி ஸத்த²ம் வா ஆஹர, விஸம் வா கா²த³, ரஜ்ஜுயா வா உப்³ப³ந்தி⁴த்வா காலங்கரோஹீதி.

அம்போ⁴ புரிஸாதி ஆலபனாதி⁴வசனமேதம்.

கிம் துய்ஹிமினா பாபகேன து³ஜ்ஜீவிதேனாதி பாபகம் நாம ஜீவிதம் அட்³டா⁴னம் ஜீவிதம் உபாதா³ய த³லித்³தா³னம் ஜீவிதம் பாபகம் லாமகம், ஸத⁴னானம் ஜீவிதம் உபாதா³ய அத⁴னானம் ஜீவிதம் பாபகம், தே³வானம் ஜீவிதம் உபாதா³ய மனுஸ்ஸானம் ஜீவிதம் பாபகம்.

து³ஜ்ஜீவிதம் நாம ஹத்த²ச்சி²ன்னஸ்ஸ பாத³ச்சி²ன்னஸ்ஸ ஹத்த²பாத³ச்சி²ன்னஸ்ஸ கண்ணச்சி²ன்னஸ்ஸ நாஸச்சி²ன்னஸ்ஸ கண்ணனாஸச்சி²ன்னஸ்ஸ, இமினா ச பாபகேன இமினா ச து³ஜ்ஜீவிதேன மதம் தே ஜீவிதா ஸேய்யோதி.

இதி சித்தமனோதி யம் சித்தம் தம் மனோ, யம் மனோ தம் சித்தம்.

சித்தஸங்கப்போதி மரணஸஞ்ஞீ மரணசேதனோ மரணாதி⁴ப்பாயோ.

அனேகபரியாயேனாதி உச்சாவசேஹி ஆகாரேஹி.

மரணவண்ணம் வா ஸம்வண்ணேய்யாதி ஜீவிதே ஆதீ³னவம் த³ஸ்ஸேதி, மரணே வண்ணம் ப⁴ணதி – ‘‘இதோ த்வம் காலங்கதோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜிஸ்ஸஸி, தத்த² தி³ப்³பே³ஹி பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ பரிசாரேஸ்ஸஸீ’’தி.

மரணாய வா ஸமாத³பேய்யாதி ஸத்த²ம் வா ஆஹர, விஸம் வா கா²த³, ரஜ்ஜுயா வா உப்³ப³ந்தி⁴த்வா காலங்கரோஹி, ஸோப்³பே⁴ வா நரகே வா பபாதே வா பபதாதி.

அயம்பீதி புரிமே உபாதா³ய வுச்சதி.

பாராஜிகோ ஹோதீதி ஸேய்யதா²பி நாம புது²ஸிலா த்³விதா⁴ பி⁴ன்னா [த்³வேதா⁴ பி⁴ன்னா (ஸ்யா.)] அப்படிஸந்தி⁴கா ஹோதி, ஏவமேவ பி⁴க்கு² ஸஞ்சிச்ச மனுஸ்ஸவிக்³க³ஹம் ஜீவிதா வோரோபேத்வா அஸ்ஸமணோ ஹோதி அஸக்யபுத்தியோ. தேன வுச்சதி – ‘பாராஜிகோ ஹோதீ’தி.

அஸம்வாஸோதி ஸம்வாஸோ நாம ஏககம்மம் ஏகுத்³தே³ஸோ ஸமஸிக்க²தா – ஏஸோ ஸம்வாஸோ நாம. ஸோ தேன ஸத்³தி⁴ம் நத்தி², தேன வுச்சதி அஸம்வாஸோதி.

173. ஸாமம், அதி⁴ட்டா²ய, தூ³தேன, தூ³தபரம்பராய, விஸக்கியேன தூ³தேன, க³தபச்சாக³தேன தூ³தேன, அரஹோ ரஹோஸஞ்ஞீ, ரஹோ அரஹோஸஞ்ஞீ, அரஹோ அரஹோஸஞ்ஞீ, ரஹோ ரஹோஸஞ்ஞீ காயேன ஸம்வண்ணேதி, வாசாய ஸம்வண்ணேதி, காயேன வாசாய ஸம்வண்ணேதி, தூ³தேன ஸம்வண்ணேதி, லேகா²ய ஸம்வண்ணேதி, ஓபாதம் அபஸ்ஸேனம், உபனிக்கி²பனம், பே⁴ஸஜ்ஜம், ரூபூபஹாரோ, ஸத்³தூ³பஹாரோ, க³ந்தூ⁴பஹாரோ, ரஸூபஹாரோ, போ²ட்ட²ப்³பூ³பஹாரோ, த⁴ம்மூபஹாரோ, ஆசிக்க²னா, அனுஸாஸனீ, ஸங்கேதகம்மம், நிமித்தகம்மந்தி.

174. ஸாமந்தி ஸயம் ஹனதி காயேன வா காயபடிப³த்³தே⁴ன வா நிஸ்ஸக்³கி³யேன வா.

அதி⁴ட்டா²யாதி அதி⁴ட்ட²ஹித்வா ஆணாபேதி – ‘‘ஏவம் விஜ்ஜ², ஏவம் பஹர, ஏவம் கா⁴தேஹீ’’தி.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமம் ஜீவிதா வோரோபேஹீ’’தி, ஆபத்தி து³க்கடஸ்ஸ. ஸோ தம் மஞ்ஞமானோ தம் ஜீவிதா வோரோபேதி, ஆபத்தி உபி⁴ன்னம் பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமம் ஜீவிதா வோரோபேஹீ’’தி, ஆபத்தி து³க்கடஸ்ஸ. ஸோ தம் மஞ்ஞமானோ அஞ்ஞம் ஜீவிதா வோரோபேத்தி, மூலட்ட²ஸ்ஸ அனாபத்தி. வத⁴கஸ்ஸ ஆபத்தி பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமம் ஜீவிதா வோரோபேஹீ’’தி, ஆபத்தி து³க்கடஸ்ஸ. ஸோ அஞ்ஞம் மஞ்ஞமானோ தம் ஜீவிதா வோரோபேதி, ஆபத்தி உபி⁴ன்னம் பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமம் ஜீவிதா வோரோபேஹீ’’தி, ஆபத்தி து³க்கடஸ்ஸ. ஸோ அஞ்ஞம் மஞ்ஞமானோ அஞ்ஞம் ஜீவிதா வோரோபேதி; மூலட்ட²ஸ்ஸ அனாபத்தி, வத⁴கஸ்ஸ ஆபத்தி பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமஸ்ஸ பாவத³ – ‘இத்த²ன்னாமோ இத்த²ன்னாமஸ்ஸ பாவத³து – இத்த²ன்னாமோ இத்த²ன்னாமம் ஜீவிதா வோரோபேதூ’’’தி, ஆபத்தி து³க்கடஸ்ஸ. ஸோ இதரஸ்ஸ ஆரோசேதி, ஆபத்தி து³க்கடஸ்ஸ. வத⁴கோ படிக்³க³ண்ஹாதி, மூலட்ட²ஸ்ஸ ஆபத்தி து²ல்லச்சயஸ்ஸ. ஸோ தம் ஜீவிதா வோரோபேதி, ஆபத்தி ஸப்³பே³ஸம் பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமஸ்ஸ பாவத³ – ‘இத்த²ன்னாமோ இத்த²ன்னாமஸ்ஸ பாவத³து – இத்த²ன்னாமோ இத்த²ன்னாமம் ஜீவிதா வோரோபேதூ’’’தி, ஆபத்தி து³க்கடஸ்ஸ. ஸோ அஞ்ஞம் ஆணாபேதி, ஆபத்தி து³க்கடஸ்ஸ. வத⁴கோ படிக்³க³ண்ஹாதி, ஆபத்தி து³க்கடஸ்ஸ. ஸோ தம் ஜீவிதா வோரோபேதி, மூலட்ட²ஸ்ஸ அனாபத்தி; ஆணாபகஸ்ஸ ச வத⁴கஸ்ஸ ச ஆபத்தி பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமம் ஜீவிதா வோரோபேஹீ’’தி, ஆபத்தி து³க்கடஸ்ஸ. ஸோ க³ந்த்வா புன பச்சாக³ச்ச²தி – ‘‘நாஹம் ஸக்கோமி தம் ஜீவிதா வோரோபேது’’ந்தி. ஸோ புன ஆணாபேதி – ‘‘யதா³ ஸக்கோஸி ததா³ தம் ஜீவிதா வோரோபேஹீ’’தி, ஆபத்தி து³க்கடஸ்ஸ. ஸோ தம் ஜீவிதா வோரோபேதி, ஆபத்தி உபி⁴ன்னம் பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமம் ஜீவிதா வோரோபேஹீ’’தி, ஆபத்தி து³க்கடஸ்ஸ. ஸோ ஆணாபேத்வா விப்படிஸாரீ ந ஸாவேதி – ‘‘மா கா⁴தேஹீ’’தி. ஸோ தம் ஜீவிதா வோரோபேதி, ஆபத்தி உபி⁴ன்னம் பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமம் ஜீவிதா வோரோபேஹீ’’தி, ஆபத்தி து³க்கடஸ்ஸ. ஸோ ஆணாபேத்வா விப்படிஸாரீ ஸாவேதி – ‘‘மா கா⁴தேஹீ’’தி. ஸோ – ‘‘ஆணத்தோ அஹம் தயா’’தி தம் ஜீவிதா வோரோபேதி, மூலட்ட²ஸ்ஸ அனாபத்தி. வத⁴கஸ்ஸ ஆபத்தி பாராஜிகஸ்ஸ.

பி⁴க்கு² பி⁴க்கு²ம் ஆணாபேதி – ‘‘இத்த²ன்னாமம் ஜீவிதா வோரோபேஹீ’’தி, ஆபத்தி து³க்கடஸ்ஸ. ஸோ ஆணாபேத்வா விப்படிஸாரீ ஸாவேதி – ‘‘மா கா⁴தேஹீ’’தி. ஸோ ஸாதூ⁴தி ஓரமதி, உபி⁴ன்னம் அனாபத்தி.

175. அரஹோ ரஹோஸஞ்ஞீ உல்லபதி – ‘‘அஹோ இத்த²ன்னாமோ ஹதோ அஸ்ஸா’’தி, ஆபத்தி து³க்கடஸ்ஸ. ரஹோ அரஹோஸஞ்ஞீ உல்லபதி – ‘‘அஹோ இத்த²ன்னாமோ ஹதோ அஸ்ஸா’’தி, ஆபத்தி து³க்கடஸ்ஸ. அரஹோ அரஹோஸஞ்ஞீ உல்லபதி – ‘‘அஹோ இத்த²ன்னாமோ ஹதோ அஸ்ஸா’’தி, ஆபத்தி து³க்கடஸ்ஸ. ரஹோ ரஹோஸஞ்ஞீ உல்லபதி – ‘‘அஹோ இத்த²ன்னாமோ ஹதோ அஸ்ஸா’’தி, ஆபத்தி து³க்கடஸ்ஸ.

காயேன ஸம்வண்ணேதி நாம காயேன விகாரம் கரோதி – ‘‘யோ ஏவம் மரதி ஸோ த⁴னம் வா லப⁴தி யஸம் வா லப⁴தி ஸக்³க³ம் வா க³ச்ச²தீ’’தி, ஆபத்தி து³க்கடஸ்ஸ. தாய ஸம்வண்ணனாய மரிஸ்ஸாமீதி து³க்க²ம் வேத³னம் உப்பாதே³தி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ.

வாசாய ஸம்வண்ணேதி நாம வாசாய ப⁴ணதி – ‘‘யோ ஏவம் மரதி ஸோ த⁴னம் வா லப⁴தி யஸம் வா லப⁴தி ஸக்³க³ம் வா க³ச்ச²தீ’’தி, ஆபத்தி து³க்கடஸ்ஸ. தாய ஸம்வண்ணனாய மரிஸ்ஸாமீதி து³க்க²ம் வேத³னம் உப்பாதே³தி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ.

காயேன வாசாய ஸம்வண்ணேதி நாம காயேன ச விகாரம் கரோதி, வாசாய ச ப⁴ணதி – ‘‘யோ ஏவம் மரதி ஸோ த⁴னம் வா லப⁴தி யஸம் வா லப⁴தி ஸக்³க³ம் வா க³ச்ச²தீ’’தி, ஆபத்தி து³க்கடஸ்ஸ. தாய ஸம்வண்ணனாய மரிஸ்ஸாமீதி து³க்க²ம் வேத³னம் உப்பாதே³தி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ.

தூ³தேன ஸம்வண்ணேதி நாம தூ³தஸ்ஸ ஸாஸனம் ஆரோசேதி – ‘‘யோ ஏவம் மரதி ஸோ த⁴னம் வா லப⁴தி யஸம் வா லப⁴தி ஸக்³க³ம் வா க³ச்ச²தீ’’தி, ஆபத்தி து³க்கடஸ்ஸ. தூ³தஸ்ஸ ஸாஸனம் ஸுத்வா மரிஸ்ஸாமீதி து³க்க²ம் வேத³னம் உப்பாதே³தி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ.

176. லேகா²ய ஸம்வண்ணேதி நாம லேக²ம் சி²ந்த³தி – ‘‘யோ ஏவம் மரதி ஸோ த⁴னம் வா லப⁴தி யஸம் வா லப⁴தி ஸக்³க³ம் வா க³ச்ச²தீ’’தி, அக்க²ரக்க²ராய ஆபத்தி து³க்கடஸ்ஸ. லேக²ம் பஸ்ஸித்வா மரிஸ்ஸாமீதி து³க்க²ம் வேத³னம் உப்பாதே³தி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ.

ஓபாதம் நாம மனுஸ்ஸம் உத்³தி³ஸ்ஸ ஓபாதம் க²னதி – ‘‘பபதித்வா மரிஸ்ஸதீ’’தி, ஆபத்தி து³க்கடஸ்ஸ. பபதிதே து³க்கா² வேத³னா உப்பஜ்ஜதி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ. அனோதி³ஸ்ஸ ஓபாதம் க²னதி – ‘‘யோ கோசி பபதித்வா மரிஸ்ஸதீ’’தி, ஆபத்தி து³க்கடஸ்ஸ. மனுஸ்ஸோ தஸ்மிம் பபததி, ஆபத்தி து³க்கடஸ்ஸ. பபதிதே து³க்கா² வேத³னா உப்பஜ்ஜதி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ. யக்கோ² வா பேதோ வா திரச்சா²னக³தமனுஸ்ஸவிக்³க³ஹோ வா தஸ்மிம் பபததி, ஆபத்தி து³க்கடஸ்ஸ. பபதிதே து³க்கா² வேத³னா உப்பஜ்ஜதி, ஆபத்தி து³க்கடஸ்ஸ. மரதி, ஆபத்தி து²ல்லச்சயஸ்ஸ. திரச்சா²னக³தோ தஸ்மிம் பபததி, ஆபத்தி து³க்கடஸ்ஸ. பபதிதே து³க்கா² வேத³னா உப்பஜ்ஜதி, ஆபத்தி து³க்கடஸ்ஸ. மரதி, ஆபத்தி பாசித்தியஸ்ஸ.

177. அபஸ்ஸேனம் நாம அபஸ்ஸேனே ஸத்த²ம் வா ட²பேதி விஸேன வா மக்கே²தி து³ப்³ப³லம் வா கரோதி ஸோப்³பே⁴ வா நரகே வா பபாதே வா ட²பேதி – ‘‘பபதித்வா மரிஸ்ஸதீ’’தி, ஆபத்தி து³க்கடஸ்ஸ. ஸத்தே²ன வா விஸேன வா பபதிதேன வா து³க்கா² வேத³னா உப்பஜ்ஜதி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ.

உபனிக்கி²பனம் நாம அஸிம் வா ஸத்திம் வா பே⁴ண்டி³ம் வா லகு³ளம் வா பாஸாணம் வா ஸத்த²ம் வா விஸம் வா ரஜ்ஜும் வா உபனிக்கி²பதி – ‘‘இமினா மரிஸ்ஸதீ’’தி, ஆபத்தி து³க்கடஸ்ஸ. ‘‘தேன மரிஸ்ஸாமீ’’தி து³க்க²ம் வேத³னம் உப்பாதே³தி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ.

பே⁴ஸஜ்ஜம் நாம ஸப்பிம் வா நவனீதம் வா தேலம் வா மது⁴ம் வா பா²ணிதம் வா தே³தி – ‘‘இமம் ஸாயித்வா மரிஸ்ஸதீ’’தி, ஆபத்தி து³க்கடஸ்ஸ. தம் ஸாயிதே து³க்கா² வேத³னா உப்பஜ்ஜதி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ.

178. ரூபூபஹாரோ நாம அமனாபிகம் ரூபம் உபஸம்ஹரதி ப⁴யானகம் பே⁴ரவம் – ‘‘இமம் பஸ்ஸித்வா உத்தஸித்வா மரிஸ்ஸதீ’’தி, ஆபத்தி து³க்கடஸ்ஸ. தம் பஸ்ஸித்வா உத்தஸதி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ. மனாபிகம் ரூபம் உபஸம்ஹரதி [உபஸம்ஹரதி பேமனீயம் ஹத³யங்க³மம் (ஸ்யா.)] – ‘‘இமம் பஸ்ஸித்வா அலாப⁴கேன ஸுஸ்ஸித்வா மரிஸ்ஸதீ’’தி, ஆபத்தி து³க்கடஸ்ஸ. தம் பஸ்ஸித்வா அலாப⁴கேன ஸுஸ்ஸதி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ.

ஸத்³தூ³பஹாரோ நாம அமனாபிகம் ஸத்³த³ம் உபஸம்ஹரதி ப⁴யானகம் பே⁴ரவம் – ‘‘இமம் ஸுத்வா உத்தஸித்வா மரிஸ்ஸதீ’’தி, ஆபத்தி து³க்கடஸ்ஸ. தம் ஸுத்வா உத்தஸதி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ. மனாபிகம் ஸத்³த³ம் உபஸம்ஹரதி பேமனீயம் ஹத³யங்க³மம் – ‘‘இமம் ஸுத்வா அலாப⁴கேன ஸுஸ்ஸித்வா மரிஸ்ஸதீ’’தி, ஆபத்தி து³க்கடஸ்ஸ. தம் ஸுத்வா அலாப⁴கேன ஸுஸ்ஸதி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ.

க³ந்தூ⁴பஹாரோ நாம அமனாபிகம் க³ந்த⁴ம் உபஸம்ஹரதி ஜேகு³ச்ச²ம் பாடிகுல்யம் [படிகூலம் (?)] – ‘‘இமம் கா⁴யித்வா ஜேகு³ச்ச²தா பாடிகுல்யதா மரிஸ்ஸதீ’’தி, ஆபத்தி து³க்கடஸ்ஸ. தம் கா⁴யிதே ஜேகு³ச்ச²தா பாடிகுல்யதா து³க்கா² வேத³னா உப்பஜ்ஜதி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ. மனாபிகம் க³ந்த⁴ம் உபஸம்ஹரதி – ‘‘இமம் கா⁴யித்வா அலாப⁴கேன ஸுஸ்ஸித்வா மரிஸ்ஸதீ’’தி, ஆபத்தி து³க்கடஸ்ஸ. தம் கா⁴யித்வா அலாப⁴கேன ஸுஸ்ஸதி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ.

ரஸூபஹாரோ நாம அமனாபிகம் ரஸம் உபஸம்ஹரதி ஜேகு³ச்ச²ம் பாடிகுல்யம் [படிகூலம் (?)] – ‘‘இமம் ஸாயித்வா ஜேகு³ச்ச²தா பாடிகுல்யதா மரிஸ்ஸதீ’’தி, ஆபத்தி து³க்கடஸ்ஸ. தம் ஸாயிதே ஜேகு³ச்ச²தா பாடிகுல்யதா து³க்கா² வேத³னா உப்பஜ்ஜதி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ. மனாபிகம் ரஸம் உபஸம்ஹரதி – ‘‘இமம் ஸாயித்வா அலாப⁴கேன ஸுஸ்ஸித்வா மரிஸ்ஸதீ’’தி, ஆபத்தி து³க்கடஸ்ஸ. தம் ஸாயித்வா அலாப⁴கேன ஸுஸ்ஸதி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ.

போ²ட்ட²ப்³பூ³பஹாரோ நாம அமனாபிகம் போ²ட்ட²ப்³ப³ம் உபஸம்ஹரதி து³க்க²ஸம்ப²ஸ்ஸம் க²ரஸம்ப²ஸ்ஸம் – ‘‘இமினா பு²ட்டோ² மரிஸ்ஸதீ’’தி, ஆபத்தி து³க்கடஸ்ஸ. தேன பு²ட்ட²ஸ்ஸ து³க்கா² வேத³னா உப்பஜ்ஜதி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ. மனாபிகம் போ²ட்ட²ப்³ப³ம் உபஸம்ஹரதி ஸுக²ஸம்ப²ஸ்ஸம் முது³ஸம்ப²ஸ்ஸம் – ‘‘இமினா பு²ட்டோ² அலாப⁴கேன ஸுஸ்ஸித்வா மரிஸ்ஸதீ’’தி, ஆபத்தி து³க்கடஸ்ஸ. தேன பு²ட்டோ² அலாப⁴கேன ஸுஸ்ஸதி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ.

த⁴ம்மூபஹாரோ நாம நேரயிகஸ்ஸ நிரயகத²ம் கதே²தி – ‘‘இமம் ஸுத்வா உத்தஸித்வா மரிஸ்ஸதீ’’தி, ஆபத்தி து³க்கடஸ்ஸ. தம் ஸுத்வா உத்தஸதி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ. கல்யாணகம்மஸ்ஸ ஸக்³க³கத²ம் கதே²தி – ‘‘இமம் ஸுத்வா அதி⁴முத்தோ மரிஸ்ஸதீ’’தி, ஆபத்தி து³க்கடஸ்ஸ. தம் ஸுத்வா அதி⁴முத்தோ மரிஸ்ஸாமீதி து³க்க²ம் வேத³னம் உப்பாதே³தி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ.

179. ஆசிக்க²னா நாம புட்டோ² ப⁴ணதி – ‘‘ஏவம் மரஸ்ஸு. யோ ஏவம் மரதி ஸோ த⁴னம் வா லப⁴தி யஸம் வா லப⁴தி ஸக்³க³ம் வா க³ச்ச²தீ’’தி, ஆபத்தி து³க்கடஸ்ஸ. தாய ஆசிக்க²னாய மரிஸ்ஸாமீதி து³க்க²ம் வேத³னம் உப்பாதே³தி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ.

அனுஸாஸனீ நாம அபுட்டோ² ப⁴ணதி – ‘‘ஏவம் மரஸ்ஸு. யோ ஏவம் மரதி ஸோ த⁴னம் வா லப⁴தி யஸம் வா லப⁴தி ஸக்³க³ம் வா க³ச்ச²தீ’’தி, ஆபத்தி து³க்கடஸ்ஸ. தாய அனுஸாஸனியா மரிஸ்ஸாமீதி து³க்க²ம் வேத³னம் உப்பாதே³தி, ஆபத்தி து²ல்லச்சயஸ்ஸ. மரதி, ஆபத்தி பாராஜிகஸ்ஸ.

ஸங்கேதகம்மம் நாம ஸங்கேதம் கரோதி புரேப⁴த்தம் வா பச்சா²ப⁴த்தம் வா ரத்திம் வா தி³வா வா – ‘‘தேன ஸங்கேதேன தம் ஜீவிதா வோரோபேஹீ’’தி, ஆபத்தி து³க்கடஸ்ஸ. தேன ஸங்கேதேன தம் ஜீவிதா வோரோபேதி, ஆபத்தி உபி⁴ன்னம் பாராஜிகஸ்ஸ. தம் ஸங்கேதம் புரே வா பச்சா² வா தம் ஜீவிதா வோரோபேதி, மூலட்ட²ஸ்ஸ அனாபத்தி, வத⁴கஸ்ஸ ஆபத்தி பாராஜிகஸ்ஸ.

நிமித்தகம்மம் நாம நிமித்தம் கரோதி – ‘‘அக்கி²ம் வா நிக²ணிஸ்ஸாமி ப⁴முகம் வா உக்கி²பிஸ்ஸாமி ஸீஸம் வா உக்கி²பிஸ்ஸாமி, தேன நிமித்தேன தம் ஜீவிதா வோரோபேஹீ’’தி, ஆபத்தி து³க்கடஸ்ஸ. தேன நிமித்தேன தம் ஜீவிதா வோரோபேதி, ஆபத்தி உபி⁴ன்னம் பாராஜிகஸ்ஸ. தம் நிமித்தம் புரே வா பச்சா² வா தம் ஜீவிதா வோரோபேதி, மூலட்ட²ஸ்ஸ அனாபத்தி, வத⁴கஸ்ஸ ஆபத்தி பாராஜிகஸ்ஸ.

அனாபத்தி அஸஞ்சிச்ச அஜானந்தஸ்ஸ நமரணாதி⁴ப்பாயஸ்ஸ உம்மத்தகஸ்ஸ [உம்மத்தகஸ்ஸ கி²த்தசித்தஸ்ஸ வேத³னாட்டஸ்ஸ (ஸ்யா.)] ஆதி³கம்மிகஸ்ஸாதி.

மனுஸ்ஸவிக்³க³ஹபாராஜிகம்ஹி பட²மபா⁴ணவாரோ நிட்டி²தோ.

வினீதவத்து²உத்³தா³னகா³தா²

ஸம்வண்ணனா நிஸீத³ந்தோ, முஸலோது³க்க²லேன ச;

வுட்³ட⁴பப்³ப³ஜிதாபி⁴ஸன்னோ, அக்³க³வீமம்ஸனாவிஸம்.

தயோ ச வத்து²கம்மேஹி, இட்ட²காஹிபரே தயோ;

வாஸீ கோ³பானஸீ சேவ, அட்டகோதரணம் பதி.

ஸேத³ம் நத்து²ஞ்ச ஸம்பா³ஹோ, ந்ஹாபனப்³ப⁴ஞ்ஜனேன ச;

உட்டா²பேந்தோ நிபாதேந்தோ, அன்னபானேன மாரணம்.

ஜாரக³ப்³போ⁴ ஸபத்தீ ச, மாதா புத்தம் உபோ⁴ வதி⁴;

உபோ⁴ ந மிய்யரே மத்³தா³, தாபம் வஞ்ஜா² விஜாயினீ.

பதோத³ம் நிக்³க³ஹே யக்கோ², வாளயக்க²ஞ்ச பாஹிணி;

தம் மஞ்ஞமானோ பஹரி, ஸக்³க³ஞ்ச நிரயம் ப⁴ணே.

ஆளவியா தயோ ருக்கா², தா³யேஹி அபரே தயோ;

மா கிலமேஸி ந துய்ஹம், தக்கம் ஸோவீரகேன சாதி.

வினீதவத்து²

180. தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தஸ்ஸ பி⁴க்கூ² காருஞ்ஞேன மரணவண்ணம் ஸம்வண்ணேஸும். ஸோ பி⁴க்கு² காலமகாஸி. தேஸம் குக்குச்சம் அஹோஸி ‘‘ப⁴க³வதா ஸிக்கா²பத³ம் பஞ்ஞத்தம், கச்சி நு கோ² மயம் பாராஜிகம் ஆபத்திம் ஆபன்னா’’தி? ப⁴க³வதோ ஏதமத்த²ம் ஆரோசேஸும். ‘‘ஆபத்திம் தும்ஹே, பி⁴க்க²வே, ஆபன்னா பாராஜிக’’ந்தி.

தேன கோ² பன ஸமயேன அஞ்ஞதரோ பிண்ட³சாரிகோ பி⁴க்கு² பீட²கே பிலோதிகாய படிச்ச²ன்னம் தா³ரகம் நிஸீத³ந்தோ ஓத்த²ரித்வா மாரேஸி. தஸ்ஸ குக்குச்சம் அஹோஸி ‘‘ப⁴க³வதா ஸிக்கா²பத³ம் பஞ்ஞத்தம், கச்சி நு கோ² அஹம் பாராஜிகம் ஆபத்திம் ஆபன்னோ’’தி? ப⁴க³வதோ ஏதமத்த²ம் ஆரோசேஸி. ‘‘அனாபத்தி, பி⁴க்கு², பாராஜிகஸ்ஸ. ந ச, பி⁴க்க²வே, அப்படிவேக்கி²த்வா ஆஸனே நிஸீதி³தப்³ப³ம்; யோ நிஸீதே³ய்ய, ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² ப⁴த்தக்³கே³ அந்தரக⁴ரே ஆஸனம் பஞ்ஞபேந்தோ முஸலே உஸ்ஸிதே ஏகம் முஸலம் அக்³க³ஹேஸி. து³தியோ முஸலோ பரிபதித்வா அஞ்ஞதரஸ்ஸ தா³ரகஸ்ஸ மத்த²கே அவத்தா²ஸி. ஸோ காலமகாஸி. தஸ்ஸ குக்குச்சம் அஹோஸி…பே… ‘‘கிம்சித்தோ த்வம், பி⁴க்கூ²’’தி? ‘‘அஸஞ்சிச்ச அஹம், ப⁴க³வா’’தி. ‘‘அனாபத்தி, பி⁴க்கு², அஸஞ்சிச்சா’’தி.

தேன கோ² பன ஸமயேன அஞ்ஞதரோ பி⁴க்கு² ப⁴த்தக்³கே³ அந்தரக⁴ரே ஆஸனம் பஞ்ஞபேந்தோ உது³க்க²லப⁴ண்டி³கம் அக்கமித்வா பவட்டேஸி. அஞ்ஞதரம் தா³ரகம் ஓத்த²ரித்வா மாரேஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², அஸஞ்சிச்சா’’தி.

தேன கோ² பன ஸமயேன பிதாபுத்தா பி⁴க்கூ²ஸு பப்³ப³ஜிதா ஹோந்தி. காலே ஆரோசிதே புத்தோ பிதரம் ஏதத³வோச – ‘‘க³ச்ச², ப⁴ந்தே, ஸங்கோ⁴ தம் பதிமானேதீ’’தி பிட்டி²யம் க³ஹேத்வா பணாமேஸி. ஸோ பபதித்வா காலமகாஸி. தஸ்ஸ குக்குச்சம் அஹோஸி…பே… ‘‘கிம்சித்தோ த்வம், பி⁴க்கூ²’’தி? ‘‘நாஹம், ப⁴க³வா, மரணாதி⁴ப்பாயோ’’தி. ‘‘அனாபத்தி, பி⁴க்கு², நமரணாதி⁴ப்பாயஸ்ஸா’’தி.

தேன கோ² பன ஸமயேன பிதாபுத்தா பி⁴க்கூ²ஸு பப்³ப³ஜிதா ஹோந்தி. காலே ஆரோசிதே புத்தோ பிதரம் ஏதத³வோச – ‘‘க³ச்ச², ப⁴ந்தே, ஸங்கோ⁴ தம் பதிமானேதீ’’தி மரணாதி⁴ப்பாயோ பிட்டி²யம் க³ஹேத்வா பணாமேஸி. ஸோ பபதித்வா காலமகாஸி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

தேன கோ² பன ஸமயேன பிதாபுத்தா பி⁴க்கூ²ஸு பப்³ப³ஜிதா ஹோந்தி. காலே ஆரோசிதே புத்தோ பிதரம் ஏதத³வோச – ‘‘க³ச்ச², ப⁴ந்தே, ஸங்கோ⁴ தம் பதிமானேதீ’’தி மரணாதி⁴ப்பாயோ பிட்டி²யம் க³ஹேத்வா பணாமேஸி. ஸோ பபதித்வா ந காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

181. தேன கோ² பன ஸமயேன அஞ்ஞதரஸ்ஸ பி⁴க்கு²னோ பு⁴ஞ்ஜந்தஸ்ஸ மம்ஸம் கண்டே² விலக்³க³ம் ஹோதி. அஞ்ஞதரோ பி⁴க்கு² தஸ்ஸ பி⁴க்கு²னோ கீ³வாயம் பஹாரம் அதா³ஸி. ஸலோஹிதம் மம்ஸம் பதி. ஸோ பி⁴க்கு² காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரஸ்ஸ பி⁴க்கு²னோ பு⁴ஞ்ஜந்தஸ்ஸ மம்ஸம் கண்டே² விலக்³க³ம் ஹோதி. அஞ்ஞதரோ பி⁴க்கு² மரணாதி⁴ப்பாயோ தஸ்ஸ பி⁴க்கு²னோ கீ³வாயம் பஹாரம் அதா³ஸி. ஸலோஹிதம் மம்ஸம் பதி. ஸோ பி⁴க்கு² காலமகாஸி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

தேன கோ² பன ஸமயேன அஞ்ஞதரஸ்ஸ பி⁴க்கு²னோ பு⁴ஞ்ஜந்தஸ்ஸ மம்ஸம் கண்டே² விலக்³க³ம் ஹோதி. அஞ்ஞதரோ பி⁴க்கு² மரணாதி⁴ப்பாயோ தஸ்ஸ பி⁴க்கு²னோ கீ³வாயம் பஹாரம் அதா³ஸி. ஸலோஹிதம் மம்ஸம் பதி. ஸோ பி⁴க்கு² ந காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பிண்ட³சாரிகோ பி⁴க்கு² விஸக³தம் பிண்ட³பாதம் லபி⁴த்வா படிக்கமனம் ஹரித்வா பி⁴க்கூ²னம் அக்³க³காரிகம் அதா³ஸி. தே பி⁴க்கூ² காலமகம்ஸு. தஸ்ஸ குக்குச்சம் அஹோஸி…பே… ‘‘கிம்சித்தோ த்வம், பி⁴க்கூ²’’தி? ‘‘நாஹம், ப⁴க³வா, ஜானாமீ’’தி. ‘‘அனாபத்தி, பி⁴க்கு², அஜானந்தஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² வீமம்ஸாதி⁴ப்பாயோ அஞ்ஞதரஸ்ஸ பி⁴க்கு²னோ விஸம் அதா³ஸி. ஸோ பி⁴க்கு² காலமகாஸி. தஸ்ஸ குக்குச்சம் அஹோஸி…பே… ‘‘கிம்சித்தோ த்வம், பி⁴க்கூ²’’தி? ‘‘வீமம்ஸாதி⁴ப்பாயோ அஹம், ப⁴க³வா’’தி. ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

182. தேன கோ² பன ஸமயேன ஆளவகா [ஆளவிகா (ஸ்யா.)] பி⁴க்கூ² விஹாரவத்து²ம் கரோந்தி. அஞ்ஞதரோ பி⁴க்கு² ஹேட்டா² ஹுத்வா ஸிலம் உச்சாரேஸி. உபரிமேன பி⁴க்கு²னா து³க்³க³ஹிதா ஸிலா ஹேட்டி²மஸ்ஸ பி⁴க்கு²னோ மத்த²கே அவத்தா²ஸி. ஸோ பி⁴க்கு² காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², அஸஞ்சிச்சா’’தி.

தேன கோ² பன ஸமயேன ஆளவகா பி⁴க்கூ² விஹாரவத்து²ம் கரோந்தி. அஞ்ஞதரோ பி⁴க்கு² ஹேட்டா² ஹுத்வா ஸிலம் உச்சாரேஸி. உபரிமோ பி⁴க்கு² மரணாதி⁴ப்பாயோ ஹேட்டி²மஸ்ஸ பி⁴க்கு²னோ மத்த²கே ஸிலம் முஞ்சி. ஸோ பி⁴க்கு² காலமகாஸி…பே… ஸோ பி⁴க்கு² ந காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன ஆளவகா பி⁴க்கூ² விஹாரஸ்ஸ குட்டம் உட்டா²பேந்தி. அஞ்ஞதரோ பி⁴க்கு² ஹேட்டா² ஹுத்வா இட்ட²கம் உச்சாரேஸி. உபரிமேன பி⁴க்கு²னா து³க்³க³ஹிதா இட்ட²கா ஹேட்டி²மஸ்ஸ பி⁴க்கு²னோ மத்த²கே அவத்தா²ஸி. ஸோ பி⁴க்கு² காலமகாஸி. தஸ்ஸ குக்குச்சம் அஹோஸி…பே… ‘‘அனாபதி, பி⁴க்கு², அஸஞ்சிச்சா’’தி.

தேன கோ² பன ஸமயேன ஆளவகா பி⁴க்கூ² விஹாரஸ்ஸ குட்டம் உட்டா²பேந்தி. அஞ்ஞதரோ பி⁴க்கு² ஹேட்டா² ஹுத்வா இட்ட²கம் உச்சாரேஸி. உபரிமோ பி⁴க்கு² மரணாதி⁴ப்பாயோ ஹேட்டி²மஸ்ஸ பி⁴க்கு²னோ மத்த²கே இட்ட²கம் முஞ்சி. ஸோ பி⁴க்கு² காலமகாஸி…பே… ஸோ பி⁴க்கு² ந காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

183. தேன கோ² பன ஸமயேன ஆளவகா பி⁴க்கூ² நவகம்மம் கரோந்தி. அஞ்ஞதரோ பி⁴க்கு² ஹேட்டா² ஹுத்வா வாஸிம் உச்சாரேஸி. உபரிமேன பி⁴க்கு²னா து³க்³க³ஹிதா வாஸீ ஹேட்டி²மஸ்ஸ பி⁴க்கு²னோ மத்த²கே அவத்தா²ஸி. ஸோ பி⁴க்கு² காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², அஸஞ்சிச்சா’’தி.

தேன கோ² பன ஸமயேன ஆளவகா பி⁴க்கூ² நவகம்மம் கரோந்தி. அஞ்ஞதரோ பி⁴க்கு² ஹேட்டா² ஹுத்வா வாஸிம் உச்சாரேஸி. உபரிமோ பி⁴க்கு² மரணாதி⁴ப்பாயோ ஹேட்டி²மஸ்ஸ பி⁴க்கு²னோ மத்த²கே வாஸிம் முஞ்சி. ஸோ பி⁴க்கு² காலமகாஸி…பே… ஸோ பி⁴க்கு² ந காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன ஆளவகா பி⁴க்கூ² நவகம்மம் கரோந்தி. அஞ்ஞதரோ பி⁴க்கு² ஹேட்டா² ஹுத்வா கோ³பானஸிம் உச்சாரேஸி. உபரிமேன பி⁴க்கு²னா து³க்³க³ஹிதா கோ³பானஸீ ஹேட்டி²மஸ்ஸ பி⁴க்கு²னோ மத்த²கே அவத்தா²ஸி. ஸோ பி⁴க்கு² காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², அஸஞ்சிச்சா’’தி.

தேன கோ² பன ஸமயேன ஆளவகா பி⁴க்கூ² நவகம்மம் கரோந்தி. அஞ்ஞதரோ பி⁴க்கு² ஹேட்டா² ஹுத்வா கோ³பானஸிம் உச்சாரேஸி. உபரிமோ பி⁴க்கு² மரணாதி⁴ப்பாயோ ஹேட்டி²மஸ்ஸ பி⁴க்கு²னோ மத்த²கே கோ³பானஸிம் முஞ்சி. ஸோ பி⁴க்கு² காலமகாஸி…பே… ஸோ பி⁴க்கு² ந காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன ஆளவகா பி⁴க்கூ² நவகம்மம் கரோந்தா அட்டகம் ப³ந்த⁴ந்தி. அஞ்ஞதரோ பி⁴க்கு² அஞ்ஞதரம் பி⁴க்கு²ம் ஏதத³வோச – ‘‘ஆவுஸோ, அத்ரட்டி²தோ ப³ந்தா⁴ஹீ’’தி. ஸோ தத்ரட்டி²தோ ப³ந்த⁴ந்தோ பரிபதித்வா காலமகாஸி. தஸ்ஸ குக்குச்சம் அஹோஸி…பே… ‘‘கிம்சித்தோ த்வம், பி⁴க்கூ²’’தி? ‘‘நாஹம், ப⁴க³வா, மரணாதி⁴ப்பாயோ’’தி. ‘‘அனாபத்தி, பி⁴க்கு², நமரணாதி⁴ப்பாயஸ்ஸா’’தி.

தேன கோ² பன ஸமயேன ஆளவகா பி⁴க்கூ² நவகம்மம் கரோந்தா அட்டகம் ப³ந்த⁴ந்தி. அஞ்ஞதரோ பி⁴க்கு² மரணாதி⁴ப்பாயோ அஞ்ஞதரம் பி⁴க்கு²ம் ஏதத³வோச – ‘‘ஆவுஸோ, அத்ரட்டி²தோ ப³ந்தா⁴ஹீ’’தி. ஸோ தத்ரட்டி²தோ ப³ந்த⁴ந்தோ பரிபதித்வா காலமகாஸி…பே… பரிபதித்வா ந காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² விஹாரம் சா²தே³த்வா ஓதரதி. அஞ்ஞதரோ பி⁴க்கு² தம் பி⁴க்கு²ம் ஏதத³வோச – ‘‘ஆவுஸோ, இதோ ஓதராஹீ’’தி. ஸோ தேன ஓதரந்தோ பரிபதித்வா காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² விஹாரம் சா²தே³த்வா ஓதரதி. அஞ்ஞதரோ பி⁴க்கு² மரணாதி⁴ப்பாயோ தம் பி⁴க்கு²ம் ஏதத³வோச – ‘‘ஆவுஸோ, இதோ ஓதராஹீ’’தி. ஸோ தேன ஓதரந்தோ பரிபதித்வா காலமகாஸி…பே… பரிபதித்வா ந காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² அனபி⁴ரதியா பீளிதோ கி³ஜ்ஜ²கூடம் பப்³ப³தம் அபி⁴ருஹித்வா பபாதே பபதந்தோ அஞ்ஞதரம் விலீவகாரம் ஓத்த²ரித்வா மாரேஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ. ந ச, பி⁴க்க²வே, அத்தானம் பாதேதப்³ப³ம். யோ பாதேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன ச²ப்³ப³க்³கி³யா பி⁴க்கூ² கி³ஜ்ஜ²கூடம் பப்³ப³தம் அபி⁴ருஹித்வா த³வாய ஸிலம் பவிஜ்ஜி²ம்ஸு. ஸா அஞ்ஞதரம் கோ³பாலகம் ஓத்த²ரித்வா மாரேஸி. தேஸம் குக்குச்சம் அஹோஸி …பே… ‘‘அனாபத்தி, பி⁴க்க²வே, பாராஜிகஸ்ஸ. ந ச, பி⁴க்க²வே, த³வாய ஸிலா பவிஜ்ஜி²தப்³பா³. யோ பவிஜ்ஜே²ய்ய, ஆபத்தி து³க்கடஸ்ஸா’’தி.

184. தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தம் பி⁴க்கூ² ஸேதே³ஸும். ஸோ பி⁴க்கு² காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தம் பி⁴க்கூ² மரணாதி⁴ப்பாயா ஸேதே³ஸும். ஸோ பி⁴க்கு² காலமகாஸி.…பே… ஸோ பி⁴க்கு² ந காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரஸ்ஸ பி⁴க்கு²னோ ஸீஸாபி⁴தாபோ ஹோதி. தஸ்ஸ பி⁴க்கூ² நத்து²ம் அத³ம்ஸு. ஸோ பி⁴க்கு² காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரஸ்ஸ பி⁴க்கு²னோ ஸீஸாபி⁴தாபோ ஹோதி. தஸ்ஸ பி⁴க்கூ² மரணாதி⁴ப்பாயா நத்து²ம் அத³ம்ஸு. ஸோ பி⁴க்கு² காலமகாஸி…பே… ஸோ பி⁴க்கு² ந காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தம் பி⁴க்கூ² ஸம்பா³ஹேஸும். ஸோ பி⁴க்கு² காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தம் பி⁴க்கூ² மரணாதி⁴ப்பாயா ஸம்பா³ஹேஸும். ஸோ பி⁴க்கு² காலமகாஸி…பே… ஸோ பி⁴க்கு² ந காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தம் பி⁴க்கு² ந்ஹாபேஸும். ஸோ பி⁴க்கு² காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தம் பி⁴க்கூ² மரணாதி⁴ப்பாயா ந்ஹாபேஸும். ஸோ பி⁴க்கு² காலமகாஸி…பே… ஸோ பி⁴க்கு² ந காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தம் பி⁴க்கூ² தேலேன அப்³ப⁴ஞ்ஜிம்ஸு. ஸோ பி⁴க்கு² காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தம் பி⁴க்கூ² மரணாதி⁴ப்பாயா தேலேன அப்³ப⁴ஞ்ஜிம்ஸு. ஸோ பி⁴க்கு² காலமகாஸி…பே… ஸோ பி⁴க்கு² ந காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, பாராஜிகஸ்ஸ; ஆபத்தி து²ல்லச்சயஸ்ஸா’’தி.

185. தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தம் பி⁴க்கூ² உட்டா²பேஸும். ஸோ பி⁴க்கு² காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தம் பி⁴க்கூ² மரணாதி⁴ப்பாயா உட்டா²பேஸும். ஸோ பி⁴க்கு² காலமகாஸி…பே… ஸோ பி⁴க்கு² ந காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தம் பி⁴க்கூ² நிபாதேஸும். ஸோ பி⁴க்கு² காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தம் பி⁴க்கூ² மரணாதி⁴ப்பாயா நிபாதேஸும். ஸோ பி⁴க்கு² காலமகாஸி…பே… ஸோ பி⁴க்கு² ந காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தஸ்ஸ பி⁴க்கூ² அன்னம் அத³ம்ஸு. ஸோ பி⁴க்கு² காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தஸ்ஸ பி⁴க்கூ² மரணாதி⁴ப்பாயா அன்னம் அத³ம்ஸு. ஸோ பி⁴க்கு² காலமகாஸி…பே… ஸோ பி⁴க்கு² ந காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தஸ்ஸ பி⁴க்கு² பானம் அத³ம்ஸு. ஸோ பி⁴க்கு² காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தஸ்ஸ பி⁴க்கூ² மரணாதி⁴ப்பாயா பானம் அத³ம்ஸு. ஸோ பி⁴க்கு² காலமகாஸி…பே… ஸோ பி⁴க்கு² ந காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, பாராஜிகஸ்ஸ; ஆபத்தி து²ல்லச்சயஸ்ஸா’’தி.

186. தேன கோ² பன ஸமயேன அஞ்ஞதரா இத்தீ² பவுத்த²பதிகா ஜாரேன க³ப்³பி⁴னீ ஹோதி. ஸா குலூபகம் பி⁴க்கு²ம் ஏதத³வோச – ‘‘இங்கா⁴ய்ய க³ப்³ப⁴பாதனம் ஜானாஹீ’’தி. ‘‘ஸுட்டு², ப⁴கி³னீ’’தி தஸ்ஸா க³ப்³ப⁴பாதனம் அதா³ஸி. தா³ரகோ காலமகாஸி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

தேன கோ² பன ஸமயேன அஞ்ஞதரஸ்ஸ புரிஸஸ்ஸ த்³வே பஜாபதியோ ஹோந்தி – ஏகா வஞ்ஜா², ஏகா விஜாயினீ. வஞ்ஜா² இத்தீ² குலூபகம் பி⁴க்கு²ம் ஏதத³வோச – ‘‘ஸசே ஸா, ப⁴ந்தே, விஜாயிஸ்ஸதி ஸப்³ப³ஸ்ஸ குடும்ப³ஸ்ஸ இஸ்ஸரா ப⁴விஸ்ஸதி. இங்கா⁴ய்ய, தஸ்ஸா க³ப்³ப⁴பாதனம் ஜானாஹீ’’தி.‘‘ஸுட்டு², ப⁴கி³னீ’’தி தஸ்ஸா க³ப்³ப⁴பாதனம் அதா³ஸி. தா³ரகோ காலமகாஸி, மாதா ந காலமகாஸி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

தேன கோ² பன ஸமயேன அஞ்ஞதரஸ்ஸ புரிஸஸ்ஸ த்³வே பஜாபதியோ ஹோந்தி – ஏகா வஞ்ஜா², ஏகா விஜாயினீ. வஞ்ஜா² இத்தீ² குலூபகம் பி⁴க்கு²ம் ஏதத³வோச – ‘‘ஸசே ஸா, ப⁴ந்தே, விஜாயிஸ்ஸதி ஸப்³ப³ஸ்ஸ குடும்ப³ஸ்ஸ இஸ்ஸரா ப⁴விஸ்ஸதி. இங்கா⁴ய்ய, தஸ்ஸா க³ப்³ப⁴பாதனம் ஜானாஹீ’’தி. ‘‘ஸுட்டு², ப⁴கி³னீ’’தி தஸ்ஸா க³ப்³ப⁴பாதனம் அதா³ஸி. மாதா காலமகாஸி, தா³ரகோ ந காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரஸ்ஸ புரிஸஸ்ஸ த்³வே பஜாபதியோ ஹோந்தி – ஏகா வஞ்ஜா², ஏகா விஜாயினீ. வஞ்ஜா² இத்தீ² குலூபகம் பி⁴க்கு²ம் ஏதத³வோச – ‘‘ஸசே ஸா, ப⁴ந்தே, விஜாயிஸ்ஸதி ஸப்³ப³ஸ்ஸ குடும்ப³ஸ்ஸ இஸ்ஸரா ப⁴விஸ்ஸதி. இங்கா⁴ய்ய, தஸ்ஸா க³ப்³ப⁴பாதனம் ஜானாஹீ’’தி. ‘‘ஸுட்டு², ப⁴கி³னீ’’தி தஸ்ஸா க³ப்³ப⁴பாதனம் அதா³ஸி. உபோ⁴ காலமகம்ஸு…பே… உபோ⁴ ந காலமகம்ஸு. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

187. தேன கோ² பன ஸமயேன அஞ்ஞதரா க³ப்³பி⁴னீ இத்தீ² குலூபகம் பி⁴க்கு²ம் ஏதத³வோச – ‘‘இங்கா⁴ய்ய, க³ப்³ப⁴பாதனம் ஜானாஹீ’’தி. ‘‘தேன ஹி, ப⁴கி³னி, மத்³த³ஸ்ஸூ’’தி. ஸா மத்³தா³பேத்வா க³ப்³ப⁴ம் பாதேஸி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

தேன கோ² பன ஸமயேன அஞ்ஞதரா க³ப்³பி⁴னீ இத்தீ² குலூபகம் பி⁴க்கு²ம் ஏதத³வோச – ‘‘இங்கா⁴ய்ய, க³ப்³ப⁴பாதனம் ஜானாஹீ’’தி. ‘‘தேன ஹி, ப⁴கி³னி, தாபேஹீ’’தி. ஸா தாபேத்வா க³ப்³ப⁴ம் பாதேஸி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

தேன கோ² பன ஸமயேன அஞ்ஞதரா வஞ்ஜா² இத்தீ² குலூபகம் பி⁴க்கு²ம் ஏதத³வோச – ‘‘இங்கா⁴ய்ய, பே⁴ஸஜ்ஜம் ஜானாஹி யேனாஹம் விஜாயேய்ய’’ந்தி. ‘‘ஸுட்டு², ப⁴கி³னீ’’தி தஸ்ஸா பே⁴ஸஜ்ஜம் அதா³ஸி. ஸா காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரா விஜாயினீ இத்தீ² குலூபகம் பி⁴க்கு²ம் ஏதத³வோச – ‘‘இங்கா⁴ய்ய, பே⁴ஸஜ்ஜம் ஜானாஹி யேனாஹம் ந விஜாயேய்ய’’ந்தி. ‘‘ஸுட்டு², ப⁴கி³னீ’’தி தஸ்ஸா பே⁴ஸஜ்ஜம் அதா³ஸி. ஸா காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து³க்கடஸ்ஸா’’தி.

தேன கோ² பன ஸமயேன ச²ப்³ப³க்³கி³யா பி⁴க்கூ² ஸத்தரஸவக்³கி³யம் பி⁴க்கு²ம் அங்கு³லிபதோத³கேன ஹாஸேஸும். ஸோ பி⁴க்கு² உத்தந்தோ அனஸ்ஸாஸகோ காலமகாஸி. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, பாராஜிகஸ்ஸா’’தி [பாராஜிகஸ்ஸ, ஆபத்தி பாசித்தியஸ்ஸாதி (ஸ்யா.)].

தேன கோ² பன ஸமயேன ஸத்தரஸவக்³கி³யா பி⁴க்கூ² ச²ப்³ப³க்³கி³யம் பி⁴க்கு²ம் கம்மம் கரிஸ்ஸாமாதி ஓத்த²ரித்வா மாரேஸும். தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, பாராஜிகஸ்ஸா’’தி.

தேன கோ² பன ஸமயேன அஞ்ஞதரோ பூ⁴தவேஜ்ஜகோ பி⁴க்கு² யக்க²ம் ஜீவிதா வோரோபேஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² அஞ்ஞதரம் பி⁴க்கு²ம் வாளயக்க²விஹாரம் பாஹேஸி. தம் யக்கா² ஜீவிதா வோரோபேஸும். தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² மரணாதி⁴ப்பாயோ அஞ்ஞதரம் பி⁴க்கு²ம் வாளயக்க²விஹாரம் பாஹேஸி. தம் யக்கா² ஜீவிதா வோரோபேஸும்…பே… தம் யக்கா² ஜீவிதா ந வோரோபேஸும். தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² அஞ்ஞதரம் பி⁴க்கு²ம் வாளகந்தாரம் பாஹேஸி. தம் வாளா ஜீவிதா வோரோபேஸும். தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² மரணாதி⁴ப்பாயோ அஞ்ஞதரம் பி⁴க்கு²ம் வாளகந்தாரம் பாஹேஸி. தம் வாளா ஜீவிதா வோரோபேஸும்…பே… தம் வாளா ஜீவிதா ந வோரோபேஸும். தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² அஞ்ஞதரம் பி⁴க்கு²ம் சோரகந்தாரம் பாஹேஸி. தம் சோரா ஜீவிதா வோரோபேஸும். தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² மரணாதி⁴ப்பாயோ அஞ்ஞதரம் பி⁴க்கு²ம் சோரகந்தாரம் பாஹேஸி. தம் சோரா ஜீவிதா வோரோபேஸும்…பே… தம் சோரா ஜீவிதா ந வோரோபேஸும். தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

188. தேன கோ² பன ஸமயேன அஞ்ஞதரோ பி⁴க்கு² தம் மஞ்ஞமானோ தம் ஜீவிதா வோரோபேஸி…பே… தம் மஞ்ஞமானோ அஞ்ஞம் ஜீவிதா வோரோபேஸி…பே… அஞ்ஞம் மஞ்ஞமானோ தம் ஜீவிதா வோரோபேஸி…பே… அஞ்ஞம் மஞ்ஞமானோ அஞ்ஞம் ஜீவிதா வோரோபேஸி. தஸ்ஸ குக்குச்சம் அஹோஸி…பே… ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி.

தேன கோ² பன ஸமயேன அஞ்ஞதரோ பி⁴க்கு² அமனுஸ்ஸேன க³ஹிதோ ஹோதி. அஞ்ஞதரோ பி⁴க்கு² தஸ்ஸ பி⁴க்கு²னோ பஹாரம் அதா³ஸி. ஸோ பி⁴க்கு² காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² அமனுஸ்ஸேன க³ஹிதோ ஹோதி. அஞ்ஞதரோ பி⁴க்கு² மரணாதி⁴ப்பாயோ தஸ்ஸ பி⁴க்கு²னோ பஹாரம் அதா³ஸி. ஸோ பி⁴க்கு² காலமகாஸி…பே… ஸோ பி⁴க்கு² ந காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கல்யாணகம்மஸ்ஸ ஸக்³க³கத²ம் கதே²ஸி. ஸோ அதி⁴முத்தோ காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² மரணாதி⁴ப்பாயோ கல்யாணகம்மஸ்ஸ ஸக்³க³கத²ம் கதே²ஸி. ஸோ அதி⁴முத்தோ காலமகாஸி…பே… ஸோ அதி⁴முத்தோ ந காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² நேரயிகஸ்ஸ நிரயகத²ம் கதே²ஸி. ஸோ உத்தஸித்வா காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², நமரணாதி⁴ப்பாயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² மரணாதி⁴ப்பாயோ நேரயிகஸ்ஸ நிரயகத²ம் கதே²ஸி. ஸோ உத்தஸித்வா காலமகாஸி…பே… ஸோ உத்தஸித்வா ந காலமகாஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

189. தேன கோ² பன ஸமயேன ஆளவகா பி⁴க்கூ² நவகம்மம் கரோந்தா ருக்க²ம் சி²ந்த³ந்தி. அஞ்ஞதரோ பி⁴க்கு² அஞ்ஞதரம் பி⁴க்கு²ம் ஏதத³வோச – ‘‘ஆவுஸோ, அத்ரட்டி²தோ சி²ந்தா³ஹீ’’தி. தம் தத்ரட்டி²தம் சி²ந்த³ந்தம் ருக்கோ² ஓத்த²ரித்வா மாரேஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², நமரணாதி⁴ப்பாயஸ்ஸா’’தி.

தேன கோ² பன ஸமயேன ஆளவகா பி⁴க்கூ² நவகம்மம் கரோந்தா ருக்க²ம் சி²ந்த³ந்தி. அஞ்ஞதரோ பி⁴க்கு² மரணாதி⁴ப்பாயோ அஞ்ஞதரம் பி⁴க்கு²ம் ஏதத³வோச – ‘‘ஆவுஸோ, அத்ரட்டி²தோ சி²ந்தா³ஹீ’’தி. தம் தத்ரட்டி²தம் சி²ந்த³ந்தம் ருக்கோ² ஓத்த²ரித்வா மாரேஸி…பே… ருக்கோ² ஓத்த²ரித்வா ந மாரேஸி. தஸ்ஸ குக்குச்சம் அஹோஸி…பே… ‘‘அனாபத்தி, பி⁴க்கு², பாராஜிகஸ்ஸ; ஆபத்தி து²ல்லச்சயஸ்ஸா’’தி.

190. தேன கோ² பன ஸமயேன ச²ப்³ப³க்³கி³யா பி⁴க்கூ² தா³யம் ஆலிம்பேஸும் [ஆளிம்பேஸும் (ஸ்யா. க.)]; மனுஸ்ஸா த³ட்³டா⁴ காலமகம்ஸு. தேஸம் குக்குச்சம் அஹோஸி…பே… ‘‘அனாபத்தி, பி⁴க்க²வே, நமரணாதி⁴ப்பாயஸ்ஸா’’தி.