9. நவமஸிக்கா²பத³ம்

1158. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ புரிஸஸம்ஸட்ட²ம் குமாரகஸம்ஸட்ட²ம் சண்டி³ம் ஸோகாவாஸம் [ஸோகவஸ்ஸம் (ஸீ.) ஸோகாவஸ்ஸம் (ஸ்யா.)] சண்ட³காளிம் ஸிக்க²மானம் வுட்டா²பேதி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ புரிஸஸம்ஸட்ட²ம் குமாரகஸம்ஸட்ட²ம் சண்டி³ம் ஸோகாவாஸம் [ஸோகவஸ்ஸம் (ஸீ.) ஸோகாவஸ்ஸம் (ஸ்யா.)] சண்ட³காளிம் ஸிக்க²மானம் வுட்டா²பேஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ புரிஸஸம்ஸட்ட²ம் குமாரகஸம்ஸட்ட²ம் சண்டி³ம் ஸோகாவாஸம் [ஸோகவஸ்ஸம் (ஸீ.) ஸோகாவஸ்ஸம் (ஸ்யா.)] சண்ட³காளிம் ஸிக்க²மானம் வுட்டா²பேதீதி [வுட்டா²பேஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ புரிஸஸம்ஸட்ட²ம் குமாரகஸம்ஸட்ட²ம் சண்டி³ம் ஸோகாவாஸம் சண்ட³காளிம் ஸிக்க²மானம் வுட்டா²பேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1159. ‘‘யா பன பி⁴க்கு²னீ புரிஸஸம்ஸட்ட²ம் குமாரகஸம்ஸட்ட²ம் சண்டி³ம் ஸோகாவாஸம் ஸிக்க²மானம் வுட்டா²பேய்ய, பாசித்திய’’ந்தி.

1160. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

புரிஸோ நாம பத்தவீஸதிவஸ்ஸோ. குமாரகோ நாம அப்பத்தவீஸதிவஸ்ஸோ. ஸம்ஸட்டா² நாம அனனுலோமிகேன காயிகவாசஸிகேன ஸம்ஸட்டா². சண்டீ³ நாம கோத⁴னா வுச்சதி.

ஸோகாவாஸா நாம பரேஸம் து³க்க²ம் உப்பாதே³தி, ஸோகம் ஆவிஸதி. ஸிக்க²மானா நாம த்³வே வஸ்ஸானி ச²ஸு த⁴ம்மேஸு ஸிக்கி²தஸிக்கா². வுட்டா²பேய்யாதி உபஸம்பாதே³ய்ய.

‘‘வுட்டா²பேஸ்ஸாமீ’’தி க³ணம் வா ஆசரினிம் வா பத்தம் வா சீவரம் வா பரியேஸதி, ஸீமம் வா ஸம்மன்னதி, ஆபத்தி து³க்கடஸ்ஸ. ஞத்தியா து³க்கடம். த்³வீஹி கம்மவாசாஹி து³க்கடா. கம்மவாசாபரியோஸானே உபஜ்ஜா²யாய ஆபத்தி பாசித்தியஸ்ஸ; க³ணஸ்ஸ ச ஆசரினியா ச ஆபத்தி து³க்கடஸ்ஸ.

1161. அனாபத்தி அஜானந்தீ வுட்டா²பேதி, உம்மத்திகாய, ஆதி³கம்மிகாயாதி.

நவமஸிக்கா²பத³ம் நிட்டி²தம்.