4. பாசித்தியகண்ட³ம் (பி⁴க்கு²னீவிப⁴ங்கோ³)

1. லஸுணவக்³கோ³

1. பட²மஸிக்கா²பத³ம்

இமே கோ² பனாய்யாயோ ச²ஸட்டி²ஸதா பாசித்தியா

த⁴ம்மா உத்³தே³ஸம் ஆக³ச்ச²ந்தி.

793. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரேன உபாஸகேன பி⁴க்கு²னிஸங்கோ⁴ லஸுணேன பவாரிதோ ஹோதி – ‘‘யாஸம் அய்யானம் லஸுணேன அத்தோ², அஹம் லஸுணேனா’’தி. கே²த்தபாலோ ச ஆணத்தோ ஹோதி – ‘‘ஸசே பி⁴க்கு²னியோ ஆக³ச்ச²ந்தி, ஏகமேகாய பி⁴க்கு²னியா த்³வேதயோ ப⁴ண்டி³கே தே³ஹீ’’தி. தேன கோ² பன ஸமயேன ஸாவத்தி²யம் உஸ்ஸவோ ஹோதி. யதா²ப⁴தம் லஸுணம் பரிக்க²யம் அக³மாஸி. பி⁴க்கு²னியோ தம் உபாஸகம் உபஸங்கமித்வா ஏதத³வோசும் – ‘‘லஸுணேன, ஆவுஸோ, அத்தோ²’’தி. ‘‘நத்தா²ய்யே. யதா²ப⁴தம் லஸுணம் பரிக்கீ²ணம். கே²த்தம் க³ச்ச²தா²’’தி. து²ல்லனந்தா³ பி⁴க்கு²னீ கே²த்தம் க³ந்த்வா ந மத்தம் ஜானித்வா ப³ஹும் லஸுணம் ஹராபேஸி. கே²த்தபாலோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம பி⁴க்கு²னியோ ந மத்தம் ஜானித்வா ப³ஹும் லஸுணம் ஹராபேஸ்ஸந்தீ’’தி! அஸ்ஸோஸும் கோ² பி⁴க்கு²னியோ தஸ்ஸ கே²த்தபாலஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ ந மத்தம் ஜானித்வா ப³ஹும் லஸுணம் ஹராபேஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ ந மத்தம் ஜானித்வா ப³ஹும் லஸுணம் ஹராபேதீதி [ஹராபேஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ந மத்தம் ஜானித்வா ப³ஹும் லஸுணம் ஹராபேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… த⁴ம்மிம் கத²ம் கத்வா பி⁴க்கூ² ஆமந்தேஸி –

‘‘பூ⁴தபுப்³ப³ம், பி⁴க்க²வே, து²ல்லனந்தா³ பி⁴க்கு²னீ அஞ்ஞதரஸ்ஸ ப்³ராஹ்மணஸ்ஸ பஜாபதி அஹோஸி. திஸ்ஸோ ச தீ⁴தரோ – நந்தா³, நந்த³வதீ, ஸுந்த³ரீனந்தா³. அத² கோ², பி⁴க்க²வே, ஸோ ப்³ராஹ்மணோ காலங்கத்வா அஞ்ஞதரம் ஹம்ஸயோனிம் உபபஜ்ஜி. தஸ்ஸ ஸப்³ப³ஸோவண்ணமயா பத்தா அஹேஸும். ஸோ தாஸம் ஏகேகம் பத்தம் தே³தி. அத² கோ², பி⁴க்க²வே, து²ல்லனந்தா³ பி⁴க்கு²னீ ‘‘அயம் ஹம்ஸோ அம்ஹாகம் ஏகேகம் பத்தம் தே³தீ’’தி தம் ஹம்ஸராஜம் க³ஹேத்வா நிப்பத்தம் அகாஸி. தஸ்ஸ புன ஜாயமானா பத்தா ஸேதா ஸம்பஜ்ஜிம்ஸு. ததா³பி, பி⁴க்க²வே, து²ல்லனந்தா³ பி⁴க்கு²னீ அதிலோபே⁴ன ஸுவண்ணா பரிஹீனா. இதா³னி லஸுணா பரிஹாயிஸ்ஸதீ’’தி.

[ஜா. 1.1.136 ஸுவண்ணஹம்ஸஜாதகேபி] ‘‘யம் லத்³த⁴ம் தேன துட்ட²ப்³ப³ம், அதிலோபோ⁴ ஹி பாபகோ;

ஹம்ஸராஜம் க³ஹேத்வான, ஸுவண்ணா பரிஹாயதா²’’தி.

அத² கோ² ப⁴க³வா து²ல்லனந்த³ம் பி⁴க்கு²னிம் அனேகபரியாயேன விக³ரஹித்வா து³ப்³ப⁴ரதாய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

794. ‘‘யா பன பி⁴க்கு²னீ லஸுணம் கா²தே³ய்ய பாசித்திய’’ந்தி.

795. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

லஸுணம் நாம மாக³த⁴கம் வுச்சதி.

‘‘கா²தி³ஸ்ஸாமீதி படிக்³க³ண்ஹா’’தி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி பாசித்தியஸ்ஸ.

796. லஸுணே லஸுணஸஞ்ஞா கா²த³தி, ஆபத்தி பாசித்தியஸ்ஸ. லஸுணே வேமதிகா கா²த³தி, ஆபத்தி பாசித்தியஸ்ஸ. லஸுணே அலஸுணஸஞ்ஞா கா²த³தி, ஆபத்தி பாசித்தியஸ்ஸ.

அலஸுணே லஸுணஸஞ்ஞா கா²த³தி, ஆபத்தி து³க்கடஸ்ஸ. அலஸுணே வேமதிகா கா²த³தி, ஆபத்தி து³க்கடஸ்ஸ. அலஸுணே அலஸுணஸஞ்ஞா கா²த³தி, அனாபத்தி.

797. அனாபத்தி பலண்டு³கே, ப⁴ஞ்ஜனகே, ஹரீதகே, சாபலஸுணே, ஸூபஸம்பாகே, மம்ஸஸம்பாகே, தேலஸம்பாகே, ஸாளவே, உத்தரிப⁴ங்கே³, உம்மத்திகாய, ஆதி³கம்மிகாயாதி.

பட²மஸிக்கா²பத³ம் நிட்டி²தம்.

2. து³தியஸிக்கா²பத³ம்

798. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ ஸம்பா³தே⁴ லோமம் ஸம்ஹராபேத்வா அசிரவதியா நதி³யா வேஸியாஹி ஸத்³தி⁴ம் நக்³கா³ ஏகதித்தே² நஹாயந்தி. வேஸியா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ ஸம்பா³தே⁴ லோமம் ஸம்ஹராபேஸ்ஸந்தி, ஸேய்யதா²பி கி³ஹினியோ காமபோ⁴கி³னியோ’’தி! அஸ்ஸோஸும் கோ² பி⁴க்கு²னியோ தாஸம் வேஸியானம் உஜ்ஜா²யந்தீனம் கி²ய்யந்தீனம் விபாசேந்தீனம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ ஸம்பா³தே⁴ லோமம் ஸம்ஹராபேஸ்ஸந்தீ’’தி…பே… ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கு²னியோ ஸம்பா³தே⁴ லோமம் ஸம்ஹராபேந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ ஸம்பா³தே⁴ லோமம் ஸம்ஹராபேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

799. ‘‘யா பன பி⁴க்கு²னீ ஸம்பா³தே⁴ லோமம் ஸம்ஹராபேய்ய, பாசித்திய’’ந்தி.

800. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஸம்பா³தோ⁴ நாம உபோ⁴ உபகச்ச²கா, முத்தகரணம்.

ஸம்ஹராபேய்யாதி ஏகம்பி லோமம் ஸம்ஹராபேதி, ஆபத்தி பாசித்தியஸ்ஸ. ப³ஹுகேபி லோமே ஸம்ஹராபேதி, ஆபத்தி பாசித்தியஸ்ஸ.

801. அனாபத்தி ஆபா³த⁴பச்சயா, உம்மத்திகாய, ஆதி³கம்மிகாயாதி.

து³தியஸிக்கா²பத³ம் நிட்டி²தம்.

3. ததியஸிக்கா²பத³ம்

802. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன த்³வே பி⁴க்கு²னியோ அனபி⁴ரதியா பீளிதா ஓவரகம் பவிஸித்வா தலகா⁴தகம் கரோந்தி. பி⁴க்கு²னியோ தேன ஸத்³தே³ன உபதா⁴வித்வா தா பி⁴க்கு²னியோ ஏதத³வோசும் – ‘‘கிஸ்ஸ தும்ஹே, அய்யே, புரிஸேன ஸத்³தி⁴ம் ஸம்பது³ஸ்ஸதா²’’தி? ‘‘ந மயம், அய்யே, புரிஸேன ஸத்³தி⁴ம் ஸம்பது³ஸ்ஸாமா’’தி. பி⁴க்கு²னீனம் ஏதமத்த²ம் ஆரோசேஸும். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ தலகா⁴தகம் கரிஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ தலகா⁴தகம் கரோந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ தலகா⁴தகம் கரிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

803. ‘‘தலகா⁴தகே பாசித்திய’’ந்தி.

804. தலகா⁴தகம் நாம ஸம்ப²ஸ்ஸம் ஸாதி³யந்தீ அந்தமஸோ உப்பலபத்தேனபி முத்தகரணே பஹாரம் தே³தி, ஆபத்தி பாசித்தியஸ்ஸ.

805. அனாபத்தி ஆபா³த⁴பச்சயா, உம்மத்திகாய, ஆதி³கம்மிகாயாதி.

ததியஸிக்கா²பத³ம் நிட்டி²தம்.

4. சதுத்த²ஸிக்கா²பத³ம்

806. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரா புராணராஜோரோதா⁴ பி⁴க்கு²னீஸு பப்³ப³ஜிதா [அஞ்ஞதரோ புராணராஜோரோதோ⁴ பி⁴க்கு²னீஸு பப்³ப³ஜிதோ (ஸ்யா.)] ஹோதி. அஞ்ஞதரா பி⁴க்கு²னீ அனபி⁴ரதியா பீளிதா யேன ஸா பி⁴க்கு²னீ தேனுபஸங்கமி; உபஸங்கமித்வா தம் பி⁴க்கு²னிம் ஏதத³வோச – ‘‘ராஜா கோ², அய்யே, தும்ஹே சிராசிரம் க³ச்ச²தி. கத²ம் தும்ஹே தா⁴ரேதா²’’தி? ‘‘ஜதுமட்ட²கேன, அய்யே’’தி. ‘‘கிம் ஏதம், அய்யே, ஜதுமட்ட²க’’ந்தி? அத² கோ² ஸா பி⁴க்கு²னீ தஸ்ஸா பி⁴க்கு²னியா ஜதுமட்ட²கம் ஆசிக்கி². அத² கோ² ஸா பி⁴க்கு²னீ ஜதுமட்ட²கம் ஆதி³யித்வா தோ⁴விதும் விஸ்ஸரித்வா ஏகமந்தம் ச²ட்³டே³ஸி. பி⁴க்கு²னியோ மக்கி²காஹி ஸம்பரிகிண்ணம் பஸ்ஸித்வா ஏவமாஹம்ஸு – ‘‘கஸ்ஸித³ம் கம்ம’’ந்தி? ஸா ஏவமாஹ – ‘‘மய்ஹித³ம் கம்ம’’ந்தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னீ ஜதுமட்ட²கம் ஆதி³யிஸ்ஸதீ’’தி…பே… ஸச்சம் கிர, பி⁴க்க²வே, பி⁴க்கு²னீ ஜதுமட்ட²கம் ஆதி³யதீதி [ஆதி³யீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னீ ஜதுமட்ட²கம் ஆதி³யிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

807. ‘‘ஜதுமட்ட²கே [ஜதுமட்டகே (ஸீ.)] பாசித்திய’’ந்தி.

808. ஜதுமட்ட²கம் நாம ஜதுமயம் கட்ட²மயம் பிட்ட²மயம் மத்திகாமயம்.

ஆதி³யேய்யாதி ஸம்ப²ஸ்ஸம் ஸாதி³யந்தீ அந்தமஸோ உப்பலபத்தம்பி முத்தகரணம் பவேஸேதி, ஆபத்தி பாசித்தியஸ்ஸ.

809. அனாபத்தி ஆபா³த⁴பச்சயா, உம்மத்திகாய, ஆதி³கம்மிகாயாதி.

சதுத்த²ஸிக்கா²பத³ம் நிட்டி²தம்.

5. பஞ்சமஸிக்கா²பத³ம்

810. தேன ஸமயேன பு³த்³தோ⁴ ப⁴க³வா ஸக்கேஸு விஹரதி கபிலவத்து²ஸ்மிம் நிக்³ரோதா⁴ராமே. அத² கோ² மஹாபஜாபதி கோ³தமீ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா அதோ⁴வாதே அட்டா²ஸி – ‘‘து³க்³க³ந்தோ⁴, ப⁴க³வா, மாதுகா³மோ’’தி. அத² கோ² ப⁴க³வா – ‘‘ஆதி³யந்து கோ² பி⁴க்கு²னியோ உத³கஸுத்³தி⁴க’’ந்தி, மஹாபஜாபதிம் கோ³தமிம் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² மஹாபஜாபதி கோ³தமீ ப⁴க³வதா த⁴ம்மியா கதா²ய ஸந்த³ஸ்ஸிதா ஸமாத³பிதா ஸமுத்தேஜிதா ஸம்பஹம்ஸிதா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, பி⁴க்கு²னீனம் உத³கஸுத்³தி⁴க’’ந்தி. தேன கோ² பன ஸமயேன அஞ்ஞதரா பி⁴க்கு²னீ – ‘‘ப⁴க³வதா உத³கஸுத்³தி⁴கா அனுஞ்ஞாதா’’தி அதிக³ம்பீ⁴ரம் உத³கஸுத்³தி⁴கம் ஆதி³யந்தீ முத்தகரணே வணம் அகாஸி. அத² கோ² ஸா பி⁴க்கு²னீ பி⁴க்கு²னீனம் ஏதமத்த²ம் ஆரோசேதி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – கத²ஞ்ஹி நாம பி⁴க்கு²னீ அதிக³ம்பீ⁴ரம் உத³கஸுத்³தி⁴கம் ஆதி³யிஸ்ஸதீதி…பே… ஸச்சம் கிர, பி⁴க்க²வே, பி⁴க்கு²னீ அதிக³ம்பீ⁴ரம் உத³கஸுத்³தி⁴கம் ஆதி³யதீ’’தி [ஆதி³யீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னீ அதிக³ம்பீ⁴ரம் உத³கஸுத்³தி⁴கம் ஆதி³யிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

811. ‘‘உத³கஸுத்³தி⁴கம் பன பி⁴க்கு²னியா ஆதி³யமானாய த்³வங்கு³லபப்³ப³பரமம் ஆதா³தப்³ப³ம். தம் அதிக்காமேந்தியா பாசித்திய’’ந்தி.

812. உத³கஸுத்³தி⁴கம் நாம முத்தகரணஸ்ஸ தோ⁴வனா வுச்சதி.

ஆதி³யமானாயாதி தோ⁴வந்தியா.

த்³வங்கு³லபப்³ப³பரமம் ஆதா³தப்³ப³ந்தி த்³வீஸு அங்கு³லேஸு த்³வே பப்³ப³பரமா ஆதா³தப்³பா³.

தம் அதிக்காமேந்தியாதி ஸம்ப²ஸ்ஸம் ஸாதி³யந்தீ அந்தமஸோ கேஸக்³க³மத்தம்பி அதிக்காமேதி, ஆபத்தி பாசித்தியஸ்ஸ.

813. அதிரேகத்³வங்கு³லபப்³பே³ அதிரேகஸஞ்ஞா ஆதி³யதி, ஆபத்தி பாசித்தியஸ்ஸ. அதிரேகத்³வங்கு³லபப்³பே³ வேமதிகா ஆதி³யதி, ஆபத்தி பாசித்தியஸ்ஸ. அதிரேகத்³வங்கு³லபப்³பே³ ஊனகஸஞ்ஞா ஆதி³யதி, ஆபத்தி பாசித்தியஸ்ஸ.

ஊனகத்³வங்கு³லபப்³பே³ அதிரேகஸஞ்ஞா, ஆபத்தி து³க்கடஸ்ஸ. ஊனகத்³வங்கு³லபப்³பே³ வேமதிகா, ஆபத்தி து³க்கடஸ்ஸ. ஊனகத்³வங்கு³லபப்³பே³ ஊனகஸஞ்ஞா, அனாபத்தி.

814. அனாபத்தி த்³வங்கு³லபப்³ப³பரமம் ஆதி³யதி, ஊனகத்³வங்கு³லபப்³ப³பரமம் ஆதி³யதி, ஆபா³த⁴பச்சயா, உம்மத்திகாய, ஆதி³கம்மிகாயாதி.

பஞ்சமஸிக்கா²பத³ம் நிட்டி²தம்.

6. ச²ட்ட²ஸிக்கா²பத³ம்

815. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆரோஹந்தோ நாம மஹாமத்தோ பி⁴க்கூ²ஸு பப்³ப³ஜிதோ ஹோதி. தஸ்ஸ புராணது³தியிகா பி⁴க்கு²னீஸு பப்³ப³ஜிதா ஹோதி. தேன கோ² பன ஸமயேன ஸோ பி⁴க்கு² தஸ்ஸா பி⁴க்கு²னியா ஸந்திகே ப⁴த்தவிஸ்ஸக்³க³ம் கரோதி. அத² கோ² ஸா பி⁴க்கு²னீ தஸ்ஸ பி⁴க்கு²னோ பு⁴ஞ்ஜந்தஸ்ஸ பானீயேன ச விதூ⁴பனேன ச உபதிட்டி²த்வா அச்சாவத³தி. அத² கோ² ஸோ பி⁴க்கு² தம் பி⁴க்கு²னிம் அபஸாதே³தி – ‘‘மா, ப⁴கி³னி, ஏவரூபம் அகாஸி. நேதம் கப்பதீ’’தி. ‘‘புப்³பே³ மம் த்வம் ஏவஞ்ச ஏவஞ்ச கரோஸி, இதா³னி ஏத்தகம் ந ஸஹஸீ’’தி – பானீயதா²லகம் மத்த²கே ஆஸும்பி⁴த்வா விதூ⁴பனேன பஹாரம் அதா³ஸி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னீ பி⁴க்கு²ஸ்ஸ பஹாரம் த³ஸ்ஸதீ’’தி…பே… ஸச்சம் கிர, பி⁴க்க²வே, பி⁴க்கு²னீ பி⁴க்கு²ஸ்ஸ பஹாரம் அதா³ஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னீ பி⁴க்கு²ஸ்ஸ பஹாரம் த³ஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

816. ‘‘யா பன பி⁴க்கு²னீ பி⁴க்கு²ஸ்ஸ பு⁴ஞ்ஜந்தஸ்ஸ பானீயேன வா விதூ⁴பனேன வா உபதிட்டே²ய்ய, பாசித்திய’’ந்தி.

817. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

பி⁴க்கு²ஸ்ஸாதி உபஸம்பன்னஸ்ஸ.

பு⁴ஞ்ஜந்தஸ்ஸாதி பஞ்சன்னம் போ⁴ஜனானம் அஞ்ஞதரம் போ⁴ஜனம் பு⁴ஞ்ஜந்தஸ்ஸ.

பானீயம் நாம யம் கிஞ்சி பானீயம்.

விதூ⁴பனம் நாம யா காசி பீ³ஜனீ.

உபதிட்டே²ய்யாதி ஹத்த²பாஸே திட்ட²தி, ஆபத்தி பாசித்தியஸ்ஸ.

818. உபஸம்பன்னே உபஸம்பன்னஸஞ்ஞா பானீயேன வா விதூ⁴பனேன வா உபதிட்ட²தி, ஆபத்தி பாசித்தியஸ்ஸ. உபஸம்பன்னே வேமதிகா பானீயேன வா விதூ⁴பனேன வா உபதிட்ட²தி, ஆபத்தி பாசித்தியஸ்ஸ. உபஸம்பன்னே அனுபஸம்பன்னஸஞ்ஞா பானீயேன வா விதூ⁴பனேன வா உபதிட்ட²தி, ஆபத்தி பாசித்தியஸ்ஸ.

ஹத்த²பாஸம் விஜஹித்வா உபதிட்ட²தி, ஆபத்தி து³க்கடஸ்ஸ. கா²த³னீயம் கா²த³ந்தஸ்ஸ உபதிட்ட²தி, ஆபத்தி து³க்கடஸ்ஸ. அனுபஸம்பன்னஸ்ஸ உபதிட்ட²தி, ஆபத்தி து³க்கடஸ்ஸ. அனுபஸம்பன்னே உபஸம்பன்னஸஞ்ஞா, ஆபத்தி து³க்கடஸ்ஸ. அனுபஸம்பன்னே வேமதிகா, ஆபத்தி து³க்கடஸ்ஸ. அனுபஸம்பன்னே அனுபஸம்பன்னஸஞ்ஞா, ஆபத்தி து³க்கடஸ்ஸ.

819. அனாபத்தி தே³தி, தா³பேதி, அனுபஸம்பன்னம் ஆணாபேதி, உம்மத்திகாய, ஆதி³கம்மிகாயாதி.

ச²ட்ட²ஸிக்கா²பத³ம் நிட்டி²தம்.

7. ஸத்தமஸிக்கா²பத³ம்

820. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ ஸஸ்ஸகாலே ஆமகத⁴ஞ்ஞம் விஞ்ஞாபேத்வா நக³ரம் அதிஹரந்தி த்³வாரட்டா²னே – ‘‘தே³தா²ய்யே, பா⁴க³’’ந்தி. பலிபு³ந்தே⁴த்வா முஞ்சிம்ஸு. அத² கோ² தா பி⁴க்கு²னியோ உபஸ்ஸயம் க³ந்த்வா பி⁴க்கு²னீனம் ஏதமத்த²ம் ஆரோசேஸும். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ ஆமகத⁴ஞ்ஞம் விஞ்ஞாபேஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ ஆமகத⁴ஞ்ஞம் விஞ்ஞாபேந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ ஆமகத⁴ஞ்ஞம் விஞ்ஞாபேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

821. ‘‘யா பன பி⁴க்கு²னீ ஆமகத⁴ஞ்ஞம் விஞ்ஞத்வா வா விஞ்ஞாபேத்வா வா ப⁴ஜ்ஜித்வா வா ப⁴ஜ்ஜாபேத்வா வா கோட்டேத்வா வா கோட்டாபேத்வா வா பசித்வா வா பசாபேத்வா வா பு⁴ஞ்ஜேய்ய, பாசித்திய’’ந்தி.

822. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஆமகத⁴ஞ்ஞம் நாம ஸாலி வீஹி யவோ கோ³து⁴மோ கங்கு³ வரகோ குத்³ருஸகோ.

விஞ்ஞத்வாதி ஸயம் விஞ்ஞத்வா. விஞ்ஞாபேத்வாதி அஞ்ஞம் விஞ்ஞாபேத்வா.

ப⁴ஜ்ஜித்வாதி ஸயம் ப⁴ஜ்ஜித்வா. ப⁴ஜ்ஜாபேத்வாதி அஞ்ஞம் ப⁴ஜ்ஜாபேத்வா.

கோட்டேத்வாதி ஸயம் கோட்டேத்வா. கோட்டாபேத்வாதி அஞ்ஞம் கோட்டாபேத்வா.

பசித்வாதி ஸயம் பசித்வா. பசாபேத்வாதி அஞ்ஞம் பசாபேத்வா.

‘‘பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி பாசித்தியஸ்ஸ.

823. அனாபத்தி ஆபா³த⁴பச்சயா, அபரண்ணம் விஞ்ஞாபேதி, உம்மத்திகாய, ஆதி³கம்மிகாயாதி.

ஸத்தமஸிக்கா²பத³ம் நிட்டி²தம்.

8. அட்ட²மஸிக்கா²பத³ம்

824. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ ப்³ராஹ்மணோ நிப்³பி³ட்ட²ராஜப⁴டோ ‘‘தஞ்ஞேவ ப⁴டபத²ம் யாசிஸ்ஸாமீ’’தி ஸீஸம் நஹாயித்வா பி⁴க்கு²னுபஸ்ஸயம் நிஸ்ஸாய ராஜகுலம் க³ச்ச²தி. அஞ்ஞதரா பி⁴க்கு²னீ கடாஹே வச்சம் கத்வா திரோகுட்டே ச²ட்³டே³ந்தீ தஸ்ஸ ப்³ராஹ்மணஸ்ஸ மத்த²கே ஆஸும்பி⁴. அத² கோ² ஸோ ப்³ராஹ்மணோ உஜ்ஜா²யதி கி²ய்யதி விபாசேதி – ‘‘அஸ்ஸமணியோ இமா முண்டா³ ப³ந்த⁴கினியோ. கத²ஞ்ஹி நாம கூ³த²கடாஹம் மத்த²கே ஆஸும்பி⁴ஸ்ஸந்தி! இமாஸம் உபஸ்ஸயம் ஜா²பேஸ்ஸாமீ’’தி! உம்முகம் க³ஹேத்வா உபஸ்ஸயம் பவிஸதி. அஞ்ஞதரோ உபாஸகோ உபஸ்ஸயா நிக்க²மந்தோ அத்³த³ஸ தம் ப்³ராஹ்மணம் உம்முகம் க³ஹேத்வா உபஸ்ஸயம் பவிஸந்தம். தி³ஸ்வான தம் ப்³ராஹ்மணம் ஏதத³வோச – ‘‘கிஸ்ஸ த்வம், போ⁴, உம்முகம் க³ஹேத்வா உபஸ்ஸயம் பவிஸஸீ’’தி? ‘‘இமா மம், போ⁴, முண்டா³ ப³ந்த⁴கினியோ கூ³த²கடாஹம் மத்த²கே ஆஸும்பி⁴ம்ஸு. இமாஸம் உபஸ்ஸயம் ஜா²பேஸ்ஸாமீ’’தி. ‘‘க³ச்ச², போ⁴ ப்³ராஹ்மண, மங்க³லம் ஏதம். ஸஹஸ்ஸம் லச்ச²ஸி தஞ்ச ப⁴டபத²’’ந்தி. அத² கோ² ஸோ ப்³ராஹ்மணோ ஸீஸம் நஹாயித்வா ராஜகுலம் க³ந்த்வா ஸஹஸ்ஸம் அலத்த² தஞ்ச ப⁴டபத²ம். அத² கோ² ஸோ உபாஸகோ உபஸ்ஸயம் பவிஸித்வா பி⁴க்கு²னீனம் ஏதமத்த²ம் ஆரோசேத்வா பரிபா⁴ஸி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ உச்சாரம் திரோகுட்டே ச²ட்³டே³ஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ உச்சாரம் திரோகுட்டே ச²ட்³டே³ந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ உச்சாரம் திரோகுட்டே ச²ட்³டே³ஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

825. ‘‘யா பன பி⁴க்கு²னீ உச்சாரம் வா பஸ்ஸாவம் வா ஸங்காரம் வா விகா⁴ஸம் வா திரோகுட்டே வா திரோபாகாரே வா ச²ட்³டே³ய்ய வா ச²ட்³டா³பேய்ய வா, பாசித்திய’’ந்தி.

826. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

உச்சாரோ நாம கூ³தோ² வுச்சதி. பஸ்ஸாவோ நாம முத்தம் வுச்சதி.

ஸங்காரம் நாம கசவரம் வுச்சதி.

விகா⁴ஸம் நாம சலகானி வா அட்டி²கானி வா உச்சி²ட்டோ²த³கம் வா.

குட்டோ நாம தயோ குட்டா – இட்ட²காகுட்டோ, ஸிலாகுட்டோ, தா³ருகுட்டோ.

பாகாரோ நாம தயோ பாகாரா – இட்ட²காபாகாரோ, ஸிலாபாகாரோ, தா³ருபாகாரோ.

திரோகுட்டேதி குட்டஸ்ஸ பரதோ. திரோபாகாரேதி பாகாரஸ்ஸ பரதோ.

ச²ட்³டே³ய்யாதி ஸயம் ச²ட்³டே³தி, ஆபத்தி பாசித்தியஸ்ஸ.

ச²ட்³டா³பேய்யாதி அஞ்ஞம் ஆணாபேதி, ஆபத்தி து³க்கடஸ்ஸ. ஸகிம் ஆணத்தா ப³ஹுகம்பி ச²ட்³டே³தி, ஆபத்தி பாசித்தியஸ்ஸ.

827. அனாபத்தி ஓலோகேத்வா ச²ட்³டே³தி, அவளஞ்ஜே ச²ட்³டே³தி, உம்மத்திகாய, ஆதி³கம்மிகாயாதி.

அட்ட²மஸிக்கா²பத³ம் நிட்டி²தம்.

9. நவமஸிக்கா²பத³ம்

828. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரஸ்ஸ ப்³ராஹ்மணஸ்ஸ பி⁴க்கு²னூபஸ்ஸயம் நிஸ்ஸாய யவகே²த்தம் ஹோதி. பி⁴க்கு²னியோ உச்சாரம்பி பஸ்ஸாவம்பி ஸங்காரம்பி விகா⁴ஸம்பி கே²த்தே ச²ட்³டே³ந்தி. அத² கோ² ஸோ ப்³ராஹ்மணோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம பி⁴க்கு²னியோ அம்ஹாகம் யவகே²த்தம் தூ³ஸேஸ்ஸந்தீ’’தி! அஸ்ஸோஸும் கோ² பி⁴க்கு²னியோ தஸ்ஸ ப்³ராஹ்மணஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ உச்சாரம்பி பஸ்ஸாவம்பி ஸங்காரம்பி விகா⁴ஸம்பி ஹரிதே ச²ட்³டே³ஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ உச்சாரம்பி பஸ்ஸாவம்பி ஸங்காரம்பி விகா⁴ஸம்பி ஹரிதே ச²ட்³டே³ந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ உச்சாரம்பி பஸ்ஸாவம்பி ஸங்காரம்பி விகா⁴ஸம்பி ஹரிதே ச²ட்³டே³ஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

829. ‘‘யா பன பி⁴க்கு²னீ உச்சாரம் வா பஸ்ஸாவம் வா ஸங்காரம் வா விகா⁴ஸம் வா ஹரிதே ச²ட்³டே³ய்ய வா ச²ட்³டா³பேய்ய வா, பாசித்திய’’ந்தி.

830. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

உச்சாரோ நாம கூ³தோ² வுச்சதி. பஸ்ஸாவோ நாம முத்தம் வுச்சதி.

ஸங்காரம் நாம கசவரம் வுச்சதி.

விகா⁴ஸம் நாம சலகானி வா அட்டி²கானி வா உச்சி²ட்டோ²த³கம் வா.

ஹரிதம் நாம புப்³ப³ண்ணம் அபரண்ணம் யம் மனுஸ்ஸானம் உபபோ⁴க³பரிபோ⁴க³ம் ரோபிமம்.

ச²ட்³டே³ய்யாதி ஸயம் ச²ட்³டே³தி, ஆபத்தி பாசித்தியஸ்ஸ.

831. ஹரிதே ஹரிதஸஞ்ஞா ச²ட்³டே³தி வா ச²ட்³டா³பேதி வா, ஆபத்தி பாசித்தியஸ்ஸ. ஹரிதே வேமதிகா ச²ட்³டே³தி வா ச²ட்³டா³பேதி வா, ஆபத்தி பாசித்தியஸ்ஸ. ஹரிதே அஹரிதஸஞ்ஞா ச²ட்³டே³தி வா ச²ட்³டா³பேதி வா, ஆபத்தி பாசித்தியஸ்ஸ.

அஹரிதே ஹரிதஸஞ்ஞா, ஆபத்தி து³க்கடஸ்ஸ. அஹரிதே வேமதிகா, ஆபத்தி து³க்கடஸ்ஸ. அஹரிதே அஹரிதஸஞ்ஞா, அனாபத்தி.

832. அனாபத்தி ஓலோகேத்வா ச²ட்³டே³தி, கே²த்தமரியாதே³ [ச²ட்³டி³தகே²த்தே (?) அட்ட²கதா² ஓலோகேதப்³பா³] ச²ட்³டே³தி ஸாமிகே ஆபுச்சி²த்வா அபலோகேத்வா ச²ட்³டே³தி, உம்மத்திகாய, ஆதி³கம்மிகாயாதி.

நவமஸிக்கா²பத³ம் நிட்டி²தம்.

10. த³ஸமஸிக்கா²பத³ம்

833. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ராஜக³ஹே கி³ரக்³க³ஸமஜ்ஜோ ஹோதி. ச²ப்³ப³க்³கி³யா பி⁴க்கு²னியோ கி³ரக்³க³ஸமஜ்ஜம் த³ஸ்ஸனாய அக³மம்ஸு. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ நச்சம்பி கீ³தம்பி வாதி³தம்பி த³ஸ்ஸனாய க³ச்சி²ஸ்ஸந்தி, ஸேய்யதா²பி கி³ஹினியோ காமபோ⁴கி³னியோ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ நச்சம்பி கீ³தம்பி வாதி³தம்பி த³ஸ்ஸனாய க³ச்சி²ஸ்ஸந்தீ’’தி…பே… ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கு²னியோ நச்சம்பி கீ³தம்பி வாதி³தம்பி த³ஸ்ஸனாய க³ச்ச²ந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ நச்சம்பி கீ³தம்பி வாதி³தம்பி த³ஸ்ஸனாய க³ச்சி²ஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

834. ‘‘யா பன பி⁴க்கு²னீ நச்சம் வா கீ³தம் வா வாதி³தம் வா த³ஸ்ஸனாய க³ச்சே²ய்ய, பாசித்திய’’ந்தி.

835. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

நச்சம் நாம யம் கிஞ்சி நச்சம். கீ³தம் நாம யம் கிஞ்சி கீ³தம். வாதி³தம் நாம யம் கிஞ்சி வாதி³தம்.

836. த³ஸ்ஸனாய க³ச்ச²தி, ஆபத்தி து³க்கடஸ்ஸ. யத்த² டி²தா பஸ்ஸதி வா ஸுணாதி வா, ஆபத்தி பாசித்தியஸ்ஸ. த³ஸ்ஸனூபசாரம் விஜஹித்வா புனப்புனம் பஸ்ஸதி வா ஸுணாதி வா, ஆபத்தி பாசித்தியஸ்ஸ. ஏகமேகம் த³ஸ்ஸனாய க³ச்ச²தி, ஆபத்தி து³க்கடஸ்ஸ. யத்த² டி²தா பஸ்ஸதி வா ஸுணாதி வா, ஆபத்தி பாசித்தியஸ்ஸ. த³ஸ்ஸனூபசாரம் விஜஹித்வா புனப்புனம் பஸ்ஸதி வா ஸுணாதி வா, ஆபத்தி பாசித்தியஸ்ஸ.

837. அனாபத்தி ஆராமே டி²தா பஸ்ஸதி வா ஸுணாதி வா, பி⁴க்கு²னியா டி²தோகாஸம் வா நிஸின்னோகாஸம் வா நிபன்னோகாஸம் வா ஆக³ந்த்வா நச்சந்தி வா கா³யந்தி வா வாதே³ந்தி வா, படிபத²ம் க³ச்ச²ந்தீ பஸ்ஸதி வா ஸுணாதி வா, ஸதி கரணீயே க³ந்த்வா பஸ்ஸதி வா ஸுணாதி வா, ஆபதா³ஸு, உம்மத்திகாய, ஆதி³கம்மிகாயாதி.

த³ஸமஸிக்கா²பத³ம் நிட்டி²தம்.

லஸுணவக்³கோ³ பட²மோ.

2. அந்த⁴காரவக்³கோ³

1. பட²மஸிக்கா²பத³ம்

838. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ப⁴த்³தா³ய காபிலானியா அந்தேவாஸினியா பி⁴க்கு²னியா ஞாதகோ புரிஸோ கா³மகா ஸாவத்தி²ம் அக³மாஸி கேனசிதே³வ கரணீயேன. அத² கோ² ஸா பி⁴க்கு²னீ தேன புரிஸேன ஸத்³தி⁴ம் ரத்தந்த⁴காரே அப்பதீ³பே ஏகேனேகா ஸந்திட்ட²திபி ஸல்லபதிபி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னீ ரத்தந்த⁴காரே அப்பதீ³பே புரிஸேன ஸத்³தி⁴ம் ஏகேனேகா ஸந்திட்டி²ஸ்ஸதிபி ஸல்லபிஸ்ஸதிபீ’’தி…பே… ஸச்சம் கிர, பி⁴க்க²வே, பி⁴க்கு²னீ ரத்தந்த⁴காரே அப்பதீ³பே புரிஸேன ஸத்³தி⁴ம் ஏகேனேகா ஸந்திட்ட²திபி ஸல்லபதிபீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னீ ரத்தந்த⁴காரே அப்பதீ³பே புரிஸேன ஸத்³தி⁴ம் ஏகேனேகா ஸந்திட்டி²ஸ்ஸதிபி ஸல்லபிஸ்ஸதிபி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

839. ‘‘யா பன பி⁴க்கு²னீ ரத்தந்த⁴காரே அப்பதீ³பே புரிஸேன ஸத்³தி⁴ம் ஏகேனேகா ஸந்திட்டே²ய்ய வா ஸல்லபேய்ய வா, பாசித்திய’’ந்தி.

840. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ரத்தந்த⁴காரேதி ஓக்³க³தே ஸூரியே. அப்பதீ³பேதி அனாலோகே.

புரிஸோ நாம மனுஸ்ஸபுரிஸோ ந யக்கோ² ந பேதோ ந திரச்சா²னக³தோ விஞ்ஞூ படிப³லோ ஸந்திட்டி²தும் ஸல்லபிதும்.

ஸத்³தி⁴ந்தி ஏகதோ. ஏகேனேகாதி புரிஸோ சேவ ஹோதி பி⁴க்கு²னீ ச.

ஸந்திட்டே²ய்ய வாதி புரிஸஸ்ஸ ஹத்த²பாஸே திட்ட²தி, ஆபத்தி பாசித்தியஸ்ஸ.

ஸல்லபேய்ய வாதி புரிஸஸ்ஸ ஹத்த²பாஸே டி²தா ஸல்லபதி, ஆபத்தி பாசித்தியஸ்ஸ.

ஹத்த²பாஸம் விஜஹித்வா ஸந்திட்ட²தி வா ஸல்லபதி வா, ஆபத்தி து³க்கடஸ்ஸ. யக்கே²ன வா பேதேன வா பண்ட³கேன வா திரச்சா²னக³தமனுஸ்ஸவிக்³க³ஹேன வா ஸத்³தி⁴ம் ஸந்திட்ட²தி வா ஸல்லபதி வா, ஆபத்தி து³க்கடஸ்ஸ.

841. அனாபத்தி யோ கோசி விஞ்ஞூ து³தியோ [யா காசி விஞ்ஞூ து³தியா (ஸ்யா.)] ஹோதி, அரஹோபேக்கா², அஞ்ஞவிஹிதா ஸந்திட்ட²தி வா ஸல்லபதி வா, உம்மத்திகாய, ஆதி³கம்மிகாயாதி.

பட²மஸிக்கா²பத³ம் நிட்டி²தம்.

2. து³தியஸிக்கா²பத³ம்

842. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ப⁴த்³தா³ய காபிலானியா அந்தேவாஸினியா பி⁴க்கு²னியா ஞாதகோ புரிஸோ கா³மகா ஸாவத்தி²ம் அக³மாஸி கேனசிதே³வ கரணீயேன. அத² கோ² ஸா பி⁴க்கு²னீ – ‘‘ப⁴க³வதா படிக்கி²த்தம் ரத்தந்த⁴காரே அப்பதீ³பே புரிஸேன ஸத்³தி⁴ம் ஏகேனேகா ஸந்திட்டி²தும் ஸல்லபிது’’ந்தி தேனேவ புரிஸேன ஸத்³தி⁴ம் படிச்ச²ன்னே ஓகாஸே ஏகேனேகா ஸந்திட்ட²திபி ஸல்லபதிபி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னீ படிச்ச²ன்னே ஓகாஸே புரிஸேன ஸத்³தி⁴ம் ஏகேனேகா ஸந்திட்டி²ஸ்ஸதிபி ஸல்லபிஸ்ஸதிபீ’’தி…பே… ஸச்சம் கிர, பி⁴க்க²வே, பி⁴க்கு²னீ படிச்ச²ன்னே ஓகாஸே புரிஸேன ஸத்³தி⁴ம் ஏகேனேகா ஸந்திட்ட²திபி ஸல்லபதிபீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னீ படிச்ச²ன்னே ஓகாஸே புரிஸேன ஸத்³தி⁴ம் ஏகேனேகா ஸந்திட்டி²ஸ்ஸதிபி ஸல்லபிஸ்ஸதிபி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

843. ‘‘யா பன பி⁴க்கு²னீ படிச்ச²ன்னே ஓகாஸே புரிஸேன ஸத்³தி⁴ம் ஏகேனேகா ஸந்திட்டே²ய்ய வா ஸல்லபேய்ய வா, பாசித்திய’’ந்தி.

844. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

படிச்ச²ன்னோ நாம ஓகாஸோ குட்டேன வா கவாடேன வா கிலஞ்ஜேன வா ஸாணிபாகாரேன வா ருக்கே²ன வா த²ம்பே⁴ன வா கோத்த²ளியா வா யேன கேனசி படிச்ச²ன்னோ ஹோதி.

ஸத்³தி⁴ந்தி ஏகதோ. ஏகேனேகாதி புரிஸோ சேவ ஹோதி பி⁴க்கு²னீ ச.

ஸந்திட்டே²ய்ய வாதி புரிஸஸ்ஸ ஹத்த²பாஸே திட்ட²தி, ஆபத்தி பாசித்தியஸ்ஸ.

ஸல்லபேய்ய வாதி புரிஸஸ்ஸ ஹத்த²பாஸே டி²தா ஸல்லபதி, ஆபத்தி பாசித்தியஸ்ஸ.

845. அனாபத்தி யோ கோசி விஞ்ஞூ து³தியோ ஹோதி, அரஹோபேக்கா², அஞ்ஞவிஹிதா ஸந்திட்ட²தி வா ஸல்லபதி வா, உம்மத்திகாய, ஆதி³கம்மிகாயாதி.

து³தியஸிக்கா²பத³ம் நிட்டி²தம்.

3. ததியஸிக்கா²பத³ம்

846. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ப⁴த்³தா³ய காபிலானியா அந்தேவாஸினியா பி⁴க்கு²னியா ஞாதகோ புரிஸோ கா³மகா ஸாவத்தி²ம் அக³மாஸி கேனசிதே³வ கரணீயேன. அத² கோ² ஸா பி⁴க்கு²னீ – ‘‘ப⁴க³வதா படிக்கி²த்தம் படிச்ச²ன்னே ஓகாஸே புரிஸேன ஸத்³தி⁴ம் ஏகேனேகா ஸந்திட்டி²தும் ஸல்லபிது’’ந்தி தேனேவ புரிஸேன ஸத்³தி⁴ம் அஜ்ஜோ²காஸே ஏகேனேகா ஸந்திட்ட²திபி ஸல்லபதிபி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னீ அஜ்ஜோ²காஸே புரிஸேன ஸத்³தி⁴ம் ஏகேனேகா ஸந்திட்டி²ஸ்ஸதிபி ஸல்லபிஸ்ஸதிபீ’’தி…பே… ஸச்சம் கிர, பி⁴க்க²வே, பி⁴க்கு²னீ அஜ்ஜோ²காஸே புரிஸேன ஸத்³தி⁴ம் ஏகேனேகா ஸந்திட்ட²திபி ஸல்லபதிபீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னீ அஜ்ஜோ²காஸே புரிஸேன ஸத்³தி⁴ம் ஏகேனேகா ஸந்திட்டி²ஸ்ஸதிபி ஸல்லபிஸ்ஸதிபி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

847. ‘‘யா பன பி⁴க்கு²னீ அஜ்ஜோ²காஸே புரிஸேன ஸத்³தி⁴ம் ஏகேனேகா ஸந்திட்டே²ய்ய வா ஸல்லபேய்ய வா, பாசித்திய’’ந்தி.

848. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அஜ்ஜோ²காஸோ நாம அப்படிச்ச²ன்னோ ஹோதி குட்டேன வா கவாடேன வா கிலஞ்ஜேன வா ஸாணிபாகாரேன வா ருக்கே²ன வா த²ம்பே⁴ன வா கோத்த²ளியா வா, யேன கேனசி அப்படிச்ச²ன்னோ ஹோதி.

புரிஸோ நாம மனுஸ்ஸபுரிஸோ, ந யக்கோ² ந பேதோ ந திரச்சா²னக³தோ, விஞ்ஞூ படிப³லோ ஸந்திட்டி²தும் ஸல்லபிதும்.

ஸத்³தி⁴ந்தி ஏகதோ. ஏகேனேகாதி புரிஸோ சேவ ஹோதி பி⁴க்கு²னீ ச.

ஸந்திட்டே²ய்ய வாதி புரிஸஸ்ஸ ஹத்த²பாஸே திட்ட²தி, ஆபத்தி பாசித்தியஸ்ஸ.

ஸல்லபேய்ய வாதி புரிஸஸ்ஸ ஹத்த²பாஸே டி²தா ஸல்லபதி, ஆபத்தி பாசித்தியஸ்ஸ.

ஹத்த²பாஸம் விஜஹித்வா ஸந்திட்ட²தி வா ஸல்லபதி வா, ஆபத்தி து³க்கடஸ்ஸ. யக்கே²ன வா பேதேன வா பண்ட³கேன வா திரச்சா²க³தமனுஸ்ஸவிக்³க³ஹேன வா ஸத்³தி⁴ம் ஸந்திட்ட²தி வா ஸல்லபதி வா, ஆபத்தி து³க்கடஸ்ஸ.

849. அனாபத்தி யோ கோசி விஞ்ஞூ து³தியோ ஹோதி, அரஹோபேக்கா², அஞ்ஞவிஹிதா ஸந்திட்ட²தி வா ஸல்லபதி வா, உம்மத்திகாய, ஆதி³கம்மிகாயாதி.

ததியஸிக்கா²பத³ம் நிட்டி²தம்.