10. த³ஸமஸிக்கா²பத³ம்

1162. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ மாதாபிதூஹிபி ஸாமிகேனபி அனனுஞ்ஞாதம் ஸிக்க²மானம் வுட்டா²பேதி. மாதாபிதரோபி ஸாமிகோபி உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ அம்ஹேஹி அனனுஞ்ஞாதம் ஸிக்க²மானம் வுட்டா²பேஸ்ஸதீ’’தி! அஸ்ஸோஸும் கோ² பி⁴க்கு²னியோ மாதாபிதூனம்பி ஸாமிகஸ்ஸபி உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ மாதாபிதூஹிபி ஸாமிகேனபி அனனுஞ்ஞாதம் ஸிக்க²மானம் வுட்டா²பேஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ, மாதாபிதூஹிபி ஸாமிகேனபி அனனுஞ்ஞாதம் ஸிக்க²மானம் வுட்டா²பேதீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ மாதாபிதூஹிபி ஸாமிகேனபி அனனுஞ்ஞாதம் ஸிக்க²மானம் வுட்டா²பேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1163. ‘‘யா பன பி⁴க்கு²னீ மாதாபிதூஹி வா ஸாமிகேன வா அனனுஞ்ஞாதம் ஸிக்க²மானம் வுட்டா²பேய்ய, பாசித்திய’’ந்தி.

1164. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

மாதாபிதரோ நாம ஜனகா வுச்சந்தி. ஸாமிகோ நாம யேன பரிக்³க³ஹிதா ஹோதி. அனனுஞ்ஞாதாதி அனாபுச்சா². ஸிக்க²மானா நாம த்³வே வஸ்ஸானி ச²ஸு த⁴ம்மேஸு ஸிக்கி²தஸிக்கா². வுட்டா²பேய்யாதி உபஸம்பாதே³ய்ய.

வுட்டா²பேஸ்ஸாமீதி க³ணம் வா ஆசரினிம் வா பத்தம் வா சீவரம் வா பரியேஸதி, ஸீமம் வா ஸம்மன்னதி, ஆபத்தி து³க்கடஸ்ஸ. ஞத்தியா து³க்கடம். த்³வீஹி கம்மவாசாஹி து³க்கடா. கம்மவாசாபரியோஸானே உபஜ்ஜா²யாய ஆபத்தி பாசித்தியஸ்ஸ. க³ணஸ்ஸ ச ஆசரினியா ச ஆபத்தி து³க்கடஸ்ஸ.

1165. அனாபத்தி அஜானந்தீ வுட்டா²பேதி, அபலோகேத்வா வுட்டா²பேதி, உம்மத்திகாய, ஆதி³கம்மிகாயாதி.

த³ஸமஸிக்கா²பத³ம் நிட்டி²தம்.