6. ச²ட்ட²ஸிக்கா²பத³ம்

1146. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன சண்ட³காளீ பி⁴க்கு²னீ பி⁴க்கு²னிஸங்க⁴ம் உபஸங்கமித்வா வுட்டா²பனஸம்முதிம் யாசதி. அத² கோ² பி⁴க்கு²னிஸங்கோ⁴ சண்ட³காளிம் பி⁴க்கு²னிம் பரிச்சி²ந்தி³த்வா – ‘‘அலம் தாவ தே, அய்யே, வுட்டா²பிதேனா’’தி, வுட்டா²பனஸம்முதிம் ந அதா³ஸி. சண்ட³காளீ பி⁴க்கு²னீ ‘ஸாதூ⁴’தி படிஸ்ஸுணி. தேன கோ² பன ஸமயேன பி⁴க்கு²னிஸங்கோ⁴ அஞ்ஞாஸம் பி⁴க்கு²னீனம் வுட்டா²பனஸம்முதிம் தே³தி. சண்ட³காளீ பி⁴க்கு²னீ உஜ்ஜா²யதி கி²ய்யதி விபாசேதி – ‘‘அஹமேவ நூன பா³லா, அஹமேவ நூன அலஜ்ஜினீ; யம் ஸங்கோ⁴ அஞ்ஞாஸம் பி⁴க்கு²னீனம் வுட்டா²பனஸம்முதிம் தே³தி, மய்ஹமேவ ந தே³தீ’’தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா சண்ட³காளீ – ‘அலம் தாவ தே, அய்யே, வுட்டா²பிதேனா’தி வுச்சமானா ‘ஸாதூ⁴’தி படிஸ்ஸுணித்வா பச்சா² கீ²யனத⁴ம்மம் ஆபஜ்ஜிஸ்ஸதீ’’தி…பே… ஸச்சம் கிர, பி⁴க்க²வே, ‘சண்ட³காளீ பி⁴க்கு²னீ அலம் தாவ தே அய்யே வுட்டா²பிதேனா’தி வுச்சமானா ‘‘ஸாதூ⁴’’தி படிஸ்ஸுணித்வா பச்சா² கீ²யனத⁴ம்மம் ஆபஜ்ஜதீதி [ஆபஜ்ஜீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, சண்ட³காளீ பி⁴க்கு²னீ – ‘‘அலம் தாவ தே, அய்யே, வுட்டா²பிதேனா’’தி வுச்சமானா ‘ஸாதூ⁴’தி படிஸ்ஸுணித்வா பச்சா² கீ²யனத⁴ம்மம் ஆபஜ்ஜிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1147. ‘‘யா பன பி⁴க்கு²னீ – ‘அலம் தாவ தே, அய்யே, வுட்டா²பிதேனா’தி வுச்சமானா ‘ஸாதூ⁴’தி படிஸ்ஸுணித்வா பச்சா² கீ²யனத⁴ம்மம் ஆபஜ்ஜேய்ய, பாசித்திய’’ந்தி.

1148. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அலம் தாவ தே அய்யே வுட்டா²பிதேனாதி அலம் தாவ தே, அய்யே, உபஸம்பாதி³தேன. ‘ஸாதூ⁴’தி படிஸ்ஸுணித்வா பச்சா² கீ²யனத⁴ம்மம் ஆபஜ்ஜதி, ஆபத்தி பாசித்தியஸ்ஸ.

1149. அனாபத்தி பகதியா ச²ந்தா³ தோ³ஸா மோஹா ப⁴யா கரோந்தம் கி²ய்யதி, உம்மத்திகாய, ஆதி³கம்மிகாயாதி.

ச²ட்ட²ஸிக்கா²பத³ம் நிட்டி²தம்.