7. ஸத்தமஸிக்கா²பத³ம்

1150. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரா ஸிக்க²மானா து²ல்லனந்த³ம் பி⁴க்கு²னிம் உபஸங்கமித்வா உபஸம்பத³ம் யாசி. து²ல்லனந்தா³ பி⁴க்கு²னீ தம் ஸிக்க²மானம் – ‘‘ஸசே மே த்வம், அய்யே, சீவரம் த³ஸ்ஸஸி ஏவாஹம் தம் வுட்டா²பேஸ்ஸாமீ’’தி வத்வா, நேவ வுட்டா²பேதி ந வுட்டா²பனாய உஸ்ஸுக்கம் கரோதி. அத² கோ² ஸா ஸிக்க²மானா பி⁴க்கு²னீனம் ஏதமத்த²ம் ஆரோசேஸி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ ஸிக்க²மானம் – ‘ஸசே மே த்வம், அய்யே, சீவரம் த³ஸ்ஸஸி ஏவாஹம் தம் வுட்டா²பேஸ்ஸாமீ’தி வத்வா, நேவ வுட்டா²பேஸ்ஸதி ந வுட்டா²பனாய உஸ்ஸுக்கம் கரிஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ ஸிக்க²மானம் – ‘‘ஸசே மே த்வம், அய்யே, சீவரம் த³ஸ்ஸஸி ஏவாஹம் தம் வுட்டா²பேஸ்ஸாமீ’’தி வத்வா, நேவ வுட்டா²பேதி ந வுட்டா²பனாய உஸ்ஸுக்கம் கரோதீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ஸிக்க²மானம் – ‘‘ஸசே மே த்வம், அய்யே, சீவரம் த³ஸ்ஸஸி ஏவாஹம் தம் வுட்டா²பேஸ்ஸாமீ’’தி வத்வா, நேவ வுட்டா²பேஸ்ஸதி ந வுட்டா²பனாய உஸ்ஸுக்கம் கரிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1151. ‘‘யா பன பி⁴க்கு²னீ ஸிக்க²மானம் – ‘ஸசே மே த்வம், அய்யே, சீவரம் த³ஸ்ஸஸி, ஏவாஹம் தம் வுட்டா²பேஸ்ஸாமீ’தி வத்வா, ஸா பச்சா² அனந்தராயிகினீ நேவ வுட்டா²பேய்ய ந வுட்டா²பனாய உஸ்ஸுக்கம் கரேய்ய, பாசித்திய’’ந்தி.

1152. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஸிக்க²மானா நாம த்³வே வஸ்ஸானி ச²ஸு த⁴ம்மேஸு ஸிக்கி²தஸிக்கா².

ஸசே மே த்வம் அய்யே சீவரம் த³ஸ்ஸஸி ஏவாஹம் தம் வுட்டா²பேஸ்ஸாமீதி ஏவாஹம் தம் உபஸம்பாதே³ஸ்ஸாமி.

ஸா பச்சா² அனந்தராயிகினீதி அஸதி அந்தராயே.

நேவ வுட்டா²பேய்யாதி ந ஸயம் வுட்டா²பேய்ய.

ந வுட்டா²பனாய உஸ்ஸுக்கம் கரேய்யாதி ந அஞ்ஞம் ஆணாபேய்ய. ‘‘நேவ வுட்டா²பேஸ்ஸாமி ந வுட்டா²பனாய உஸ்ஸுக்கம் கரிஸ்ஸாமீ’’தி து⁴ரம் நிக்கி²த்தமத்தே ஆபத்தி பாசித்தியஸ்ஸ.

1153. அனாபத்தி ஸதி அந்தராயே, பரியேஸித்வா ந லப⁴தி, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.

ஸத்தமஸிக்கா²பத³ம் நிட்டி²தம்.