13. தேரஸமஸிக்கா²பத³ம்

1174. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ ஏகம் வஸ்ஸம் த்³வே வுட்டா²பேந்தி. உபஸ்ஸயோ ததே²வ ந ஸம்மதி. மனுஸ்ஸா [மனுஸ்ஸா விஹாரசாரிகம் ஆஹிண்ட³ந்தா பஸ்ஸித்வா (ஸீ.)] ததே²வ உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ ஏகம் வஸ்ஸம் த்³வே வுட்டா²பேஸ்ஸந்தி! உபஸ்ஸயோ ததே²வ ந ஸம்மதீ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ ஏகம் வஸ்ஸம் த்³வே வுட்டா²பேஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ ஏகம் வஸ்ஸம் த்³வே வுட்டா²பேந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ ஏகம் வஸ்ஸம் த்³வே வுட்டா²பேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1175. ‘‘யா பன பி⁴க்கு²னீ ஏகம் வஸ்ஸம் த்³வே வுட்டா²பேய்ய, பாசித்திய’’ந்தி.

1176. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஏகம் வஸ்ஸந்தி ஏகம் ஸம்வச்ச²ரம். த்³வே வுட்டா²பேய்யாதி த்³வே உபஸம்பாதே³ய்ய.

‘‘த்³வே வுட்டா²பேஸ்ஸாமீ’’தி க³ணம் வா ஆசரினிம் வா பத்தம் வா சீவரம் வா பரியேஸதி, ஸீமம் வா ஸம்மன்னதி, ஆபத்தி து³க்கடஸ்ஸ. ஞத்தியா து³க்கடம். த்³வீஹி கம்மவாசாஹி து³க்கடா. கம்மவாசாபரியோஸானே உபஜ்ஜா²யாய ஆபத்தி பாசித்தியஸ்ஸ. க³ணஸ்ஸ ச ஆசரினியா ச ஆபத்தி து³க்கடஸ்ஸ.

1177. அனாபத்தி ஏகந்தரிகம் ஏகம் வுட்டா²பேதி, உம்மத்திகாய, ஆதி³கம்மிகாயாதி.

தேரஸமஸிக்கா²பத³ம் நிட்டி²தம்.

குமாரீபூ⁴தவக்³கோ³ அட்ட²மோ.