9. ச²த்துபாஹனவக்³கோ³

1. பட²மஸிக்கா²பத³ம்

1178. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ ச²த்துபாஹனம் தா⁴ரேந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ ச²த்துபாஹனம் தா⁴ரேஸ்ஸந்தி, ஸேய்யதா²பி கி³ஹினியோ காமபோ⁴கி³னியோ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ ச²த்துபாஹனம் தா⁴ரேஸ்ஸந்தீ’’தி…பே… ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கு²னியோ ச²த்துபாஹனம் தா⁴ரேந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ ச²த்துபாஹனம் தா⁴ரேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

‘‘யா பன பி⁴க்கு²னீ ச²த்துபாஹனம் தா⁴ரேய்ய, பாசித்திய’’ந்தி.

ஏவஞ்சித³ம் ப⁴க³வதா பி⁴க்கு²னீனம் ஸிக்கா²பத³ம் பஞ்ஞத்தம் ஹோதி.

1179. தேன கோ² பன ஸமயேன அஞ்ஞதரா பி⁴க்கு²னீ கி³லானா ஹோதி. தஸ்ஸா வினா ச²த்துபாஹனம் ந பா²ஸு ஹோதி…பே… ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, கி³லானாய பி⁴க்கு²னியா ச²த்துபாஹனம். ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1180. ‘‘யா பன பி⁴க்கு²னீ அகி³லானா ச²த்துபாஹனம் தா⁴ரேய்ய, பாசித்திய’’ந்தி.

1181. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அகி³லானா நாம யஸ்ஸா வினா ச²த்துபாஹனம் பா²ஸு ஹோதி.

கி³லானா நாம யஸ்ஸா வினா ச²த்துபாஹனம் ந பா²ஸு ஹோதி.

ச²த்தம் நாம தீணி ச²த்தானி – ஸேதச்ச²த்தம், கிலஞ்ஜச்ச²த்தம், பண்ணச்ச²த்தம் மண்ட³லப³த்³த⁴ம் ஸலாகப³த்³த⁴ம். தா⁴ரேய்யாதி ஸகிம்பி தா⁴ரேதி, ஆபத்தி பாசித்தியஸ்ஸ.

1182. அகி³லானா அகி³லானஸஞ்ஞா ச²த்துபாஹனம் தா⁴ரேதி, ஆபத்தி பாசித்தியஸ்ஸ. அகி³லானா வேமதிகா ச²த்துபாஹனம் தா⁴ரேதி, ஆபத்தி பாசித்தியஸ்ஸ. அகி³லானா கி³லானஸஞ்ஞா ச²த்துபாஹனம் தா⁴ரேதி, ஆபத்தி பாசித்தியஸ்ஸ.

ச²த்தம் தா⁴ரேதி ந உபாஹனம், ஆபத்தி து³க்கடஸ்ஸ. உபாஹனம் தா⁴ரேதி ந ச²த்தம், ஆபத்தி து³க்கடஸ்ஸ. கி³லானா அகி³லானஸஞ்ஞா, ஆபத்தி து³க்கடஸ்ஸ. கி³லானா வேமதிகா, ஆபத்தி து³க்கடஸ்ஸ. கி³லானா கி³லானஸஞ்ஞா, அனாபத்தி.

1183. அனாபத்தி கி³லானாய, ஆராமே ஆராமூபசாரே தா⁴ரேதி, ஆபதா³ஸு, உம்மத்திகாய, ஆதி³கம்மிகாயாதி.

பட²மஸிக்கா²பத³ம் நிட்டி²தம்.

2. து³தியஸிக்கா²பத³ம்

1184. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ யானேன யாயந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ யானேன யாயிஸ்ஸந்தி, ஸேய்யதா²பி கி³ஹினியோ காமபோ⁴கி³னியோ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே. … தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ யானேன யாயிஸ்ஸந்தீ’’தி…பே… ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கு²னியோ யானேன யாயந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ யானேன யாயிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

‘‘யா பன பி⁴க்கு²னீ யானேன யாயேய்ய, பாசித்திய’’ந்தி.

ஏவஞ்சித³ம் ப⁴க³வதா பி⁴க்கு²னீனம் ஸிக்கா²பத³ம் பஞ்ஞத்தம் ஹோதி.

1185. தேன கோ² பன ஸமயேன அஞ்ஞதரா பி⁴க்கு²னீ கி³லானா ஹோதி, ந ஸக்கோதி பத³ஸா க³ந்தும்…பே… ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, கி³லானாய பி⁴க்கு²னியா யானம். ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1186. ‘‘யா பன பி⁴க்கு²னீ அகி³லானா யானேன யாயேய்ய, பாசித்திய’’ந்தி.

1187. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அகி³லானா நாம ஸக்கோதி பத³ஸா க³ந்தும்.

கி³லானா நாம ந ஸக்கோதி பத³ஸா க³ந்தும்.

யானம் நாம வய்ஹம் ரதோ² ஸகடம் ஸந்த³மானிகா ஸிவிகா பாடங்கீ.

யாயேய்யாதி ஸகிம்பி யானேன யாயதி, ஆபத்தி பாசித்தியஸ்ஸ.

1188. அகி³லானா அகி³லானஸஞ்ஞா யானேன யாயதி, ஆபத்தி பாசித்தியஸ்ஸ. அகி³லானா வேமதிகா யானேன யாயதி, ஆபத்தி பாசித்தியஸ்ஸ. அகி³லானா கி³லானஸஞ்ஞா யானேன யாயதி, ஆபத்தி பாசித்தியஸ்ஸ.

கி³லானா அகி³லானஸஞ்ஞா, ஆபத்தி து³க்கடஸ்ஸ. கி³லானா வேமதிகா, ஆபத்தி து³க்கடஸ்ஸ. கி³லானா கி³லானஸஞ்ஞா, அனாபத்தி.

1189. அனாபத்தி கி³லானாய, ஆபதா³ஸு, உம்மத்திகாய, ஆதி³கம்மிகாயாதி.

து³தியஸிக்கா²பத³ம் நிட்டி²தம்.

3. ததியஸிக்கா²பத³ம்

1190. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரா பி⁴க்கு²னீ அஞ்ஞதரிஸ்ஸா இத்தி²யா குலூபிகா ஹோதி. அத² கோ² ஸா இத்தீ² தம் பி⁴க்கு²னிம் ஏதத³வோச – ‘‘ஹந்தா³ய்யே, இமம் ஸங்கா⁴ணிம் அமுகாய நாம இத்தி²யா தே³ஹீ’’தி. அத² கோ² ஸா பி⁴க்கு²னீ – ‘‘ஸசாஹம் பத்தேன ஆதா³ய க³ச்சா²மி விஸ்ஸரோ மே ப⁴விஸ்ஸதீ’’தி படிமுஞ்சித்வா அக³மாஸி. தஸ்ஸா ரதி²காய ஸுத்தகே சி²ன்னே விப்பகிரியிம்ஸு. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ ஸங்கா⁴ணிம் தா⁴ரேஸ்ஸந்தி, ஸேய்யதா²பி கி³ஹினியோ காமபோ⁴கி³னியோ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே. … தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னீ ஸங்கா⁴ணிம் தா⁴ரேஸ்ஸதீ’’தி…பே… ஸச்சம் கிர, பி⁴க்க²வே, பி⁴க்கு²னீ ஸங்கா⁴ணிம் தா⁴ரேதீ’’தி [தா⁴ரேஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னீ ஸங்கா⁴ணிம் தா⁴ரேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1191. ‘‘யா பன பி⁴க்கு²னீ ஸங்கா⁴ணிம் தா⁴ரேய்ய, பாசித்திய’’ந்தி.

1192. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஸங்கா⁴ணி நாம யா காசி கடூபகா³.

தா⁴ரேய்யாதி ஸகிம்பி தா⁴ரேதி, ஆபத்தி பாசித்தியஸ்ஸ.

1193. அனாபத்தி ஆபா³த⁴ப்பச்சயா, கடிஸுத்தகம் தா⁴ரேதி, உம்மத்திகாய, ஆதி³கம்மிகாயாதி.

ததியஸிக்கா²பத³ம் நிட்டி²தம்.

4. சதுத்த²ஸிக்கா²பத³ம்

1194. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ இத்தா²லங்காரம் தா⁴ரேந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ இத்தா²லங்காரம் தா⁴ரேஸ்ஸந்தி, ஸேய்யதா²பி கி³ஹினியோ காமபோ⁴கி³னியோ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ இத்தா²லங்காரம் தா⁴ரேஸ்ஸந்தீ’’தி …பே… ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கு²னியோ இத்தா²லங்காரம் தா⁴ரேந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ இத்தா²லங்காரம் தா⁴ரேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1195. ‘‘யா பன பி⁴க்கு²னீ இத்தா²லங்காரம் தா⁴ரேய்ய, பாசித்திய’’ந்தி.

1196. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

இத்தா²லங்காரோ நாம ஸீஸூபகோ³ கீ³வூபகோ³ ஹத்தூ²பகோ³ பாதூ³பகோ³ கடூபகோ³. தா⁴ரேய்யாதி ஸகிம்பி தா⁴ரேதி, ஆபத்தி பாசித்தியஸ்ஸ.

1197. அனாபத்தி ஆபா³த⁴பச்சயா, உம்மத்திகாய, ஆதி³கம்மிகாயாதி.

சதுத்த²ஸிக்கா²பத³ம் நிட்டி²தம்.

5. பஞ்சமஸிக்கா²பத³ம்

1198. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ க³ந்த⁴வண்ணகேன நஹாயந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ க³ந்த⁴வண்ணகேன நஹாயிஸ்ஸந்தி, ஸேய்யதா²பி கி³ஹினியோ காமபோ⁴கி³னியோ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ க³ந்த⁴வண்ணகேன நஹாயிஸ்ஸந்தீ’’தி…பே… ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கு²னியோ க³ந்த⁴வண்ணகேன நஹாயந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ க³ந்த⁴வண்ணகேன நஹாயிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1199. ‘‘யா பன பி⁴க்கு²னீ க³ந்த⁴வண்ணகேன நஹாயேய்ய, பாசித்திய’’ந்தி.

1200. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

க³ந்தோ⁴ நாம யோ கோசி க³ந்தோ⁴. வண்ணகம் நாம யம் கிஞ்சி வண்ணகம். நஹாயேய்யாதி நஹாயதி. பயோகே³ து³க்கடம், நஹானபரியோஸானே ஆபத்தி பாசித்தியஸ்ஸ.

1201. அனாபத்தி ஆபா³த⁴ப்பச்சயா, உம்மத்திகாய, ஆதி³கம்மிகாயாதி.

பஞ்சமஸிக்கா²பத³ம் நிட்டி²தம்.

6. ச²ட்ட²ஸிக்கா²பத³ம்

1202. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ வாஸிதகேன பிஞ்ஞாகேன நஹாயந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ வாஸிதகேன பிஞ்ஞாகேன நஹாயிஸ்ஸந்தி, ஸேய்யதா²பி கி³ஹினியோ காமபோ⁴கி³னியோ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ வாஸிதகேன பிஞ்ஞாகேன நஹாயிஸ்ஸந்தீ’’தி…பே… ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கு²னியோ வாஸிதகேன பிஞ்ஞாகேன நஹாயந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ வாஸிதகேன பிஞ்ஞாகேன நஹாயிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1203. ‘‘யா பன பி⁴க்கு²னீ வாஸிதகேன பிஞ்ஞாகேன நஹாயேய்ய, பாசித்திய’’ந்தி.

1204. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

வாஸிதகம் நாம யம் கிஞ்சி க³ந்த⁴வாஸிதகம். பிஞ்ஞாகம் நாம திலபிட்ட²ம் வுச்சதி. நஹாயேய்யாதி நஹாயதி. பயோகே³ து³க்கடம், நஹானபரியோஸானே ஆபத்தி பாசித்தியஸ்ஸ.

1205. அனாபத்தி ஆபா³த⁴ப்பச்சயா, பகதிபிஞ்ஞாகேன நஹாயதி, உம்மத்திகாய, ஆதி³கம்மிகாயாதி.

ச²ட்ட²ஸிக்கா²பத³ம் நிட்டி²தம்.

7. ஸத்தமஸிக்கா²பத³ம்

1206. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ பி⁴க்கு²னியா உம்மத்³தா³பேந்திபி பரிமத்³தா³பேந்திபி. மனுஸ்ஸா விஹாரசாரிகம் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ பி⁴க்கு²னியா உம்மத்³தா³பேஸ்ஸந்திபி பரிமத்³தா³பேஸ்ஸந்திபி ஸேய்யதா²பி கி³ஹினியோ காமபோ⁴கி³னியோ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ பி⁴க்கு²னியா உம்மத்³தா³பேஸ்ஸந்திபி பரிமத்³தா³பேஸ்ஸந்திபீ’’தி…பே… ஸச்சம் கிர, பி⁴க்க²வே, பி⁴க்கு²னியோ பி⁴க்கு²னியா உம்மத்³தா³பேந்திபி பரிமத்³தா³பேந்திபீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ பி⁴க்கு²னியா உம்மத்³தா³பேஸ்ஸந்திபி பரிமத்³தா³பேஸ்ஸந்திபி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1207. ‘‘யா பன பி⁴க்கு²னீ பி⁴க்கு²னியா உம்மத்³தா³பேய்ய வா பரிமத்³தா³பேய்ய வா, பாசித்திய’’ந்தி.

1208. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

பி⁴க்கு²னியாதி அஞ்ஞாய பி⁴க்கு²னியா. உம்மத்³தா³பேய்ய வாதி உம்மத்³தா³பேதி [உப்³ப³ட்டாபேதி (ஸீ.)], ஆபத்தி பாசித்தியஸ்ஸ. பரிமத்³தா³பேய்ய வாதி ஸம்பா³ஹாபேதி, ஆபத்தி பாசித்தியஸ்ஸ.

1209. அனாபத்தி கி³லானாய, ஆபதா³ஸு, உம்மத்திகாய, ஆதி³கம்மிகாயாதி.

ஸத்தமஸிக்கா²பத³ம் நிட்டி²தம்.

8-9-10. அட்ட²ம-நவம-த³ஸமஸிக்கா²பத³ம்

1210. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ ஸிக்க²மானாய உம்மத்³தா³பேந்திபி பரிமத்³தா³பேந்திபி…பே… ஸாமணேரியா உம்மத்³தா³பேந்திபி பரிமத்³தா³பேந்திபி…பே… கி³ஹினியா உம்மத்³தா³பேந்திபி பரிமத்³தா³பேந்திபி. மனுஸ்ஸா விஹாரசாரிகம் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ கி³ஹினியா உம்மத்³தா³பேஸ்ஸந்திபி பரிமத்³தா³பேஸ்ஸந்திபி, ஸேய்யதா²பி கி³ஹினியோ காமபோ⁴கி³னியோ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – கத²ஞ்ஹி நாம பி⁴க்கு²னியோ கி³ஹினியா உம்மத்³தா³பேஸ்ஸந்திபி பரிமத்³தா³பேஸ்ஸந்திபீதி…பே… ஸச்சம் கிர, பி⁴க்க²வே, பி⁴க்கு²னியோ கி³ஹினியா உம்மத்³தா³பேந்திபி பரிமத்³தா³பேந்திபீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ கி³ஹினியா உம்மத்³தா³பேஸ்ஸந்திபி பரிமத்³தா³பேஸ்ஸந்திபி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1211. ‘‘யா பன பி⁴க்கு²னீ (ஸிக்க²மானாய…பே… ஸாமணேரியா…பே…) கி³ஹினியா உம்மத்³தா³பேய்ய வா பரிமத்³தா³பேய்ய வா, பாசித்திய’’ந்தி.

1212. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஸிக்க²மானா நாம த்³வே வஸ்ஸானி ச²ஸு த⁴ம்மேஸு ஸிக்கி²தஸிக்கா².

ஸாமணேரீ நாம த³ஸஸிக்கா²பதி³கா.

கி³ஹினீ நாம அகா³ரினீ வுச்சதி.

உம்மத்³தா³பேய்ய வாதி உம்மத்³தா³பேதி, ஆபத்தி பாசித்தியஸ்ஸ.

பரிமத்³தா³பேய்ய வாதி ஸம்பா³ஹாபேதி, ஆபத்தி பாசித்தியஸ்ஸ.

1213. அனாபத்தி கி³லானாய [ஆபா³த⁴ப்பச்சயா (க.)], ஆபதா³ஸு, உம்மத்திகாய, ஆதி³கம்மிகாயாதி.

அட்ட²ம நவம த³ஸமஸிக்கா²பதா³னி நிட்டி²தானி.

11. ஏகாத³ஸமஸிக்கா²பத³ம்

1214. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ பி⁴க்கு²ஸ்ஸ புரதோ அனாபுச்சா² ஆஸனே நிஸீத³ந்தி. பி⁴க்கூ² உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ பி⁴க்கு²ஸ்ஸ புரதோ அனாபுச்சா² ஆஸனே நிஸீதி³ஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ பி⁴க்கு²ஸ்ஸ புரதோ அனாபுச்சா² ஆஸனே நிஸீத³ந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ பி⁴க்கு²ஸ்ஸ புரதோ அனாபுச்சா² ஆஸனே நிஸீதி³ஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1215. ‘‘யா பன பி⁴க்கு²னீ பி⁴க்கு²ஸ்ஸ புரதோ அனாபுச்சா² ஆஸனே நிஸீதே³ய்ய, பாசித்திய’’ந்தி.

1216. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

பி⁴க்கு²ஸ்ஸ புரதோதி உபஸம்பன்னஸ்ஸ புரதோ. அனாபுச்சா²தி அனபலோகேத்வா. ஆஸனே நிஸீதே³ய்யாதி அந்தமஸோ ச²மாயபி நிஸீத³தி, ஆபத்தி பாசித்தியஸ்ஸ.

1217. அனாபுச்சி²தே அனாபுச்சி²தஸஞ்ஞா ஆஸனே நிஸீத³தி, ஆபத்தி பாசித்தியஸ்ஸ. அனாபுச்சி²தே வேமதிகா ஆஸனே நிஸீத³தி, ஆபத்தி பாசித்தியஸ்ஸ. அனாபுச்சி²தே ஆபுச்சி²தஸஞ்ஞா ஆஸனே நிஸீத³தி, ஆபத்தி பாசித்தியஸ்ஸ.

ஆபுச்சி²தே அனாபுச்சி²தஸஞ்ஞா, ஆபத்தி து³க்கடஸ்ஸ. ஆபுச்சி²தே வேமதிகா, ஆபத்தி து³க்கடஸ்ஸ. ஆபுச்சி²தே ஆபுச்சி²தஸஞ்ஞா, அனாபத்தி.

1218. அனாபத்தி ஆபுச்சா² ஆஸனே நிஸீத³தி, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.

ஏகாத³ஸமஸிக்கா²பத³ம் நிட்டி²தம்.

12. த்³வாத³ஸமஸிக்கா²பத³ம்

1219. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ அனோகாஸகதம் பி⁴க்கு²ம் பஞ்ஹம் புச்ச²ந்தி. பி⁴க்கூ² உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ அனோகாஸகதம் பி⁴க்கு²ம் பஞ்ஹம் புச்சி²ஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ அனோகாஸகதம் பி⁴க்கு²ம் பஞ்ஹம் புச்ச²ந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ அனோகாஸகதம் பி⁴க்கு²ம் பஞ்ஹம் புச்சி²ஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1220. ‘‘யா பன பி⁴க்கு²னீ அனோகாஸகதம் பி⁴க்கு²ம் பஞ்ஹம் புச்சே²ய்ய, பாசித்திய’’ந்தி.

1221. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அனோகாஸகதந்தி அனாபுச்சா². பி⁴க்கு²ந்தி உபஸம்பன்னம். பஞ்ஹம் புச்சே²ய்யாதி ஸுத்தந்தே ஓகாஸம் காராபேத்வா வினயம் வா அபி⁴த⁴ம்மம் வா புச்ச²தி, ஆபத்தி பாசித்தியஸ்ஸ. வினயே ஓகாஸம் காராபேத்வா ஸுத்தந்தம் வா அபி⁴த⁴ம்மம் வா புச்ச²தி, ஆபத்தி பாசித்தியஸ்ஸ. அபி⁴த⁴ம்மே ஓகாஸம் காராபேத்வா ஸுத்தந்தம் வா வினயம் வா புச்ச²தி, ஆபத்தி பாசித்தியஸ்ஸ.

1222. அனாபுச்சி²தே அனாபுச்சி²தஸஞ்ஞா பஞ்ஹம் புச்ச²தி, ஆபத்தி பாசித்தியஸ்ஸ. அனாபுச்சி²தே வேமதிகா பஞ்ஹம் புச்ச²தி, ஆபத்தி பாசித்தியஸ்ஸ. அனாபுச்சி²தே ஆபுச்சி²தஸஞ்ஞா பஞ்ஹம் புச்ச²தி, ஆபத்தி பாசித்தியஸ்ஸ.

ஆபுச்சி²தே அனாபுச்சி²தஸஞ்ஞா, ஆபத்தி து³க்கடஸ்ஸ. ஆபுச்சி²தே வேமதிகா, ஆபத்தி து³க்கடஸ்ஸ. ஆபுச்சி²தே ஆபுச்சி²தஸஞ்ஞா, அனாபத்தி.

1223. அனாபத்தி ஓகாஸம் காராபேத்வா புச்ச²தி, அனோதி³ஸ்ஸ ஓகாஸம் காராபேத்வா யத்த² கத்த²சி புச்ச²தி, உம்மத்திகாய, ஆதி³கம்மிகாயாதி.

த்³வாத³ஸமஸிக்கா²பத³ம் நிட்டி²தம்.

13. தேரஸமஸிக்கா²பத³ம்

1224. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரா பி⁴க்கு²னீ அஸங்கச்சிகா [அஸங்கச்சி²கா (ஸ்யா.)] கா³மம் பிண்டா³ய பாவிஸி. தஸ்ஸா ரதி²காய வாதமண்ட³லிகா ஸங்கா⁴டியோ உக்கி²பிம்ஸு. மனுஸ்ஸா உக்குட்டி²ம் அகம்ஸு – ‘‘ஸுந்த³ரா அய்யாய த²னுத³ரா’’தி. ஸா பி⁴க்கு²னீ தேஹி மனுஸ்ஸேஹி உப்பண்டி³யமானா மங்கு அஹோஸி. அத² கோ² ஸா பி⁴க்கு²னீ உபஸ்ஸயம் க³ந்த்வா பி⁴க்கு²னீனம் ஏதமத்த²ம் ஆரோசேஸி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னீ அஸங்கச்சிகா கா³மம் பவிஸிஸ்ஸதீ’’தி…பே… ஸச்சம் கிர, பி⁴க்க²வே, பி⁴க்கு²னீ அஸங்கச்சிகா கா³மம் பாவிஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னீ அஸங்கச்சிகா கா³மம் பவிஸிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1225. ‘‘யா பன பி⁴க்கு²னீ அஸங்கச்சிகா [அஸங்கச்சி²கா (ஸ்யா.)] கா³மம் பவிஸேய்ய, பாசித்திய’’ந்தி.

1226. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அஸங்கச்சிகாதி வினா ஸங்கச்சிகம்.

ஸங்கச்சிகம் நாம அத⁴க்க²கம் உப்³ப⁴னாபி⁴, தஸ்ஸ படிச்சா²த³னத்தா²ய.

கா³மம் பவிஸேய்யாதி பரிக்கி²த்தஸ்ஸ கா³மஸ்ஸ பரிக்கே²பம் அதிக்காமேந்தியா ஆபத்தி பாசித்தியஸ்ஸ. அபரிக்கி²த்தஸ்ஸ கா³மஸ்ஸ உபசாரம் ஓக்கமந்தியா ஆபத்தி பாசித்தியஸ்ஸ.

1227. அனாபத்தி அச்சி²ன்னசீவரிகாய, நட்ட²சீவரிகாய, கி³லானாய, அஸ்ஸதியா, அஜானந்தியா, ஆபதா³ஸு, உம்மத்திகாய, ஆதி³கம்மிகாயாதி.

தேரஸமஸிக்கா²பத³ம் நிட்டி²தம்.

ச²த்துபாஹனவக்³கோ³ நவமோ.

உத்³தி³ட்டா² கோ², அய்யாயோ, ச²ஸட்டி²ஸதா பாசித்தியா த⁴ம்மா. தத்தா²ய்யாயோ புச்சா²மி – ‘‘கச்சித்த² பரிஸுத்³தா⁴’’? து³தியம்பி புச்சா²மி – ‘‘கச்சித்த² பரிஸுத்³தா⁴’’? ததியம்பி புச்சா²மி – ‘‘கச்சித்த² பரிஸுத்³தா⁴’’? பரிஸுத்³தே⁴த்தா²ய்யாயோ, தஸ்மா துண்ஹீ, ஏவமேதம் தா⁴ரயாமீதி.

கு²த்³த³கம் ஸமத்தம்.

பி⁴க்கு²னிவிப⁴ங்கே³ பாசித்தியகண்ட³ம் நிட்டி²தம்.