9. நவமஸிக்கா²பத³ம்

1111. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ வுட்டா²பிதம் பவத்தினிம் த்³வே வஸ்ஸானி நானுப³ந்த⁴ந்தி. தா பா³லா ஹோந்தி அப்³யத்தா; ந ஜானந்தி கப்பியம் வா அகப்பியம் வா. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ வுட்டா²பிதம் பவத்தினிம் த்³வே வஸ்ஸானி நானுப³ந்தி⁴ஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ வுட்டா²பிதம் பவத்தினிம் த்³வே வஸ்ஸானி நானுப³ந்த⁴ந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ வுட்டா²பிதம் பவத்தினிம் த்³வே வஸ்ஸானி நானுப³ந்தி⁴ஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1112. ‘‘யா பன பி⁴க்கு²னீ வுட்டா²பிதம் பவத்தினிம் த்³வே வஸ்ஸானி நானுப³ந்தே⁴ய்ய, பாசித்திய’’ந்தி.

1113. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

வுட்டா²பிதந்தி உபஸம்பாதி³தம். பவத்தினீ நாம உபஜ்ஜா²யா வுச்சதி. த்³வே வஸ்ஸானீதி த்³வே ஸம்வச்ச²ரானி. நானுப³ந்தே⁴ய்யாதி ந ஸயம் உபட்ட²ஹேய்ய. த்³வே வஸ்ஸானி நானுப³ந்தி⁴ஸ்ஸாமீதி து⁴ரம் நிக்கி²த்தமத்தே ஆபத்தி பாசித்தியஸ்ஸ.

1114. அனாபத்தி உபஜ்ஜா²யா பா³லா வா ஹோதி அலஜ்ஜினீ வா, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.

நவமஸிக்கா²பத³ம் நிட்டி²தம்.