10. த³ஸமஸிக்கா²பத³ம்

1115. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ ஸஹஜீவினிம் வுட்டா²பேத்வா நேவ வூபகாஸேதி ந வூபகாஸாபேதி. ஸாமிகோ அக்³க³ஹேஸி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ ஸஹஜீவினிம் வுட்டா²பேத்வா நேவ வூபகாஸேஸ்ஸதி ந வூபகாஸாபேஸ்ஸதி, ஸாமிகோ அக்³க³ஹேஸி! ஸசாயம் பி⁴க்கு²னீ பக்கந்தா அஸ்ஸ, ந ச ஸாமிகோ க³ண்ஹேய்யா’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ ஸஹஜீவினிம் வுட்டா²பேத்வா நேவ வூபகாஸேதி ந வூபகாஸாபேதி […ஸி (க.)], ஸாமிகோ அக்³க³ஹேஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ஸஹஜீவினிம் வுட்டா²பேத்வா நேவ வூபகாஸேஸ்ஸதி ந வூபகாஸாபேஸ்ஸதி, ஸாமிகோ அக்³க³ஹேஸி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1116. ‘‘யா பன பி⁴க்கு²னீ ஸஹஜீவினிம் வுட்டா²பேத்வா நேவ வூபகாஸேய்ய ந வூபகாஸாபேய்ய அந்தமஸோ ச²ப்பஞ்சயோஜனானிபி, பாசித்திய’’ந்தி.

1117. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஸஹஜீவினீ நாம ஸத்³தி⁴விஹாரினீ வுச்சதி. வுட்டா²பேத்வாதி உபஸம்பாதே³த்வா. நேவ வூபகாஸேய்யாதி ந ஸயம் வூபகாஸேய்ய. ந வூபகாஸாபேய்யாதி ந அஞ்ஞம் ஆணாபேய்ய. ‘‘நேவ வூபகாஸேஸ்ஸாமி ந வூபகாஸாபேஸ்ஸாமி அந்தமஸோ ச²ப்பஞ்சயோஜனானிபீ’’தி து⁴ரம் நிக்கி²த்தமத்தே ஆபத்தி பாசித்தியஸ்ஸ.

1118. அனாபத்தி ஸதி அந்தராயே, பரியேஸித்வா து³தியிகம் பி⁴க்கு²னிம் ந லப⁴தி, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.

த³ஸமஸிக்கா²பத³ம் நிட்டி²தம்.

க³ப்³பி⁴னிவக்³கோ³ ஸத்தமோ.