8. அட்ட²மஸிக்கா²பத³ம்

1107. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ ஸஹஜீவினிம் வுட்டா²பேத்வா த்³வே வஸ்ஸானி நேவ அனுக்³க³ண்ஹாதி ந அனுக்³க³ண்ஹாபேதி. தா பா³லா ஹோந்தி அப்³யத்தா; ந ஜானந்தி கப்பியம் வா அகப்பியம் வா. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ ஸஹஜீவினிம் வுட்டா²பேத்வா த்³வே வஸ்ஸானி நேவ அனுக்³க³ண்ஹிஸ்ஸதி ந அனுக்³க³ண்ஹாபேஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ ஸஹஜீவினிம் வுட்டா²பேத்வா த்³வே வஸ்ஸானி நேவ அனுக்³க³ண்ஹாதி ந அனுக்³க³ண்ஹாபேதீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ஸஹஜீவினிம் வுட்டா²பேத்வா த்³வே வஸ்ஸானி நேவ அனுக்³க³ண்ஹிஸ்ஸதி ந அனுக்³க³ண்ஹாபேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1108. ‘‘யா பன பி⁴க்கு²னீ ஸஹஜீவினிம் வுட்டா²பேத்வா த்³வே வஸ்ஸானி நேவ அனுக்³க³ண்ஹேய்ய ந அனுக்³க³ண்ஹாபேய்ய, பாசித்திய’’ந்தி.

1109. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஸஹஜீவினீ நாம ஸத்³தி⁴விஹாரினீ வுச்சதி. வுட்டா²பேத்வாதி உபஸம்பாதே³த்வா. த்³வே வஸ்ஸானீதி த்³வே ஸம்வச்ச²ரானி.

நேவ அனுக்³க³ண்ஹேய்யாதி ந ஸயம் அனுக்³க³ண்ஹேய்ய உத்³தே³ஸேன பரிபுச்சா²ய ஓவாதே³ன அனுஸாஸனியா.

ந அனுக்³க³ண்ஹாபேய்யாதி ந அஞ்ஞம் ஆணாபேய்ய ‘‘த்³வே வஸ்ஸானி நேவ அனுக்³க³ண்ஹிஸ்ஸாமி ந அனுக்³க³ண்ஹாபேஸ்ஸாமீ’’தி து⁴ரம் நிக்கி²த்தமத்தே ஆபத்தி பாசித்தியஸ்ஸ.

1110. அனாபத்தி ஸதி அந்தராயே, பரியேஸித்வா ந லப⁴தி, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.

அட்ட²மஸிக்கா²பத³ம் நிட்டி²தம்.