5. பஞ்சமஸிக்கா²பத³ம்

1090. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ ஊனத்³வாத³ஸவஸ்ஸம் கி³ஹிக³தம் வுட்டா²பேந்தி. தா அக்க²மா ஹோந்தி ஸீதஸ்ஸ உண்ஹஸ்ஸ ஜிக⁴ச்சா²ய பிபாஸாய ட³ம்ஸமகஸவாதாதபஸரீஸபஸம்ப²ஸ்ஸானம் து³ருத்தானம் து³ராக³தானம் வசனபதா²னம். உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் க²ரானம் கடுகானம் அஸாதானம் அமனாபானம் பாணஹரானம் அனதி⁴வாஸகஜாதிகா ஹோந்தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ ஊனத்³வாத³ஸவஸ்ஸம் கி³ஹிக³தம் வுட்டா²பேஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ ஊனத்³வாத³ஸவஸ்ஸம் கி³ஹிக³தம் வுட்டா²பேந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ ஊனத்³வாத³ஸவஸ்ஸம் கி³ஹிக³தம் வுட்டா²பேஸ்ஸந்தி! ஊனத்³வாத³ஸவஸ்ஸா [ஊனத்³வாத³ஸவஸ்ஸாஹி (க.)], பி⁴க்க²வே, கி³ஹிக³தா அக்க²மா ஹோதி ஸீதஸ்ஸ உண்ஹஸ்ஸ ஜிக⁴ச்சா²ய பிபாஸாய ட³ம்ஸமகஸவாதாதபஸரீஸபஸம்ப²ஸ்ஸானம் து³ருத்தானம் து³ராக³தானம் வசனபதா²னம். உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் க²ரானம் கடுகானம் அஸாதானம் அமனாபானம் பாணஹரானம் அனதி⁴வாஸகஜாதிகா ஹோதி. த்³வாத³ஸவஸ்ஸாவ [த்³வாத³ஸவஸ்ஸா ச (ஸ்யா. க.)] கோ², பி⁴க்க²வே, கி³ஹிக³தா க²மா ஹோதி ஸீதஸ்ஸ உண்ஹஸ்ஸ ஜிக⁴ச்சா²ய பிபாஸாய ட³ம்ஸமகஸவாதாதபஸரீஸபஸம்ப²ஸ்ஸானம் து³ருத்தானம் து³ராக³தானம் வசனபதா²னம். உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் க²ரானம் கடுகானம் அஸாதானம் அமனாபானம் பாணஹரானம் அதி⁴வாஸகஜாதிகா ஹோதி. நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1091. ‘‘யா பன பி⁴க்கு²னீ ஊனத்³வாத³ஸவஸ்ஸம் கி³ஹிக³தம் வுட்டா²பேய்ய, பாசித்திய’’ந்தி.

1092. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஊனத்³வாத³ஸவஸ்ஸா நாம அப்பத்தத்³வாத³ஸவஸ்ஸா. கி³ஹிக³தா நாம புரிஸந்தரக³தா வுச்சதி. வுட்டா²பேய்யாதி உபஸம்பாதே³ய்ய.

‘‘வுட்டா²பேஸ்ஸாமீ’’தி க³ணம் வா ஆசரினிம் வா பத்தம் வா சீவரம் வா பரியேஸதி, ஸீமம் வா ஸம்மன்னதி, ஆபத்தி து³க்கடஸ்ஸ. ஞத்தியா து³க்கடம். த்³வீஹி கம்மவாசாஹி து³க்கடா. கம்மவாசாபரியோஸானே உபஜ்ஜா²யாய ஆபத்தி பாசித்தியஸ்ஸ. க³ணஸ்ஸ ச ஆசரினியா ச ஆபத்தி து³க்கடஸ்ஸ.

1093. ஊனத்³வாத³ஸவஸ்ஸாய ஊனத்³வாத³ஸவஸ்ஸஸஞ்ஞா வுட்டா²பேதி, ஆபத்தி பாசித்தியஸ்ஸ. ஊனத்³வாத³ஸவஸ்ஸாய வேமதிகா வுட்டா²பேதி, ஆபத்தி து³க்கடஸ்ஸ. ஊனத்³வாத³ஸவஸ்ஸாய பரிபுண்ணஸஞ்ஞா வுட்டா²பேதி, அனாபத்தி.

பரிபுண்ணத்³வாத³ஸவஸ்ஸாய ஊனத்³வாத³ஸவஸ்ஸஸஞ்ஞா, ஆபத்தி து³க்கடஸ்ஸ. பரிபுண்ணத்³வாத³ஸவஸ்ஸாய வேமதிகா, ஆபத்தி து³க்கடஸ்ஸ. பரிபுண்ணத்³வாத³ஸவஸ்ஸாய பரிபுண்ணஸஞ்ஞா, அனாபத்தி.

1094. அனாபத்தி ஊனத்³வாத³ஸவஸ்ஸம் பரிபுண்ணஸஞ்ஞா வுட்டா²பேதி, பரிபுண்ணத்³வாத³ஸவஸ்ஸம் பரிபுண்ணஸஞ்ஞா வுட்டா²பேதி, உம்மத்திகாய, ஆதி³கம்மிகாயாதி.

பஞ்சமஸிக்கா²பத³ம் நிட்டி²தம்.