6. ச²ட்ட²ஸிக்கா²பத³ம்

1095. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ பரிபுண்ணத்³வாத³ஸவஸ்ஸம் கி³ஹிக³தம் த்³வே வஸ்ஸானி ச²ஸு த⁴ம்மேஸு அஸிக்கி²தஸிக்க²ம் வுட்டா²பேந்தி. தா பா³லா ஹோந்தி அப்³யத்தா ந ஜானந்தி கப்பியம் வா அகப்பியம் வா. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ பரிபுண்ணத்³வாத³ஸவஸ்ஸம் கி³ஹிக³தம் த்³வே வஸ்ஸானி ச²ஸு த⁴ம்மேஸு அஸிக்கி²தஸிக்க²ம் வுட்டா²பேஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ பரிபுண்ணத்³வாத³ஸவஸ்ஸம் கி³ஹிக³தம் த்³வே வஸ்ஸானி ச²ஸு த⁴ம்மேஸு அஸிக்கி²தஸிக்க²ம் வுட்டா²பேந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ பரிபுண்ணத்³வாத³ஸவஸ்ஸம் கி³ஹிக³தம் த்³வே வஸ்ஸானி ச²ஸு த⁴ம்மேஸு அஸிக்கி²தஸிக்க²ம் வுட்டா²பேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… விக³ரஹித்வா த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, பரிபுண்ணத்³வாத³ஸவஸ்ஸாய கி³ஹிக³தாய த்³வே வஸ்ஸானி ச²ஸு த⁴ம்மேஸு ஸிக்கா²ஸம்முதிம் தா³தும். ஏவஞ்ச பன, பி⁴க்க²வே, தா³தப்³பா³. தாய பரிபுண்ணத்³வாத³ஸவஸ்ஸாய கி³ஹிக³தாய ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா பி⁴க்கு²னீனம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – அஹம், அய்யே, இத்த²ன்னாமா இத்த²ன்னாமாய அய்யாய பரிபுண்ணத்³வாத³ஸவஸ்ஸா கி³ஹிக³தா ஸங்க⁴ம் த்³வே வஸ்ஸானி ச²ஸு த⁴ம்மேஸு ஸிக்கா²ஸம்முதிம் யாசாமீ’’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தாய பி⁴க்கு²னியா படிப³லாய ஸங்கோ⁴ ஞாபேதப்³போ³ –

1096. ‘‘ஸுணாது மே, அய்யே, ஸங்கோ⁴. அயம் இத்த²ன்னாமா இத்த²ன்னாமாய அய்யாய பரிபுண்ணத்³வாத³ஸவஸ்ஸா கி³ஹிக³தா ஸங்க⁴ம் த்³வே வஸ்ஸானி ச²ஸு த⁴ம்மேஸு ஸிக்கா²ஸம்முதிம் யாசதி. யதி³ ஸங்க⁴ஸ்ஸ பத்தகல்லம் ஸங்கோ⁴ இத்த²ன்னாமாய பரிபுண்ணத்³வாத³ஸவஸ்ஸாய கி³ஹிக³தாய த்³வே வஸ்ஸானி ச²ஸு த⁴ம்மேஸு ஸிக்கா²ஸம்முதிம் த³தே³ய்ய. ஏஸா ஞத்தி.

‘‘ஸுணாது மே, அய்யே, ஸங்கோ⁴. அயம் இத்த²ன்னாமா இத்த²ன்னாமாய அய்யாய பரிபுண்ணத்³வாத³ஸவஸ்ஸா கி³ஹிக³தா ஸங்க⁴ம் த்³வே வஸ்ஸானி ச²ஸு த⁴ம்மேஸு ஸிக்கா²ஸம்முதிம் யாசதி. ஸங்கோ⁴ இத்த²ன்னாமாய பரிபுண்ணத்³வாத³ஸவஸ்ஸாய கி³ஹிக³தாய த்³வே வஸ்ஸானி ச²ஸு த⁴ம்மேஸு ஸிக்கா²ஸம்முதிம் தே³தி. யஸ்ஸா அய்யாய க²மதி இத்த²ன்னாமாய பரிபுண்ணத்³வாத³ஸவஸ்ஸாய கி³ஹிக³தாய த்³வே வஸ்ஸானி ச²ஸு த⁴ம்மேஸு ஸிக்கா²ஸம்முதியா தா³னம், ஸா துண்ஹஸ்ஸ; யஸ்ஸா நக்க²மதி, ஸா பா⁴ஸேய்ய.

‘‘தி³ன்னா ஸங்கே⁴ன இத்த²ன்னாமாய பரிபுண்ணத்³வாத³ஸவஸ்ஸாய கி³ஹிக³தாய த்³வே வஸ்ஸானி ச²ஸு த⁴ம்மேஸு ஸிக்கா²ஸம்முதி. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

ஸா பரிபுண்ணத்³வாத³ஸவஸ்ஸா கி³ஹிக³தா ஏவம் வதே³ஹீதி வத்தப்³பா³ – ‘‘பாணாதிபாதா வேரமணிம் த்³வே வஸ்ஸானி அவீதிக்கம்ம ஸமாதா³னம் ஸமாதி³யாமி…பே… விகாலபோ⁴ஜனா வேரமணிம் த்³வே வஸ்ஸானி அவீதிக்கம்ம ஸமாதா³னம் ஸமாதி³யாமீ’’தி.

அத² கோ² ப⁴க³வா தா பி⁴க்கு²னியோ அனேகபரியாயேன விக³ரஹித்வா து³ப்³ப⁴ரதாய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1097. ‘‘யா பன பி⁴க்கு²னீ பரிபுண்ணத்³வாத³ஸவஸ்ஸம் கி³ஹிக³தம் த்³வே வஸ்ஸானி ச²ஸு த⁴ம்மேஸு அஸிக்கி²தஸிக்க²ம் வுட்டா²பேய்ய, பாசித்திய’’ந்தி.

1098. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

பரிபுண்ணத்³வாத³ஸவஸ்ஸா நாம பத்தத்³வாத³ஸவஸ்ஸா. கி³ஹிக³தா நாம புரிஸந்தரக³தா வுச்சதி. த்³வே வஸ்ஸானீதி த்³வே ஸம்வச்ச²ரானி. அஸிக்கி²தஸிக்கா² நாம ஸிக்கா² வா ந தி³ன்னா ஹோதி, தி³ன்னா வா ஸிக்கா² குபிதா. வுட்டா²பேய்யாதி உபஸம்பாதே³ய்ய.

‘‘வுட்டா²பேஸ்ஸாமீ’’தி க³ணம் வா ஆசரினிம் வா பத்தம் வா சீவரம் வா பரியேஸதி, ஸீமம் வா ஸம்மன்னதி, ஆபத்தி து³க்கடஸ்ஸ. ஞத்தியா து³க்கடம். த்³வீஹி கம்மவாசாஹி து³க்கடா. கம்மவாசாபரியோஸானே உபஜ்ஜா²யாய ஆபத்தி பாசித்தியஸ்ஸ. க³ணஸ்ஸ ச ஆசரினியா ச ஆபத்தி து³க்கடஸ்ஸ.

1099. த⁴ம்மகம்மே த⁴ம்மகம்மஸஞ்ஞா வுட்டா²பேதி, ஆபத்தி பாசித்தியஸ்ஸ. த⁴ம்மகம்மே வேமதிகா வுட்டா²பேதி, ஆபத்தி பாசித்தியஸ்ஸ. த⁴ம்மகம்மே அத⁴ம்மகம்மஸஞ்ஞா வுட்டா²பேதி, ஆபத்தி பாசித்தியஸ்ஸ.

அத⁴ம்மகம்மே த⁴ம்மகம்மஸஞ்ஞா வுட்டா²பேதி, ஆபத்தி து³க்கடஸ்ஸ. அத⁴ம்மகம்மே வேமதிகா வுட்டா²பேதி, ஆபத்தி து³க்கடஸ்ஸ. அத⁴ம்மகம்மே அத⁴ம்மகம்மஸஞ்ஞா வுட்டா²பேதி, ஆபத்தி து³க்கடஸ்ஸ.

1100. அனாபத்தி பரிபுண்ணத்³வாத³ஸவஸ்ஸம் கி³ஹிக³தம் த்³வே வஸ்ஸானி ச²ஸு த⁴ம்மேஸு ஸிக்கி²தஸிக்க²ம் வுட்டா²பேதி, உம்மத்திகாய, ஆதி³கம்மிகாயாதி.

ச²ட்ட²ஸிக்கா²பத³ம் நிட்டி²தம்.