9. நவமஸிக்கா²பத³ம்

1058. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ உபோஸத²ம்பி ந புச்ச²ந்தி ஓவாத³ம்பி ந யாசந்தி. பி⁴க்கூ² உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ உபோஸத²ம்பி ந புச்சி²ஸ்ஸந்தி ஓவாத³ம்பி ந யாசிஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ ‘‘உபோஸத²ம்பி ந புச்ச²ந்தி ஓவாத³ம்பி ந யாசந்தீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ உபோஸத²ம்பி ந புச்சி²ஸ்ஸந்தி ஓவாத³ம்பி ந யாசிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1059. ‘‘அன்வத்³த⁴மாஸம் பி⁴க்கு²னியா பி⁴க்கு²ஸங்க⁴தோ த்³வே த⁴ம்மா பச்சாஸீஸிதப்³பா³ – உபோஸத²புச்ச²கஞ்ச ஓவாதூ³பஸங்கமனஞ்ச. தம் அதிக்காமேந்தியா பாசித்திய’’ந்தி.

1060. அன்வத்³த⁴மாஸந்தி அனுபோஸதி²கம். உபோஸதோ² நாம த்³வே உபோஸதா² – சாதுத்³த³ஸிகோ ச பன்னரஸிகோ ச.

ஓவாதோ³ நாம அட்ட² க³ருத⁴ம்மா. ‘‘உபோஸத²ம்பி ந புச்சி²ஸ்ஸாமி ஓவாத³ம்பி ந யாசிஸ்ஸாமீ’’தி து⁴ரம் நிக்கி²த்தமத்தே ஆபத்தி பாசித்தியஸ்ஸ.

1061. அனாபத்தி ஸதி அந்தராயே, பரியேஸித்வா து³தியிகம் பி⁴க்கு²னிம் ந லப⁴தி, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.

நவமஸிக்கா²பத³ம் நிட்டி²தம்.