10. த³ஸமஸிக்கா²பத³ம்

1062. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரா பி⁴க்கு²னீ பஸாகே² ஜாதம் க³ண்ட³ம் புரிஸேன ஸத்³தி⁴ம் ஏகேனேகா பே⁴தா³பேஸி. அத² கோ² ஸோ புரிஸோ தம் பி⁴க்கு²னிம் தூ³ஸேதும் உபக்கமி. ஸா விஸ்ஸரமகாஸி. பி⁴க்கு²னியோ உபதா⁴வித்வா தம் பி⁴க்கு²னிம் ஏதத³வோசும் – ‘‘கிஸ்ஸ த்வம், அய்யே, விஸ்ஸரமகாஸீ’’தி? அத² கோ² ஸா பி⁴க்கு²னீ பி⁴க்கு²னீனம் ஏதமத்த²ம் ஆரோசேஸி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னீ பஸாகே² ஜாதம் க³ண்ட³ம் புரிஸேன ஸத்³தி⁴ம் ஏகேனேகா பே⁴தா³பேஸ்ஸதீ’’தி…பே… ஸச்சம் கிர, பி⁴க்க²வே, பி⁴க்கு²னீ பஸாகே² ஜாதம் க³ண்ட³ம் புரிஸேன ஸத்³தி⁴ம் ஏகேனேகா பே⁴தா³பேதீதி [பே⁴தா³பேஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னீ பஸாகே² ஜாதம் க³ண்ட³ம் புரிஸேன ஸத்³தி⁴ம் ஏகேனேகா பே⁴தா³பேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1063. ‘‘யா பன பி⁴க்கு²னீ பஸாகே² ஜாதம் க³ண்ட³ம் வா ருதி⁴தம் வா அனபலோகேத்வா ஸங்க⁴ம் வா க³ணம் வா புரிஸேன ஸத்³தி⁴ம் ஏகேனேகா பே⁴தா³பேய்ய வா பா²லாபேய்ய வா தோ⁴வாபேய்ய வா ஆலிம்பாபேய்ய வா ப³ந்தா⁴பேய்ய வா மோசாபேய்ய வா, பாசித்திய’’ந்தி.

1064. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

பஸாக²ம் நாம அதோ⁴னாபி⁴ உப்³ப⁴ஜாணுமண்ட³லம். ஜாதந்தி தத்த² ஜாதம். க³ண்டோ³ நாம யோ கோசி க³ண்டோ³. ருதி⁴தம் நாம யம் கிஞ்சி வணம். அனபலோகேத்வாதி அனாபுச்சா². ஸங்கோ⁴ நாம பி⁴க்கு²னிஸங்கோ⁴ வுச்சதி. க³ணோ நாம ஸம்ப³ஹுலா பி⁴க்கு²னியோ வுச்சந்தி. புரிஸோ நாம மனுஸ்ஸபுரிஸோ, ந யக்கோ², ந பேதோ, ந திரச்சா²னக³தோ, விஞ்ஞூ படிப³லோ தூ³ஸேதும். ஸத்³தி⁴ந்தி ஏகதோ. ஏகேனேகாதி புரிஸோ சேவ ஹோதி பி⁴க்கு²னீ ச.

1065. ‘‘பி⁴ந்தா³’’தி ஆணாபேதி, ஆபத்தி து³க்கடஸ்ஸ. பி⁴ன்னே ஆபத்தி பாசித்தியஸ்ஸ. ‘‘பா²லேஹீ’’தி ஆணாபேதி, ஆபத்தி து³க்கடஸ்ஸ. பா²லிதே ஆபத்தி பாசித்தியஸ்ஸ. ‘‘தோ⁴வா’’தி ஆணாபேதி, ஆபத்தி து³க்கடஸ்ஸ. தோ⁴விதே [தோ⁴தே (ஸ்யா.)] ஆபத்தி பாசித்தியஸ்ஸ. ‘‘ஆலிம்பா’’தி ஆணாபேதி, ஆபத்தி து³க்கடஸ்ஸ. லித்தே [ஆலித்தே (ஸ்யா.)] ஆபத்தி பாசித்தியஸ்ஸ. ‘‘ப³ந்தா⁴ஹீ’’தி ஆணாபேதி, ஆபத்தி து³க்கடஸ்ஸ. ப³த்³தே⁴ ஆபத்தி பாசித்தியஸ்ஸ. ‘‘மோசேஹீ’’தி ஆணாபேதி, ஆபத்தி து³க்கடஸ்ஸ. முத்தே ஆபத்தி பாசித்தியஸ்ஸ.

1066. அனாபத்தி அபலோகேத்வா பே⁴தா³பேதி வா பா²லாபேதி வா தோ⁴வாபேதி வா ஆலிம்பாபேதி வா ப³ந்தா⁴பேதி வா மோசாபேதி வா, யா காசி விஞ்ஞூ து³தியிகா [யா காசி விஞ்ஞூ து³தியா (ஸ்யா.), யோ கோசி விஞ்ஞூ து³தியோ (க.)] ஹோதி, உம்மத்திகாய, ஆதி³கம்மிகாயாதி.

த³ஸமஸிக்கா²பத³ம் நிட்டி²தம்.

ஆராமவக்³கோ³ ச²ட்டோ².