6. ச²ட்ட²ஸிக்கா²பத³ம்

1046. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலா பி⁴க்கு²னியோ கா³மகாவாஸே வஸ்ஸம்வுட்டா² ஸாவத்தி²ம் அக³மம்ஸு. பி⁴க்கு²னியோ தா பி⁴க்கு²னியோ ஏதத³வோசும் – ‘‘கத்தா²ய்யாயோ வஸ்ஸம்வுட்டா²? கச்சி ஓவாதோ³ இத்³தோ⁴ அஹோஸீ’’தி? ‘‘நத்த²ய்யே, தத்த² பி⁴க்கூ²; குதோ ஓவாதோ³ இத்³தோ⁴ ப⁴விஸ்ஸதீ’’தி! யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ அபி⁴க்கு²கே ஆவாஸே வஸ்ஸம் வஸிஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ அபி⁴க்கு²கே ஆவாஸே வஸ்ஸம் வஸந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ அபி⁴க்கு²கே ஆவாஸே வஸ்ஸம் வஸிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1047. ‘‘யா பன பி⁴க்கு²னீ அபி⁴க்கு²கே ஆவாஸே வஸ்ஸம் வஸேய்ய, பாசித்திய’’ந்தி.

1048. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அபி⁴க்கு²கோ நாம ஆவாஸோ ந ஸக்கா ஹோதி ஓவாதா³ய வா ஸம்வாஸாய வா க³ந்தும். ‘‘வஸ்ஸம் வஸிஸ்ஸாமீ’’தி ஸேனாஸனம் பஞ்ஞபேதி பானீயம் பரிபோ⁴ஜனீயம் உபட்ட²பேதி பரிவேணம் ஸம்மஜ்ஜதி, ஆபத்தி து³க்கடஸ்ஸ. ஸஹ அருணுக்³க³மனா ஆபத்தி பாசித்தியஸ்ஸ.

1049. அனாபத்தி வஸ்ஸுபக³தா பி⁴க்கூ² பக்கந்தா வா ஹோந்தி விப்³ப⁴ந்தா வா காலங்கதா வா பக்க²ஸங்கந்தா வா, ஆபதா³ஸு, உம்மத்திகாய, ஆதி³கம்மிகாயாதி.

ச²ட்ட²ஸிக்கா²பத³ம் நிட்டி²தம்.