7. ஸத்தமஸிக்கா²பத³ம்

1050. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலா பி⁴க்கு²னியோ கா³மகாவாஸே வஸ்ஸம்வுட்டா² ஸாவத்தி²ம் அக³மம்ஸு. பி⁴க்கு²னியோ தா பி⁴க்கு²னியோ ஏதத³வோசும் – ‘‘கத்தா²ய்யாயோ வஸ்ஸம்வுட்டா²; கத்த² [கச்சி (ஸ்யா.)] பி⁴க்கு²ஸங்கோ⁴ பவாரிதோ’’தி? ‘‘ந மயம், அய்யே, பி⁴க்கு²ஸங்க⁴ம் பவாரேமா’’தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ வஸ்ஸம்வுட்டா² பி⁴க்கு²ஸங்க⁴ம் ந பவாரேஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ வஸ்ஸம்வுட்டா² பி⁴க்கு²ஸங்க⁴ம் ந பவாரேந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ வஸ்ஸம்வுட்டா² பி⁴க்கு²ஸங்க⁴ம் ந பவாரேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1051. ‘‘யா பன பி⁴க்கு²னீ வஸ்ஸம்வுட்டா² உப⁴தோஸங்கே⁴ தீஹி டா²னேஹி ந பவாரேய்ய தி³ட்டே²ன வா ஸுதேன வா பரிஸங்காய வா, பாசித்திய’’ந்தி.

1052. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

வஸ்ஸம்வுட்டா² நாம புரிமம் வா தேமாஸம் பச்சி²மம் வா தேமாஸம் வுட்டா². உப⁴தோஸங்கே⁴ தீஹி டா²னேஹி ந பவாரேஸ்ஸாமி தி³ட்டே²ன வா ஸுதேன வா பரிஸங்காய வா’’தி து⁴ரம் நிக்கி²த்தமத்தே ஆபத்தி பாசித்தியஸ்ஸ.

1053. அனாபத்தி ஸதி அந்தராயே, பரியேஸித்வா ந லப⁴தி, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.

ஸத்தமஸிக்கா²பத³ம் நிட்டி²தம்.