3. ததியஸிக்கா²பத³ம்

1033. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன சண்ட³காளீ பி⁴க்கு²னீ ப⁴ண்ட³னகாரிகா ஹோதி கலஹகாரிகா விவாத³காரிகா ப⁴ஸ்ஸகாரிகா ஸங்கே⁴ அதி⁴கரணகாரிகா. து²ல்லனந்தா³ பி⁴க்கு²னீ தஸ்ஸா கம்மே கரீயமானே படிக்கோஸதி. தேன கோ² பன ஸமயேன து²ல்லனந்தா³ பி⁴க்கு²னீ கா³மகம் அக³மாஸி கேனசிதே³வ கரணீயேன. அத² கோ² பி⁴க்கு²னிஸங்கோ⁴ – ‘‘து²ல்லனந்தா³ பி⁴க்கு²னீ பக்கந்தா’’தி சண்ட³காளிம் பி⁴க்கு²னிம் ஆபத்தியா அத³ஸ்ஸனே உக்கி²பி. து²ல்லனந்தா³ பி⁴க்கு²னீ கா³மகே தம் கரணீயம் தீரேத்வா புனதே³வ ஸாவத்தி²ம் பச்சாக³ச்சி². சண்ட³காளீ பி⁴க்கு²னீ து²ல்லனந்தா³ய பி⁴க்கு²னியா ஆக³ச்ச²ந்தியா நேவ ஆஸனம் பஞ்ஞபேஸி ந பாதோ³த³கம் பாத³பீட²ம் பாத³கட²லிகம் உபனிக்கி²பி; ந பச்சுக்³க³ந்த்வா பத்தசீவரம் படிக்³க³ஹேஸி ந பானீயேன ஆபுச்சி². து²ல்லனந்தா³ பி⁴க்கு²னீ சண்ட³காளிம் பி⁴க்கு²னிம் ஏதத³வோச – ‘‘கிஸ்ஸ த்வம், அய்யே, மயி ஆக³ச்ச²ந்தியா நேவ ஆஸனம் பஞ்ஞபேஸி ந பாதோ³த³கம் பாத³பீட²ம் பாத³கட²லிகம் உபனிக்கி²பி; ந பச்சுக்³க³ந்த்வா பத்தசீவரம் படிக்³க³ஹேஸி ந பானீயேன ஆபுச்சீ²’’தி? ‘‘ஏவஞ்ஹேதம், அய்யே, ஹோதி யதா² தம் அனாதா²யா’’தி. ‘‘கிஸ்ஸ பன த்வம், அய்யே, அனாதா²’’தி? ‘‘இமா மம், அய்யே, பி⁴க்கு²னியோ – ‘‘அயம் அனாதா² அப்பஞ்ஞாதா, நத்தி² இமிஸ்ஸா காசி பதிவத்தா’’தி, ஆபத்தியா அத³ஸ்ஸனே உக்கி²பிம்ஸூ’’தி. து²ல்லனந்தா³ பி⁴க்கு²னீ – ‘‘பா³லா ஏதா அப்³யத்தா ஏதா நேதா ஜானந்தி கம்மம் வா கம்மதோ³ஸம் வா கம்மவிபத்திம் வா கம்மஸம்பத்திம் வா’’தி, சண்டீ³கதா க³ணம் பரிபா⁴ஸி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ சண்டீ³கதா க³ணம் பரிபா⁴ஸிஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ சண்டீ³கதா க³ணம் பரிபா⁴ஸதீதி [பரிபா⁴ஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா …பே…கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ சண்டீ³கதா க³ணம் பரிபா⁴ஸிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1034. ‘‘யா பன பி⁴க்கு²னீ சண்டீ³கதா க³ணம் பரிபா⁴ஸேய்ய, பாசித்திய’’ந்தி.

1035. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

சண்டீ³கதா நாம கோத⁴னா வுச்சதி.

க³ணோ நாம பி⁴க்கு²னிஸங்கோ⁴ வுச்சதி.

பரிபா⁴ஸேய்யாதி ‘‘பா³லா ஏதா அப்³யத்தா ஏதா நேதா ஜானந்தி கம்மம் வா கம்மதோ³ஸம் வா கம்மவிபத்திம் வா கம்மஸம்பத்திம் வா’’தி பரிபா⁴ஸதி, ஆபத்தி பாசித்தியஸ்ஸ. ஸம்ப³ஹுலா பி⁴க்கு²னியோ வா ஏகம் பி⁴க்கு²னிம் வா அனுபஸம்பன்னம் வா பரிபா⁴ஸதி, ஆபத்தி து³க்கடஸ்ஸ.

1036. அனாபத்தி அத்த²புரேக்கா²ராய, த⁴ம்மபுரேக்கா²ராய, அனுஸாஸனிபுரேக்கா²ராய, உம்மத்திகாய, ஆதி³கம்மிகாயாதி.

ததியஸிக்கா²பத³ம் நிட்டி²தம்.