4. சதுத்த²ஸிக்கா²பத³ம்

1037. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ ப்³ராஹ்மணோ பி⁴க்கு²னியோ நிமந்தேத்வா போ⁴ஜேஸி. பி⁴க்கு²னியோ பு⁴த்தாவீ [பு⁴த்தாவினீ (க.)] பவாரிதா ஞாதிகுலானி க³ந்த்வா ஏகச்சா பு⁴ஞ்ஜிம்ஸு ஏகச்சா பிண்ட³பாதம் ஆதா³ய அக³மம்ஸு. அத² கோ² ஸோ ப்³ராஹ்மணோ படிவிஸ்ஸகே ஏதத³வோச – ‘‘பி⁴க்கு²னியோ மயா அய்யா ஸந்தப்பிதா, ஏத² தும்ஹேபி ஸந்தப்பேஸ்ஸாமீ’’தி. தே ஏவமாஹம்ஸு – ‘‘கிம் த்வம், அய்யோ, அம்ஹே ஸந்தப்பேஸ்ஸஸி! யாபி தயா நிமந்திதா தாபி அம்ஹாகம் க⁴ரானி ஆக³ந்த்வா ஏகச்சா பு⁴ஞ்ஜிம்ஸு ஏகச்சா பிண்ட³பாதம் ஆதா³ய அக³மம்ஸூ’’தி. அத² கோ² ஸோ ப்³ராஹ்மணோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம பி⁴க்கு²னியோ அம்ஹாகம் க⁴ரே பு⁴ஞ்ஜித்வா அஞ்ஞத்ர பு⁴ஞ்ஜிஸ்ஸந்தி, ந சாஹம் படிப³லோ யாவத³த்த²ம் தா³து’’ந்தி! அஸ்ஸோஸும் கோ² பி⁴க்கு²னியோ தஸ்ஸ ப்³ராஹ்மணஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ பு⁴த்தாவீ [பு⁴த்தாவினீ (க.)] பவாரிதா அஞ்ஞத்ர பு⁴ஞ்ஜிஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ பு⁴த்தாவீ பவாரிதா அஞ்ஞத்ர பு⁴ஞ்ஜந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ பு⁴த்தாவீ பவாரிதா அஞ்ஞத்ர பு⁴ஞ்ஜிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1038. ‘‘யா பன பி⁴க்கு²னீ நிமந்திதா வா பவாரிதா வா கா²த³னீயம் வா போ⁴ஜனீயம் வா கா²தே³ய்ய வா பு⁴ஞ்ஜேய்ய வா, பாசித்திய’’ந்தி.

1039. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

நிமந்திதா நாம பஞ்சன்னம் போ⁴ஜனானம் அஞ்ஞதரேன போ⁴ஜனேன நிமந்திதா.

பவாரிதா நாம அஸனம் பஞ்ஞாயதி, போ⁴ஜனம் பஞ்ஞாயதி, ஹத்த²பாஸே டி²தா அபி⁴ஹரதி, படிக்கே²போ பஞ்ஞாயதி.

கா²த³னீயம் நாம பஞ்ச போ⁴ஜனானி – யாகு³ம் யாமகாலிகம் ஸத்தாஹகாலிகம் யாவஜீவிகம் ட²பேத்வா அவஸேஸம் கா²த³னீயம் நாம.

போ⁴ஜனீயம் நாம பஞ்ச போ⁴ஜனானி – ஓத³னோ, கும்மாஸோ, ஸத்து, மச்சோ², மம்ஸம்.

‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி பாசித்தியஸ்ஸ.

1040. நிமந்திதே நிமந்திதஸஞ்ஞா கா²த³னீயம் வா போ⁴ஜனீயம் வா கா²த³தி வா பு⁴ஞ்ஜதி வா, ஆபத்தி பாசித்தியஸ்ஸ. நிமந்திதே வேமதிகா கா²த³னீயம் வா போ⁴ஜனீயம் வா கா²த³தி வா பு⁴ஞ்ஜதி வா, ஆபத்தி பாசித்தியஸ்ஸ. நிமந்திதே அனிமந்திதஸஞ்ஞா கா²த³னீயம் வா போ⁴ஜனீயம் வா கா²த³தி வா பு⁴ஞ்ஜதி வா, ஆபத்தி பாசித்தியஸ்ஸ.

யாமகாலிகம் ஸத்தாஹகாலிகம் யாவஜீவிகம் ஆஹாரத்தா²ய படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸ…பே….

1041. அனாபத்தி நிமந்திதா அப்பவாரிதா, யாகு³ம் பிவதி, ஸாமிகே அபலோகேத்வா பு⁴ஞ்ஜதி, யாமகாலிகம் ஸத்தாஹகாலிகம் யாவஜீவிகம் ஸதி பச்சயே பரிபு⁴ஞ்ஜதி, உம்மத்திகாய, ஆதி³கம்மிகாயாதி.

சதுத்த²ஸிக்கா²பத³ம் நிட்டி²தம்.