2. து³தியஸிக்கா²பத³ம்

1028. தேன ஸமயேன பு³த்³தோ⁴ ப⁴க³வா வேஸாலியம் விஹரதி மஹாவனே கூடாகா³ரஸாலாயம். தேன கோ² பன ஸமயேன ஆயஸ்மதோ உபாலிஸ்ஸ உபஜ்ஜா²யோ ஆயஸ்மா கப்பிதகோ ஸுஸானே விஹரதி. தேன கோ² பன ஸமயேன ச²ப்³ப³க்³கி³யானம் பி⁴க்கு²னீனம் மஹத்தரா [மஹந்ததரா (ஸீ.)] பி⁴க்கு²னீ காலங்கதா ஹோதி. ச²ப்³ப³க்³கி³யா பி⁴க்கு²னியோ தம் பி⁴க்கு²னிம் நீஹரித்வா ஆயஸ்மதோ கப்பிதகஸ்ஸ விஹாரஸ்ஸ அவிதூ³ரே ஜா²பேத்வா தூ²பம் கத்வா க³ந்த்வா தஸ்மிம் தூ²பே ரோத³ந்தி. அத² கோ² ஆயஸ்மா கப்பிதகோ தேன ஸத்³தே³ன உப்³பா³ள்ஹோ தம் தூ²பம் பி⁴ந்தி³த்வா பகிரேஸி. ச²ப்³ப³க்³கி³யா பி⁴க்கு²னியோ – ‘‘இமினா கப்பிதகேன அம்ஹாகம் அய்யாய தூ²போ பி⁴ன்னோ, ஹந்த³ நம் கா⁴தேமா’’தி, மந்தேஸும். அஞ்ஞதரா பி⁴க்கு²னீ ஆயஸ்மதோ உபாலிஸ்ஸ ஏதமத்த²ம் ஆரோசேஸி. ஆயஸ்மா உபாலி ஆயஸ்மதோ கப்பிதகஸ்ஸ ஏதமத்த²ம் ஆரோசேஸி. அத² கோ² ஆயஸ்மா கப்பிதகோ விஹாரா நிக்க²மித்வா நிலீனோ அச்சி². அத² கோ² ச²ப்³ப³க்³கி³யா பி⁴க்கு²னியோ யேனாயஸ்மதோ கப்பிதகஸ்ஸ விஹாரோ தேனுபஸங்கமிம்ஸு; உபஸங்கமித்வா ஆயஸ்மதோ கப்பிதகஸ்ஸ விஹாரம் பாஸாணேஹி ச லேட்³டூ³ஹி ச ஓத்த²ராபேத்வா, ‘‘மதோ கப்பிதகோ’’தி பக்கமிம்ஸு.

அத² கோ² ஆயஸ்மா கப்பிதகோ தஸ்ஸா ரத்தியா அச்சயேன புப்³ப³ண்ஹஸமயம் நிவாஸேத்வா பத்தசீவரமாதா³ய வேஸாலிம் பிண்டா³ய பாவிஸி. அத்³த³ஸம்ஸு கோ² ச²ப்³ப³க்³கி³யா பி⁴க்கு²னியோ ஆயஸ்மந்தம் கப்பிதகம் பிண்டா³ய சரந்தம். தி³ஸ்வான ஏவமாஹம்ஸு – ‘‘அயம் கப்பிதகோ ஜீவதி, கோ நு கோ² அம்ஹாகம் மந்தம் ஸம்ஹரீ’’தி? அஸ்ஸோஸும் கோ² ச²ப்³ப³க்³கி³யா பி⁴க்கு²னியோ – ‘‘அய்யேன கிர உபாலினா அம்ஹாகம் மந்தோ ஸம்ஹடோ’’தி. தா ஆயஸ்மந்தம் உபாலிம் அக்கோஸிம்ஸு – ‘‘கத²ஞ்ஹி நாம அயம் காஸாவடோ மலமஜ்ஜனோ நிஹீனஜச்சோ அம்ஹாகம் மந்தம் ஸம்ஹரிஸ்ஸதீ’’தி! யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ அய்யம் உபாலிம் அக்கோஸிஸ்ஸந்தீ’’தி…பே… ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கு²னியோ உபாலிம் அக்கோஸந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ உபாலிம் அக்கோஸிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1029. ‘‘யா பன பி⁴க்கு²னீ பி⁴க்கு²ம் அக்கோஸேய்ய வா பரிபா⁴ஸேய்ய வா, பாசித்திய’’ந்தி.

1030. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

பி⁴க்கு²ந்தி உபஸம்பன்னம். அக்கோஸேய்ய வாதி த³ஸஹி வா அக்கோஸவத்தூ²ஹி அக்கோஸதி ஏதேஸம் வா அஞ்ஞதரேன, ஆபத்தி பாசித்தியஸ்ஸ.

பரிபா⁴ஸேய்ய வாதி ப⁴யம் உபத³ம்ஸேதி, ஆபத்தி பாசித்தியஸ்ஸ.

1031. உபஸம்பன்னே உபஸம்பன்னஸஞ்ஞா அக்கோஸதி வா பரிபா⁴ஸதி வா, ஆபத்தி பாசித்தியஸ்ஸ. உபஸம்பன்னே வேமதிகா அக்கோஸதி வா பரிபா⁴ஸதி வா, ஆபத்தி பாசித்தியஸ்ஸ. உபஸம்பன்னே அனுபஸம்பன்னஸஞ்ஞா அக்கோஸதி வா பரிபா⁴ஸதி வா, ஆபத்தி பாசித்தியஸ்ஸ.

அனுபஸம்பன்னம் அக்கோஸதி வா பரிபா⁴ஸதி வா, ஆபத்தி து³க்கடஸ்ஸ. அனுபஸம்பன்னே உபஸம்பன்னஸஞ்ஞா, ஆபத்தி து³க்கடஸ்ஸ. அனுபஸம்பன்னே வேமதிகா, ஆபத்தி து³க்கடஸ்ஸ. அனுபஸம்பன்னே அனுபஸம்பன்னஸஞ்ஞா, ஆபத்தி து³க்கடஸ்ஸ.

1032. அனாபத்தி அத்த²புரேக்கா²ராய, த⁴ம்மபுரேக்கா²ராய, அனுஸாஸனிபுரேக்கா²ராய, உம்மத்திகாய, ஆதி³கம்மிகாயாதி.

து³தியஸிக்கா²பத³ம் நிட்டி²தம்.