6. ச²ட்ட²ஸிக்கா²பத³ம்

999. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ நடானம்பி நடகானம்பி லங்க⁴கானம்பி ஸோகஜ்ஜா²யிகானம்பி கும்ப⁴தூ²ணிகானம்பி ஸஹத்தா² கா²த³னீயம் போ⁴ஜனீயம் தே³தி – ‘‘மய்ஹம் பரிஸதி வண்ணம் பா⁴ஸதா²’’தி. நடாபி நடகாபி லங்க⁴காபி ஸோகஜ்ஜா²யிகாபி கும்ப⁴தூ²ணிகாபி து²ல்லனந்தா³ய பி⁴க்கு²னியா பரிஸதி வண்ணம் பா⁴ஸந்தி – ‘‘அய்யா து²ல்லனந்தா³ ப³ஹுஸ்ஸுதா பா⁴ணிகா விஸாரதா³ பட்டா த⁴ம்மிம் கத²ம் காதும்; தே³த² அய்யாய, கரோத² அய்யாயா’’தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – கத²ஞ்ஹி நாம அய்யா து²ல்லனந்தா³ அகா³ரிகஸ்ஸ ஸஹத்தா² கா²த³னீயம் போ⁴ஜனீயம் த³ஸ்ஸதீதி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ அகா³ரிகஸ்ஸ ஸஹத்தா² கா²த³னீயம் போ⁴ஜனீயம் தே³தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ அகா³ரிகஸ்ஸ ஸஹத்தா² கா²த³னீயம் போ⁴ஜனீயம் த³ஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1000. ‘‘யா பன பி⁴க்கு²னீ அகா³ரிகஸ்ஸ வா பரிப்³பா³ஜகஸ்ஸ வா பரிப்³பா³ஜிகாய வா ஸஹத்தா² கா²த³னீயம் வா போ⁴ஜனீயம் வா த³தே³ய்ய, பாசித்திய’’ந்தி.

1001. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அகா³ரிகோ நாம யோ கோசி அகா³ரம் அஜ்ஜா²வஸதி.

பரிப்³பா³ஜகோ நாம பி⁴க்கு²ஞ்ச ஸாமணேரஞ்ச ட²பேத்வா யோ கோசி பரிப்³பா³ஜகஸமாபன்னோ.

பரிப்³பா³ஜிகா நாம பி⁴க்கு²னிஞ்ச ஸிக்க²மானஞ்ச ஸாமணேரிஞ்ச ட²பேத்வா யா காசி பரிப்³பா³ஜிகஸமாபன்னா.

கா²த³னீயம் நாம பஞ்ச போ⁴ஜனானி – உத³கத³ந்தபோனம் ட²பேத்வா அவஸேஸம் கா²த³னீயம் நாம.

போ⁴ஜனீயம் நாம பஞ்ச போ⁴ஜனானி – ஓத³னோ, கும்மாஸோ, ஸத்து, மச்சோ², மம்ஸம்.

த³தே³ய்யாதி காயேன வா காயபடிப³த்³தே⁴ன வா நிஸ்ஸக்³கி³யேன வா தே³தி, ஆபத்தி பாசித்தியஸ்ஸ. உத³கத³ந்தபோனம் தே³தி, ஆபத்தி து³க்கடஸ்ஸ.

1002. அனாபத்தி தா³பேதி ந தே³தி, உபனிக்கி²பித்வா தே³தி, பா³ஹிராலேபம் தே³தி, உம்மத்திகாய, ஆதி³கம்மிகாயாதி.

ச²ட்ட²ஸிக்கா²பத³ம் நிட்டி²தம்.