7. ஸத்தமஸிக்கா²பத³ம்

1003. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ ஆவஸத²சீவரம் அனிஸ்ஸஜ்ஜித்வா பரிபு⁴ஞ்ஜதி. அஞ்ஞா உதுனியோ பி⁴க்கு²னியோ ந லப⁴ந்தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ ஆவஸத²சீவரம் அனிஸ்ஸஜ்ஜித்வா பரிபு⁴ஞ்ஜிஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ ஆவஸத²சீவரம் அனிஸ்ஸஜ்ஜித்வா பரிபு⁴ஞ்ஜதீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ஆவஸத²சீவரம் அனிஸ்ஸஜ்ஜித்வா பரிபு⁴ஞ்ஜிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1004. ‘‘யா பன பி⁴க்கு²னீ ஆவஸத²சீவரம் அனிஸ்ஸஜ்ஜித்வா பரிபு⁴ஞ்ஜேய்ய, பாசித்திய’’ந்தி.

1005. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஆவஸத²சீவரம் நாம ‘‘உதுனியோ பி⁴க்கு²னியோ பரிபு⁴ஞ்ஜந்தூ’’தி தி³ன்னம் ஹோதி.

அனிஸ்ஸஜ்ஜித்வா பரிபு⁴ஞ்ஜேய்யாதி த்³வேதிஸ்ஸோ ரத்தியோ பரிபு⁴ஞ்ஜித்வா சதுத்த²தி³வஸே தோ⁴வித்வா பி⁴க்கு²னியா வா ஸிக்க²மானாய வா ஸாமணேரியா வா அனிஸ்ஸஜ்ஜித்வா பரிபு⁴ஞ்ஜதி, ஆபத்தி பாசித்தியஸ்ஸ.

1006. அனிஸ்ஸஜ்ஜிதே அனிஸ்ஸஜ்ஜிதஸஞ்ஞா பரிபு⁴ஞ்ஜதி, ஆபத்தி பாசித்தியஸ்ஸ. அனிஸ்ஸஜ்ஜிதே வேமதிகா பரிபு⁴ஞ்ஜதி, ஆபத்தி பாசித்தியஸ்ஸ. அனிஸ்ஸஜ்ஜிதே நிஸ்ஸஜ்ஜிதஸஞ்ஞா பரிபு⁴ஞ்ஜதி, ஆபத்தி பாசித்தியஸ்ஸ.

நிஸ்ஸஜ்ஜிதே அனிஸ்ஸஜ்ஜிதஸஞ்ஞா, ஆபத்தி து³க்கடஸ்ஸ. நிஸ்ஸஜ்ஜிதே வேமதிகா, ஆபத்தி து³க்கடஸ்ஸ. நிஸ்ஸஜ்ஜிதே நிஸ்ஸஜ்ஜிதஸஞ்ஞா அனாபத்தி.

1007. அனாபத்தி நிஸ்ஸஜ்ஜித்வா பரிபு⁴ஞ்ஜதி, புன பரியாயேன பரிபு⁴ஞ்ஜதி, அஞ்ஞா உதுனியோ பி⁴க்கு²னியோ ந ஹோந்தி, அச்சி²ன்னசீவரிகாய, நட்ட²சீவரிகாய, ஆபதா³ஸு, உம்மத்திகாய, ஆதி³கம்மிகாயாதி.

ஸத்தமஸிக்கா²பத³ம் நிட்டி²தம்.