3. ததியஸிக்கா²பத³ம்

986. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ ஸுத்தம் கந்தந்தி. மனுஸ்ஸா விஹாரசாரிகம் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ ஸுத்தம் கந்திஸ்ஸந்தி, ஸேய்யதா²பி கி³ஹினியோ காமபோ⁴கி³னியோ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா² …பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ ஸுத்தம் கந்திஸ்ஸந்தீ’’தி…பே… ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கு²னியோ ஸுத்தம் கந்தந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ ஸுத்தம் கந்திஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

987. ‘‘யா பன பி⁴க்கு²னீ ஸுத்தம் கந்தேய்ய, பாசித்திய’’ந்தி.

988. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஸுத்தம் நாம ச² ஸுத்தானி – கோ²மம், கப்பாஸிகம், கோஸேய்யம், கம்ப³லம், ஸாணம், ப⁴ங்க³ம்.

கந்தேய்யாதி ஸயம் கந்ததி, பயோகே³ து³க்கடம். உஜ்ஜவுஜ்ஜவே ஆபத்தி பாசித்தியஸ்ஸ.

989. அனாபத்தி கந்திதஸுத்தம் கந்ததி, உம்மத்திகாய, ஆதி³கம்மிகாயாதி.

ததியஸிக்கா²பத³ம் நிட்டி²தம்.