4. சதுத்த²ஸிக்கா²பத³ம்

990. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ கி³ஹிவேய்யாவச்சம் கரோந்தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ கி³ஹிவேய்யாவச்சம் கரிஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ கி³ஹிவேய்யாவச்சம் கரோந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ கி³ஹிவேய்யாவச்சம் கரிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

991. ‘‘யா பன பி⁴க்கு²னீ கி³ஹிவேய்யாவச்சம் கரேய்ய, பாசித்திய’’ந்தி.

992. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

கி³ஹிவேய்யாவச்சம் நாம அகா³ரிகஸ்ஸ யாகு³ம் வா ப⁴த்தம் வா கா²த³னீயம் வா பசதி, ஸாடகம் வா வேட²னம் வா தோ⁴வதி, ஆபத்தி பாசித்தியஸ்ஸ.

993. அனாபத்தி யாகு³பானே, ஸங்க⁴ப⁴த்தே, சேதியபூஜாய, அத்தனோ வேய்யாவச்சகரஸ்ஸ யாகு³ம் வா ப⁴த்தம் வா கா²த³னீயம் வா பசதி, ஸாடகம் வா வேட²னம் வா தோ⁴வதி, உம்மத்திகாய, ஆதி³கம்மிகாயாதி.

சதுத்த²ஸிக்கா²பத³ம் நிட்டி²தம்.