2. து³தியஸிக்கா²பத³ம்

982. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ ஆஸந்தி³ம்பி பல்லங்கம்பி பரிபு⁴ஞ்ஜந்தி. மனுஸ்ஸா விஹாரசாரிகம் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ ஆஸந்தி³ம்பி பல்லங்கம்பி பரிபு⁴ஞ்ஜிஸ்ஸந்தி, ஸேய்யதா²பி கி³ஹினியோ காமபோ⁴கி³னியோ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ ஆஸந்தி³ம்பி பல்லங்கம்பி பரிபு⁴ஞ்ஜிஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ ஆஸந்தி³ம்பி பல்லங்கம்பி பரிபு⁴ஞ்ஜந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ ஆஸந்தி³ம்பி பல்லங்கம்பி பரிபு⁴ஞ்ஜிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

983. ‘‘யா பன பி⁴க்கு²னீ ஆஸந்தி³ம் வா பல்லங்கம் வா பரிபு⁴ஞ்ஜேய்ய, பாசித்திய’’ந்தி.

984. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ஆஸந்தீ³ நாம அதிக்கந்தப்பமாணா வுச்சதி.

பல்லங்கோ நாம ஆஹரிமேஹி [‘‘அஸம்ஹாரிமேஹி’’ இதி கங்கா²விதரணியா ஸமேதி] வாளேஹி கதோ ஹோதி.

பரிபு⁴ஞ்ஜேய்யாதி தஸ்மிம் அபி⁴னிஸீத³தி வா அபி⁴னிபஜ்ஜதி வா, ஆபத்தி பாசித்தியஸ்ஸ.

985. அனாபத்தி ஆஸந்தி³யா பாதே³ சி²ந்தி³த்வா பரிபு⁴ஞ்ஜதி, பல்லங்கஸ்ஸ வாளே பி⁴ந்தி³த்வா பரிபு⁴ஞ்ஜதி, உம்மத்திகாய, ஆதி³கம்மிகாயாதி.

து³தியஸிக்கா²பத³ம் நிட்டி²தம்.