1. பட²மஸிக்கா²பத³ம்

977. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ரஞ்ஞோ பஸேனதி³ஸ்ஸ கோஸலஸ்ஸ உய்யானே சித்தாகா³ரே படிபா⁴னசித்தம் கதம் ஹோதி. ப³ஹூ மனுஸ்ஸா சித்தாகா³ரம் த³ஸ்ஸனாய க³ச்ச²ந்தி. ச²ப்³ப³க்³கி³யாபி பி⁴க்கு²னியோ சித்தாகா³ரம் த³ஸ்ஸனாய அக³மம்ஸு. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ சித்தாகா³ரம் த³ஸ்ஸனாய க³ச்சி²ஸ்ஸந்தி, ஸேய்யதா²பி கி³ஹினியோ காமபோ⁴கி³னியோ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ சித்தாகா³ரம் த³ஸ்ஸனாய க³ச்சி²ஸ்ஸந்தீ’’தி…பே… ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கு²னியோ சித்தாகா³ரம் த³ஸ்ஸனாய க³ச்ச²ந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ சித்தாகா³ரம் த³ஸ்ஸனாய க³ச்சி²ஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

978. ‘‘யா பன பி⁴க்கு²னீ ராஜாகா³ரம் வா சித்தாகா³ரம் வா ஆராமம் வா உய்யானம் வா போக்க²ரணிம் வா த³ஸ்ஸனாய க³ச்சே²ய்ய, பாசித்திய’’ந்தி.

979. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

ராஜாகா³ரம் நாம யத்த² கத்த²சி ரஞ்ஞோ கீளிதும் ரமிதும் கதம் ஹோதி.

சித்தாகா³ரம் நாம யத்த² கத்த²சி மனுஸ்ஸானம் கீளிதும் ரமிதும் கதம் ஹோதி.

ஆராமோ நாம யத்த² கத்த²சி மனுஸ்ஸானம் கீளிதும் ரமிதும் கதோ ஹோதி.

உய்யானம் நாம யத்த² கத்த²சி மனுஸ்ஸானம் கீளிதும் ரமிதும் கதம் ஹோதி.

போக்க²ரணீ நாம யத்த² கத்த²சி மனுஸ்ஸானம் கீளிதும் ரமிதும் கதா ஹோதி.

980. த³ஸ்ஸனாய க³ச்ச²தி, ஆபத்தி து³க்கடஸ்ஸ. யத்த² டி²தா பஸ்ஸதி, ஆபத்தி பாசித்தியஸ்ஸ. த³ஸ்ஸனூபசாரம் விஜஹித்வா புனப்புனம் பஸ்ஸதி, ஆபத்தி பாசித்தியஸ்ஸ. ஏகமேகம் த³ஸ்ஸனாய க³ச்ச²தி, ஆபத்தி து³க்கடஸ்ஸ. யத்த² டி²தா பஸ்ஸதி, ஆபத்தி பசித்தியஸ்ஸ. த³ஸ்ஸனூபசாரம் விஜஹித்வா புனப்புனம் பஸ்ஸதி, ஆபத்தி பாசித்தியஸ்ஸ.

981. அனாபத்தி ஆராமே டி²தா பஸ்ஸதி, க³ச்ச²ந்தீ வா ஆக³ச்ச²ந்தீ வா பஸ்ஸதி, ஸதி கரணீயே க³ந்த்வா பஸ்ஸதி, ஆபதா³ஸு, உம்மத்திகாய, ஆதி³கம்மிகாயாதி.

பட²மஸிக்கா²பத³ம் நிட்டி²தம்.