9. நவமஸிக்கா²பத³ம்

969. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன பி⁴க்கு²னியோ அந்தோவஸ்ஸம் சாரிகம் சரந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ அந்தோவஸ்ஸம் சாரிகம் சரிஸ்ஸந்தி ஹரிதானி திணானி ச ஸம்மத்³த³ந்தா, ஏகிந்த்³ரியம் ஜீவம் விஹேடே²ந்தா, ப³ஹூ கு²த்³த³கே பாணே ஸங்கா⁴தம் ஆபாதே³ந்தா’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ அந்தோவஸ்ஸம் சாரிகம் சரிஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ அந்தோவஸ்ஸம் சாரிகம் சரந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ அந்தோவஸ்ஸம் சாரிகம் சரிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

970. ‘‘யா பன பி⁴க்கு²னீ அந்தோவஸ்ஸம் சாரிகம் சரேய்ய, பாசித்திய’’ந்தி.

971. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அந்தோவஸ்ஸந்தி புரிமம் வா தேமாஸம் பச்சி²மம் வா தேமாஸம் அவஸித்வா.

சாரிகம் சரேய்யாதி குக்குடஸம்பாதே கா³மே கா³மந்தரே கா³மந்தரே ஆபத்தி பாசித்தியஸ்ஸ. அகா³மகே அரஞ்ஞே அத்³த⁴யோஜனே அத்³த⁴யோஜனே ஆபத்தி பாசித்தியஸ்ஸ.

972. அனாபத்தி ஸத்தாஹகரணீயேன க³ச்ச²தி, கேனசி உப்³பா³ள்ஹா க³ச்ச²தி, ஆபதா³ஸு, உம்மத்திகாய, ஆதி³கம்மிகாயாதி.

நவமஸிக்கா²பத³ம் நிட்டி²தம்.