10. த³ஸமஸிக்கா²பத³ம்

973. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன பி⁴க்கு²னியோ தத்தே²வ ராஜக³ஹே வஸ்ஸம் வஸந்தி, தத்த² ஹேமந்தம், தத்த² கி³ம்ஹம். மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘ஆஹுந்த³ரிகா பி⁴க்கு²னீனம் தி³ஸா அந்த⁴காரா, ந இமாஸம் தி³ஸா பக்கா²யந்தீ’’தி. அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். அத² கோ² தா பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, பி⁴க்கு²னீனம் ஸிக்கா²பத³ம் பஞ்ஞபேஸ்ஸாமி த³ஸ அத்த²வஸே படிச்ச – ஸங்க⁴ஸுட்டு²தாய…பே… ஸத்³த⁴ம்மட்டி²தியா வினயானுக்³க³ஹாய. ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

974. ‘‘யா பன பி⁴க்கு²னீ வஸ்ஸம்வுட்டா² சாரிகம் ந பக்கமேய்ய அந்தமஸோ ச²ப்பஞ்சயோஜனானிபி, பாசித்திய’’ந்தி.

975. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

வஸ்ஸம்வுட்டா² நாம புரிமம் வா தேமாஸம் பச்சி²மம் வா தேமாஸம் வுட்டா².

‘‘சாரிகம் ந பக்கமிஸ்ஸாமி அந்தமஸோ ச²ப்பஞ்சயோஜனானிபீ’’தி து⁴ரம் நிக்கி²த்தமத்தே ஆபத்தி பாசித்தியஸ்ஸ.

976. அனாபத்தி ஸதி அந்தராயே, பரியேஸித்வா து³தியிகம் பி⁴க்கு²னிம் ந லப⁴தி, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.

த³ஸமஸிக்கா²பத³ம் நிட்டி²தம்.

துவட்டவக்³கோ³ சதுத்தோ².