8. அட்ட²மஸிக்கா²பத³ம்

965. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ திரோரட்டே² ஸாஸங்கஸம்மதே ஸப்படிப⁴யே அஸத்தி²கா சாரிகம் சரந்தி. து⁴த்தா தூ³ஸேந்தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ திரோரட்டே² ஸாஸங்கஸம்மதே ஸப்படிப⁴யே அஸத்தி²கா சாரிகம் சரிஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ திரோரட்டே² ஸாஸங்கஸம்மதே ஸப்படிப⁴யே அஸத்தி²கா சாரிகம் சரந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ திரோரட்டே² ஸாஸங்கஸம்மதே ஸப்படிப⁴யே அஸத்தி²கா சாரிகம் சரிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

966. ‘‘யா பன பி⁴க்கு²னீ திரோரட்டே² ஸாஸங்கஸம்மதே ஸப்படிப⁴யே அஸத்தி²கா சாரிகம் சரேய்ய, பாசத்திய’’ந்தி.

967. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

திரோரட்டே²தி யஸ்ஸ விஜிதே விஹரதி, தம் ட²பேத்வா அஞ்ஞஸ்ஸ ரட்டே².

ஸாஸங்கம் நாம தஸ்மிம் மக்³கே³ சோரானம் நிவிட்டோ²காஸோ தி³ஸ்ஸதி, பு⁴த்தோகாஸோ தி³ஸ்ஸதி, டி²தோகாஸோ தி³ஸ்ஸதி, நிஸின்னோகாஸோ தி³ஸ்ஸதி, நிபன்னோகாஸோ தி³ஸ்ஸதி.

ஸப்படிப⁴யம் நாம தஸ்மிம் மக்³கே³ சோரேஹி மனுஸ்ஸா ஹதா தி³ஸ்ஸந்தி, விலுத்தா தி³ஸ்ஸந்தி, ஆகோடிதா தி³ஸ்ஸந்தி.

அஸத்தி²கா நாம வினா ஸத்தே²ன.

சாரிகம் சரேய்யாதி குக்குடஸம்பாதே கா³மே கா³மந்தரே கா³மந்தரே, ஆபத்தி பாசித்தியஸ்ஸ. அகா³மகே அரஞ்ஞே அத்³த⁴யோஜனே அத்³த⁴யோஜனே ஆபத்தி பாசித்தியஸ்ஸ.

968. அனாபத்தி ஸத்தே²ன ஸஹ க³ச்ச²தி, கே²மே அப்படிப⁴யே க³ச்ச²தி, ஆபதா³ஸு, உம்மத்திகாய, ஆதி³கம்மிகாயாதி.

அட்ட²மஸிக்கா²பத³ம் நிட்டி²தம்.