3. ததியஸிக்கா²பத³ம்

941. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ ப³ஹுஸ்ஸுதா ஹோதி பா⁴ணிகா விஸாரதா³ பட்டா த⁴ம்மிம் கத²ம் காதும். ப⁴த்³தா³பி காபிலானீ ப³ஹுஸ்ஸுதா ஹோதி பா⁴ணிகா விஸாரதா³ பட்டா த⁴ம்மிம் கத²ம் காதும் உளாரஸம்பா⁴விதா. மனுஸ்ஸா – ‘‘அய்யா ப⁴த்³தா³ காபிலானீ ப³ஹுஸ்ஸுதா பா⁴ணிகா விஸாரதா³ பட்டா த⁴ம்மிம் கத²ம் காதும் உளாரஸம்பா⁴விதா’’தி ப⁴த்³த³ம் காபிலானிம் பட²மம் பயிருபாஸித்வா, பச்சா² து²ல்லனந்த³ம் பி⁴க்கு²னிம் பயிருபாஸந்தி. து²ல்லனந்தா³ பி⁴க்கு²னீ இஸ்ஸாபகதா – ‘‘இமா கிர அப்பிச்சா² ஸந்துட்டா² பவிவித்தா அஸம்ஸட்டா² யா இமா ஸஞ்ஞத்திப³ஹுலா விஞ்ஞத்திப³ஹுலா விஹரந்தீ’’தி ப⁴த்³தா³ய காபிலானியா புரதோ சங்கமதிபி திட்ட²திபி நிஸீத³திபி ஸேய்யம்பி கப்பேதி உத்³தி³ஸதிபி உத்³தி³ஸாபேதிபி ஸஜ்ஜா²யம்பி கரோதி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ அய்யாய ப⁴த்³தா³ய காபிலானியா ஸஞ்சிச்ச அபா²ஸும் கரிஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ ப⁴த்³தா³ய காபிலானியா ஸஞ்சிச்ச அபா²ஸும் கரோதீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ப⁴த்³தா³ய காபிலானியா ஸஞ்சிச்ச அபா²ஸும் கரிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

942. ‘‘யா பன பி⁴க்கு²னீ பி⁴க்கு²னியா ஸஞ்சிச்ச அபா²ஸும் கரேய்ய, பாசித்திய’’ந்தி.

943. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

பி⁴க்கு²னியாதி அஞ்ஞாய பி⁴க்கு²னியா.

ஸஞ்சிச்சாதி ஜானந்தீ ஸஞ்ஜானந்தீ சேச்ச அபி⁴விதரித்வா வீதிக்கமோ.

அபா²ஸும் கரேய்யாதி – ‘‘இமினா இமிஸ்ஸா அபா²ஸு ப⁴விஸ்ஸதீ’’தி அனாபுச்சா² புரதோ சங்கமதி வா திட்ட²தி வா நிஸீத³தி வா ஸேய்யம் வா கப்பேதி உத்³தி³ஸதி வா உத்³தி³ஸாபேதி வா ஸஜ்ஜா²யம் வா கரோதி, ஆபத்தி பாசித்தியஸ்ஸ.

944. உபஸம்பன்னாய உபஸம்பன்னஸஞ்ஞா ஸஞ்சிச்ச அபா²ஸும் கரோதி, ஆபத்தி பாசித்தியஸ்ஸ. உபஸம்பன்னாய வேமதிகா ஸஞ்சிச்ச அபா²ஸும் கரோதி, ஆபத்தி பாசித்தியஸ்ஸ. உபஸம்பன்னாய அனுபஸம்பன்னஸஞ்ஞா ஸஞ்சிச்ச அபா²ஸும் கரோதி, ஆபத்தி பாசித்தியஸ்ஸ.

அனுபஸம்பன்னாய ஸஞ்சிச்ச அபா²ஸும் கரோதி, ஆபத்தி து³க்கடஸ்ஸ. அனுபஸம்பன்னாய உபஸம்பன்னஸஞ்ஞா, ஆபத்தி து³க்கடஸ்ஸ. அனுபஸம்பன்னாய வேமதிகா, ஆபத்தி து³க்கடஸ்ஸ. அனுபஸம்பன்னாய அனுபஸம்பன்னஸஞ்ஞா, ஆபத்தி து³க்கடஸ்ஸ.

945. அனாபத்தி ந அபா²ஸும் கத்துகாமா ஆபுச்சா² புரதோ சங்கமதி வா திட்ட²தி வா நிஸீத³தி வா ஸேய்யம் வா கப்பேதி உத்³தி³ஸதி வா உத்³தி³ஸாபேதி வா ஸஜ்ஜா²யம் வா கரோதி, உம்மத்திகாய, ஆதி³கம்மிகாயாதி.

ததியஸிக்கா²பத³ம் நிட்டி²தம்.