4. சதுத்த²ஸிக்கா²பத³ம்

946. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ து³க்கி²தம் ஸஹஜீவினிம் நேவ உபட்டே²தி ந உபட்டா²பனாய உஸ்ஸுக்கம் கரோதி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ து³க்கி²தம் ஸஹஜீவினிம் நேவ உபட்டே²ஸ்ஸதி ந உபட்டா²பனாய உஸ்ஸுக்கம் கரிஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ து³க்கி²தம் ஸஹஜீவினிம் நேவ உபட்டே²தி ந உபட்டா²பனாய உஸ்ஸுக்கம் கரோதீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ து³க்கி²தம் ஸஹஜீவினிம் நேவ உபட்டே²ஸ்ஸதி ந உபட்டா²பனாய உஸ்ஸுக்கம் கரிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

947. ‘‘யா பன பி⁴க்கு²னீ து³க்கி²தம் ஸஹஜீவினிம் நேவ உபட்டே²ய்ய ந உபட்டா²பனாய உஸ்ஸுக்கம் கரேய்ய, பாசித்திய’’ந்தி.

948. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

து³க்கி²தா நாம கி³லானா வுச்சதி.

ஸஹஜீவினீ நாம ஸத்³தி⁴விஹாரினீ வுச்சதி.

நேவ உபட்டே²ய்யாதி ந ஸயம் உபட்டே²ய்ய.

ந உபட்டா²பனாய உஸ்ஸுக்கம் கரேய்யாதி ந அஞ்ஞம் ஆணாபேய்ய.

‘‘நேவ உபட்டே²ஸ்ஸாமி, ந உபட்டா²பனாய உஸ்ஸுக்கம் கரிஸ்ஸாமீ’’தி து⁴ரம் நிக்கி²த்தமத்தே ஆபத்தி பாசித்தியஸ்ஸ. அந்தேவாஸினிம் வா அனுபஸம்பன்னம் வா நேவ உபட்டே²தி, ந உபட்டா²பனாய உஸ்ஸுக்கம் கரோதி, ஆபத்தி து³க்கடஸ்ஸ.

949. அனாபத்தி ஸதி அந்தராயே, பரியேஸித்வா ந லப⁴தி, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.

சதுத்த²ஸிக்கா²பத³ம் நிட்டி²தம்.